Maysa nga Aldaw, Maysa nga Rabii, ken Maysa nga Aldaw, ni Jorge Cocco

Septiembre 7–13

3 Nephi 1–7

“Yangadmo ti Ulom ket Agragsakka”

Nasaksian dagiti Nephite dagiti namilagruan a tanda, ngem kalpasan ti panawen nalipatanda no ania ti napadasanda (kitaen iti 3 Nephi 2:1). Ti panangisurat kadagiti impresionmo ket mangtulongto kenka a manglagip kadagiti naespirituan a padasmo kabayatan ti panagadalmo iti 3 Nephi 1–7.

Isuratmo dagiti Impresionmo

Iti sumagmamano a wagas, maysa a makaparagsak a panawen tapno agbalin a maysa a mamatpati ken ni Jesucristo. Naipatungpalen dagiti padto—dagiti naindaklan a tanda ken milagro kadagiti tattao ti nangipasimudaag nga asidegen a maipasngay ti Mangisalakan. Iti sabali a bangir, maysa met idi a nakaddadanag a panawen kadagiti mamatpati gapu ta iti baet dagiti amin a milagro, impilit dagiti di mamatpati a “nalpasen ti kanito” para iti pannakaipasngay ti Mangisalakan (3 Nephi 1:5). Nakaigapu dagitoy a tao ti “nga agikkisda iti amin a pagilian” (3 Nephi 1:7) ket nangilatangda pay iti aldaw a mangpapatay kadagiti amin a mamatpati no ti tanda nga impadto ni Samuel a Lamanite—maysa a rabii nga awan ti sipnget—ket di napasamak.

Kadagitoy a mapannubok a kasasaad, ni propeta Nephi ket “immawag a sipapasnek iti Dios nga agpaay kadagiti taona” (3 Nephi 1:11). Makaparegta ti sungbat ti Apo iti siasino man a maipasango iti pannakaidadanes wenno duadua ket kasapulanna a maammuan a ti lawag ti mangparmekto iti sipnget: “Yangadmo ti ulom ket agragsakka; … “tungpalek amin dagiti saok babaen iti ngiwat dagiti nasantuan a propetak” (3 Nephi 1:13).

Dagiti Kapanunotan para iti Bukod a Panagadal iti Nasantuan a Kasuratan

3 Nephi 1:4–21; 5:1–3

Ipatungpalto ti Apo dagiti amin a balikasna.

Kasano iti panagkunam a nariknam koma no maysaka kadagiti mamatpati kabayatan ti panawen a nailadawan iti 3 Nephi 1–7? Kasano koma ti riknam no, kas pagarigan, ti panaguraymo iti rabii nga awan ti sipnget a mangiwaragawag iti pannakaipasngay ti Mangisalakan, nga ammom a papatayendaka no saan komaa napasamak daytoy? Bayat ti panangbasam iti 3 Nephi 1:4–21 ken 5:1–3, sapulem no ania ti inaramid ni Nephi ken dagiti dadduma pay a mamatpati tapno mapagtalinaed ti pammatida kabayatan dagitoy naririgat a panawen. Kasano a binendisionan ida ti Apo? Ania ti masursurom a makatulong no makitam ti bagim nga agur-uray kadagiti bendision nga inkari ti Apo?

3 Nephi 1:22; 2:1–3

Ti pananglipat kadagiti naespirituan a padas ket yasidegnak kadagiti pannulisog ni Satanas.

Mabalin a mapanunotmo a ti pannakasaksi iti maysa a banag a namilagruan unay a kas iti maysa a rabii nga awan ti sipnget ket agtalinaed kenka a malaglagip iti napaut a panawen ket agbalin nga angkora iti pammaneknekmo. Ngem dagiti pananglagip kadagiti tanda ken pagsidsiddaawan a nasaksian dagiti Nephite ket kasla agmawmaw iti panaglabas ti panawen. Ania ti nakaigapu kadakuada a makalipat, ken ania dagiti bunga ti pannakalipat? 3 Nephi 1:22; 2:1–3).

Ania ti ar-aramidem a manglagip ken mangpabaro iti pammaneknekmo kadagiti naespirituan a kinapudno? Kas pagarigan, ibilangmo no kasano a makatulong kenka ti panangisurat kadagiti naespirituan a padasmo. Kasano nga iburaymonto ti pammaneknekmo kadagiti kaasitgan kenka a mangtulong kadakuada a mamati?

Kitaen met iti Alma 5:6; Henry B. Eyring, “O Remember, Remember,” Ensign wenno Liahona, Nob. 2007, 66–69; Neil L. Andersen, “Faith Is Not by Chance, but by Choice,” Ensign wenno Liahona, Nob. 2015, 65–68.

3 Nephi 2:11–12; 3:1–26; 5:24–26

Patibkeren ti Apo dagiti Santona a maibusor iti naespirituan a peggad.

Iti panawentayo, masansan a saantayo a maipasango kadagiti grupo dagiti mannanakaw a mangpilit kadatayo a mangpanaw kadagiti pagtaengantayo ket aguummong iti maysa a lugar. Ngem maipasangotayo kadagiti naespirituan a peggad, ket mabalin a naglaon ti padas dagiti Nephite kadagiti adalen a makatulong kadatayo. Sapulem dagitoy nga adalen bayat ti panangbasam iti 3 Nephi 2:11–12 ken 3:1–26.

Iti 3 Nephi 5:24–26 mabasatayo ti panaguummong dagiti tao ti Apo iti ud-udina nga aldaw. Ania ti isuro dagitoy a bersikulo maipapan iti no kasano nga ummongen ti Apo dagiti taona iti agdama?

Kitaen met iti “Worldwide Devotional for Youth: Messages from President Russell M. Nelson and Sister Wendy W. Nelson,” Hunio 3, 2018, ChurchofJesusChrist.org; “Israel—Ti panaguummong tiIsrael,” Pangiwanwan iti Nasantuan a Kasuratan, scriptures.ChurchofJesusChrist.org.

3 Nephi 5:12–26; 7:15–26

Maysaak a disipulo ni Jesucristo.

Ania iti panagkunam a kayat a sawen ti agbalin a maysa a disipulo ni Jesucristo? (kitaen iti DK 41:5). Iti 3 Nephi 5:12–26, insardeng ni Mormon ti panangyababana kadagiti kasuratan dagiti Nephite ket impakdaarna a maysa isuna a disipulo ni Jesucristo. Kalpasanna, iti 3 Nephi 7:15–26, inladawanna ti panagserbi ti sabali pay a disipulo—ni propeta Nephi. Ania ti masarakam kadagitoy dua a binatog a mangtulong kenka a makaawat iti no ania ti kaipapanan ti agbalin a maysa a disipulo ni Jesucristo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

3 Nephi 3:13–14, 25–26

Ania ti inaramid dagiti Nephite a mangsalaknib iti bagbagida manipud kadagiti kabusor a nakaipasanguanda? Ania ti ar-aramidentayo tapno maaramidtayo ti pagtaengantayo a maysa a lugar ti kinatalged ken salaknib manipud iti kinadakes ditoy lubong?

3 Nephi 2:1–3; 6:15–17

Tapno matulongam ti pamiliam a mangsursuro no kasano a maallilawnatayo ni Satanas, mangidrowing iti maysa a bagi, ket bayat ti panangbasa ti pamiliam iti 3 Nephi 2:1–3 ken 6:15–17, markaam dagiti nadumaduma a paset ti bagi a nadakamat. Segun kadagitoy a bersikulo, ania dagiti sumagmamano a wagas a pangsulisog ni Satanas kadatayo a manglipat iti Dios ket agsubli nga agbasol?

3 Nephi 4:7–12, 30–33

Ania ti inaramid dagiti Nephite idi makitada nga umayen dagiti mannanakaw ni Gadianton? Ania ti masursuro ti pamiliatayo manipud kadagiti Nephite no maipasangotayo kadagiti narikut a kasasaad? Ania ti masursurotayo manipud kadagiti balikas dagiti Nephite kalpasan a tinulongan ida ti Apo iti panawen ti panagrigat?

3 Nephi 5:13; Doktrina ken Katulagan 41:5

Basaen ti 3 Nephi 5:13 ken Doktrina ken Katulagan 41:5, ken paglilinnawagan no ania ti kaipapanan ti agbalin a maysa a disipulo ni Cristo. Nalabit a mabalin nga agsarita dagiti miembro ti pamilia maipapan kadagiti panawen idi nadlawda ti tunggal maysa a kas disipulo. No addaanka kadagiti babassit nga ubbing, mabalinmo ti agaramid iti maysa a badge a naisurat ti, “Maysaak a disipulo ni Jesucristo,” ket paisuotdagitoy kadakuada no makitam ida a mangsursurot iti Mangisalakan.

Para kadagiti nayon a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Tulongam ti pamiliam a mangyarig kadagiti nasantuan a kasuratan iti bagbagida. Kinuna ni Nephi, “Inyarigko amin a nasantuan a kasuratan kadatayo, tapno agbalinda koma a pakairanudan ken pagadalantayo” (1 Nephi 19:23). Tapno matulongam ti pamiliam a mangyarig kadagiti nasantuan a kasuratan iti bagbagida, mabalinmo nga awisen ida a mangutob no ania koma ti inaramidda no maysada kadagidi mamatpati a nailadawan iti 3 Nephi 1:4–9. (Kitaen iti Panangisuro iti Wagas ti Mangisalakan,21.)

Maysa nga Aldaw, maysa nga Rabii, ken maysa nga Aldaw, ni Walter Rane