“ວັນທີ 13-19 ເດືອນເມສາ. ໂມໄຊຢາ 1–3: ‘ເຕັມໄປດ້ວຍຄວາມຮັກຕໍ່ພຣະເຈົ້າ ແລະ ມະນຸດທັງປວງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 13-19 ເດືອນເມສາ. ໂມໄຊຢາ 1–3,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
ມິເນີວາ ເຄ ໄທເກີດ (1888–1976), King Benjamin’s Farewell Address [ຄຳປາໄສອຳລາຂອງກະສັດເບັນຢາມິນ], 1935, ສີນ້ຳມັນ ເທິງແຜ່ນໄມ້ອັດ, 36 x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ
ວັນທີ 13–19 ເດືອນເມສາ
ໂມໄຊຢາ 1–3
“ເຕັມໄປດ້ວຍຄວາມຮັກຕໍ່ພຣະເຈົ້າ ແລະ ມະນຸດທັງປວງ”
ກະສັດເບັນຢາມິນໃຫ້ເຫດຜົນຢ່າງໜຶ່ງ ເພື່ອບັນທຶກຄວາມປະທັບໃຈທາງວິນຍານຂອງເຮົາ ນັ້ນຄື “ມັນເປັນໄປບໍ່ໄດ້ທີ່ລີໄຮບັນພະບຸລຸດຂອງພວກເຮົາຈະຈື່ຈຳເລື່ອງເຫລົ່ານີ້ໄດ້ທັງໝົດ ເພື່ອສິດສອນລູກຫລານຂອງເພິ່ນນອກຈາກຈະເປັນໄປໂດຍຄວາມຊ່ວຍເຫລືອຈາກແຜ່ນຈາລຶກເຫລົ່ານີ້” (ໂມໄຊຢາ 1:4).
ບັນທຶກຄວາມປະທັບໃຈຂອງທ່ານ
ເມື່ອທ່ານໄດ້ຍິນຄຳວ່າ ກະສັດ, ທ່ານອາດຄິດກ່ຽວກັບມົງກຸດ, ຫໍປາສາດ, ຜູ້ຮັບໃຊ້, ແລະ ບັນລັງ. ໃນ ໂມໄຊຢາ 1–3, ທ່ານຈະອ່ານກ່ຽວກັບກະສັດທີ່ແຕກຕ່າງຈາກກະສັດອື່ນ. ແທນທີ່ຈະໃຊ້ຊີວິດຈາກແຮງງານຂອງຜູ້ຄົນຂອງເພິ່ນ, ກະສັດເບັນຢາມິນ “ໄດ້ເຮັດວຽກງານດ້ວຍມື [ຂອງເພິ່ນ] ເອງ” (ໂມໄຊຢາ 2:14). ແທນທີ່ຈະໃຫ້ຄົນອື່ນຮັບໃຊ້ເພິ່ນ, ເພິ່ນໄດ້ຮັບໃຊ້ຜູ້ຄົນຂອງເພິ່ນ “ດ້ວຍສຸດພະລັງ, ຄວາມນຶກຄິດ, ແລະ ກຳລັງ ຊຶ່ງພຣະຜູ້ເປັນເຈົ້າໄດ້ປະທານໃຫ້ [ເພິ່ນ]” (ໂມໄຊຢາ 2:11). ກະສັດອົງນີ້ບໍ່ຢາກໃຫ້ຜູ້ຄົນຂອງເພິ່ນນະມັດສະການເພິ່ນ; ແຕ່ເພິ່ນໄດ້ສິດສອນພວກເຂົາໃຫ້ນະມັດສະການອົງກະສັດທີ່ຍິ່ງໃຫຍ່ກວ່າເພິ່ນ, ເພາະເພິ່ນເຂົ້າໃຈວ່າ ນັ້ນຄື “ພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່” (ໂມໄຊຢາ 3:5). ຄືກັນກັບຜູ້ນຳທີ່ຍິ່ງໃຫຍ່ທັງໝົດ ຢູ່ໃນອານາຈັກຂອງພຣະເຈົ້າ, ຖ້ອຍຄຳ ແລະ ຕົວຢ່າງຂອງກະສັດເບັນຢາມິນ ຊີ້ບອກເຮົາເຖິງອົງກະສັດແຫ່ງສະຫວັນ, ຄືພຣະຜູ້ຊ່ວຍໃຫ້ລອດ, ພຣະເຢຊູຄຣິດ. ກະສັດເບັນຢາມິນໄດ້ເປັນພະຍານວ່າ ພຣະເຢຊູໄດ້ສະເດັດ “ມາຈາກສະຫວັນ” ແລະ ໄດ້ສະເດັດ “ອອກໄປໃນບັນດາມະນຸດ ແລະ ເຮັດສິ່ງມະຫັດສະຈັນ. … ແລະ ແລ້ວພຣະອົງຈະສະເດັດໄປຫາຜູ້ຄົນຂອງພຣະອົງເພື່ອ ຄວາມລອດຈະໄດ້ມາເຖິງລູກຫລານມະນຸດ ເຖິງແມ່ນໂດຍທາງ ສັດທາໃນພຣະນາມຂອງພຣະອົງ” (ໂມໄຊຢາ 3:5, 9).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ການຮັບເອົາພຣະຄຳຂອງພຣະເຈົ້າຮຽກຮ້ອງການກະກຽມ.
ເມື່ອກະສັດເບັນຢາມິນໄດ້ສົ່ງຂໍ້ຄວາມອອກໄປວ່າ ເພິ່ນຢາກກ່າວກັບຜູ້ຄົນຂອງເພິ່ນ, ຜູ້ຄົນຢ່າງຫລວງຫລາຍໄດ້ມາ “ຈົນວ່ານັບບໍ່ຖ້ວນ” (ໂມໄຊຢາ 2:2). ພວກເຂົາໄດ້ມາ, ຢ່າງໜຶ່ງ, ເພາະຄວາມຮູ້ບຸນຄຸນ ແລະ ຄວາມຮັກທີ່ພວກເຂົາມີຕໍ່ຜູ້ນຳຂອງພວກເຂົາ. ແຕ່ສິ່ງທີ່ສຳຄັນກວ່ານັ້ນແມ່ນ, ພວກເຂົາໄດ້ມາເພື່ອຮັບການສິດສອນໂດຍພຣະຄຳຂອງພຣະເຈົ້າ.
ຂະນະທີ່ທ່ານອ່ານ ໂມໄຊຢາ 2:1–9, ໃຫ້ຊອກຫາສິ່ງທີ່ຜູ້ຄົນໄດ້ເຮັດ ເພື່ອສະແດງອອກວ່າ ພວກເຂົາເອົາໃຈໃສ່ຕໍ່ພຣະຄຳຂອງພຣະເຈົ້າ. ກະສັດເບັນຢາມິນໄດ້ຂໍໃຫ້ພວກເຂົາເຮັດຫຍັງ ເພື່ອກະກຽມທີ່ຈະຮັບຟັງພຣະຄຳຂອງພຣະເຈົ້າ? (ເບິ່ງ ຂໍ້ທີ 9). ທ່ານຈະສາມາດກະກຽມຕົວເອງໃຫ້ດີກວ່າເກົ່າ ເພື່ອຮັບເອົາພຣະຄຳຂອງພຣະເຈົ້າ ໃນການສຶກສາສ່ວນຕົວ ແລະ ເປັນຄອບຄົວ ແລະ ໃນການປະຊຸມທີ່ໂບດໄດ້ແນວໃດ?
ເບິ່ງ ມັດທາຍ 13:18–23; ແອວມາ 16:16–17 ນຳອີກ.
ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້ານັ້ນເອງ.
ທ່ານເຄີຍຫຍຸ້ງຍາກຢູ່ບໍ ທີ່ຈະຫາເວລາ ເພື່ອຮັບໃຊ້ ຫລື ຫວັງວ່າ ການຮັບໃຊ້ຂອງທ່ານ ຈະນຳຄວາມສຸກມາໃຫ້ທ່ານຫລາຍກວ່າເກົ່າ? ທ່ານຄິດວ່າ ກະສັດເບັນຢາມິນຈະກ່າວແນວໃດ ຖ້າຫາກທ່ານຖາມເພິ່ນວ່າ ເປັນຫຍັງເພິ່ນຈຶ່ງຮັບໃຊ້ດ້ວຍສຸດພະລັງ, ຄວາມນຶກຄິດ, ແລະ ກຳລັງຂອງເພິ່ນ”? (ໂມໄຊຢາ 2:11). ຂະນະທີ່ທ່ານອ່ານ ໂມໄຊຢາ 2:10–26, ໃຫ້ຊອກຫາຄວາມຈິງທີ່ກະສັດເບັນຢາມິນໄດ້ສິດສອນກ່ຽວກັບການຮັບໃຊ້ ແລະ ໃຫ້ໄຕ່ຕອງເຖິງວິທີທີ່ທ່ານສາມາດໃຊ້ຄວາມຈິງເຫລົ່ານັ້ນຢູ່ໃນຊີວິດຂອງທ່ານ. ຍົກຕົວຢ່າງ, ຄຳວ່າ ເມື່ອທ່ານຮັບໃຊ້ຄົນອື່ນ, ທ່ານກໍຮັບໃຊ້ພຣະເຈົ້າຂອງທ່ານນັ້ນເອງ ໝາຍຄວາມວ່າແນວໃດຕໍ່ທ່ານ? (ເບິ່ງ ໂມໄຊຢາ 2:17). ໃຫ້ຄິດຫາວິທີທີ່ທ່ານສາມາດຮັບໃຊ້ບາງຄົນ ໃນອາທິດນີ້!
ເບິ່ງ ມັດທາຍ 25:40 ນຳອີກ.
ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້ານັ້ນເອງ.
ເຮົາສາມາດເອົາຊະນະມະນຸດທີ່ມີຈິດໃຈທຳມະດາ ແລະ ກາຍເປັນໄພ່ພົນໄດ້ ຜ່ານທາງການຊົດໃຊ້ຂອງພຣະເຢຊູຄຣິດ.
ກະສັດເບັນຢາມິນ, ຄືກັນກັບສາດສະດາທຸກຄົນ, ໄດ້ເປັນພະຍານເຖິງພຣະເຢຊູຄຣິດ ເພື່ອວ່າຜູ້ຄົນຂອງເພິ່ນ “ຈະໄດ້ຮັບການປົດບາບຂອງພວກເຂົາ, ແລະ ປິຕິຍິນດີດ້ວຍຄວາມຊື່ນຊົມຢ່າງຍິ່ງ” (ໂມໄຊຢາ 3:13). ເພິ່ນຍັງໄດ້ສິດສອນອີກວ່າ ພຣະຜູ້ຊ່ວຍໃຫ້ລອດ, ຜ່ານທາງການຊົດໃຊ້ຂອງພຣະອົງ, ບໍ່ພຽງແຕ່ເຮັດໃຫ້ເຮົາສະອາດເທົ່ານັ້ນ ແຕ່ຍັງໄດ້ມອບພະລັງໃຫ້ເຮົາ ເພື່ອປະຖິ້ມ “ມະມຸດທີ່ມີຈິດໃຈທຳມະດາ” ແລະ ກາຍມາເປັນ “ໄພ່ພົນ” (ໂມໄຊຢາ 3:19; ເບິ່ງ ຄູ່ມືພຣະຄຳພີ, “ມະນຸດທີ່ມີຈິດໃຈທຳມະດາ,” scriptures.ChurchofJesusChrist.org ນຳອີກ).
ແອວເດີ ເດວິດ ເອ ແບ໊ດນາ ໄດ້ອະທິບາຍວ່າ: “ມັນແມ່ນການຊົດໃຊ້ຂອງພຣະເຢຊູຄຣິດນັ້ນເອງ ທີ່ຈັດໃຫ້ມີ ອຳນາດແຫ່ງການຊຳລະລ້າງ ແລະ ການໄຖ່ ເພື່ອຊ່ວຍເຮົາໃຫ້ເອົາຊະນະບາບ ແລະ ອຳນາດແຫ່ງການເຮັດໃຫ້ບໍລິສຸດ ແລະ ການເພີ່ມຄວາມເຂັ້ມແຂງນັ້ນ ຈະຊ່ວຍເຮົາໃຫ້ກາຍເປັນຄົນດີກວ່າເກົ່າ ເກີນກວ່າທີ່ເຮົາສາມາດເຮັດໄດ້ດ້ວຍຕົວເອງ. ການຊົດໃຊ້ອັນເປັນນິດແມ່ນສຳລັບທັງຄົນບາບ ແລະ ໄພ່ພົນ ໃນຕົວເຮົາແຕ່ລະຄົນ” (“Clean Hands and a Pure Heart,” Ensign ຫລື Liahona, Nov. 2007, 82).
ຕໍ່ໄປນີ້ແມ່ນຄຳຖາມຈຳນວນໜຶ່ງ ເພື່ອໃຫ້ໄຕ່ຕອງຂະນະທີ່ທ່ານອ່ານປະຈັກພະຍານຂອງກະສັດເບັນຢາມິນ ເຖິງພຣະຜູ້ຊ່ວຍໃຫ້ລອດ ຢູ່ໃນ ໂມໄຊຢາ 3:1–20:
-
ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບພຣະຜູ້ຊ່ວຍໃຫ້ລອດ ແລະ ພາລະກິດຂອງພຣະອົງ?
-
ພຣະເຢຊູຄຣິດໄດ້ຊ່ວຍເຮົາໃຫ້ເອົາຊະນະບາບເຫລົ່ານີ້ແນວໃດ? ພຣະອົງໄດ້ຊ່ວຍເຮົາໃຫ້ປ່ຽນແປງທຳມະຊາດຂອງເຮົາ ແລະ ກາຍເປັນເໝືອນໄພ່ພົນຫລາຍກວ່າເກົ່າໄດ້ແນວໃດ?
-
ເຮົາຮຽນຮູ້ຫຍັງແດ່ກ່ຽວກັບການກາຍເປັນເໝືອນໄພ່ພົນ ຈາກ ໂມໄຊຢາ 3:19?
ເປັນຫຍັງກະສັດເບັນຢາມິນຈຶ່ງອ້າງເຖິງພຣະເຢຊູ ວ່າເປັນ “ພຣະບິດາແຫ່ງສະຫວັນ ແລະ ແຜ່ນດິນໂລກ”?
ປະທານໂຈເຊັບ ແອັຟ ສະມິດ ໄດ້ອະທິບາຍວ່າ: “ພຣະເຢຊູຄຣິດ, ຜູ້ທີ່ເຮົາຮູ້ຈັກອີກວ່າເປັນພຣະເຢໂຮວາ, ໄດ້ເປັນຜູ້ບໍລິຫານຂອງພຣະບິດາ, ເອໂລຮິມ, ໃນວຽກງານແຫ່ງການສ້າງ. … ພຣະເຢຊູຄຣິດ, ໂດຍທີ່ເປັນພຣະຜູ້ສ້າງ, ຈຶ່ງຖືກເອີ້ນສະເໝີວ່າ ພຣະບິດາແຫ່ງສະຫວັນ ແລະ ແຜ່ນດິນໂລກ … ; ແລະ ເພາະການສ້າງຂອງພຣະອົງ ເປັນວຽກງານຊົ່ວນິລັນດອນ ພຣະອົງຈຶ່ງຖືກເອີ້ນຢ່າງຖືກຕ້ອງວ່າເປັນພຣະບິດານິລັນດອນແຫ່ງສະຫວັນ ແລະ ແຜ່ນດິນໂລກ” (Teachings of Presidents of the Church: Joseph F. Smith [1998], 357).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ໂມໄຊຢາ 1:1–7
ແຜ່ນຈາລຶກທອງເຫລືອງ ແລະ ແຜ່ນຈາລຶກຂອງນີໄຟ ເປັນພອນໃຫ້ແກ່ຜູ້ຄົນຂອງກະສັດເບັນຢາມິນແນວໃດ? ພຣະຄຳພີເປັນພອນໃຫ້ແກ່ຄອບຄົວຂອງເຮົາແນວໃດ?
ໂມໄຊຢາ 2–3
ມັນອາດເປັນສິ່ງມ່ວນຊື່ນ ຖ້າຫາກຄອບຄົວຂອງທ່ານຈັດສະຖານທີ່ຢູ່ໃນເຮືອນ ສຳລັບການກ່າວປາໄສຂອງກະສັດເບັນຢາມິນ. ທ່ານສາມາດເຮັດຫໍສູງ ແລະ ໃຫ້ສະມາຊິກໃນຄອບຄົວປ່ຽນຜຽນກັນຂຶ້ນອ່ານຖ້ອຍຄຳຂອງກະສັດເບັນຢາມິນ ຂະນະທີ່ຢືນຢູ່ເທິງຫໍສູງນັ້ນ. ສ່ວນຄົນອື່ນໆໃນຄອບຄົວ ໃຫ້ນັ່ງຟັງຢູ່ໃນຜ້າເຕັ້ນ.
ໂມໄຊຢາ 2:9–19
ເຮົາຮຽນຮູ້ຫຍັງແດ່ກ່ຽວກັບການຮັບໃຊ້ ຈາກການສິດສອນ ແລະ ຕົວຢ່າງຂອງກະສັດເບັນຢາມິນ? ເຮົາຮູ້ສຶກໄດ້ຮັບການດົນໃຈໃຫ້ເຮັດຫຍັງ?
ໂມໄຊຢາ 2:15–25
ມັນຈະເປັນປະໂຫຍດບໍ ຖ້າຫາກຄອບຄົວຂອງທ່ານສົນທະນາກັນກ່ຽວກັບຄວາມຖ່ອມຕົວ? ເປັນຫຍັງກະສັດເບັນຢາມິນຈຶ່ງບໍ່ກ່າວອວດອ້າງກ່ຽວກັບທຸກສິ່ງທີ່ເພິ່ນໄດ້ເຮັດ? ເຮົາຮຽນຮູ້ຫຍັງແດ່ຈາກການສິດສອນຂອງເພິ່ນກ່ຽວກັບຄວາມສຳພັນຂອງເຮົາກັບພຣະເຈົ້າ?
ໂມໄຊຢາ 2:36–41
ກະສັດເບັນຢາມິນໄດ້ສິດສອນຫຍັງແດ່ກ່ຽວກັບຜົນສະທ້ອນຂອງການຮູ້ຄວາມຈິງ ແຕ່ບໍ່ດຳລົງຊີວິດຕາມນັ້ນ? ເພິ່ນໄດ້ສິດສອນຫຍັງແດ່ກ່ຽວກັບວິທີທີ່ຈະໄດ້ຮັບຄວາມສຸກທີ່ແທ້ຈິງ?
ໂມໄຊຢາ 3:19
ເຮົາຕ້ອງເຮັດຫຍັງແດ່ ເພື່ອຈະກາຍເປັນໄພ່ພົນໄດ້? ຄຸນສົມບັດໃດແດ່ຈາກຂໍ້ນີ້ ທີ່ເຮົາຄວນເອົາໃຈໃສ່ເພື່ອພັດທະນາເປັນຄອບຄົວ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ຕັ້ງເປົ້າໝາຍທີ່ຈັດການໄດ້. ການໃຊ້ເວລາສຶກສາພຣະຄຳພີພຽງສອງສາມນາທີໃນແຕ່ລະວັນ ກໍສາມາດເປັນພອນໃຫ້ແກ່ຊີວິດຂອງທ່ານໄດ້. ເຮັດຄຳໝັ້ນສັນຍາທີ່ຈະສຶກສາທຸກວັນ, ແລະ ຊອກຫາວິທີເພື່ອເຕືອນຕົວເອງເຖິງຄຳໝັ້ນສັນຍານັ້ນ.
King Benjamin’s Address [ການປາໄສຂອງກະສັດເບັນຢາມິນ], ໂດຍ ແຈຣາມີ ວິນບອກ