Agosto 31–Septiembre 6. Helaman 13–16: ‘Naragsak a Damag ti Naindaklan a Rag-o,’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Agosto 31–Septiembre 6,” Umaykayo, Sumurot Kaniak—Para kadagiti Indibidual ken Pamilia: 2020
Ni Samuel a Lamanite iti rabaw ti Pader, ni Arnold Friberg
Agosto 31–Septiembre 6
Helaman 13–16
“Naragsak a Damag ti Naindaklan a Rag-o.”
Bayat ti panangisuratmo kadagiti impresion itoy a lawas, panunotem ti maipapan no kasano a dagiti pagbatayan iti Helaman 13–16 ket mangipasdek ken mangpatibker kadagiti dadduma a banag a masursurom kadagiti nasantuan a kasuratan.
Isuratmo dagiti Impresionmo
Iti umuna a gundaway nga imbinglay ni Samuel a Lamanite ti “naragsak a damag iti Zarahemla (Helaman 13:7), saan nga inawat isuna ken pinapanaw dagiti natangken ti panagpuspusona a Nephite. Mabalinmo nga isao a kasla nangipasdekda iti di madupir a pader iti lawlaw ti puspusoda a manglapped kadakuada nga umawat iti mensahe ni Samuel. Naawatan ni Samuel ti kinapateg ti mensahe nga imburayna ken nangipakita iti pammati nga babaen ti panagtulnogna kadagiti bilin ti Dios, “a nasken nga agsubli manen, ket agipadto” (Helaman 13:3). Kas iti inaramid ni Samuel, maipasangotayo amin kadagiti pader bayat ti “panangisaganatayo iti dalan ti Apo” (Helaman 14:9) ken agkagumaantayo a mangsurot kadagiti propetana. Ket kas ken ni Samuel, maiburaytayo met ti pammaneknektayo ken ni Jesucristo, “nga awan duadua nga umayto,” ket awisenna amin a “mamati iti naganna” (Helaman 13:6; 14:13). Saanto a dumngeg ti amin, ket mabalin a sumagmamano ti naregget a mangsuppiat kadatayo. Ngem dagiti tao a mamati iti daytoy a mensahe nga addaan iti pammati ken ni Cristo ket makitada nga agpayso daytoy a “naragsak a damag ti naindaklan a rag-o” (Helaman 16:14).
Dagiti Kapanunotan para iti Bukod a Panagadal iti Nasantuan a Kasuratan
Mangyeg ti Apo kadagiti ballaag babaen dagiti propetana.
Kadagiti nasantuan a kasuratan, no dadduma maidasig dagiti propeta kadagiti agwanawan iti rabaw ti pader wenno torre nga agiballaag kadagiti pagpeggadan (kitaen iti Isaias 62:6; Ezequiel 33:1–7).
Insuro ni Presidente M. Russell Ballard: “Iti panaglabas dagiti siglo, natungpal dagiti propeta dagiti pagrebbenganda idi binallaaganda dagiti tao kadagiti peggad a sangsanguenda. Rebbengen dagiti Apostol ti Apo ti agwanawan, agballaag, ken mangdanon a tumulong kadagiti agbirbirok iti sungbat dagiti saludsod ti biag” (God Is at the Helm,” Ensign wenno Liahona, Nob. 2015, 25).
Bayat ti panangbasam ken panangutobmo iti Helaman 13, markaam dagiti adu a ballaag nga inted ni Samuel. Kas pagarigan, ania ti insurona maipapan iti panagbabawi? maipapan iti kinapakumbaba ken kinabaknang? Kasano a mayaplikar kenka dagitoy a ballaag? Ania dagiti ballaag itay kallabes nga inted dagiti kabaruanan a propeta itay nabiit, ket ania ti mariknam a rumbeng nga aramidem maipapan kadagitoy a ballaag?
Itudonatayo ti propeta ken ni Jesucristo.
Naasi ti Apo kadagiti agbabawi.
Ti immun-una, naibaon ni Samuel kadagiti Nephite tapno ibinglay dagiti narag-o a damag ti yaay ti Mangisalakan (kitaen iti Helaman 13:7). Agsipud ta pinagkedkedanda isuna, nagsubli isuna nga addaan kadagiti naig-iget a ballaag iti panangukom ti Dios. Ngem nagtultuloy dagita a ballaag a nangiraman iti naasi nga awis nga agbabawi; sapulen dagitoy nga awis iti unos ti Helaman 13–15 (kitaen nangnangruna iti Helaman 13:6, 11; 14:15–19; 15:7–8). Kasano a mayaplikar kenka dagitoy nga awis? Ania ti masursurom manipud kadagitoy a bersikulo maipapan iti panagbabawi? Kaano a napadasamon ti asi ti Dios a sumangbay manipud iti panagbabawi?
Mabalin a patibker dagiti tanda ken pagsidsiddaawan ti pammati ti siasino man a di mangpatangken iti puspusoda
Iti Helaman 14, inlawlawag ni Samuel ti gapu ti panangted ti Apo kadagiti tanda ti pannakayanak ken ipapatay ti Mangisalakan: “Iti panggep a mamatikayo koma iti naganna” (Helaman 14:12). Bayat ti panagadalmo iti Helaman 14, kitaem dagiti tanda ti pannakayanak ti Mangisalakan kadagiti bersikulo 1–8 ken dagiti tanda ti ipapatayna kadagiti bersikulo 20–28. Apay iti panagkunam no apay dagitoy a tanda ket nasamay a wagwagas a mangiparangarang iti pannakayanak ken ipupusay ni Jesucristo?
Makapanunotka kadi kadagiti ania man a tanda nga inted ti Apo a mangtulong kenka a mamati Kenkuana? Kas pagarigan, impadto dagiti propeta dagiti tanda nga agparangto sakbay ti Maikadua a Yaay ti Mangisalakan (kitaen iti “Tanda ti Panawen,” Pangiwanwan iti Nasantuan a Kasuratan, scriptures.ChurchofJesusChrist.org). Adda kadi ania man kadagitoy a tanda ti naipatungpalen iti panawentayo? Mabalin nga ad-adda a personal ken makasagid rikna dagiti dadduma pay a tanda a mangiturong iti pammati ken ni Jesucristo. . Utobem dagiti wagas a nasaksiam ti Impluensiana iti biagmo.
Ania ti patigmaan a naited maipapan kadagiti tanda iti Helaman 16:13–23? Kasanom a maliklikan ti galad dagiti tao a nailadawan kadagitoy a bersikulo?
Kitaen met iti Alma 30:43–52; Ronald A. Rasband, “By Divine Design,” Ensign wenno Liahona, Nob. 2017, 55–57.
Ti panagtulnog iti pammagbaga ti propeta ti mangyas-asideg kaniak iti Apo.
Insuro ni Elder Neil L. Andersen: “Napadasak a bayat ti nainkararagan a panagadal kadagiti balikas ti propeta ti Dios ket siaannad, addaan anus, naespirituan a maitunos ti pagayatak kadagiti naparegta a pannursurona, kanayon a tumibker ti pammatik iti Apo a ni Jesucristo. No pilientayo nga idian ti balakadna ket ipetteng a nalalaingtayo, agsagaba ti pammatitayo ket lumidem ti agnanayon a pannirigantayo” (“The Prophet of God,” Ensign wenno Liahona, Mayo 2018, 26–27). Kasano a dagiti balikas ken tignay dagiti Nephite iti Helaman 16 ket mangpasingked iti no ania ti insuro ni Elder Andersen? Ania dagiti personal a panagkumit a mariknam a rumbeng nga aramidem maipanggep kadagiti propeta ti Dios ken dagiti mensaheda?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Helaman 13:3–4
Ania ti mangparegta iti pamiliam maipapan iti sungbat ni Samuel iti bilin ti Apo iti Helaman 13:3–4? Bayat ti panagadal ti pamiliam itoy a lawas, nalabit a mabalinmo a paregtaen dagiti miembro ti pamiliam tapno mangibinglay kadagiti impresion nga “umay iti puso[da].”
Helaman 13:38
Ti kapanunotan a mabalin a magun-od ti kinaragsak “iti panagaramid iti dakes” ket gagangayen iti panawentayo. Iti ania a wagwagas ti panagbiag iti ebanghelio a nakaisangbayankadatayo iti pudno a ragsak?
Helaman 15:3
Kasano nga ipakita ti panangatur ti Dios ti ayatna kadatayo? Awisem dagiti miembro ti pamilia a sipapakumbaba a damagen iti Apo no ania ti mabalinda nga aramiden tapno makapagdur-as.
Helaman 15:5–8
Ania ti masursurotayo maipapan iti pannakapasurot manipud kadagiti Lamanite a nailadawan kadagitoy a bersikulo? Kasano a masurottayo dagiti pagwadanda?
Helaman 16:1–3
Magustuan ngata ti pamiliam a mangyakem ti estoria ni Samuel a Lamanite? Kalpasan a basaen ti pakaammuan, mabalin nga agsisinusublat dagiti miembro ti pamilia nga agtakder iti rabaw ti tugaw ket basaenda ti sumagmamano kadagiti padto ni Samuel bayat ti panagpammarang dagiti dadduma a miembro ti pamilia a mangitira kadagiti pana wenno mangitiro kadagiti bato. Makatulong daytoy iti pamiliam a maawatanda no kasano ti narikna ni Samuel ken dagiti Nephite. Mabalin met a magustuan dagiti ubbing ti agdrowing kadagiti ladawan ti estoria. Kasano a makapagbalintayo a kas ken ni Samuel ket mangibinglay iti ebanghelio kadagiti dadduma iti laksid dagiti butengtayo?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—para iti Primary.
Panangpadur-as iti Bukod a Panagadal
Agsapul kadagiti pagtuladan [pattern]. Ti pagtuladan ket maysa a plano wenno modelo a mabalin nga aramaten a kas mangiwanwan tapno maipatungpal ti maysa nga aramiden. Masarakantayo kadagiti nasantuan a kasuratan dagiti pagtuladan a mangipakita no kasano nga ipatungpal ti Apo ti aramidna, a kas iti panangibaonna kadagiti katulonganna a mangballaag kadagiti tao.
© The Book of Mormon for Young Readers, Ni Samuel a Lamanite, ni Briana Shawcroft