Ata o Keriso o faaali atu i sa Nifaē saunia e Andrew Bosley

12--18 Oketopa

3 Nifae 20--26

“O Outou o Fanau o le Feagaiga”

A o e faitauina le 3 Nifae 20-26, “suesue ma le filiga i nei mea” (3 Nifae 23:1) e maua ai mea moni e te lagona le musuia e faasoa atu ma tamaiti o lau vasega.

Tusi Faamaumau Ou Lagona Uunai

Valaaulia le Fefaasoaai

Pasi faataamilo i le vasega se ata o le Faaola . A maua e tamaiti uma le ata, valaaulia o ia e faasoa atu se mea na aoao atu e Iesu pe na ia faia ina ua Ia asiasi atu i tagata i le Tusi a Mamona. E mafai ona latou faasoa atu se mea na latou aoaoina i le fale po o le Peraimeri.

Aoao atu le Aoaoga Faavae: Tamaiti Laiti

3 Nifae 20:1

E mafai ona ou tatalo i loʻu loto.

Afai na aʻoaʻo lau vasega e uiga i le tatalo i le vaiaso talu ai, e mafai ona e fausia i luga o lena lesona ma se tasi o nei gaoioiga.

Gaoioiga e Mafai Ona Fai

• Fai i tamaiti e faaali atu ia te oe mea latou te faia pe a latou tatalo. O a mea latou te faia i o latou lima? o latou ulu? o latou mata? Faamalamalama atu o nisi taimi tatou te mananao ai e talanoa i le Tama Faalelagi, ae le mafai ona tatou tootuli pe moeiini o tatou mata. O le a se mea e mafai ona tatou faia? Faitau atu i tamaiti mai le 3 Nifae 20:1: “Sa [poloai atu Iesu] ia te i latou ia latou le tuu le tatalo i o latou loto.” Tau atu i tamaiti pe faapefea ona e tatalo i lou loto.

• Tusi se gutu ma se fatu i luga o le laupapa. Fai i tamaiti e faasino i le gutu ma taʻu atu ia te oe nisi o mea latou te ta’u atu pe a latou tatalo. Ona fai atu lea ia i latou e faasino i le fatu, ma faamatala atu e mafai ona tatou fai atu na lava mea i o tatou loto. Molimau atu e silafia e le Tama Faalelagi o tatou lagona ma mafaufauga.

3 Nifae 24:8–12

O le totogiina o le sefuluai e aumaia ai faamanuiaga.

Tamaiti e le’i papatisoina e le o faamoemoe e totogi le sefuluai. Ae ui i lea, e le o vave tele ona aʻoaʻoina i latou i mataupu ma faʻamanuiaga e o faatasi ma lenei tulafono.

Gaoioiga e Mafai Ona Fai

• Afai e i ai se faamalama o lou potu aoga, valaaulia tamaiti e tilotilo i ai. O a mea e mafai ona sau i totonu o le potu pe a tatala le faamalama? Faitau le 3 Nifae 24:10, ma faamatala atu afai tatou te totogiina le sefuluai, e tatalaina “pupuni o le lagi,” ma oo mai faamanuiaga i o tatou olaga.

• Faaali atu i tamaiti tupe siliva e 10 (poʻo isi mea laiti). Valaaulia i latou e faitau tupe siliva ma oe. Molimau atu o mea uma ua tatou maua o se faamanuiaga mai le Tama Faalelagi. Tuu eseese se tupe siliva se tasi, ma faamatala atu afai tatou te totogiina le sefuluai, tatou te toe faafoi atu i le Tama Faalelagi le tasi vaesefulu o mea tatou te maua. Faaali atu ata e faaalia ai le auala e faaaoga ai le sefuluai e faamanuia ai le Ekalesia a le Alii (e pei o le fausiaina o malumalu, faasalalau atu o le talalelei, ma isi; tagai Tusiata o le Talalelei, nu. 109–10, 118–19).

• Usu faatasi se pese e faatatau i le sefuluai, e pei o le “I Want to Give the Lord My Tenth” (Children’s Songbook, 150). Faasino fuaiupu o loo aoao mai pe aisea tatou te totogi ai le sefuluai.

3 Nifae 25:5–6

E finagalo le Tama Faalelagi ia ou aoao e uiga i o’u tuaa.

E pei ona valoia i nei fuaiupu, ua toefuatai mai e Elia ia faamaufaailoga e faatagaina ai i tatou e faatasi ma o tatou aiga mo le faavavau.

Gaoioiga e Mafai Ona Fai

• Faitau le 3 Nifae 25:6, ma valaaulia tamaiti e tuu o latou lima i o latou fatu i taimi uma latou te faalogo ai i le upu “fatu.” Faamatala atu e finagalo le Tama Faalelagi “o tamaiti”--o i tatou uma--e aoao ma lagona le alofa mo “tama”--o tatou matua, matua matutua, ma matua o matua matutua.

• Valaaulia se matua o se tasi o tamaiti e faamatala mai e uiga i o latou tuaa. Pe taʻu atu i tamaiti se tala e uiga i se tasi o ou tuaa; faaali ata pe a mafai. Molimau atu e finagalo le Tama Faalelagi tatou te faatasi ma o tatou aiga e faavavau, ma o le mafuaaga lea na Ia tuuina mai ai ia i tatou malumalu. Usu faatasi le “E Mafai Ona Faavavau Aiga” (Tusipese a Tamaiti,98).

Aoao atu le Aoaoga Faavae: Tamaiti Matutua

3 Nifae 23:1, 5

E mafai ona ou suesue ma le filiga i tusitusiga paia.

Sa taʻu atu e le Faaola i le motu o tagata e suesue i tusitusiga paia, ma sa Ia manao e faamautinoa ua latou tusia upu a perofeta (tagai 3 Nifae 23:1, 5–13; 26:2).

Gaoioiga e Mafai Ona Fai

• Valaaulia tamaiti e faitau le 3 Nifae 23:1, 5 ma vaavaai mo se upu o ta’ua faatolu. O le a le uiga o le suesue i upu a perofeta? E faʻapefea ona ese le sailiga mai le na o le faitau? Tau atu i tamaiti pe faapefea ona e sailia ia tusitusiga paia ma mea e te mauaina iina.

• Tuu atu i tamaiti taitasi se tamai kata po o se fasi pepa, ma valaaulia i latou e tusi le faasinoga i se mau sili ona fiafia i ai. (Tuuina atu fautuaga pe a manaʻomia.) Tuu atu ia i latou e auauai e natia a latou kata i totonu o le potu aʻo ufiufi mata o isi tamaiti. Fai atu i tamaiti e sue le mau, ma a latou mauaina, ona faitau faatasi lea. O a mea tatou te maua i lenei mau e taua ia i tatou?

3 Nifae 24:8–12

O le totogiina o le sefuluai e tatalaina pupuni o le lagi.

A e aoaoina tamaiti e uiga i le sefuluai, ua e saunia i latou e talia “se manuia o le a leai se avanoa e lava e teu ai” (3 Nifae 24:10).

Gaoioiga e Mafai Ona Fai

• Tusi i luga o le laupapa Afai ou te totogiina le sefuluai, o le a finagalo le Alii e . Valaaulia tamaiti e faitau le 3 Nifae 24:8–12, ma fesoasoani ia latou sailia fuaitau e faamaea ai lenei fuaiupu. Faasoa atu se aafiaga na faamanuiaina ai oe ona sa e totogiina le sefuluai.

• Tusi ni nai aofaiga o tupe i luga o le laupapa, ma fesoasoani i tamaiti e fuafua pe fia le sefuluai (10 pasene) e tatau ona tatou tuuina atu mo aofaiga taitasi. Faaali atu ia i latou pe faapefea ona faatumu se lisiti o foai o le sefuluai.

• Fesoasoani i tamaiti e lisi i luga o le laupapa nisi o auala e faaaoga ai le sefuluai e faamanuia ai le Ekalesia a le Alii (ia fausia malumalu, faasalalauina le talalelei, lolomiina tusitusiga paia, ma isi). Fai atu i tamaiti e tusi ni ata (pe sue ni ata i mekasini a le Ekalesia) auala e faamanuia ai e le sefuluai le Ekalesia.

3 Nifae 25:5–6

E finagalo le Tama Faalelagi ia ou aoao e uiga i o’u tuaa.

Mafaufau pe o le a faapefea ona e musuia tamaiti e saili o latou augatama ina ia oo ina latou matutua e o i le malumalu, e mafai ona latou faatinoina sauniga mo na tuaa.

Gaoioiga e Mafai Ona Fai

• Tau atu i tamaiti o le 3 Nifae 25:5--6 o loo i ai se valoaga e uiga i se mea o le a tupu i aso e gata ai. Valaaulia i latou e faitau nei fuaiupu e saili ai pe o le a. Molimau atu ua faataunuuina lenei valoaga, ma valaaulia tamaiti e faitau e uiga i ai i le Mataupu Faavae ma Feagaiga 110:13–16 (tagai foi Tusiata o le Talalelei, nu. 95). Faamalamalama atu pe a tatou aoao e uiga i o tatou tuaa ma fai galuega o le malumalu mo i latou, ua liliu atu o tatou loto i o tatou tama.

• Tau atu i tamaiti e uiga i se tasi o ou tuaa na maliu e aunoa ma le avanoa e papatiso ai. Faaali atu se ata pe a mafai. Tuu atu lau molimau e alofa le Tama Faalelagi i lenei tagata, o lea na Ia saunia ai se auala mo ia e maua ai le papatisoga e ala i le galuega o faia i totonu o malumalu. Fai i tamaiti e sue se fuaitau i le 3 Nifae 25:6 atonu e ono faamatalaina ai ou lagona e uiga i ou tuaa.

• Fesoasoani i tamaiti e faatumu se laau o le aiga ma igoa o o latou matua ma matua matutua. Fautuaina i latou e fesili i o latou matua e fesoasoani ia i latou e faaopoopo nisi igoa.

Fautuaina le Aoaoina i le Aiga

Valaaulia tamaiti e fesili i o latou matua po o matua matutua e taʻu atu ia i latou ni tala e uiga i o latou tuaa.

Faaleleia o Lo Tatou Aoao Atu

E tele auala e aoao ai tamaiti. E fiafia lava tamaiti e aoao e ala i aafiaga fou eseese. Faaaoga gaoioiga e fesoasoani latou te feoai ai, faaaoga uma o latou sane, ma faataitai ni mea fou. (Tagai Aoao Atu i le Ala a le Faaola,25.)