Agosto 17–23

Helaman 1–6

“Ti Bato ti Mannubbottayo”

Dagiti pagbatayan iti daytoy a balabala ti makatulong a mangiwanwan iti panagadalmo iti Helaman 1–6, ngem saanmo bay-an a dagitoy ti mangtiped kenka. Iturongnakanto ti Espiritu Santo kadagiti kinapudno a kasapulam a sursuruen.

Isuratmo dagiti Impresionmo

Irekord nga agpadpada ti libro ni Helaman dagiti panagballigi ken trahedia kadagiti Nephite ken Lamanite. Nangrugi daytoy iti “maysa a nadagsen a kasasaad dagiti tao ni Nephite” (Helaman 1:1), ket nagtultuloy a dimteng dagitoy a kinarigat iti unos ti kasuratan. Ditoy a mabasatayo maipapan iti problema ti politika, grupo dagiti mannanakaw, saan a panangawat kadagiti propeta, ken kinapannakkel ken kinaawan pammati iti sibubukel a daga. Ngem makitatayo pay dagiti pagarigan kas kada Nephi ken Lehi ken “ti ad-adu a napakumbaba a paset dagiti tao”a saanda laeng a nagbiag ngem dimmur-asda a naespirituan (Helaman 3:34). Kasano ti panangaramidda daytoy? Kasano ti panagtalinaedda a napigsa kabayatan ti panangrugi a marpuog ken matnag ti sibilisasionda? Iti kasta met la a wagas nga agtalinaed a napigsa ti asino man kadatayo iti “nabileg a bagyo” a yeg ti sairo a “sumaplit [kadatayo]”—babaen iti panagipasdek iti biagtayo “babaen ti bato ti Mannubbottayo, nga isu ni Cristo, ti Anak ti Dios, … ti pamuon a pangbangonan dagiti tao a saanda a matuang” (Helaman 5:12).

Dagiti Kapanunotan para iti Bukod a Panagadal iti Nasantuan a Kasuratan

Helaman 1–6

Isinanak ti kinapannakkel manipud iti Espiritu ken bileg ti Apo.

Bayat ti panangbasam iti Helaman 1–6—ken iti pakabuklan ti Libro ni Mormon—makitam ti maysa a pagtuladan iti galad dagiti Nephite: No nalinteg dagiti Nephite, bendisionan ida ti Dios ket rumang-ayda. Kalpasan ti maysa a panawen, agbalinda napannakkel ken nadangkes, nga agar-aramidda kadagiti pili a mangiturong kadakuada iti pannakadadael ken panagsagaba. Kalpasanna napakumbaba ken naparegtada nga agbabawi, ket bendisionan manen ti Dios ida. Masansan a maulit unay ti pagtuladan gapu ta aw-awagan ti sumagmamano a tattao iti “siklo ti kinapalangguad.”

Ti “siklo ti kinapalangguad.”

Sapulem dagiti pagarigan daytoy a siklo bayat ti panagbasam. Mabalin a kayatmo a markaan dagiti pagarigan no masarakam ida. Adtoy dagiti sumagmamano a saludsod a makatulong kenka a makaawat iti daytoy a pagtuladan ket makitam no kasano a mabalin a mayaplikar kenka:

• Ania dagiti pakakitaan ti kinapannakkel a makitam kadagiti Nephite? (kitaen, kas pagarigan iti, Helaman 3:33–34; 4:11–13). Makitam kadi dagiti isu met la a pagarigan ti kinapannakkel iti bagim?

• Ania dagiti bunga ti kinapannakkel ken kinadangkes? (kitaen iti Helaman 4:23–26). Ania dagiti bunga ti kinapakumbaba ken panagbabawi? (kitaen iti Helaman 3:27–30, 35; 4:14–16).

• Ania ti kayat ni Helaman a malagip dagiti annakna? (kitaen iti Alma 5:4–12). Kasano a ti pananglaglagip kadagitoy a kinapudno ket matulongannaka a mangliklik iti panagbalin a napannakkel?

Kitaen met iti Dieter F. Uchtdorf, “Pride and the Priesthood,” Ensign wenno Liahona, Nob. 2010, 55–58.

Helaman 3:24–35

Mapasantoak bayat ti panangtedko iti pusok iti Dios.

Iti Helaman 3, inladawan ni Mormon ti maysa a panawen idi narang-ay ken naparaburan unay ti Simbaan a nagsiddaawan uray dagiti lider (kitaen kadagiti bersikulo 24–32). Iti kamaudiananna nagbalin a napannakkel ti sumagmamano a tattao, idinto a dagiti dadduma ket “pimmigsada a pimmigsa iti kinapakumbabada, … iti pannakapatarnaw ken ti pannakapasanto ti puspusoda” (Helaman 3:35). Makita kadagiti bersikulo 34–35 no ania ti inaramid dagiti napakpakumbaba a tattao tapno agbalinda a napasanto. Kasano a matulongannaka dagitoy a bambanag nga agbalin nga ad-adda a napasanto? Makatulong a maammuan a ti Pangiwanwan iti Nasantuan a Kasuratan (scriptures.ChurchofJesusChrist.org) kaipapananna ti pannakapasanto kas “ti proseso nga agbalin a nawaya iti basol, natarnaw, nadalus, ken nasantuan babaen iti Pannubbot ni Jesucristo.” Ania ti mariknam a makaparegta nga aramidem tapno masurot ti pagwadan dagitoy a disipulo? Ania ti ar-aramidem a mangted iti pusom iti Dios?

Helaman 5:14–52

Napatibker ti pammatik gapu iti “kinabileg dagiti pammaneknek a naawat[ko].”

Imbaga iti naminsan ni Elder Jeffrey R. Holland kadagiti asino man nga agkarkarigatan iti pammatida: “Natibtibker ti pammatim ngem iti panagkunam nga aramiden gapu iti no ania ti aw-awagan ti Libro ni Mormon a ‘ti kinabileg dagiti pammaneknek’ [Helaman 5:50]. … Ti bunga ti agbibiag iti ebanghelio ket nalawag iti biag dagiti Santo iti Ud-udina nga Aldaw iti amin a lugar” (“Lord, I Believe,” Ensign wenno Liahona, Mayo 2013, 94). Bayat ti panagbasam kadagitoy a bersikulo, panunotem maipapan dagiti pammaneknek nga inted ti Dios kenka. Kas pagarigan, nalabit a dimo a talaga nangngeg ti timek ti Apo, ngem nariknam kadi ti “maysa nga arasaas” manipud iti Espiritu Santo nga “ad-adda a simmeksek iti kaunggan ti kararua”? (Helaman 5:30; kitaen met iti DK 88:66). Nalabit a naggapuka iti kasipngetan, agkararagka a naimpusuan iti Dios para iti nabilbileg a pammati, ket “napno[da] iti dayta a rag-o a saan a mayebkas” (Helaman 5:40–47). Ania dagiti dadduma pay a padas ti nangpatibker iti pammatim ken ni Cristo ken ti ebangheliona?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Helaman 3:27–30

Bayat ti panangyababa ni propeta Mormon kadagiti sagrado a kasuratan, inusarna sagpaminsan ti ragup ti balikas a “tapno makitatayo” a mangyunay-unay kadagiti napateg a kinapudno. Ania ti kayatna a makitatayo iti Helaman 3:27–30? Iti panagadalmo itoy a lawas, nalabit nga agsardengka sagpaminsan tapno damagem kadagiti miembro ti pamiliam no kasano a maileppasda ti ragup dagiti balikas a “tapno makitatayo” maipanggep iti no ania ti nabasada. Ania dagiti kinapudno a kayatda a yunay-unay?

Helaman 5:6–7

Daydi pimmusay a lelong ni Presidente George Albert Smith a ni George A. Smith ket nagparang kenkuana iti maysa a tagtagainep ket dinamagna, “kayatko a maammuan no ania ti inaramidmo iti naganko.” Ti insungbat ni Presidente Smith, “awan ti inaramidko iti naganmo a nasken a pagbainam” (iti Teachings of Presidents of the Church: George Albert Smith [2011], xxvi). Kalpasan ti panangbasam iti Helaman 5:6–7, nalabit a makasaritam dagiti miembro ti pamiliam maipapan iti pananglaglagip ken panangdaydayaw kadagiti nagan nga imettayo, agraman ti nagan ti Mangisalakan.

Helaman 5:12

Tapno makatulong iti pamiliam a mangiladawan iti panunotda no ania ti kaipapanan ti “maysa nga awan duadua a pamuon,” nalabit a kayatmo ti mangipasdek iti bassit nga istraktura a sangkamaysa ket ipan daytoy kadagiti agduduma a pamuon. Kalpasanna mabalinmo ti mangparnuay iti “napigsa a bagyo” babaen iti panangisumpit iti danum ken agusar ti paypay wenno hair dryer tapno makaparnuay iti angin. Ania ti napasamak iti istraktura idi adda daytoy iti nadumaduma a pamuon? Kasano a mayarig ni Jesucristo iti “maysa nga awan duadua a pamuon” iti biagtayo?

Helaman 5:29–33

Ania dagiti padastayo iti panangbigbigti timek ti Dios iti biagtayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

An-anusam ti bagim. Ti pamuon ti pammati ket maipasdek a saggaysa. No masarakam ti sumagmamano a doktrina a narigat a maawatan ita, agan-anuska. Agtalekka nga umayto ti pannakaawat bayat ti panangpasdekmo iti pamuon ken ni Jesucristo babaen ti panangusar iti pammati ken napasnek a panagadalmo.

© The Book of Mormon for Young Readers, Da Nephi ken Lehi a Linawlaw ti Adigi ti Apoy, ni Briana Shawcroft; saan a mabalin a kopiaen