“ວັນທີ 30 ເດືອນມີນາ–ວັນທີ 12 ເດືອນເມສາ. ອີດສະເຕີ: ‘ພຣະອົງຈະລຸກຂຶ້ນ … ໂດຍອຳນາດແຫ່ງການປິ່ນປົວຂອງພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 30 ເດືອນມີນາ–ວັນທີ 12 ເດືອນເມສາ. ອີດສະເຕີ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Christ and the Apostles [ພຣະຄຣິດກັບອັກຄະສາວົກ], ໂດຍ ແດວ ພາສັນ
ວັນທີ 30 ເດືອນມີນາ–ວັນທີ 12 ເດືອນເມສາ
ອີດສະເຕີ
“ພຣະອົງຈະລຸກຂຶ້ນ … ໂດຍອຳນາດແຫ່ງການປິ່ນປົວຂອງພຣະອົງ”
ໃນໄລຍະທີ່ໃກ້ເຖິງວັນອາທິດ ອີດສະເຕີ, ໃຫ້ເຈາະຈົງການສຶກສາພຣະຄຳພີເປັນສ່ວນຕົວ ແລະ ເປັນຄອບຄົວຂອງທ່ານ ໃສ່ກັບປະຈັກພະຍານທີ່ມີພະລັງຂອງພຣະຄຳພີມໍມອນ ກ່ຽວກັບພຣະຊົນຊີບ, ການສິ້ນພຣະຊົນ, ການຟື້ນຄືນພຣະຊົນ, ແລະ ອຳນາດແຫ່ງການຊົດໃຊ້ຂອງພຣະເຢຊູຄຣິດ.
ບັນທຶກຄວາມປະທັບໃຈຂອງທ່ານ
ອັກຄະສາວົກໃນສະໄໝບູຮານ ມີຄວາມກ້າຫານຫລາຍໃນປະຈັກພະຍານຂອງພວກເພິ່ນ ເຖິງພຣະເຢຊູຄຣິດ ແລະ ການຟື້ນຄືນພຣະຊົນຂອງພຣະອົງ. ຫລາຍລ້ານຄົນເຊື່ອໃນພຣະເຢຊູຄຣິດ ແລະ ພະຍາຍາມຕິດຕາມພຣະອົງ ເພາະຖ້ອຍຄຳຂອງເຂົາເຈົ້າມີຢູ່ໃນພຣະຄຣິສຕະທຳຄຳພີ. ແຕ່ບາງຄົນອາດສົງໃສ, ຖ້າຫາກວ່າພຣະເຢຊູຄຣິດຄື ພຣະຜູ້ຊ່ວຍໃຫ້ລອດຂອງໂລກທັງໂລກ, ແລ້ວເປັນຫຍັງພະຍານຂອງພຣະອົງຈຶ່ງມີໜ້ອຍຄົນ ທີ່ເປັນກຸ່ມຢູ່ໃນພາກພື້ນນ້ອຍໜຶ່ງເທົ່ານັ້ນ?
ພຣະຄຳພີມໍມອນເປັນພະຍານເພີ່ມເຕີມຢ່າງໜຶ່ງ ທີ່ເປັນໜ້າເຊື່ອວ່າ ພຣະເຢຊູຄຣິດ ເປັນ ພຣະຜູ້ຊ່ວຍໃຫ້ລອດຂອງໂລກ, ທີ່ “ສະແດງພຣະອົງເອງໃຫ້ປະຈັກແກ່ປະຊາຊາດທັງປວງ” (ໜ້າວິເຄາະສະບັບຂອງພຣະຄຳພີມໍມອນ) ແລະ ສະເໜີມອບຄວາມລອດໃຫ້ທຸກຄົນ ທີ່ມາຫາພຣະອົງ. ນອກເໜືອຈາກນັ້ນ, ພະຍານຢ່າງທີສອງນີ້ ກໍຍັງໃຫ້ຄວາມແຈ່ມແຈ້ງນຳອີກ ວ່າຄວາມລອດໝາຍຄວາມວ່າແນວໃດ. ດ້ວຍເຫດນີ້ ນີໄຟ, ຢາໂຄບ, ມໍມອນ, ແລະ ສາດສະດາຄົນອື່ນໆ ຈຶ່ງໄດ້ອອກແຮງງານ “ຢ່າງພາກພຽນທີ່ຈະຄວັດຂໍ້ຄວາມນີ້ໄວ້ໃນແຜ່ນຈາລຶກ”—ເພື່ອປະກາດຕໍ່ຄົນລຸ້ນຫລັງ ເພື່ອວ່າເຂົາເຈົ້າຈະ “ຮູ້ຈັກພຣະຄຣິດ, ແລະ … ມີຄວາມຫວັງໃນລັດສະໝີພາບຂອງພຣະອົງ” (ຢາໂຄບ 4:3–4). ໃນເທດສະການອີດສະເຕີນີ້, ໃຫ້ສະທ້ອນເຖິງປະຈັກພະຍານໃນພຣະຄຳພີມໍມອນ ວ່າອຳນາດຂອງການຊົດໃຊ້ຂອງພຣະຄຣິດ ແມ່ນສຳລັບທົ່ວໄປ ແລະ ສ່ວນບຸກຄົນ—ໄຖ່ຖອນໂລກທັງໂລກ ແລະ ໄຖ່ຖອນທ່ານ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
2 ນີໄຟ 9:6–15, 22; ແອວມາ 11:41–45; 40:21–23; 3 ນີໄຟ 26:4–5
ເພາະການຟື້ນຄືນພຣະຊົນຂອງພຣະເຢຊູຄຣິດ, ທຸກຄົນຈຶ່ງຈະຟື້ນຄືນຊີວິດ.
ມັນເປັນປະເພນີໃນວັນອີດສະເຕີ ທີ່ຈະໄຕ່ຕອງເຖິງການຟື້ນຄືນພຣະຊົນຂອງພຣະເຢຊູຄຣິດ, ແຕ່ຄຳວ່າ ການຟື້ນຄືນຊີວິດ ໝາຍຄວາມວ່າແນວໃດແທ້ໆ? ມີຄວາມຮູ້ຢ່າງໃດແດ່ທີ່ພຣະຄຳພີມໍມອນມີໃຫ້ ກ່ຽວກັບການຟື້ນຄືນຊີວິດ? ບາງທີ ພາກສ່ວນໜຶ່ງຂອງການສະຫລອງວັນອີດສະເຕີແມ່ນ ທ່ານສາມາດຂຽນຄວາມຈິງກ່ຽວກັບການຟື້ນຄືນຊີວິດ ທີ່ທ່ານພົບເຫັນຢູ່ໃນ 2 ນີໄຟ 9:6–15, 22; ແອວມາ 11:41–45; 40:21–23; ແລະ 3 ນີໄຟ 26:4–5. ທ່ານກໍສາມາດບັນທຶກນຳອີກວ່າ ເປັນຫຍັງທ່ານຈຶ່ງຄິດວ່າມັນສຳຄັນ ທີ່ຈະຮູ້ຈັກເຖິງຄວາມຈິງແຕ່ລະຢ່າງເຫລົ່ານັ້ນ.
ທ່ານອາດສັງເກດເຫັນວ່າ ຄວາມຈິງກ່ຽວກັບການຟື້ນຄືນພຣະຊົນ ມັກຖືກສິດສອນໄປກັບຄວາມຈິງກ່ຽວກັບການພິພາກສາຄັ້ງສຸດທ້າຍ. ໃຫ້ໄຕ່ຕອງກ່ຽວກັບສິ່ງທີ່ສິດສອນທ່ານເຖິງຄວາມສຳຄັນຂອງການຟື້ນຄືນພຣະຊົນ ຢູ່ໃນແຜນແຫ່ງຄວາມລອດ.
ໂມໄຊຢາ 3:7; 15:5–9; ແອວມາ 7:11–13
ພຣະເຢຊູຄຣິດໄດ້ຮັບເອົາບາບ, ຄວາມເຈັບປວດ, ແລະ ຄວາມອ່ອນແອຂອງເຮົາໄປ.
ພຣະຄຣິສຕະທຳຄຳພີສິດສອນຢ່າງແຈ່ມແຈ້ງວ່າ ພຣະເຢຊູຄຣິດໄດ້ຊົດໃຊ້ແທນບາບຂອງເຮົາ. ເຖິງແນວໃດກໍຕາມ, ພຣະຄຳພີມໍມອນໄດ້ຂະຫຍາຍຄວາມເຂົ້າໃຈຂອງເຮົາ ເຖິງການເສຍສະລະ ແລະ ການຮັບທຸກທໍລະມານຂອງພຣະຄຣິດ ໃນທາງທີ່ສຳຄັນ. ທ່ານສາມາດພົບເຫັນຄຳສອນເຫລົ່ານີ້ ຢູ່ໃນ ໂມໄຊຢາ 3:7; 15:5–9; ແລະ ແອວມາ 7:11–13. ຫລັງຈາກທ່ານໄດ້ອ່ານຂໍ້ຄວາມເຫລົ່ານີ້ແລ້ວ, ໃຫ້ຄິດທີ່ຈະບັນທຶກສິ່ງທີ່ທ່ານຄົ້ນພົບໄວ້ຢູ່ໃນແຜນຜັງ ທີ່ຄືກັນກັບອັນນີ້:
|
ພຣະຜູ້ຊ່ວຍໃຫ້ລອດໄດ້ຮັບທຸກທໍລະມານກັບສິ່ງໃດແດ່? |
ເປັນຫຍັງພຣະອົງຈຶ່ງຮັບທຸກທໍລະມານ? |
ສິ່ງນີ້ໝາຍຄວາມວ່າແນວໃດຕໍ່ເຮົາ? |
|---|---|---|
ພຣະຜູ້ຊ່ວຍໃຫ້ລອດໄດ້ຮັບທຸກທໍລະມານກັບສິ່ງໃດແດ່? | ເປັນຫຍັງພຣະອົງຈຶ່ງຮັບທຸກທໍລະມານ? | ສິ່ງນີ້ໝາຍຄວາມວ່າແນວໃດຕໍ່ເຮົາ? |
ເບິ່ງ ເອຊາຢາ 53; ເຮັບເຣີ 4:14–16 ນຳອີກ.
Gethsemane [ເຄັດເຊມາເນ], ໂດຍ ໄມໂກ ທີ ມອມ
ໂມໄຊຢາ 5:1–2; 27:8–28; ແອວມາ 15:3–12; 24:7–19
ການຊົດໃຊ້ຂອງພຣະເຢຊູຄຣິດ ຊຳລະເຮົາໃຫ້ສະອາດ ແລະ ຊ່ວຍເຮົາໃຫ້ດີພ້ອມທຸກຢ່າງ.
ສາມາດເວົ້າໄດ້ວ່າ ສ່ວນຫລາຍແລ້ວພຣະຄຳພີມໍມອນແມ່ນກ່ຽວກັບເລື່ອງລາວຂອງຜູ້ຄົນທີ່ປ່ຽນແປງ ເພາະການຊົດໃຊ້ຂອງພຣະເຢຊູຄຣິດ. ຕາມຈິງແລ້ວ, ບາງຄົນເຫລົ່ານັ້ນໄດ້ເຮັດບາບທີ່ຮ້າຍແຮງທີ່ສຸດ ແລະ ຍັງເປັນສັດຕູຂອງຜູ້ຄົນຂອງພຣະເຈົ້ານຳອີກ ກ່ອນອຳນາດຂອງພຣະຜູ້ຊ່ວຍໃຫ້ລອດ ໄດ້ທຳການປ່ຽນແປງອັນຍິ່ງໃຫຍ່ໃນຕົວຂອງພວກເຂົາ ອີງຕາມສັດທາຂອງພວກເຂົາໃນພຣະອົງ. ທ່ານສາມາດອ່ານບາງເລື່ອງກ່ຽວກັບປະສົບການເຫລົ່ານີ້ ຢູ່ໃນ ໂມໄຊຢາ 5:1–2; 27:8–28; ແລະ ແອວມາ 15:3–12; 24:7–19; ທ່ານສາມາດຄິດກ່ຽວກັບຕົວຢ່າງອື່ນໆອີກ ເພື່ອສຶກສາ. ທ່ານສັງເກດເຫັນຫຍັງແດ່ ທີ່ປະສົບການເຫລົ່ານີ້ ມີບາງສິ່ງທີ່ຄ້າຍຄືກັນ? ທ່ານສັງເກດເຫັນສິ່ງໃດແດ່ທີ່ແຕກຕ່າງ? ເລື່ອງລາວເຫລົ່ານີ້ສິດສອນທ່ານຫຍັງແດ່ກ່ຽວກັບວິທີທີ່ການຊົດໃຊ້ຂອງພຣະຜູ້ຊ່ວຍໃຫ້ລອດສາມາດປ່ຽນແປງທ່ານ?
ເບິ່ງ ແອວມາ 5:6–14; 13:11–12; 18; 19:1–16; 22:1–26; 36:16–21; ອີເທີ 12:27; ໂມໂຣໄນ 10:32–33.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານສະເຫລີມສະຫລອງບຸນອີດສະເຕີກັບຄອບຄົວຂອງທ່ານ, ໃຫ້ຊອກຫາວິທີທີ່ຈະຮຽນຮູ້ນຳກັນ ກ່ຽວກັບພຣະຜູ້ຊ່ວຍໃຫ້ລອດ ແລະ ການຊົດໃຊ້ຂອງພຣະອົງ, ລວມທັງການຟື້ນຄືນພຣະຊົນ. ຕໍ່ໄປນີ້ແມ່ນແນວຄິດບາງຢ່າງ.
3 ນີໄຟ 11; 17
ບາງຄອບຄົວໄດ້ພົບເຫັນວ່າ ການສຶກສາເລື່ອງລາວກ່ຽວກັບພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນ ຢ້ຽມຢາມອາເມຣິກາ ມີຄວາມໝາຍຫລາຍໂດຍສະເພາະ ລະຫວ່າງເທດສະການ ອີດສະເຕີ. ຊຸກຍູ້ສະມາຊິກໃນຄອບຄົວໃຫ້ວາດພາບວ່າ ຄົງເປັນແບບໃດ ທີ່ໄດ້ສຳພັດຮອຍແຜຂອງພຣະອົງ (ເບິ່ງ 3 ນີໄຟ 11:14–15) ຫລື ໄດ້ເປັນເດັກນ້ອຍຄົນໜຶ່ງ ທີ່ພຣະອົງໄດ້ອວຍພອນ (ເບິ່ງ 3 ນີໄຟ 17:21). ເລື່ອງນີ້ເຮັດໃຫ້ທ່ານມີຄວາມຮູ້ບຸນຄຸນຢ່າງເລິກຊຶ້ງແນວໃດ ສຳລັບການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ? ຮູບພາບໜຶ່ງທີ່ວາດໃຫ້ເຫັນເລື່ອງນີ້ ກໍບັນຈຸຢູ່ໃນໂຄງຮ່າງນີ້; ຮູບພາບອື່ນໆ ກໍມີຢູ່ທີ່ ChurchofJesusChrist.org. ສະມາຊິກໃນຄອບຄົວຂອງທ່ານອາດຢາກແຕ້ມຮູບເອງ ເຖິງສິ່ງທີ່ເຂົາເຈົ້າໄດ້ອ່ານ.
ຂ່າວສານຈາກກອງປະຊຸມໃຫຍ່ສາມັນ
ໃນຫລາຍພາກສ່ວນຂອງໂລກ, ກອງປະຊຸມໃຫຍ່ສາມັນເດືອນເມສາ ຂອງປີນີ້ ຈະຖືກຈັດຂຶ້ນກ່ອນວັນ ອີດສະເຕີ. ບາງທີການຮັບຟັງຂ່າວສານຂອງກອງປະຊຸມໃຫຍ່ ສາມາດຊ່ວຍຄອບຄົວຂອງທ່ານ ໃຫ້ເຈາະຈົງຢູ່ທີ່ພຣະຜູ້ຊ່ວຍໃຫ້ລອດ ໃນວັນອີດສະເຕີນີ້. ຍົກຕົວຢ່າງ, ທ່ານສາມາດເຊື້ອເຊີນສະມາຊິກໃນຄອບຄົວ ໃຫ້ຮັບຟັງຂ່າວສານຂອງກອງປະຊຸມໃຫຍ່ ທີ່ເປັນພະຍານເຖິງພຣະເຢຊູຄຣິດ ແລະ ການຟື້ນຄືນພຣະຊົນຂອງພຣະອົງ—ໂດຍສະເພາະຈາກອັກຄະສາວົກ, ຜູ້ເປັນພະຍານພິເສດຂອງພຣະເຢຊູຄຣິດ. ແລ້ວ ທ່ານສາມາດທົບທວນຂ່າວສານເຫລົ່ານີ້ ແລະ ຊີ້ບອກຄຳສອນທີ່ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານເຖິງພຣະຜູ້ຊ່ວຍໃຫ້ລອດ.
“ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ”
ນຳກັນເປັນຄອບຄົວ, ໃຫ້ອ່ານ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ” (Ensign ຫລື Liahona, May 2017, ດ້ານໃນຂອງໜ້າປົກ, ເບິ່ງ ChurchofJesusChrist.org) ນຳອີກ ແລະ ເຊື້ອເຊີນສະມາຊິກໃນຄອບຄົວແຕ່ລະຄົນ ໃຫ້ເລືອກເອົາຂ່າວສານໃດໜຶ່ງກ່ຽວກັບອີດສະເຕີ ຈາກປະຈັກພະຍານນີ້ ເພື່ອແບ່ງປັນກັບຄົນອື່ນ. ຍົກຕົວຢ່າງ, ທ່ານສາມາດເຮັດໂປສເຕີເພື່ອສະແດງຢູ່ໃນສື່ສານມວນຊົນ, ຕິດໄວ້ຢູ່ປະຕູໜ້າບ້ານ, ຫລື ຢູ່ປ່ອງຢ້ຽມ.
ວິດີໂອ: Special Witnesses of Christ
ChurchofJesusChrist.org ແລະ ແອພ ຫ້ອງສະໝຸດພຣະກິດຕິຄຸນ ກໍມີວິດີໂອຫລາຍຕອນ ທີ່ເອີ້ນວ່າ Special Witnesses of Christ. ມັນລວມດ້ວຍວິດີໂອຂອງສະມາຊິກໃນຝ່າຍປະທານສູງສຸດແຕ່ລະທ່ານ ແລະ ກຸ່ມອັກຄະສາວົກສິບສອງ ກ່າວປະຈັກພະຍານເຖິງພຣະເຢຊູຄຣິດ. ຄອບຄົວຂອງທ່ານສາມາດເບິ່ງວິດີໂອເລື່ອງໜຶ່ງ ຫລື ຫລາຍກວ່ານັ້ນ ແລະ ສົນທະນາເຖິງສິ່ງທີ່ພວກເພິ່ນສິດສອນເຮົາກ່ຽວກັບສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ. ສິ່ງທີ່ສຳຄັນທີ່ສຸດ ທີ່ທ່ານສາມາດເຮັດ ໃນຖານະເປັນພໍ່ແມ່ແມ່ນ ການດຳລົງຊີວິດຕາມພຣະກິດຕິຄຸນ ດ້ວຍສຸດໃຈຂອງທ່ານ. ນີ້ແມ່ນວິທີທີ່ດີທີ່ສຸດ ທີ່ຈະເໝາະສົມກັບການເປັນເພື່ອນຂອງພຣະວິນຍານບໍລິສຸດ. ທ່ານບໍ່ຈຳເປັນຕ້ອງດີພ້ອມທຸກຢ່າງ, ພຽງແຕ່ໃຫ້ພະຍາຍາມຢ່າງພາກພຽນ ທີ່ຈະເຮັດໃຫ້ດີທີ່ສຸດ ແລະ ສະແຫວງຫາການໃຫ້ອະໄພ ຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ. (ເບິ່ງ Teaching in the Savior’s Way, 13–14.)
ຮູບພາບພຣະຄຣິດກັບຊາວນີໄຟ ໂດຍ ເບັນ ຊໍວອດ