Atatusi o Keriso ua faaali atu i sa Nifae na saunia e Andrew Bosley

12–18 Oketopa

3 Nifae 20–26

“O Outou o Fanau o le Feagaiga”

Pe a fetalai ai e uiga i tusitusiga paia, sa masani ona faaaoga e Iesu le upu suesue (tagai 3 Nifae 20:11; 23:1, 5). A e faitau i le 3 Nifae 20–26, o le a se mea o le a e suesuea?

Tusifaamaumau Ou Lagona Uunai

A e faalogo i tagata o faaaoga faaupuga e pei o le aiga o Isaraelu, pe e te lagonaina le pei o loo latou talanoa e uiga ia te oe? O sa Nifae ma sa Lamana o e tupuga moni mai ia Isaraelu—o le latou tala e amata foi i Ierusalema—ae i nisi o i latou, e foliga mai o Ierusalema ua pei o “se laueleele ua mamao lava, o se laueleele ua tatou le iloa” (Helamana 16:20). Ioe, o i latou o “se lala o le laau o Isaraelu,” ae o i latou foi sa “leiloa mai i lona tino” (Alema 26:36; tagai foi 1 Nifae 15:12). Ae ina ua faaali mai le Faaola ia i latou, sa finagalo o Ia ia latou iloa sa le leiloa i latou ia te Ia. Sa fetalai mai o Ia, “O outou o lo le aiga o Isaraelu; ma o outou o lo le feagaiga” (3 Nifae 20:25). Atonu e fetalai mai o Ia ise mea e talitutusa ia te oe i le aso, mo soo se tasi ua papatisoina ma osifeagaiga ma Ia, o se aiga foi o Isaraelu, “o le feagaiga” e tusa lava po o ai e te tupuga mai ai pe o fea e te nofo ai. I nisi faaupuga, a fetalai Iesu e uiga i le aiga o Isaraelu, o loo fetalai o Ia e uiga ia te oe. O le faatonuga ia manuia “aiga uma o le lalolagi” e mo oe (3 Nifae 20:27). O le valaaulia e “ina toe ala mai ia; ma ofu lou malosi” e mo oe (3 Nifae 20:36). Ma o Lana folafolaga faapelepele, “o le a le alu ese lava lou agalelei mai ia te oe, pe o le a aveesea foi le feagaiga o loʼu filemu,” e mo oe (3 Nifae 22:10).

Manatu mo Suesuega Faaletagata Lava Ia o Tusitusiga Paia

3 Nifae 20–22

I aso e gata ai, o le a faataunuu ai e le Atua se galuega tele ma le ofoofogia.

Sa tuuina atu e le Faaola i le motu o tagata nisi o folafolaga matagofie ma folafola atu e uiga i le lumanai o Lona nuu o le feagaiga—ma o lena mea e aofia ai ma oe. E pei ona saunoa lo tatou perofeta o Peresitene Russell M. Nelson: “o i tatou o le nuu o le feagaiga a le Alii. O lo tatou avanoa lenei e auai patino i le faataunuuina o nei folafolaga. Oka se taimi ina a manaia e ola ai!” (“O Le Faapotopotoina o Isaraelu ua Faataapeapeina,” Ensign po o le Liahona, Nov. 2006, 79).

Vaavaai mo valoaga e uiga i aso e gata ai i fetalaiga a le Faaola o loo i le 3 Nifae 20–22. O fea o nei valoaga e faapitoa le manaia ia te oe? O le a se mea e mafai ona e faia e fesoasoani e faataunuu ai valoaga o loo i nei mataupu?

Ia maitau o le 3 Nifae 21:1–7 o loo ta’u mai ai, o le oo mai o le Tusi a Mamona (o “nei mea” i fuaiupu 2 ma le 3) o se faailoga ua amata ona faataunuuina ia folafolaga a le Atua. O a na folafolaga, ma e faapefea ona fesoasoani le Tusi a Mamona e faataunuu i latou?

Tagai foi Russell M. Nelson, “Hope of Israel” (worldwide devotional for youth, June 3, 2018), broadcasts.ChurchofJesusChrist.org.

3 Nifae 20:10–12; 23; 26:1–12

E finagalo le Faaola ou te suesue i upu a perofeta.

O fetalaiga ma faatinoga a Iesu i nei mataupu uma, ua faaalia ai Lona finagalo e uiga i tusitusiga paia. O le a se mea ua e aoaoina e uiga i tusitusiga paia i le 3 Nifae 20:10–12; 23; ma le 26:1–12? O a ni mea ua e maua i nei fuaiupu ua musuia ai oe e suesue ma le filiga i nei mea”? (3 Nifae 23:1).

3 Nifae 22; 24

E alofa mutimutivale le Atua ia i latou o e toe foi atu ia te Ia.

I le 3 Nifae 22 ma le 24, o loo sii mai ai e le Faaola ia upu mai le Isaia ma le Malaki lea e tumu i ata ma faatusa loloto—maa faavae felanulanuai, malala i le afi, siliva faamamaina, ma pupuni o le lagi. Atonu e manaia le fai o se lisi o ia mea. O le a se mea o aoao mai e mea taitasi e uiga i le faiā a le Atua ma Lona nuu? Mo se faataitaiga, o le 3 Nifae 22:4–8 o loo faatusa ai le Atua i se tane ae o Lona nuu i se avā. O le faitau e uiga i nei faatusa e ono uunaia ai oe e mafaufau e uiga i le lua faiā ma le Alii? Ua faapefea ona faataunuuina folafolaga o i nei mataupu i lou olaga? (tagai faapitoa i le 3 Nifae 22:7–8, 10–17; 24:10–12, 17–18).

3 Nifae 25:5–6

E tatau ona liliu atu lo’u loto i o’u tuaa.

O le folafolaina mai o le toe foi mai o Elia na talitalia ma le naunautai e tagata Iutaia i le lalolagi atoa mo seneturi. Ua iloa e le Au Paia o Aso e Gata Ai ua toe foi mai Elia, na faaali mai ia Iosefa Samita i le Malumalu o Katelani i le 1836 (tagai MFF 110:13–16). O le galuega o le liliu o loto i fanau—galuega o malumalu ma talafaasolopito o aiga—ua amatalia lelei ma faagasolo. O a ni aafiaga ua e maua na fesoasoani e liliu atu ai lou loto i ou tuaa?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

3 Nifae 22:2

A uma ona faitau le fuaiupu lenei, atonu e mafai ona e faia se faleie ma talanoa i le faapei o le Ekalesia o se faleie i totonu o se togavao, Mata o le a le uiga o le “ia faauumi [ona] maea” ma “faamalolosi [ona] siteki”? E faapefea ona tatou valaauliaina isi e saili ni “malutaga” i le Ekalesia? (tagai i le vitio “Welcome” i le ComeUntoChrist.org).

3 Nifae 23:6-13

A faapea e suesue le Faaola ia faamaumauga ua tausia e lo tatou aiga, mata o a ni fesili e ono fesili mai ai o Ia ia i tatou? Pe o i ai ni mea taua na tutupu po o ni aafiaga faaleagaga e tatau ona tatou tusifaamaumauina? Atonu o le taimi lenei o se taimi lelei lea e fatufatu ma faaopoopo atu i se faamaumauga faaleaiga ma fefautuaai faatasi e uiga i mea e aofia ai. Atonu e fiafia tagata laiti ifo o le aiga i le teuteuina o au faamaumauga i ata po o ni tusiga ata. Aisea e taua ai le faamaumau o aafiaga faaleagaga a le tatou aiga?

3 Nifae 24:7–18

Ua faapefea ona tatou maua faamanuiaga o le totogi o le sefuluai ua folafolaina mai i nei fuaiupu? O le savali a Elder David A. Bednar “The Windows of Heaven” (Ensign po o le Liahona, Nov. 2013, 17–20) e mafai ona fesoasoani i tagata o le aiga ia iloa nei faamanuiaga.

3 Nifae 25:5–6

O le a faapefea ona e fesoasoani i tagata o lou aiga ia liliu atu o latou loto i o latou tama? Atonu e mafai ona e tofia ni tagata o le aiga e aoao e uiga i se tasi o ou tuaa ma faasoa mai i tagata uma o le aiga mea latou te aoaoina (tagai FamilySearch.org). Pe e mafai ona outou galulue faatasi e su’e se tuaa o manaomia sauniga o le malumalu ona fuafua lea o se malaga i le malumalu e faataunuu na sauniga.

Mo nisi manatu mo le aoaoina o tamaiti, tagai i le otootoga o le vaiaso lenei i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Ola i lau molimau. “E te aoao atu mea o loo avea ai oe,” na aoao mai ai Elder Neal A. Maxwell. “O le a sili atu le manatuaina o ou uiga tulaga ese … nai lo o se upumoni faapitoa i se lesona faapitoa” (“But a Few Days” [saunoaga i faiaoga faalelotu o le Ofisa o Aoga a le Ekalesia, 10 Sete. 1982], 2). Afai e te manao e aoao atu se mataupu faavae o le talalelei, ia fai le mea sili e te mafaia e ola ai i lena mataupu faavae.

Aumai ia Faamaumauga, saunia e Gary L. Kapp