“Septiembre 14–20. 3 Nephi 8–11: ‘Bumangon ket Umaykayo Kaniak,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Septiembre 14–20. 3 Nephi 8–11,” Umaykayo, Sumurot Kaniak—Para kadagiti Indibidual ken Pamilia: 2020
Siak ti Silaw ti Lubong, ni James Fullmer
Septiembre 14–20
3 Nephi 8–11
“Bumangon ket Umaykayo Kaniak”
Iti 3 Nephi 8–11, nangngeg dagiti tao ti timek ti Dios a makisarsarita kadakuada. Bayat ti panangbasam kadagitoy a kapitulo, ikasom no ania ti ibaga ti timekna kenka.
Isuratmo dagiti Impresionmo
“Adtoy, siak ni Jesucristo, a pinaneknekan dagiti propeta nga umayto ditoy lubong” (3 Nephi 11:10). Addaan kadagitoy a balikas, ti nagungar a Mangisalakan inyam-ammona ti Bagina, a mangipatpatungpal iti 600 a tawen a padto iti Libro ni Mormon. “Dayta a panagparang ken dayta a pakdaar,” insurat ni Elder Jeffrey R. Holland, “ti nangbukel iti kapatgan a punto, ti kadayagan a kanito, iti intero a pakasaritaan ti Libro ni Mormon. Dayta ti panangiparangarang ken ti paulog a nangipakaammo ken nangparegta iti tunggal propeta a Nephite. … Tunggal maysa ket nagsarita maipapan kenkuana, nagkanta maipapan kenkuana, nagtagainep maipapan kenkuana ken inkararaganda ti panagparangna—ngem adtoy isu a talaga dayta. Ti aldaw dagiti aldaw! Dimtengen ti Dios a mamagbalin ti nasipnget a rabii a silaw ti agsapa” (Christ and the New Covenant [1997], 250–51).
Dagiti Kapanunotan para iti Bukod a Panagadal iti Nasantuan a Kasuratan
Ni Jesucristo ti Silaw ti Lubong.
Mabalin a madlawmo a dagiti tema nga adda pakainaiganna iti sipnget ken lawag—agpada a pisikal ken naespirituan— ket naulit iti intero a 3 Nephi 8–11. Ania ti masursurom manipud kadagitoy a kapitulo maipapan iti naespirituan a sipnget ken lawag? Ania ti mangisangbay iti sipnget iti biagmo? Ania ti mangisangbay iti lawag? Apay iti panagkunam a pinili ti Mangisalakan nga inyam-ammo ti Bagina a kas “ti silaw ken ti biag ti lubong”? (3 Nephi 9:18; 11:11). Kasano a nagbalin ni Jesucristo a silaw iti biagmo?
No agbabawiak, ummongen, salakniban, ken pagimbagennakto ti Mangisalakan.
Kasano a panunotem ti narikna dagiti tao kalpasan ti pannakapadasda iti pannakadadael ken kinasipnget a nailadawan iti 3 Nephi 8? Kasano iti panangkunam a mabalin a nariknada idi nangngeganda ti timek ti Mangisalakan nga agsarsarita maipapan iti lawag, kaasi, ken pannakasubbot kadagiti kapitulo 9 ken 10?
Uray pay impakdaar ti Mangisalakan a ti nakaam-ames a pannakadadael ket bunga dagiti basol ti tattao, inkarina a pagimbagennanto dagiti agsublinto Kenkuana ket agbabawi (kitaen iti 3 Nephi 9:2, 13). Insarita ni Elder Neil L. Andersen: “Masdaawak kadagiti mangar-arakup a takiag ti Mangisalakan iti asi ken ayat kadagiti agbabawi, uray kasano ti paidam ti inidian a basol. Paneknekak a kabaelan ken aggagar ti Mangisalakan a mangpakawan kadagiti basoltayo” (“Repent … That I May Heal You,” Ensign wenno Liahona, Nob. 2009, 40).
Sukisoken ti 3 Nephi 9–10 para iti pakakitaan ti asi ni Cristo ken ti gagarna a mamakawan. Kas pagarigan, ania ti masarakam iti 3 Nephi 9:13–22 ken 10:1–6 a mangtulong kenka a mangrikna iti ayat ken asi ti Mangisalakan? Utobem dagiti padas idi nariknam Kenkuana a “naummong” ken “natarakenka” (kitaen iti 3 Nephi 10:4). Ibilangmo ti panangisurat kadagitoy a padas iti maysa a journal wenno panangibinglay kadagitoy kadagiti ipatpateg.
Masursurok a denggen ken awaten ti timek ti Dios.
Nariknam kadin a nagkarigatanka nga awaten ti maysa a mensahe nga isarsarita ti Dios kenka? Nalabit a ti padas dagiti tao iti 3 Nephi 11:1–8 ket makatulong kenka a makaawat iti sumagmamano a pagbatayan iti panagdengngeg ken panagawat iti timek ti Dios. Mabalin nga isuratmo dagiti kababalin ti timek ti Dios a nangngeg dagiti tao ken no ania ti inaramidda tapno maawatanda a nasaysayaat. Kasano a mayaplikar daytoy a pakaammuan kadagiti panagkagumaanam a dumngeg ken mangilasin iti timek ti Dios iti biagmo babaen ti bukod a paltiing?
Awisennak ni Jesucristo a maaddaan iti bukod a pammaneknek maipapan Kenkuana.
Adda agarup 2,500 a tattao ti nagummong idiay Bountiful idi nagparang ni Jesucristo (kitaen iti 3 Nephi 17:25). Iti laksid daytoy dakkel a bilang, inawis ti Mangisalakan ida a “maysa-maysa” wenno saggaysa tapno riknaen dagiti marka ti lansa dagiti ima ken dapanna (3 Nephi 11:14–15). Ania ti isingasing daytoy kenka maipapan iti kinapateg ti addaan iti bukod a padas a mangipasdek iti pammati ken ni Jesucristo? Iti ania a wagwagas nga awisennaka ti Mangisalakan a “bumangon ket umayka” Kenkuana?? (3 Nephi 11:14). Ania dagiti padas a nakatulong kenka a maaddaan iti pammaneknek nga Isu ti Mangisalakanmo? Mabalinmo met nga ibilang no kasano a ti pagwadan ti Mangisalakan kadagitoy a bersikulo ket mangparegta kadagiti panagkagumaanmo nga agserbi kadagiti dadduma.
Saggaysa, ni Walter Rane
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
3 Nephi 8–9
Tapno matulongam ti pamiliam a maawatan dagiti padas a nailadawan iti 3 Nephi 8–9, mabalinmo a saritaen manen wenno dumngeg iti rekording dagiti paset dagitoy a kapitulo iti nasipnget a kuarto. Ilawlawag no ania koma ti mabalin a kayarigan ti adda iti kasipngetan iti tallo nga aldaw? Kalpasanna mabalinmo nga isarita ti maipapan no kasano a ni Jesucristo “ti silaw … ti lubong” (3 Nephi 9:18).
3 Nephi 10:1–6
Ti simbolismo wenno kapanunotan maipapan iti maysa nga upa a manok a mangum-ummong kadagiti piekna ket mabalin a nabileg a ramit a pangisuro a makatulong kadagiti ubbing a makaawat iti kababalin ken mision ti Mangisalakan. Mabalinmo a basaen dagitoy a bersikulo bayat ti panangkita ti pamiliam iti ladawan ti maysa nga upa a manok ken dagiti piek. Apay a masapul nga ummongen ti upa a manok dagiti piekna? Apay a tarigagayan ti Mangisalakan nga ummongennatayo a yasideg Kenkuana? Ania ti mabalin a mapasamak no pilien ti maysa a piek a saan nga agpaummong no maayaban?
3 Nephi 11:1–7
Nalabit a mabalin a basaem ti sumagmamano kadagitoy a bersikulo iti naalumamay, “bassit a timek” (3 Nephi 11:3). Ania ti inaramid dagiti tao tapno maawatanda ti timek manipud iti langit? Ania ti masursurotayo manipud iti padasda?
3 Nephi 11:21–38
Adda kadi maysa iti pamiliam nga agsagsagana a mabuniagan? Ti panangbasa iti 3 Nephi 11:21–38 ket makatulong kadakuada nga agsagana. Kasano a ti panangutob kadagiti pannursuro ti Mangisalakan ket makatulong kadagiti miembro ti pamilia a nabuniaganen?
3 Nephi 11:29–30
Ania ti isuro kadatayo dagitoy a bersikulo maipapan iti panagsusupanget? Kasano a “maaramidtayo” nga awan ti panagsusupanget iti pagtaengantayo?? (3 Nephi 11:30).
Para iti nayon a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Isuratmo dagiti impresion. Kinuna ni Elder Richard G. Scott “Ti naannad a pannakaisurat ti pannakaammo ket pannakaammo a sidadaan a mausar iti oras a panagkasapulan. … [Ti panangisurat kadagiti naespirituan impresion] ket mangpasayaat iti panaggustoyo iti yaawatyo iti ad-adu pay iti silaw” (“Acquiring Spiritual Knowledge,” Ensign, Nob. 1993, 88).
Maysa a Pastor, ni Howard Lyon