“Hulio 27–Agosto 2. Alma 39–42: ‘Ti Naindaklan a Plano ti Ragsak,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hulio 27–Agosto 2. Alma 39–42,” Umaykayo, Sumurot Kaniak—Para kadagiti Indibidual ken Pamilia: 2020
Babai, Apay nga Agsangsangitka ? ni Mark R. Pugh
Hulio 27–Agosto 2
Alma 39–42
“Ti Naindaklan a Plano ti Ragsak”
Bayat ti panagadalmo iti Alma 39–42, mabalin nga ikkannaka ti Espiritu Santo kadagiti nalawag a pannakaawat ken pannakaammo a mapaspasamak iti biagmo.
Isuratmo dagiti Impresionmo
No makaaramid iti nakaro a biddut ti maysa a tao nga ay-ayatentayo, narigat a maammuan no kasano ti agresponde. Maysa a paset a mamagbalin iti Alma 39–42 a nakapatpateg ket isu ti panangipalgakna no kasano a ni Alma—maysa a disipulo ni Cristo a naminsan a naaddaan kadagiti bukodna a nadadagsen a basol nga ibabawi—natengngelna ti kasta a situasion. Nakaaramid iti seksual a basol ti anak a lalaki ni Alma a ni Corianton, ket ni Alma kas iti sigud nga inar-aramidna, nagtalek iti bileg ti pudno a doktrina a mangallukoy iti panagbabawi (kitaen iti Alma 4:19; 31:5). Kadagitoy a kapitulo, mapaliiwtayo ti kinatured ni Alma a mangkondena iti basol ken iti kinadungngo ken ayatna ken ni Corianton. Ket iti kamaudiananna, nariknatayo ti panagtalek ni Alma a ti Mangisalakan ket “umayto a mangikkat [iti basol ken] mangipalawag iti naragsak a damag ti pannakaisalakan” kadagiti agbabawi (Alma 39:15). Kinaagpaysuanna nangsubli ni Corianton iti kamaudiananna iti trabaho a panagserbi (kitaen iti Alma 49:30) ket mangted kadatayo iti namnama ti pannakapakawan ken pannakasubbot no datayo ket “mariribuk[an]” (Alma 42:29) maipapan kadagiti bukodtayo a basol wenno dagiti basol ti maysa a tao nga ipatpategtayo.
Dagiti Kapanunotan para iti Bukod a Panagadal iti Nasantuan a Kasuratan
Maysa a makarimon nga aramid ti seksual a basol iti imatang ti Apo.
Tapno maawatan ti anakna ti kinadagsen ti seksual a basol, insuro ni Alma a “makarimon dagitoy a banag iti imatang ti Apo” (Alma 39:5). Apay a napateg ti kinadalus ti dayaw kenka? Apay a napateg daytoy iti Apo? Makatulong ti sumaganad a panangilawlawag manipud ken ni Elder Jeffrey R. Holland:
“Nalawag a kadagiti kadakkelan a pakaseknanna maipanggep iti biag ditoy rabaw ti daga ket no kasano a ti maysa nga immay ditoy a lubong ken no kasano a rummuar manipud ditoy. Nangted kadagiti nakaig-iget a limitasion kadagitoy a banag.
“… Ti panagdekket ti tao [human intimacy] iti maysa ken maysa ket nailatang iti nagkallaysa nga agassawa gapu ta daytoy ti kangrunaan a simbolo ti naan-anay a panagtipon, maysa a kinaan-anay ken maysa a panagtipon nga inordenan ken inikkan kaipapanan ti Dios. … Nairanta ti kayat a sawen ti kallaysa a naan-anay a panagtipon ti maysa a lalaki ken maysa a babai. … Daytoy ti panagtipon ti kasta a kinaan-anay nga aramatentayo ti balikas a mangilantip tapno mangted kaipapanan iti agnanayon a karina” (“Personal Purity,” Ensign, Nob. 1998, 76).
Ibilang ti pammagbaga nga inted ni Alma ken ni Corianton iti Alma 39:8–15. Kasano a matulongannaka nga ad-adda a maawatamti kinapateg ti linteg ti kinadalus ti dayaw ken no kasano a parmeken ti sulisog? Ipakita pay dagiti pannursuro ni Alma no kasano a nakasagana ti Apo iti panangpakawanna kadatayo no agbabawitayo ken adda namnama para kadatayo amin. Bayat ti panangbasam iti Alma 39–42 iti daytoy a lawas, sapulem dagiti pakakitaan ti panangngaasi ti Dios. Kasano a nabendisionannaka ti panangngaasi ti Dios?
Kitaen met iti “Kinatarnaw iti Seks,” Para iti Pigsa dagiti Agtutubo, 35–37.)
Agungar ken agtakderakto iti sanguanan ti Dios tapno maukom.
Idi nadlaw ni Alma nga adda dagiti saludsod ni Corianton maipanggep iti Panagungar, insurona kenkuana maipapan iti no ania ti mapasamak kalpasan a mataytayo. Ania dagiti kinapudno nga insuro ni Alma kadagiti kapitulo 40–41 a nakatulong koma ken ni Corianton—ken iti siasino man a nakabasol—tapno maawatanda? Mabalinmo a buklen no ania dagiti nasursurom babaen iti panangilasinmo kadagiti topiko a dinakamat ni Alma (kas iti lubong ti espiritu, panagungar, ken pannakaisubli) ket kalpasanna isuratmo no ania ti isuro ni Alma maipapan iti tunggal maysa. Kasano a ti pananglaglagip kadagitoy a kinapudno ket matulongannaka no mariknam a nasulisogka wenno dumawdawat iti pammakawan?
Masarakak dagiti sungbat kadagiti saludsodko iti ebanghelio babaen iti pammati.
No dadduma mabalin nga ipagaruptayo nga ammo dagiti propeta ti sungbat iti tunggal saludsod iti ebanghelio. Ngem madlaw nga iti intero a kapitulo 40, adda dagiti sumagmamano a di nasungbatan a saludsod maipanggep iti biag kalpasan ti ipapatay. Ania ti inaramidna a mangsapul kadagiti sungbat? Ania ti inaramidna idi awanan kadagiti sungbat? Ibilangmo no kasano a makatulong kenka ti pagwadan ni Alma kadagiti saludsodmo ti ebanghelio.
Ti kararag ti maysa a wagas a pakasarakantayo kadagiti sungbat dagiti saludsod iti ebanghelio.
Ti Pannubbot ni Jesucristo ti mangaramid a posible ti pannakasubbot.
Namati ni Corianton a ti pannakadusa gapu iti basol ket saan nga umisu (kitaen iti Alma 42:1). Ngem insuro ni Alma nga adda maysa a wagas a pakaliklikan iti “kasasaad a napnuan liday” a nangikulbuan ti basol kadatayo: panagbabawi ken pammati iti Pannubbot ni Jesucristo, nga agpada a manangngaasi ken nalinteg (kitaen iti Alma 42:15). Bayat ti panangbasam iti Alma 42, sapulem no kasano nga aramiden a posible ti Pannubbot ti Mangisalakan tapno umawatka iti panangngaasi a saanmo a “[tak]takawan ti linteg” (bersikulo 25). Ania dagiti kinapudno ti masarakam ditoy a kapitulo a makatulong kenka a mangrikna iti panangngaasina?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 39:1–9
Mangted pagimbagan kadi iti pamiliam manipud iti panaglilinnawag maipapan iti paglintegan ti kinadalus iti dayaw? No kasta, ibilangmo ti panangaramat kadagiti sumaganad a resources a mainugot kadagiti kasapulan ti pamiliam: Alma 39:1–9; “Kinatarnaw iti Seks,” Para iti Pigsa dagiti Agtutubo, 35–37; “Chastity,” Gospel Topics, topics.ChurchofJesusChrist.org; overcomingpornography.org;ken dagiti video “What Should I Do When I See Pornography?” ken “I Choose to Be Pure” (ChurchofJesusChrist.org). Utobem no kasano a matulongam a maawatan ti pamiliam dagiti bendision ti kinadalus iti dayaw ken ti intimasia iti kallaysa (kas pagarigan, kitaen ti video a “How to Talk to Your Kids maipapan iti Intimacy” iti ChurchofJesusChrist.org).
Alma 39:9–15
Ania ti masursurotayo manipud kadagitoy a bersikulo maipapan iti no kasano a liklikan ti basol?
Alma 42:4
Mabalinmo ti agay-ayam iti maysa a game a dagiti pedaso ti papel a nasuratan kadagiti kababalin ni Cristo wenno pagbatayan ti ebanghelio ket maiwaras iti lawlaw ti siled. Makitam no kasano ti kaadu ti maummong a pedaso ti papel dagiti miembro ti pamilia iti naituding a kanito, kalpasanna paglilinnawagan no kasano a dagiti banag a naisurat kadagiti papel ket makatulong kadatayo nga agbalin nga ad-adda a kas iti Dios. Kasano a ti “naited a kanito” kadatayo ditoy rabaw iti daga ket maipada iti naited itoy nga ay-ayam? Kasano a maaramattayo ti “panawen a pannakatingitingtayo” iti rabaw ti daga tapno agbalintayo a kas iti Mangisalakan?
Alma 42:12–15, 22–24
Nalabit a mailadawam ti pagnaigan ti linteg ken kaasi babaen iti panangaramat iti maysa a drowing ti simple a pagtimbangan tapno ilawlawag dagiti saludsod a kas kadagitoy: Ania ti mapasamak iti pagtimbangan no agbasoltayo? Ania ti kasapulan ti linteg tapno agbalanse ti pagtimbangan? Kasano nga ited ti Mangisalakan ti kasapulan ti linteg ken maipaayna ti panangngaasi?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Ipokusmo dagiti prinsipio a mangbendisionto iti pamiliam. Bayat ti nainkararagan a panangadalmo iti balikas ti Dios, saludsodem iti bagim, “Ania ti masarakak ditoy nga agbalinto a napateg unay iti pamiliak?” Idawatmo ti panangiturong ti Espiritu bayat ti panangutobmo no kasano a matulongam ti pamiliam a mangtakuat kadagitoy a kinapudno.
Daytoy ti Anakko, ni Elspeth Caitlin Young