“Okitobwa 19–25. 3 Nibwaai 27–4 Nibwaai: ‘Akea Riki te Botanaomata n ai Aroia ae a Kukurei,’” Nakomai, Iriirai—Ibukin te Moanrinan: Ana Boki Moomon 2020 (2020)
“Okitobwa 19-25. 4 Nibwaai 27-4,” Nakomai, Iriirai—Ibukin te Moanrinan: Ana Boki Moomon 2020
Ana Tataro Kristo, iroun Derek Hegsted
Okitobwa 19–25
3 Nibwaai 27–4 Nibwaai
“Akea Riki te Botanaomata n ai Aroia ae a Kukurei”
Ngkai ko wareka 3 Nibwaai 27–4 Nibwaai, iangoi bwaai ake a rinanona, iango, koroboki aika tabu, ao karaki ake a na kona ni buokiia ataei n ota n reirei inanon mwakoro aikai.
Korei Am Namakin
Kaoa te Tibwatibwa
Buokiia ataei ni kauringa te bwai are a tia n reiakinna ni wiiki aika a nako n te bwai are e reireiniia aomata iai Iesu n te aba ni Mari. Kabwarabwara bwa Ana Boki Moomon e tuangiira aroia aomata ni kakabwaiaki ngke a ongotaeka ni bwaai ake e reireiniia Iesu.
Reirei te Reirei: Ataei aika a Uarereke
Ngai bon Kaain Ana Ekaretia Iesu Kristo.
E kanga ana taeka te Tia Kamaiu nakoia Ana reirei ni buokiia ataei n ota ni kakaawakin kainakin ana Ekaretia Iesu Kristo?
Waaki ni Kakukurei aika a Kona ni Karaoaki
-
Tuangiia ataei n tatabemaniia bwa a na atonga aran teuanne ke neienne. Bukin tera a kakaawaki arara? Tungiia bwa ana reirei Iesu a tangiria ni kan ataia bwa tera te ara ae a na arana iai ana Ekaretia Kristo. Wareka nakoia ana kaeka Iesu n 3 Nibwaai 27:7. Antai ae e taekinna Iesu bwa e na aranaki iai Ana Ekaretia?
-
Karaoa te baeti are e kangai “Ngai bon Kaain Ana Ekaretia Iesu Kristo Ibukiia Aika Itiaki ni Boong aika Kaitira” ibukiia ataei n tatabemaniia bwa a na bwainna n okira mweengaia. Anganiia ataei bwa a na karani aia baeti. Anenea “The Church of Jesus Christ” (Aia Boki n Anene Ataei, 77) n te kiraati. Tuangiia bwa bukin tera ko kakaitau ibukin kaainakin te Ekaretia, ao titirakiniia ataei bwa bukin tera ngkai a kakaitau ibukin kaainakin te Ekaretia.
-
Buokiia ataei bwa ana karaoi kamwaninga iaon te iteranibwa ni waaki ni kakukurei ibukin te wiiki aei. Kabwarabwara bwa Iesu e tangira Ana Ekaretia bwa e na kateaki iaon Ana euangkerio, ao ni kabongana te iteraniba ibukin te waaki ni kakukurei ni maroro iai nakoia ataei n te bwai are e kananona.
Maiuakinan te euangkerio e uota te kimwareirei.
Kukureia aomata are e kabwarabwaraaki n 4 Nibwaai e kona ni buokiia ataei n reiakina taekan te kimwareirei are e roko man maiuakinan te euangkerio.
Waaki ni Kakukurei aika a Kona ni Karaoaki
-
Kaoiia ataei bwa a na taekin bwaai ake a kukurei iai. N tuangiia ataei taekan kukureia aomata n 4 Nibwaai, wareki kibuntaeka aika kakawaki man kiibu 2–3 ao 15–17. Ko kona naba ni kaineti nakon “Mwakoro 48: Te Rau i Amerika” (Karaki man ana Boki Moomon, 136–37, ke te witeo are e irekereke ma ngaia iaon ChurchofJesusChrist.org). Katuruturua bwa aomata a kukurei ibukina bwa a rairaki nakon te Uea, a maiuakin tuua, ao a itangitangiri imarenaia.
-
Kaota tamneia aomata aika a kukurei. Kabwarabwara bwa aomata n 4 Nibwaai e reke irouia ae kaan 200 te ririki ni kimwareirei ibukina bwa a bane ni karaoa aia kabanea n tamaroa ni maiuakina te euangkerio. Buokiia ataei n iangoi tabeua tuua ake a kona n ongotaeka iai. Te katoto, ko kona ni wareka nakoia 4 Nibwaai 1:15 n reireiniia bwa aomata aki mang un imarenaia. Kaoiia ataei bwa a na karaoa te kaotioti iaon kawakinan te tua are e reke n aia iango. Baane anenea te kuna iaon te kukurei are e roko man maiuakinan te euangkerio, n aron “When We’re Helping” (Aia Boki n Anene Ataei,198).
-
Wareki kibuntaeka man 4 Nibwaai 1:24–29, 34–35, ao 43 are e kabwarabwara te bwai ae riki ngkana tabeman mai irouia Nibwaite a katoka kawakinan tuua. Ngkai ko karaoi, kaoiia ataei bwa a na karaoa te ubu ae nanokawaki ngkana a ongo te bwai ae kananokawaki. Kakoaua bwa kawakinan tuua e kairi nakon te kakukurei.
Reirei te Reirei: Ataei aika a Ikawai
Ngai bon kaain Ana Ekaretia Iesu Kristo.
Iangoia bwa ko na kanga ni buokiia ataei ni kinai kakabwaia aika a korakora ake a roko man kainakin ana Ekaretia Iesu Kristo.
Waaki ni Kakukurei aika a Kona ni Karaoaki
-
Buokiia ataei bwa a na wareka 3 Nibwaai 27:3, n taratarai titiraki ake ana reirei a titirakina iai Iesu. Ngkanne kaoiia bwa a na taraa 3 Nibwaai 27:5–8 ibukin te kaeka. Ni kaineti ma kiibu aikai, bukin tera e rangi ni kakaawaki aran te Ekaretia?
-
Buokiia ataei bwa a na iangoi kurubu aika a kakaokoro ake a mena inanona, n aron te utu ke te kiraati n te Moanrinan. Tuangiia bwa ana tuangko bwa tera ae a tangiria ni kainakin kurubu akanne. Tuangiia ataei bwa a na buokiko ni korei manin aran te Ekaretia iaon mwakoro ni beeba aika kaokoro. Ngkanne rengani beeba, ao kaoiia ataei bwa ana kaeti raoi taeka aikai nakon nneia. Tera kakabwaia aika ti a tia ni karekei ibukina ngkai ti kaaina Ana Ekaretia Iesu Kristo ibukiia Aika Itiaki ni Boong aika Kaitira?
Ana Ekaretia Iesu Kristo e kateaki iaon Ana eungkerio.
Te Tia Kamaiu e taekinna ni kakimototoa Ana eungkerio inanon 3 Nibwaai 27. A na kanga Ana taeka ni buokiia ataei n ataia bwa tera te euangkerio?
Waaki ni Kakukurei aika a Kona ni Karaoaki
-
Kabwarabwara nakoia ataei bwa te taeka gospel nanona “te rongorongo ae raoiroi” (taraa Bible Dictionary, “Gospels”). Buokiia ataei ni kakaea n 3 Nibwaai 27:13–15 te bwai ae e tara n tamaroa rongorongona irouia. Bukin tera ti kakaitau ngkai ti ata ana euangkerio Iesu Kristo?
-
Korea iaon te burakibooti reirein te euangkerio n aron onimaki, rairannano, bwabetito, te Tamnei ae Raoiroi, ao teimatoa ni ua te toki. Kaoiia ateai bwa ana kakae 3 Nibwaai 27:19–21, n taratarai taeka aikai ke taeka aika titebo n ana kabwarabwara Iesu n Ana euangkerio.
-
Tuangiia ataei bwa a na iangoia bwa iai raraoia aika a titirakiniia te bwai are a kakoaua ngkai a kaina te Ekaretia. Buokiia ni kakaea te koaua inanona 3 Nibwaai 27:13–21 bwa a na kona ni tibwaia ni kakimototoa te bwai are a kakoaua.
-
Kaoiia ataei bwa a na rinea teuana te koaua man ana euangkerio te Tia Kamaiu are e reiakinna inanon 3 Nibwaai 27:13–21 are a kan reiakina riki taekana. Buokiia bwa a na kabongana te footnotes, Topical Guide, ke Bwai ni Kairi nakon koroboki aika tabu ni karekei teuana te korobki ke uoua ake a irekereke ma te koaua anne. Kaoiia bwa a na tibwa aia kibu ma tabeman n te bwai are a reiakinna. Bukin tera ti kakaitau n ataakin ana euangkerio Iesu Kristo?
Maiuakinan te euangkerio e uota te kakukurei.
Ibukina bwa a rairaki nakon Iesu ao Ana euangkerio, aomata ake a kabwarabwaraaki inanon 4 Nibwaai a kona ni katea te bootaki ae rau man katiteuanaaki. Tera ae a kona n reiakinna ataei man rongorongo aikai?
Waaki ni Kakukurei aika a Kona ni Karaoaki
-
Katauraoi mwakoro ni beeba ma kibuntaeka man 4 Nibwaai 1:2–3, 5, ao 15–17 are e kabwarabwarai kakabwaia ake a karekei aomata (n aron ae “akea te itabarara iaon te aba”). Katikui beeba inanon te kaonteina, ao kariaia ataei bwa a na anai kaka teuana ni warekia. Kaungaia ataei bwa a na kakaai aia kibuntaeka man kiibu aikai man 4 Nibwaai. Tera ae kam reiakinna man kiibu aikai? Tera ae a titebo iai are ti noori imarenan kiibu ao kabwarabwaraan Tion inanon Mote 7:18?
-
Ni buokiia ataei bwa a na karaoi bwaai ake a reireinaki inanon 4 Nibwaai 1:15–16, kaotii nakoia aaro ake a mena inanona ngke aomata a un imarenaia. Kaoiia bwa a na karaoia n te kaotioti tera ae e na kona n riki ngkan a taiai ni maeka n “akea te itabarara.” Bukin tera e bebete riki totokoan te itabarara ngkana iai iroura “ana tangira te Atua” inanora?
-
Warekia ma ataei kibu aikai, ao tuangiia bwa a na kakaai bukina ngkai Nibwaite ao Reimwanaite a karekea te rau ao te kukurei: 4 Nibwaai 1:20, 24–29, 34–35, ao 43. Ti na kanga ni kona n totokoi kaangaanga aikai? Buokiia ataei bwa a na atai kawai ake ti kona iai n totokoi aro ni kainikatonga man rinanoan Teachings of Presidents of the Church: Ezra Taft Benson (2014), 238–39.
Kaungaa te Kamatebwai n te Mweenga
Kaungaaia ataei bwa a na bairea teuana te bwai ae a na karaoia bwa e na uota riki te rau ao te kukurei nakon mweengaia ao n tibwaia ma aia utu.
Kanakoraoan Ara Anga reirei
Boutokaia aia karo ataei. “A bon rangi ni kakawaki kaaro bwa taan reireia te euangkerio nakoia natiia—iai irouia te mwiokoaki ao te korakora ni kairoroia natiia (taraa Te Tua Kaua 6:6-7). N am tai n reireiniia ataei n tain te taromauri, tataromwaaka bwa a na reke kawai ake ko kona ni boutokaia iai kaaro n tibwangaia ae kakaawaki” (Reirei n Ana Kawai te Tia Kamaiu, 25).