“Okitobwa 12–18. 3 Nibwaai 20–26: “Ngkami Ataein te Berita ae Tabu,’” Nakomai, Iriirai—Ibukin te Moanrinan: Ana Boki Moomon 2020 (2020)
“Okitobwa 12–18. 3 Nibwaai 20–26,” Nakomai, Iriirai—Ibukin te Moanrinan: 2020
Tamnein Iesu ngke e kaoti nakoia Nibwaite iroun Andrew Bosley
Okitbwa 12–18
3 Nibwaai 20–26
“Ngkami Ataein te Berita ae Tabu”
N am tai ni wareka 3 Nibwaai 20–26, “botumwaaka n ukoukori bwaai aikai” (3 Nibwaai 23:1) ni karekei koaua ake ko namakin bwa ko na tibwauaia ma ataei ake n am kiraati.
Korei Am Namakin
Kaoa te Tibwatibwa
Kabuta tamnein te Tia Kamaiu n te kiraati. Ngkana e taua te tamnei te ataei, kaoiia bwa e na tibwaua teuana te bwai ae e reirei ke e karaoia Iesu ngke E kawaria aomata ake n ana Boki Moomon. A kona n tibwaua te bwai ae a reiakinna n te mweenga ke n te Moanrinan.
Reirei te Reirei: Ataei aika a Uarereke
I kona n tataro i nanou.
Ngkana am kiraati a reiakina te tataro n te wiki ae nako, ko kona ni kabotoa am reirei iaon te reirei anne n teuana mai buakon mwakuri ni kauring aikai.
Waaki ni Kakukurei aika a Kona ni Karaoaki
-
Tuangia ataei bwa a na kaotia nakoim bwa tera ae a karaoia ngkana a tataro. Tera ae a karaoia ma baia? atuuia? mataia? Kabwarabwara bwa n tabetai ti tangiria n taetae nakon Tamara are i Karawa, ma ti aki kona ni katorobubua ke ni kamaki matara. Tera ae ti kona ni karaoia? Wareware nakoia ataei man 3 Nibwaai 20:1: “[Iesu] e tuangiia bwa a na aki toki n tataro inanoia.” Tuangia ataei bwa ko na kanga n tataro i nanom.
-
Korea te wii ao te aati iaon te burakibooti. Tuangia ataei bwa a na kotea te wii ao n tuangko tabeua bwaai aika a kona n taekin ngkana a tataro. Imwina tuangia bwa a na kotea te aati, ao kamatata bwa ti kona n taekini baikanne naba i nanora. Kaota am koaua bwa Tamara are i Karawa e atai ara namakin ma ara iango.
Kabwakaan te kabwianibwai e uoti kakabwaia.
Ataei ake a tuai ni bwabetitoaki a aki kantaningaaki bwa a na kabwaka aia kabwianibwai. Ma, e raoiroi te moantai n reireinia reirei ao kakabwaia ake a irekereke ma te tua aei.
Waaki ni Kakukurei aika a Kona ni Karaoaki
-
Ngkana iai wintoon am umwanreirei, kaoiia ataei bwa a na taraia. Tera ae kona n rin n te umwanreirei ngkana e uki te wintoo? Wareka 3 Nibwaai 24:10, ao kamatata bwa n te tai are ti kabwaka iai ara kabwianibwai, a uki “wintoon karawa”, ao a kona n roko kakabwaia nakon maiura.
-
Kaota nakoia ataei te mane 10 te maibibi (ke tabeua riki bwaai aika uarereke). Kaoiia bwa a na wareki maibibi akanne ma ngkoe. Kaota am koaua bwa ni kabane are iroura bon te kakabwaia mairoun Tamara are i Karawa. Kaokoroa teuana te maibibi, ao kabwarabwara bwa n te tai are ti kabwaka iai ara kabwianibwai, ti kaoka nakon Tamara are i Karawa kabwian are ti karekea. Kaoti tamnei aika a kaotia bwa e kanga te kabwianibwai ni kakabwaia ana Ekaretia te Uea (n aron katean temboro, kabutan te euangkerio, ao a mwaiti riki; taraa Bokin Tamnein te Euangkerio, nambwa. 109–10, 118–19).
-
Bootaki n anenea te kuna ae reirei taekan te kabwianibwai, n aron “I Want to Give the Lord My Tenth” (Aia Boki n Anene Ataei, 150). Katebenakoi mwakoro n taeka aika a reirei bwa bukin tera ti kabwaka ara kabwianibwai.
Tamara are i Karawa e tangirai bwa N na reiakin taekaia au bakatibu.
N ae taetae ni burabetiaki ni kiibu aikai, Eria e na kaoki kiing ibukin te kabaebae are e anganira te kona bwa ti na maeka ma ara utu n ae akea tokina.
Waaki ni Kakukurei aika a Kona ni Karaoaki
-
Wareka 3 Nibwaai 25:6, ao kaoiia ataei bwa a na katei baia ni katoaa te tai are a ongo te taeka ae “nanoia.” Kamataata bwa Tamara are i Karawa e tangiria “ataei”—ngaira ni kabane—n reiakina taekan ao n namakina te tangira ibukia “kaaro”—ara karo, tibura, ao tibutorura.
-
Kaoa temanna te karo ke temanna te ataei bwa e na taekina rongorongoia aia bakatibu. Ke karakina rongorongon temanna am bakatibu; kaoti tamneia ngkana iai. Kaota am koaua bwa Tamara are i Karawa e tangirira bwa ti maeka ma ara utu n aki toki, ao aio bukina ngkai E anganira tembora. Bootaki anenea “Families Can Be Together Forever” (Aia Boki n Anene Ataei, 188).
Reirei te Reirei: Ataei aika a Ikawai
I kona ni botumwaaka n ukoukori koroboki aika tabu.
Te Tia Kamaiu e tuangia aomata ake a uanao bwa a na ukoukori koroboki aika tabu, ao E tangiria bwa a na taraia bwa a korei aia taeka burabeti (taraa 3 Nibwaai 23:1, 5–13; 26:2).
Waaki ni Kakukurei aika a Kona ni Karaoaki
-
Kaoiia ataei bwa a na wareka 3 Nibwaai 23:1, 5 ao kakaea te taeka ae kaokiokaki teniua te tai. Tera nanon ukoukoran aia taeka burabeti? E kanga ni kaokoro te ukeuke ao ae ti te wareware? Tuangia ataei bwa ko kanga n ukori koroboki aika tabu ao tera ko reiakinii mai iai.
-
Anganiia ataei te kaati ae uarereke ke te mwakoro ni beeba, ao kaoiia bwa a na korea te kibu ae a tatangiria. (Anganiia iango ngkana e kainnanoaki.) Anganiia bwa a na ikaruoruo ni karabai aia kaati inanon te umwanreirei ao nikiraia ataei a karabai mataia. Tuangia ataei bwa a na ukori koroboki aika tabu, ao ngkana a kune, bootaki ni warekia. Tera ae ti kunea n te kibu aei ae kakawaki nakoira?
Kabwakaan te kabwianibwai e kauka wintoon karawa.
N am tai ni reireia ataei taekan te kabwianibwai, ko katauraoia ni karekea te “kakabwaia n te aro are e na aki tau nnena ibukin butimwaeana” (3 Nibwaai 24:10).
Waaki ni Kakukurei aika a Kona ni Karaoaki
-
Korea ae kangai iaon te burakibooti Ngkana I kabwakaa au kabwianibwai, te Uea e na . Kaoiia ataei bwa a na wareka 3 Nibwaai 24:8–12, ao buokia kakaei mwakoro n taeka ni kabwanina te kibuntaeka aei. Tibwaua te bwai ae ko a tia n rinanona ike ko kakabwaiaki ibukina bwa ko kabwakaa am kabwianibwai.
-
Korei tabeua mwaitiin te mwane iaon te burakibooti, ao buokia ataei bwa a na kakaea bwa iraua aia kabwianibwai (10 baetienti) are a riai n anga ibukin mwaiti akanne. Kaota nakoia aron kanoaakin beeban te kabwianibwai.
-
Buokia ataei ni korei iaon te burakibooti tabeua kawai are e kabonganaki iai te kabwianibwai ni kakabwaia ana Ekaretia te Uea (ni katei tembora, kabutaanako te euangkerio, boreti koroboki aika tabu, ao a mwaiti riki). Tuangia ataei bwa a na korei tamnei ( ke ni kakaei tamnei n ana maekatiin te Ekaretia) ake a kaoti bwa e kanga te kabwianibwai ni kakabwaia te Ekaretia.
Tamara are i Karawa e tangirai bwa n na reiakin taekaia au bakatibu.
Iangoia bwa ko na kanga ni kaungaia ataei bwa a na ukeri aia bakatibu n te aro are ngkana a roro n rin n te tembora, a kona ni karaoi otenanti ibukia aia bakatibu.
Waaki ni Kakukurei aika a Kona ni Karaoaki
-
Tuangia ataei bwa 3 Nibwaai 25:5–6 iai inanona te taetae ni burabeti ibukin te bwai ae e na riki ni boong aika kaitira. Kaoiia bwa a na wareki kiibu aikai ni kakaea bwa tera. Kaota am koaua bwa te taetae ni burabeti e a tia ni koro nanona, ao kaoiia ataei bwa a na wareka taekana n Reirei ao Berita aika Tabu 110:13–16 (taraa naba Bokin Tamnein te Euangkerio, nambwa. 95). Kamatata bwa n te tai are ti reiakinii iai taekaia ara bakatibu man karaoi mwakuri n te tembora ibukia, nanora a rairaki nakoia ara karo.
-
Tuangia ataei rongorongon temanna am bakatibu are e mate ao e aki reke ana tai ni bwabetitoaki. Kaota tamneina ngkana iai. Kaota am koaua bwa Tamara are i Karawa e tangira te aomata aei, ao E katauraoa te kawai ibukina bwa e na karekea te bwabetito rinanon te mwakuri are e karaoaki n taian tembora. Tuangia ataei bwa a na kakaea te mwakoro n taeka man 3 Nibwaai 25:6 are e kona ni kabwarabwara am namakin ibukin am bakatibu.
-
Buokia ataei ni kanoa rikiia ma aran aia karo ao tibuia. Kaungaia bwa a na tuangia aia karo bwa a na buokia ni karini riki aara.
Kaungaa te Kamatebwai n te Mweenga
Kaoiia ataei bwa a na tuangiia aia karo ke tibuia bwa a na karakini nakoia rongorongoia aia bakatibu.
Kanakoraoan Ara Anga reirei
A reiakinii bwaai ataei n aanga aika mwaiti. Ataei a kukurei n reireinaki ni kawai aika boou man kakaokoro. Kabonganai mwakuri ni kauring ake e na anganiia te kona ni mwainging, ni kabonganai aia namakin, ao ni katai baika a boou. (Taraa Reirei n ana Kawai te Tia kamaiu,25.)