Iesu o loo Tatalo ma sa Nifae

Christ’s Prayer, saunia e Derek Hegsted

19--25 Oketopa

3 Nifae 27–4 Nifae

“E Le Mafai Ona I Ai o Ni Tagata e Sili Atu Ona Fiafia”

Ao e faitau i le 3 Nifae 27–4 Nifae, mafaufau i mea na tutupu, mafaufauga, tusitusiga paia, ma tala o le a fesoasoani i tamaiti ia malamalama i manatu i nei mataupu.

Tusi Faamaumau Ou Lagona Uunai

aikona e fefaasoaai

Valaaulia le Fefaasoaai

Fesoasoani i tamaiti e manatua mea na latou aoaoina i nai vaiaso talu ai e uiga i mea na aoao atu e Iesu i tagata i le laueleele o Nuumau. Faamalamalama atu o le Tusi a Mamona o loo taʻu mai ai le ala na faamanuiaina ai tagata pe a latou usiusitai i mea na aoao atu e Iesu ia i latou.

aikona o le aoao atu

Aoao atu le Aoaoga Faavae: Tamaiti Laiti

3 Nifae 27:1-22

Ou te auai i Le Ekalesia a Iesu Keriso.

E mafai faapefea e upu a le Faaola i Ona soo ona fesoasoani i tamaiti ia malamalama i le taua o le auai i le Ekalesia a Iesu Keriso?

Gaoioiga e Mafai Ona Fai

• Fai atu i tamaiti taitasi e ta’u mai lona igoa. Aisea e taua ai o tatou igoa? Taʻu atu ia i latou na mananao soo o Iesu e iloa le mea e tatau ona latou faaigoaina ai le Ekalesia a Keriso. Faitau atu ia i latou le tali a le Faaola i totonu o le 3 Nifae 27:7. O ai na fai mai Iesu e tatau ona faaigoa ai Lana Ekalesia?

• Fai se pine e faimai “Ekalesia a Iesu Keriso o le Au Paia o Aso e Gata Ai ua ou auai” mo tamaiti taitasi e fai i le fale. Tuu atu i tamaiti e valivali a latou pine. Usu le “O Le Ekalesia a Iesu Keriso” (Tusipese a Tamaiti,48) o se vasega. Tau atu le mafuaaga ua e loto faafetai ai e auai i le Ekalesia, ma fesili atu i tamaiti pe aisea latou te loto faafetai ai mo le Ekalesia.

• Fesoasoani i tamaiti e tuu faatasi le paso i le itulau o gaoioiga a lenei vaiaso. Faamalamalama atu e finagalo Iesu ina ia fausia Lana Ekalesia i luga o Lana talalelei, ma faaaoga le itulau o gaoioiga e talanoa i tamaiti i le uiga o lena mea.

4 Nifae 1:2–3, 15–17

O le Ola ai i le talalelei e aumaia le olioli ia te au.

O le fiafia o tagata o loo faamatalaina i le 4 Nifae e mafai ona fesoasoani i tamaiti e aoao e uiga i le olioli lea e sau mai le ola ai i le talalelei.

Gaoioiga e Mafai Ona Fai

• Valaaulia tamaiti e talanoa e uiga i mea e faafiafia ai i latou. Taʻu atu i tamaiti e uiga i le fiafia o tagata i le 4 Nifae, faitau fuaiupu autu mai fuaiupu 2–3 ma le 15–17. E mafai foi ona e faasino i le “Mataupu 48: Filemu i Amerika” (Tala o le Tusi a Mamona, 136–37, po o le vitio talafeagai i luga o le ChurchofJesusChrist.org). Ia faamamafa atu sa fiafia tagata ona ua liua i latou i le Alii, sa latou ola i poloaiga, ma sa latou fealofani.

• Faaali atu ata o tagata fiafia. Faamatala atu o tagata i le 4 Nifae e tusa ma le 200 tausaga o le fiafia aua na latou taumafai uma lava e ola i le talalelei. Fesoasoani i tamaiti e mafaufau i ni nai poloaiga e mafai ona latou usita’ia. Mo se faataitaiga, e mafai ona e faitau atu ia i latou le 4 Nifae 1:15 e aoao atu e leʻi toe fefinauaʻi tagata. Valaaulia tamaiti e faatino le usiusitai i poloaiga na latou mafaufauina. Usu faatasi se pese e uiga i le olioli lea e mai i le ola ai i le talalelei, e pei o le “Pe A Tatou Fesoasoani” (Tusipese a Tamaiti,108).

• Faitau fuaitau mai le 4 Nifae 1:24–29, 34–35, ma le 43 o loo faamatalaina ai le mea na tupu ina ua taofia e nisi o sa Nifae le tausia o poloaiga. A o e faia, valaaulia tamaiti e fai se foliga faanoanoa pe a latou faalogo i se mea e le fiafia. Molimau atu o le tausia o poloaiga e taitaiina atu ai i le fiafia.

aikona o le aoao atu

Aoao atu le Aoaoga Faavae: Tamaiti Matutua

3 Nifae 27:3–8

Ou te auai i Le Ekalesia a Iesu Keriso.

Mafaufau pe o le a faapefea ona e fesoasoani i tamaiti o loo e aoaoina ia iloa faamanuiaga sili e oo mai ona o le avea ma tagata o le Ekalesia a Iesu Keriso.

Gaoioiga e Mafai Ona Fai

• Fesoasoani i tamaiti e faitau le 3 Nifae 27:3, saili mo le fesili na fesili atu ai soo o Iesu ia te Ia. Ona valaaulia lea o i latou e suesue le 3 Nifae 27:5--8 mo le tali. E tusa ai ma nei fuaiupu, aisea e taua ai le igoa o le Ekalesia?

• Fesoasoani i tamaiti e mafaufau i vaega eseese latou te auai, e pei o se aiga po o se vasega a le Peraimeri. Fai atu ia i latou e taʻu atu ia te oe mea latou te fiafia e uiga i le auai i vaega taitasi. Fai atu i tamaiti e fesoasoani ia te oe e tusia upu taitasi o le igoa o le Ekalesia i se isi fasipepa. Ona faafefiloi lea o pepa, ma valaaulia tamaiti e faatulaga lelei nei upu. O a faamanuiaga ua tatou maua ona o i tatou o tagata O Le Ekalesia a Iesu Keriso o le Au Paia o Aso e Gata Ai?

3 Nifae 27:13-22

Ua fausia le Ekalesia a Iesu Keriso i luga o Lana talalelei.

Na aoteleina e le Faaola Lana talalelei i totonu 3 Nifae 27. E faapefea ona fesoasoani Ana afioga i tamaiti ina ia malamalama i le talalelei?

Gaoioiga e Mafai Ona Fai

• Faamatala atu i tamaiti o le upu talalelei o lona uiga o le “tala lelei” (tagai Bible Dictionary, “Gospels”). Fesoasoani i tamaiti e suesue le 3 Nifae 27:13--15 mo se vaega e foliga mai o se tala lelei ia i latou. Aisea tatou te loto faafetai ai i le iloa o le talalelei a Iesu Keriso?

• Tusi i luga o le laupapa mataupu faavae o le talalelei e pei o le faatuatua, salamo, papatisoga, o le Agaga Paia, ma le tumau se’i oo i le iuga. Valaaulia tamaiti e suesue le 3 Nifae 27:19--21, vaavaai mo nei upu po o upu talitutusa i le faamatalaga a Iesu i Lana talalelei.

• Fai atu i tamaiti e mafaufau faapea e i ai se latou uo na fesili atu ia i latou i mea latou te talitonu i ai o se tagata o le Ekalesia. Fesoasoani ia i latou e saili upumoni i le 3 Nifae 27:13--21 e mafai ona latou faasoa atu e tauaofai ai mea tatou te talitonu i ai.

• Valaaulia tamaiti e filifili se tasi o upumoni o le talalelei na aoao mai e le Faaola i le 3 Nifae 27:13–21 latou te mananao e aoao atili e uiga i ai. Fesoasoani ia i latou e faaaoga vaefaamatalaga, Taiala mo Autu, po o le Taiala i Tusitusiga Paia e sue se mau po o ni mea e lua e fesootai ma lena upumoni. Valaaulia i latou e faasoa atu a latou tusitusiga paia i le tasi ma le isi ma mea na latou aoaoina. Aisea tatou te faafetai ai i le iloa o le talalelei a Iesu Keriso?

4 Nifae

E aumaia e le talalelei le olioli ia te au.

Talu ai ona ua liua i latou ia Iesu Keriso ma Lana talalelei, o tagata na faamatalaina i le 4 Nifae na mafai ona faatuina se sosaiete o le filemu ma le lotogatasi. O le a se mea e mafai ona aʻoaʻoina e tamaiti mai ia i latou?

Gaoioiga e Mafai Ona Fai

• Saunia ni fasipepa o iai fuaitau mai le 4 Nifae 1:2–3, 5, ma le 15–17 o loo faamatalaina ai faamanuiaga na maua e tagata (e pei o le “leai se finauga i le laueleele”). Tuu pepa i totonu o se fagu, ma tuu atu i tamaiti taitasi e filifili se tasi ma faitau. Uunai tamaiti e sue la latou fuaitau i nei fuaiupu mai 4 Nifae. O a mea tatou te aʻoaʻoina mai nei fuaitau? O a mea tutusa tatou te vaʻaia i le va o nei fuaiupu ma le faʻamalamalamaina o Siona i totonu o le Mose 7:18?

• Ina ia fesoasoani i tamaiti e faataitai mea o loo aoaoina i le 4 Nifae 1: 15-16, ia tuuina atu ia i latou i tulaga e feita ai tagata. Valaaulia i latou e faatino pe o le a le tulaga atonu e ono i ai pe afai latou te taumafai e ola i le “leai se finauga.” Aisea e faigofie ai ona aloese mai finauga pe a tatou maua le “alofa i le Atua” i o tatou loto?

• Faitau faatasi ma tamaiti fuaiupu nei, ma fai atu ia i latou e saili mafuaaga na le toe maua ai e le au sa Nifae ma sa Lamana le filemu ma le fiafia: 4 Nifae 1:20, 24–29, 34–35, ma le 43. E mafai faapefea ona tatou aloese mai nei faafitauli? Fesoasoani i tamaiti ia iloa auala e mafai ai ona tatou aloese mai le mitamita e ala i le toe iloiloina Aoaoga a Peresitene o le Ekalesia: Ezra Taft Benson (2014), 238–39.

aikona o le aoaoina

Fautuaina le Aoaoina i le Aiga

Uunai tamaiti e filifili se mea se tasi o le a latou faia e aumaia ai le filemu ma le fiafia e sili atu i o latou fale ma fefaasoaai ma o latou aiga.

Faaleleia o Lo Tatou Aoao Atu

Lagolago atu i matua o tamaiti. “O matua o faiaoga aupito taua ia mo a latou fanau—e iai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7). A o e aoao atu tamaiti i le lotu, saili ma le agaga tatalo e lagolago atu i o latou matua i la latou matafaioi taua” (Aoao Atu i le Ala a le Faaola, 25).

itulau o gaoioiga: Ou te auai i le Ekalesia a Iesu Keriso