“22–28 Suné. ʻAlamā 17– 22: ‘Te u ngaohi ʻA Kimoutolu ko ha Meʻangāue,’“ Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2020 (2020)
“22–28 Suné. ʻAlamā 17–22,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2020
ʻĀmoni mo e Tuʻi ko Lamonaí, tā fakatātā ʻe Scott M. Snow
22–28 Suné
ʻAlamā 17–22
“Te u Ngaohi ʻA Kimoutolu ko ha Meʻangāue”
ʻI hoʻo lau ʻa e ʻAlamā 17–22, lekooti e ngaahi ongo te ke maʻú pea ngāueʻi kinautolu. ʻI hoʻo fai iá te ke fakahaaʻi ai ki he ʻEikí hoʻo loto fiemālie ke maʻu ha fakahā fakafoʻituitui lahi ange.
Lekooti e Ngaahi Ongo ʻOkú ke Maʻú
Fakakaukau ki he ngaahi ʻuhinga kotoa ʻe ala ʻomi ʻe he kakaí, ko ha ʻuhinga ʻo e ʻikai ke nau vahevahe e ongoongoleleí: “ʻOku ʻikai feʻunga ʻeku ʻiló: pe “ʻOku ʻikai ke u fakapapauʻi pe te nau tokanga ki ai” pe “Fēfē kapau te u fakalaveaʻi honau lotó?” Mahalo kuó ke fakatokangaʻi haʻo fakakaukau ki ha ngaahi meʻa tatau he taimi ʻe niʻihi. Naʻe ʻi ai ha ʻuhinga makehe ʻa e kakai Nīfaí ʻi he ʻikai ke nau vahevahe ʻa e ongoongoleleí mo e kakai Leimaná: ko ha “kakai anga-kaivao mo loto-fefeka mo anga-fitaʻa; ko ha kakai naʻe manako ʻi he fakapoongi ʻo e kau Nīfaí”( ʻAlamā 17:14; vakai foki, ʻAlamā 26:23–25). Ka naʻe maʻu ʻe he ngaahi foha ʻo Mōsaiá ha ʻuhinga mālohi ange ki he ʻuhinga naʻa nau ongoʻi ai kuo pau ke nau vahevahe ʻa e ongoongoleleí mo e kakai Leimaná: “Naʻa nau fakaʻamu ke fakahā ʻa e fakamoʻuí ki he kakai fulipē, he naʻe ʻikai te nau faʻa kātakiʻi ke malaʻia ha laumālie ʻo ha taha” (Mōsaia 28:3). ʻE lava foki ʻa e ʻofa ko ʻeni naʻá ne ueʻi ʻa ʻĀmoni mo hono ngaahi tokouá, ke ne ueʻi koe ke ke vahevahe ʻa e ongoongoleleí mo ho fāmilí, ngaahi kaungāmeʻá, mo e ngaahi mahení—pea naʻa mo kinautolu ʻoku ngalingali he ʻikai ke nau tali iá.
Ngaahi Fakakaukau ki hono Ako Fakatāutaha ʻo e Folofolá
ʻI heʻeku fakamālohi ʻa ʻeku tuí, te u lava ke vahevahe lelei ange ai ʻa e ongoongoleleí.
Kuó ke toe fetaulaki nai mo haʻo ngaahi kaungāmeʻa fuoloa pea ongoʻi hangē ko ʻAlamaá—ʻo fiefia he kuo nau nofo maʻu ʻi he tuí? (vakai, ʻAlamā 17:1–2). Ko e hā kuó ke ako mei he ngaahi foha ʻo Mōsaiá fekauʻaki mo e founga ke pukepuke ai hoʻo tui ki he ongoongoleleí mo kei mālohi hoʻo tukupā ki aí? ʻI hoʻo fakalaulaulotoa e ivi fakalaumālie ʻo e ngaahi foha ʻo Mōsaiá, ko e hā ʻokú ke ongoʻi ʻoku ueʻi koe ke ke faí?
Naʻe liliu fēfē ʻe he teuteu fakalaumālie ʻa e ngaahi foha ʻo Mōsaiá, ʻenau ngāue mo e kakai Leimaná? Te ke lava ʻo fakaʻaongaʻi e faingamālie ko ʻení ke vakavakaiʻi hoʻo feinga ke akoʻi e ongoongoleleí “ʻi he mālohi mo e mafai ʻo e ʻOtuá” ( ʻAlamā 17:3).
Te u lava ʻo hoko ko ha meʻangāue ʻi he toʻukupu ʻo e ʻOtuá ke ʻomi e fakamoʻuí ki Heʻene fānaú.
Naʻe pehē ʻe Palesiteni Tōmasi S. Monisoni, “ʻOku ou fie maʻu maʻu pē ʻa e ʻEikí ke Ne ʻafioʻi kapau ʻokú Ne fie maʻu ha taha fakahoko fekau, ʻe fakahoko ʻe Tomu Monisoni ʻa e fekau ko iá Maʻana” (“On the Lord’s Errand: The Life of Thomas S. Monson,” video, ChurchofJesusChrist.org). ʻI hoʻo lau ‘a e ʻAlamā 17:6–12, kumi e meʻa naʻe fai ʻe he ngaahi foha ʻo Mōsaiá ka nau lava ʻo hoko ko ha ngaahi meʻangāue ʻi he toʻukupu ʻo e ʻOtuá. Te ke lava fēfē ke hoko ko ha meʻangāue ʻi he toʻukupu ʻo e ʻOtuá ke tāpuakiʻi ha niʻihi kehe? Ko e hā ʻokú ke ako mei heʻenau sīpingá ʻokú ke maʻu ai ha lototoʻa ke fai e meʻa ʻoku finangalo ʻa e ʻEikí ke ke faí?
Vakai foki, Tāleni H. ʻOakesi, “Ko Hono Vahevahe ʻo e Ongoongolelei Kuo Toe Fakafoki Maí,” Ensign pe Liahona, Nōvema 2016, 57–60.
Te u lava ʻo tokoniʻi ʻa e niʻihi kehé ke nau mateuteu ke tali ʻa e ongoongoleleí.
Naʻe hoko ʻa Lamonai ko ha taki ʻo ha “kakai anga-kaivao mo loto-fefeka pea mo anga-fitaʻa” ( ʻAlamā 17:14), ka naʻá ne ikunaʻi e ngaahi taʻu ʻo e tukufakaholó mo ne tali e ongoongolelei ʻo Sīsū Kalaisí. ʻI hoʻo laukonga fekauʻaki mo e ngaahi fengāueʻaki ʻa ʻĀmoni mo Lāmonaí, fakatokangaʻi ʻa e meʻa naʻe fai ʻe ʻĀmoni naʻe tokoni ke talingofua ai ʻe Lamonai ʻa ʻene pōpoakí. Kapau te ke maʻu ha ngaahi fakakaukau fekauʻaki mo e meʻa te ke lava ʻo fai ke vahevahe ai ʻa e ongoongoleleí mo e niʻihi kehé, hiki e ngaahi ueʻi ko iá.
Mahalo foki naʻa ʻaonga ke fakaʻilongaʻi pe hiki ʻa e ngaahi moʻoni naʻe akoʻi ʻe ʻĀmoni kia Lamonaí (vakai, ʻAlamā 18:24–39) mo e ngaahi moʻoni naʻe akoʻi ʻe ʻĒlone ki he tamai ʻa Lamonaí (vakai, ʻAlamā 22:1–16). Ko e hā ʻoku fokotuʻu atu ʻe he ngaahi veesi ko ʻení fekauʻaki mo e ngaahi moʻoni te ke lava ʻo vahevahe mo ha niʻihi kehe, ke tokoni ke nau fekumi ki ha fakamoʻoni ki he ongoongoleleí?
Minerva K. Teichert (1888–1976), Ammon Saves the King’s Flocks, 1935–1945, oil on masonite, 35 x 48 inches. Brigham Young University Museum of Art
ʻE lava ke maʻu ʻe heʻeku fakamoʻoní ha ivi tākiekina lahi fau.
Neongo ʻoku faʻa kau ha ngaahi meʻa makehe ʻi he ngaahi fakamatala fakaului ʻoku tau lau ki ai ʻi he folofolá, ka ʻoku tau faʻa ʻilo ai ha niʻihi fakafoʻituitui ne nau loto-toʻa ke lea mo vahevahe ʻenau fakamoʻoní mo e niʻihi kehé. Ko e founga ʻe taha ke ako ai e ngaahi meʻa ne hoko ʻi he ʻAlamā 18–22, ko hono kumi e ngaahi ivi takiekina ʻo hono vahevahe ʻe ha taha ʻene fakamoʻoní. Mahalo naʻa lava ke ke lekooti ʻa e meʻa ʻokú ke maʻú ʻi ha fakatātā hangē ko ʻení:
|
Naʻe vahevahe ʻe ʻĀmoni ʻa e ongoongoleleí mo , ʻa ia naʻá ne vahevahe ʻa e ongoongoleleí mo , pea ko hono olá ko e . |
ʻOku mafao mai e toʻukupu ʻo e ʻEikí kiate au ʻi he taimi ʻoku ou fakatomala aí.
ʻI he fakaʻosinga ʻo e fakamatala ki he ului ʻa Lamonaí, naʻe akoʻi ʻe Molomona ha meʻa mahuʻinga fekauʻaki mo e ʻulungaanga ʻo e ʻEikí. Ko e hā ʻoku fokotuʻu atu ʻe he ʻAlamā 19:36. fekauʻaki mo e ʻulungaanga ʻo e ʻEikí? Ko e fē ha taimi kuó ke ongoʻi ai hano fakamafao atu e toʻukupu ʻo e ʻEikí kiate koe? Te ke tokoniʻi fēfē kinautolu ʻokú ke ʻofa aí ke nau ongoʻi ʻEne ʻaloʻofá?
Ngaahi Fakakaukau ki Hono Ako Fakafāmili ʻo e Folofolá mo e Efiafi Fakafāmili ʻi ʻApí
ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi e ngaahi tefitoʻi moʻoni ke fakamamafaʻi mo aleaʻi kae lava ke feau e ngaahi fiemaʻu homou fāmilí. Ko ha ngaahi fakakaukau ʻeni ʻe niʻihi.
ʻAlamā 17–19
Te ke ʻai fēfē ʻa e ngaahi fakamatala ʻi he ngaahi vahe ko ʻení ke moʻui ʻaki ʻe homou fāmilí? Te mou lava ʻo fakafaivaʻi e foʻi talanoa hono maluʻi ʻe ʻĀmoni e fanga sipí, pe ko e talanoa ki he tānaki ʻe ʻĀpisi ha kakai tokolahi ke nau fakamoʻoni ki he mālohi ʻo e ʻOtuá. Mahalo naʻa lava ʻe he kau mēmipa ʻo e fāmilí ke tā ha ngaahi fakatātā ʻo ha ngaahi konga kehekehe ʻo e talanoá, pea fakaʻaongaʻi e ngaahi fakatātaá ke fai ʻaki e talanoá. Ko e hā ʻe fai ʻe homou fāmilí ke nau muimui ʻi he sīpinga ʻa ʻĀmoni mo ʻĀpisí?
ʻAlamā 8:24-39
Mahalo naʻa lava ke lau fakataha ʻe he kau mēmipa homou fāmilí ʻa e ʻAlamā 18:24–39, mo kumi e ngaahi moʻoni naʻe akoʻi ʻe ʻĀmoni kia Lamonaí. Ko e hā ʻoku tau fakakaukau ai naʻe ʻuluaki akoʻi ʻe ʻĀmoni e ngaahi moʻoni ko ʻení kia Lamonaí? Ko e hā ʻoku mahuʻinga ai ke tau maʻu ha fakamoʻoni ki he ngaahi moʻoni ko ʻení?
ʻAlamā 20:8–15
Ko e hā te tau lava ʻo ako mei he meʻa naʻe fai ʻe Lamonai ki heʻene tamaí? Te tau lava fēfē ke muimui ʻi he sīpinga ʻa Lamonaí, ʻi hono taukaveʻi ʻo e meʻa ʻoku moʻoní? (Ki ha ngaahi sīpinga, mamata ʻi he foʻi vitiō “Dare to Stand Alone” ʻi he ChurchofJesusChrist.org.)
ʻAlamā 22:15–18
Toe vakaiʻi ʻa e ʻAlamā 20:23 ke ʻiloʻi pe ko e hā naʻe loto e tamai ʻa Lamonaí ke tukuange kae lava ʻo fakahaofi ʻene moʻuí. Hili ia pea toe vakaiʻi ʻa e ʻAlamā 22:15 ke ʻiloʻi pe ko e hā naʻe loto fiemālie ke ne tukuange ke maʻu e fiefia ʻo e ongoongoleleí. Ko e hā naʻá ne loto ke tukuange kae lava ke ne ʻiloʻi ʻa e ʻOtuá? (vakai, veesi 18). Mahalo naʻa lava ke takitaha tohi ʻe he kau mēmipa ʻo e fāmilí ha palani, ke tukuange ha meʻa kae lava ke nau ʻilo kakato ange ʻa e ʻOtuá.
Ki ha ngaahi fakakaukau lahi ange ki hono ako’i ‘o e fānaú, vakai ki he lēsoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.
Fakatupulaki e Ako Fakatāutahá
ʻIlo pea fakaʻaongaʻi ʻa e ngaahi tefitoʻi moʻoní. Neongo ʻe ngali taʻeʻaonga kiate koe e ngaahi fakaikiiki ʻo e ngaahi talanoa fakafolofolá, ka ʻe ʻaonga e ngaahi tefitoʻi moʻoni ʻi he ngaahi talanoa ko ʻení. ʻI hoʻo laukonga fekauaki mo ʻĀmoni mo ʻĒloné, ko e hā ha ngaahi tefitoʻi moʻoni fekauʻaki mo hono vahevahe ʻo e ongoongoleleí ʻokú ke maʻu?
Naʻe tuʻu hake ʻa e uaifi ʻo e Tuʻi ko Lamonaí mei he kelekelé ʻo ne fakahīkihikiʻi ʻa Sīsū. ʻOi, ʻA Sīsū Monūʻia, tā fakatātā ʻe Walter Rane