“Okitobwa 12–18. 3 Nibwaai 20–26: ‘Ataein te Berita ae Tabu Ngkami,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Okitobwa 12–18. 3 Nibwaai 20–26,” Nakomai, Iriirai—Ibukiia Aomata n Tatabemaniia ao Utu: 2020
Kamataataan tamnein Kristo ni kaoti nakoia Nibwaite iroun Andrew Bosley
Okitobwa 12–18
3 Nibwaai 20–26
“Ataein te Berita ae Tabu Ngkami”
Ngke e taetae iaon koroboki aika tabu, e aki toki ni kabongana te taeka aei Iesu ukeuke (taraa 3 Nibwaai 20:11; 23:1, 5). Ngkana ko wareka 3 Nibwaai 20–26, tera ae ko na ukoukoria?
Korea Am Namakin
Ngkana ko ongo bwa a kabonganai aomata taeka n aron te bata are i Iteraera, ko namakinna ae kanga a taetae ibukim? Nibwaite ao Reimwanaite bon kanoa raoi mai Iteraera—aia karaki a moanaki mai i Ierutarem—ma nakoia tabeman mai ibuakoia, e riai Ierutarem n tia n taraaki bwa kanga “te aba ae raroa, te aba ae ti aki ataia (Ereman 16:20). Eng, bon “kaain mwaangan te kai are Iteraera,” ma “e a tia ni bua man rabwatana” (Aramwa 26:36; Taraa naba 1 Nibwaai 15:12). Ma ngke e kaoti te Tia Kamaiu nakoia, E tangiria bwa a na ataia ae aki bua Irouna. “Ngkami kaain te bata are Iteraera,” E taku, “ao ngkami kaain te berita are e tabu” (3 Nibwaai 20:25). E na taekina te bwai ae ti tebo nakoim n te bong aei, ibukina bwa ane e bwabetitoaki ao ni karaoi berita aika tabu ma Ngaia bon kaain naba te bata are Iteraera, “n te berita ae tabu,” n aki tabe bwa ko ruo mai iroun antai ke ko maeka ia. N taekana tabeua, ngke e taetae ibukin te bata are i Iteraera, E taetae ibukim. Te kaetieti ni kakabwaiaia “ni kabane kaain te aonaaba” bon ibukim (3 Nibwaai 20:27). Te kakao n “uti riki, ao katoka korakoram” bon ibukimi (3 Nibwaai 20:36). Ao Ana berita ae kakawaki, “Au akoi e bon aki kona ni kitaniko, ao e aki kamwaingaki au berita n rau ae tabu,” bon ibukimi (3 Nibwaai 22:10).
Iango ibukin Am Kamatebwai I Bon Iroum ni Koroboki Aika Tabu
Inanon boong aika kaitira, e na karaoi mwakuri te Atua aika korakora ma ni kamimi.
Te Tia Kamaiu e anganiia aika uaanao tabeua berita aika kamimi ao n taetae ni burabetiia aroia Ana aomata n te berita ae tabu nakon taai aika a na roko—ko rin naba iai. N aron are e taekinna Beretitenti Russell M. Nelson: “Ti mena ibuakoia Ana aomata te Uea aika a mena inanon te berita. Iai ara tai n iri ni kakoroi nanon berita aikai. Ai kamimiira te tai ni maiu aei!” (“The Gathering of Scattered Israel,” Ensign ke Riaona, Nob. 2006, 79).
Kakaai taeka ni burabeti ibukin boong aika kaitira n ana taeka te Tia Kamaiu n 3 Nibwaai 20–22. Tera mai ibuakon taeka ni burabeti aikai aika a kakukurei nakoim? Tera ae ko kona ni karaoia ni kakoroi nanon taeka ni burabeti inano mwakoro aikai?
Taraia bwa e taekinaki n 3 Nibwaai 21:1–7 bwa kaotin Ana Boki Moomon (“bwaai aikai” n kiibu 2 ao 3) bon kanikinaean ae a tia ana berita te Atua ni moanaki ni kakoroaki bukiia. Tera berita aikai, ao e kanga Ana Boki Moomon n ibuobuoki ni kakoroi bukiia?
Taraa naba Russell M. Nelson, “Hope of Israel” (worldwide devotional for youth, Tuun 3, 2018), broadcasts.ChurchofJesusChrist.org.
3 Nibwaai 20:10–12; 23; 26:1–12
E tangirai te Tia Kamaiu bwa N na ukoukori aia taeka burabeti.
Ana taeka ao ana mwakuri Iesu ni kabutaa te mwakoro aei e kaota aron Ana namakin ibukin koroboki aika tabu. Tera ae ko reiakinna ni booki aika tabu inanon 3 Nibwaai 20:10–12; 23; ao 26:1–12? Tera ae ko kunei inanon kiibu aikai ae kaungako bwa ko na “ukoukori bwaai aikai ma te botumwaaka”? (3 Nibwaai 23:1).
E korakora ana akoi te Atua nakoia naake a oki Nakoina.
N 3 Nibwaai 22 ao 24, te Tia Kamaiu e taekin ana taeka Itaia ao Maraki aika a onrake n tamnein te oota ao kabotau—aan atiibu aika a karanaki, kooro inanon te ai, tirewa aika a kaitiakaki raoi, wintoon karawa. E na kakaongora riki ngkana ko koroi ni karinanii. Tera ae reireiniko n tatabeua n ana reitaki te Atua ma Ana aomata? Te katooto, 3 Nibwaai 22:4–8 kabotaua te Atua bwa te bumwaane ao Ana aomata bwa buaine. Warekan taekan tamnei aikai e na kawaekoako bwa ko na iangoa aron am reitaki ma te Uea. A kanga berita inanon mwakoro aikai n tia ni korobukiia inanon maium? (taraa riki 3 Nibwaai 22:7–8, 10–17; 24:10–12, 17–18).
E riai n rairaki nanou nakoia au bakatibu.
Te berita n okin Eria are e a kaman kariariaaki irouia Iutaia n kabuta te aonaaba inanon tienture. Aika Itiaki ni Boong Aika Kaitira a ataia ae e a tia n oki Eria, are e kaoti nakon Iotebwa Timiti inanon te Kirtland Tembora n te 1836 (taraa RB 110:13–16). Te mwakuri n rairi naano nakoia taama—te mwakuri n te tembora ao n rongorongon te utu—e a tia ni waaki inanon tabeua te tai. Tera taneiai aika ko a tia ni karekei are a buokiko n raira nanom nakoia am bakatibu?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
3 Nibwaai 22:2
Imwiin warekan te kibu aei, tao ko kona ni karaoa te umwanrianna ae karaoaki ao taekinna bwa e kanga te Ekaretia n ti tebo ma te umwanrianna n te rereua. Tera ae nanonaki ni “kananaui [ana] bwai ni kabaebae ao “kamatoatoai [ana] titeiki”? Ti kanga ni kaoia tabeman bwa a na kakaea “katanaia” n te Ekaretia? (taraa te witeo “Welcome” n ComeUntoChrist.org).
3 Nibwaai 23:6–13
Ngkana e na tuoi rekooti te Tia Kamaiu ake a tia ni kawakin ara utu, tera titiraki aika E na kona n titirakiniira iai? Iai taai aika a kakawaki ke taneiai n tamnei ae ti riai ni koroi mwiia? Aio te tai ae e na tamaroa ni karaoi ke ni karin nakon ana rekooti te utu ao bootaki ni maroroakinna bwa tera ae a na karinaki. Kaain te utu aika uarereke riki a na bae ni kukurei ni katikiraoa ami rekooti ma tamnei ko korobanna. Bukin tera e kakawaki bwa ti na koroi mwiin aia taneiai n te tamnei ara utu?
3 Nibwaai 24:7–18
Ti kanga n tia ni karekea te taneiai n te kakabwaia man kabwakaan te kabwianibwai aika beritanaki inanon kiibu aikai? Ana rongorongo Unimwaane David A. Bednar “Mataroan Karawa” (Ensign ke Riaona, Nob. 2013, 17–20) e kona ni buokiia kaain te utu ni kinai kakabwaia aikai.
3 Nibwaai 25:5–6
Ko na kanga ni buokiia kaain te utu ni bitii nanoia nakoia tamaia? Ko kona ni mwiokoia kaain te utu bwa a na reirei taekan temanna aia bakatibu ao n tibwauaia ma nikiraia kaain te utu te bwai ae a reiakinna (taraa FamilySearch.org). Ke kam kona ni uaia ni bootaki ni mwakuri ni kakaea temanna te bakatibu ae kainnanoi otenanti n te tembora ao ni bairea te mwananga nakon te tembora ni karaoi otenanti aikanne.
Ibukin iango riki tabeua ibukin reireinaia, ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Ara Anga reirei
Tibwaua am kakoaua. “Ko reirei bwa antai ngkoe,” E reirei Unimwaane Neal A. Maxwell. “Kateim a na rangi n ururingaki … nakon te koaua ae onoti ao n te reirei ae onoti” (“But a Few Days” [te marooro nakoia taan reirei n te Bootaki n Reirein te Aro , Tebetembwa. 10, 1982], 2). Ngkana ko tangiria n anga reirei iaon reirein te euangkerio, karaoa am kabanea n tamaroa ni maiuakina te reirei anne.
Uoti Mai Taian Rongorongo, iroun Gary L. Kapp