Sa Susulu Atu le Malamalama o Ona Fofoga i o Latou luga, saunia e Gary L. Kapp

28 Setema–11 Oketopa

3 Nifae 17–19

“Faauta, Ua Atoatoa Lo’u Olioli”

A o matele lava ina taulai atu mataupu na muamua atu o le 3 Nifae i fetalaiga a le Faaola, o mataupu 17–19 o loo faamatala ai Lana auaunaga ma aoaoga i tagata. Ao ou faitau i nei mataupu, o le a se mea o loo aoao mai e le Agag ia te oe e uiga i le Faaola?

Tusifaamaumau Ou Lagona Uunai

Na faatoa faaalu e Iesu Keriso le aso e auauna atu ai le nuu o Nuumau, sa aoao atu Lana talalelei, tuu atu i tagata se avanoa e vaai ma tagotago ai i faailoga i Lona tino toetu, ma molimau atu o Ia o le Faaola na folafolaina. Ma ua oo nei i le taimi e tuumuli ai o Ia. Sa manaomia ona toe foi atu o Ia i Lona Tama, ma sa Ia silafia na manaomia e tagata se taimi e mafaufau loloto ai i mea sa ia aoaoina atu. O lea, o le folafola atu ai e toe foi mai i le aso na sosoo ai, sa Ia faataape ai le motu o tagata e o i o latou aiga. Ae na leai se isi na alu. Latou te le’i ta’u ina atu le mea na latou lagonaina, ae na mafai ona silafia e Iesu: sa latou faamoemoe o le a Ia “afio pea … faatasi ma i latou mo sina taimi umi teisi atu” (3 Nifae 17:5). Sa i ai isi ana mea taua e fai, ae o le avanoa e faaali atu ai le agaalofa e le o taimi uma e i ai se taimi talafeagai e oo mai ai, o lea na nofo ai Iesu faatasi ma tagata mo sina taimi umi teisi atu. O le mea na mulimuli ane ai, atonu o le faataitaiga aupito agavaivai lea o auaunaga na faamaumauina i tusitusiga paia. Na pau le faamatalaga a i latou na i ai, sa o se vaaiga na lemafaamatalaina (tagai 3 Nifae 17:16–17). Sa aoteleina e Iesu lava Ia le le’i faamoemoeina o le liligiina mai faaleagaga i nei upu faatauvaa” “O lenei faauta, ua atoatoa lo’u olioli” (3 Nifae 17:20).

Manatu mo Suesuega Faaletagata Lava Ia o Tusitusiga Paia

3 Nifae 17

O le Faaola o lo’u faataitaiga sili o auaunaga.

Ua tatou iloa sa pe a ma le 2,500 tagata (tagai 3 Nifae 17:25) o e na aafia i le asiasiga muamua a Keriso, e pei ona faamaumauina i le 3 Nifae 11–18. Ae sa maua e le Faaola se auala e auauna atu ai ia i latou taitoatasi. O le a se mea ua e aoaoina e uiga i auaunaga mai le faataitaiga a le Faaola i lenei fuaiupu? O a manaoga sa auauna i ai o Ia? Mafaufau loloto po o auala e mafai ona fesoasoani ai Lana faataitaiga ia te oe i le auauna atu i isi.

Faauta I O Outou Tamaiti, saunia e Gary L. Kapp

3 Nifae 17:13–22; 18:15–25; 19:6–9, 15–36

Sa aoaoina i tatou e le Faaola i le ala e tatalo ai.

Vaai faalemafaufau pe faapeī le faalogo atu o tatalo le Faaola mo oe. Mata o le a Sana saunoaga i le avea ai ma ou sui? Atonu e te maua ni manatu i Ana aoaoga ma tatalo o loo i mataupu nei. A o e suesue, o le a se mea ua e aoao mai i le faataitaiga a Keriso e mafai ona atili anoa ai a oe lava tatalo? O a ni faamanuiaga mai tatalo ua e vaaia i lou olaga?

3 Nifae 18:1–12

E mafai ona ou maona faaleagaga a o o’u ai ma inu i le faamanatuga.

A o e faitau i le 3 Nifae 18:1–12, mafaufau loloto pe mafai faapefea e le tagofia o le faamanatuga ona fesoasoani ia ou “maona” faaleagaga (3 Nifae 18:3–5, 9; tagai foi 3 Nifae 20:1–9). Mo se faataitaiga, e mafai ona e faia se lisi o fesili e uunaia ai le manatunatu patino pe a e tagofia le faamanatuga, e pei o le “O a ni o’u lagona e uiga i le Faaola ma Lana taulaga mo a’u?” “O faapefea ona aafia lo’u olaga i aso uma i Lana taulaga?” po o le “O le a se mea o lelei ona ou faia i le avea ai ma se soo, ma o le a se mea e mafai ona ou faaleleia atili?”

E mafai ona fesoasoani le saunoaga lenei mai ia Peresitene Henry B. Eyring e te mafaufau loloto ai i se tasi auala e mafai ona fesoasoani ai le faamanatuga ia te oe ia e maona faaleagaga: “A o e iloiloina lou olaga i le taimi o le sauniga o le faamanatuga, ou te faamoemoe o ou mafaufauga e faatotonugalemu e le gata i mea sese na e faia ae ia faapena foi i mea sao na e faia—taimi na e lagonaina ai e faapea na fiafia le Tama Faalelagi ma le Faaola ia te oe. E mafai foi ona e faaaluina se taimi i le taimi o le faamanatuga e fesili atu ai i le Atua e fesoasoani ia te oe ia iloa nei mea. … Ina ua ou faia lenei mea, na faamautinoa mai e le Agaga ia te au e faapea ao ou mamao pea mai le atoatoa, ua ou sili atu i le aso nai lo ananafi. Ma o lenei mea e tuuina mai ai ia te au le mautinoa e faapea, ona o le Faaola, e mafai lava ona ou sili atu taeao” (“Ia Manatua Pea o Ia,” Ensign, Fep. 2018, 5).

3 Nifae 18:36–37; 19:6–22

Ua saili e soo o Iesu Keriso le meaalofa o le Agaga Paia.

Mafaufau e uiga i se tatalo na e faia lata mai nei. O a ni mea o aoao atu e au tatalo ia te oe e uiga i ou manaoga loloto? Ina ua uma ona faaalu se aso o mafuta ai ma le Faaola, sa “ tatalo atu [le motu o tagata] mo lena mea na sili ona latou mananao i ai”—o le meaalofa o le Agaga Paia (3 Nifae 19:9). A o e faitauina nei fuaitau, mafaufau loloto i lou manao mo le mafutaga a le Agaga Paia. O le a se mea ua e aoaoina e uiga i le sailia o le mafutaga a le Agaga Paia?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

3 Nifae 17

A o outou faitau o se aiga i le mataupu lenei, mafaufau e malolo mai lea taimi i lea taimi e valaaulia lou aiga e vaaifaalemafaufau e faapea na latou i ai i nei mea na tutupu. Mo se faataitaiga, e mafai ona e fesili faapea, “O a ni mafatiaga e te avatua i le Faaola ina ia faamaloloina?” “O le a se mea e te manao ia te Ia e tatalo ai mo oe?” po o le “O ai ni tagata e pele ia te oe e te manao Na te faamanuiaina? O le faitauina o le mataupu lenei e mafai ona musuia ai oe e tatalo mo tagata taitoatasi o lou aiga, e pei ona sa faia e Iesu.

3 Nifae 18:1–12

O le a le uiga o le ia “maona” e ala i le tagofia o le faamanatuga, ma e faapea ona tatou lagonaina? O le a se mea tatou te aoao mai i fuaiupu 5--7 e uiga i le mafuaaga na tuuina mai ai e Iesu ia i tatou le sauniga o le faamanatuga?

3 Nifae 18:17-21

O a ni mea e mafai ona tatou aoao mai nei fuaiupu e uiga i faamoemoega o le tatalo? E mafai faapefea ona tatou faaleleia le mana faaleagaga o a tatou tatalo, o ni tagata taitoatasi ma o se aiga?

3 Nifae 18:25; 19:1–3

O le a se aafiaga na tupu i le tatou aiga e ala i le talalelei, lea tatou te moomoo ia tupu foi i tagata uma e siomia i tatou? E mafai faapefea ona tatou mulimuli i le faataitaiga a tagata o loo i ai i nei fuaiupu ma “galulue malosi” (3 Nifae 19:3) ina ia aumai isi ia Keriso, ina ia mafai foi ona latou “tagotago ma vaai” (3 Nifae 18:25) i mea ua tatou maua i totonu o le talalelei?

Mo nisi manatu mo le aoaoina o tamaiti, tagai i le otootoga o le vaiaso lenei i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava ia

Tuu atu i le Agaga e taitaia au suesuega. E mafai e le Agaga Paia ona taiala oe agai atu i mea e manaomia ona e aoao ai i aso taitasi. Ia mataala i Ana uunaiga, e tusa lava pe foliga mai o fautua atu e te faitau i se autu ese, pe suesue i se auala ese nai lo o le mea e te masani ai. Mo se faataitaiga, a o e faitau e uiga i le faamanatuga i le 3 Nifae 18, atonu e uunaia oe e le Agaga e faaali se taimi tele atu i lena autu nai lo o le mea na e fuafuaina.

Sa Latou Vaai ua Avanoa le Lagi, saunia e Walter Rane