Agosto 17–23

Helaman 1–6

“Ti Bato ti Mannubbottayo”

Pinanggep dagiti aktibidad iti daytoy a balbala ti mangpataud kadagiti kapanunotan ken pammaregta iti puso ken panunotayo. Gagangay a sumangbay dagiti kasayaatan a kapanunotan no sikakararag nga utobem dagiti nasantuan a kasuratan ken dagiti kasapulan dagiti ubbing a sursu ruam.

Isuratmo Dagiti Impresionmo

Yawis ti Panagbibinninglay

Tapno matulongan dagiti ubbing iti panangsursuroda iti ebanghelio iti pagtaengan, awisem dagiti sumagmamano kadakuada a mangibinglay iti maysa a banag a nasursuroda itoy a lawas. Iladawam no kasano nga inadalmo ti ebanghelio iti pagtaengan, ken isaritam maipapan kadagiti wagas a pakatulongan dagiti ubbing kadagiti pamiliada nga agsursuro manipud iti Libro ni Mormon.

Isuro ti Doktrina: In-inaudi nga Ubbing

Helaman 5:12

Mabangonko ti pamuonko ken ni Jesucristo.

Insuro ni Helaman kadagiti annakna a lallaki a da Nephi ken Lehi a bangonenda ti biagda iti bato ti Mannubbottayo. Utobem no kasano ti aramidemto ti kasta met laeng para kadagiti ubbing a sursuruam.

Dagiti Mabalin nga Aktibidad

• Ipakitam ti ladawan ti maysa a templo wenno sabali pay a pasdek, ken ilawlawagmo a kasapulan dagiti pasdek ti napigsa a pamuon tapno saanda a marba iti angin ken bagyo. Tapno mailadawan daytoy, awisem dagiti ubbing a mangpadas a manggaraw iti maysa a bato babaen iti panangpuyotda iti daytoy. Basaem ti sumagmamano nga umuna a linia ti Helaman 5:12, ket kiddawem kadagiti ubbing a mangingato kadagiti imada no mangngeganda no asino ti “bato” a nasken nga agbalin a pamuontayo.

• Awisem dagiti ubbing nga agtignay bayat iti panagbasam ti Helaman 5:12. Kas pagarigan, mabalinda nga iwagayway dagiti imada no basaem ti maipapan iti “napigsa a bagyo” ti sairo ken agtakderda iti maysa a lugar no basaem ti maipapan iti “bato ti Mannubbottayo.”

• Awisem dagiti ubbing a mangtulong kenka a mangbangon iti maysa nga istraktura babaen iti panangusar kadagiti bloke wenno sabali pay a kasapulan a banag. Irugim babaen iti panangaramidmo iti “awan duadua a pamuon,” ken isaritam kadakuada ti maipapan iti no kasano nga agbalin ni Jesucristo a pamuon ti biagtayo. Paibinglaymoi kadagiti ubbing maipapan kadagiti banag a mabalin nga aramidenda a sumurot ken ni Jesucristo, ken panayonam kadakuada iti maysa a bloke ti pamuon ti istraktura para iti tunggal banag nga ibinglayda.

• Pakoloram kadagiti ubbing ti panid ti aktibidad, ken tulongam ida a manggetteng iti daytoy. Ania ti maaramidtayo tapno mabangontayo ti biagtayo iti pamuon ni Jesucristo? Ibinglay dagiti sumagmamano a wagas a nangbangonam iti biagmo iti Mangisalakan ken no kasano a nabendisionan ti biagmo gapu iti panangaramidmo iti daytoy.

Helaman 5:21–52

Agarasaas ti Espiritu iti naalumamay, bassit a timek.

Ti panangiladawan iti Helaman 5:29–30, 45–47 iti timek a nangngegan dagiti Lamanite ket maipada iti wagas a masansan a panangiladawantayo no kasano nga agsarita ti Espiritu Santo. Mabalinmo nga usaren dagitoy a bersikulo a mangisuro kadagiti ubbing a mangilasin iti timek ti Espirito.

Dagiti Mabalin nga Aktibidad

• Ibinglay ti pakaammuan maipapan kada Nephi ken Lehi iti pagbaludan. Mabalinmo nga usaren ti “Kapitulo 37: Da Nephi ken Lehi iti Pagbaludan” (Dagiti Estoria iti Libro ni Mormon, 99–102, wenno ti maitutop a video iti ChurchofJesusChrist.org). No isaritam ti maipapan iti timek a nangngegan dagiti Lamanite, agsaritaka iti naalumamay a timek. Ulitem ti estoria iti sumagmamano a daras, ken awisem dagiti ubbing nga agarasaas kenka. Isaritam kadagiti ubbing maipapan kadagiti panawen idi nagarasaas kenka ti Espiritu Santo ken pinabilegna ti pammaneknekmo.

• Basaem ti Helaman 5:30, ket makipagkanta kadagiti ubbing iti maysa a kanta maipapan iti Espiritu Santo, kas iti “The Still Small Voice” (Children’s Songbook, 106–7). Ilawlawagmo dagiti balikas iti bersikulo iti nasantuan a kasuratan ken iti kanta a mangiladawan no kasano a makisao ti Espiritu Santo kadatayo (kitaen met ti Helaman 5:45–47). Usarem ti Helaman 5:29 ken dagiti bukodmo a padas a mangibinglay kadagiti ubbing iti sumagmamano a pagarigan dagiti nasayaat a banag a mabalin apangparegtaan kadatayo ti Espiritu Santo nga agaramidtayo.

Isuro ti Doktrina: In-inauna nga Ubbing

Helaman 1–6

No napakumbabaak, bendisionannakto ti Nailangitan nga Ama.

Aglaon ti Libro ni Mormon iti adu a pagarigan dagiti peggad ti kinapannakkel ken dagiti bendision ti kinapakumbaba iti Helaman 1–6. Bayat ti panagadalmo kadagitoy a kapitulo, utobem no kasano a mausarmo dagitoy a pagarigan iti panangisurom kadagiti ubbing iti klasem.

Dagiti Mabalin nga Aktibidad

• Agpatulongka kadagiti ubbing a nga idrowing iti pisarra ti sumaganad a diagram ti “siklo ti kinapannakkel [pride cycle].” Aggigiddan a basaen ti Helaman 3:24, 33–34 ken 4:11–15, ket awisem dagiti ubbing a mangitudo iti nadumaduma a paset ti siklo [cycle] nga iladawan dagitoy a bersikulo.

• Isurat dagiti balikas a Napakumbaba ken Napannakkel iti pisarra. Isurat dagiti sumagmamano a pagarigan dagiti tignay ti napakumbaba wenno napannakkel iti babassit a papel ket pagsisinnublaten dagiti ubbing iti panangpili iti maysa a papel ken panangikabil daytoy iti abay ti balikas iti pisarra a mangiladawan iti dayta a tignay. Ania dagiti sumagmamano a wagas a mabalin a pilientayo tapno agbalintayo tapno agbalin a napakumbaba?

Ti “siklo ti kinapannakkel.”

Helaman 5:5–14

Bangonekto ti pamuonko ken ni Jesucristo.

Aglaon tiHelaman 5:12 kadagiti nabileg nga imahe ti panangbangon ti pamuiontayo ken ni Jesucristo. Kasano a mausarmo dagitoy nga imahe a mangiladawan iti daytoy a pagbatayan kadagiti ubbing? Ti panagaramid daytoy ket makatulong nga isagana dagiti ubbing kadagiti sulisog ken pannubok a pakaipasanguandanto.

Dagiti Mabalin nga Aktibidad

• Mangitugot iti klase iti sumagmamano a kita ti material a mabalin a mangibagi iti nakapsut wenno napigsa a pamuon (kas dagiti cotton balls wenno patad a bato [flat stome] wenno baldosa [tile]). Awisem dagiti ubbing a mangbangon iti sinan-torre babaen iti panangusar iti bloke wenno sabali a pay a material iti nadumaduma a kita ti pamuon. Ania ti mangaramid iti sumagmamano a pamuon tapno agbalin a napigpigsa ngem iti dadduma? Aggigiddan a basaen ti Helaman 5:12, ken saludsodem kadagiti ubbing no apay nga iti panangkunada nga“awan duadua a pamuon” ni Jesucristo iti biagtayo. Kasano a mabangontayo ti biagtayo Kenkuana? Awisem ida a mangsukisok iti Helaman 3:27–29, 35 ken Pagannurotan ti Pammati 1:4 a mangsapul kadagiti kapanunotan.

• Awisem dagiti ubbing a magbasa biit iti Helaman 5:5–14 ken mangbilang no namin-ano a nadakamat ti balikas a “laglagipen.” Ania ti insuro ni Helaman kadagiti annakna a lallaki a rumbeng a laglagipentayo? Kasano a makatulong kadatayo ti panangllagip kadagitoy a banag a mapagbalintayo a pamuon ni Jesucristo iti biagtayo?

Helaman 5:20–52

Ti panagbabawi ti mangsukat iti naespirituan a sipnget iti lawag.

Nalikmutan iti sipnget dagiti Lamanite a napan iti pagbaludan a mangpatay kada Nephi ken Lehi. No agbasoltayo, addatayo iti naespirituan a sipnget. Helaman 5:20–52 isuronatayo no kasano a maikkat ti naespirituan nga “ulep ti sipnget[tayo]” (bersikulo 41).

Dagiti Mabalin nga Aktibidad

• Pagbalinen a nasipnget ti siled ti klase; kalpasanna basaem wenno gupgopem ti pakaammuan iti Helaman 5:20–40 nga us-usaren ti maysa a bassit a flashlight. Kasano ti mabalin a narikna dagiti Lamanite bayat ti kaaddada iti sipnget? Awisem dagiti ubbing a dumngeg iti no ania ti insuro ni Aminadab nga aramiden dagiti taotapno maikkat ti sipnget, kalpasanna basaen ti bersikulo 41. Kalpasanna sindiam ti silaw, ken aggigiddan a basaen dagiti bersikulo 42–48 . Ania ti isuro kadatayo dagitoy a bersikulo maipapan kadagiti bendision nga isangbayti panagbabawi iti biagtayo?

• Awisem dagiti ubbing a mangipapan a mangisursuroda ti maysa a bassit nga ubing maipapan iti Espiritu Santo. Kasano a mausarda ti Helaman 5:29–33, 44–47 a mangisuro no ania ti kayarigan iti panangrikna iti timek ti Espiritu ken dagiti sumagmamano a banag nga ibaga ti Espiritu kadatayo? Kasano a naparegtanaka ti Espiritu Santo nga agbabawi? Awisem dagiti ubbing a mangibinglay kadagiti padasda idi nariknada ti kappia ken liwliwa ti Espiritu Santo.

Yallukoy ti Panagsursuro iti Pagtaengan

Awisem dagiti ubbing a mangsaludsod kadagiti miembro ti pamiliada maipapan iti no kasano a binangonda ti biagda ken ni Jesucristo. Wenno mabalinda nga ibinglay kadagiti pamiliada no kasano a nagplanoda a bangonen ti biagda Kenkuana.

Panangpadur-as iti Panangisurotayo

Paneknekan ti maipapan ken ni Jesucristo. Addaanka iti sagrado a gundaway a makatulong a mangpapigsa kadagiti pammaneknek dagiti ubbing iti klasem. Tulongam ida a mangrikna iti ayat ni Jesus kadakuada, ken masansan nga ibinglaymo ti pammaneknekmo.