Ootan Moamoana e bon oota i Aoia, iroun Gary L. Kapp

Tebetembwa 28–Okitobwa 11

3 Nibwaai 17–19

“Nooria, E a Bwanin Kukureiu”

N am tai ni wareka 3 Nibwaai 17–19, iangoi kibu, taneiai, ao mwakuri ni kauring, ma karaki aika a na buokiia ataei ni kamatataia ni koaua aika n te mwakoro aei.

Korei Am Namakin

Kaoa te Tibwatibwa

Kaota tamnein te Tia Kamaiu, ao kaoiia ataei bwa a na tibwaua aia namakin ngke arona bwa E na kawaria n aron are E karaoia nakoia Nibwaite.

Reirei te Reirei: Ataei aika a Uarereke

3 Nibwaai 17:7, 20–25

Te Tia Kamaiu e tangiriia ni kabane natin Tamara are Karawa.

Iesu e kaota Ana tangira ibukiia ataei ngke E kakabwaiaia ao n tataro ibukiia. Ko na kanga ni buokiia ataei n namakina Ana tangira ibukiia?

Waaki ni Kakukurei aika a Kona ni Karaoaki

• Kakimototoa te rongorongo n 3 Nibwaai 17 n am tai n kaota te tamnei n aron are inanon te kabwarabwara n te wiki aei n Nakomai, Iriirai—Ibukiia Aomata n Tatabemaniia ao Utu. Ke ko kona ni kabongana “Mwakoro 44: Iesu Kristo E kakabwaiaia Ataei,” (Karaki man Ana Boki Moomon, 124–25, ke te witeo ae irekereke ma ngaia iaon ChurchofJesusChrist.org). Wareki mwakoron n taeka ke kiibu man 3 Nibwaai 17 aika a kamatata ana tangira te Tia Kamaiu ibukiia aomata (n aron kiibu 7 ao 20–25). Angania ataei bwa a na ikaruoruo n taua te tamnei ao n taekina are karaoia Iesu ibukina bwa E tangiria aomata.

• Kabongana te iteraniba ibukin te waaki ni kakukurei n te wiiki aei ni koreia tamneia ma Iesu. N aia tai ni karaoa anne, buokiia bwa a na iangoi kawai ake e kaota iai ana tangira Iesu ibukiia.

  

  Nooria Ami Ataei, iroun Gary L. Kapp

3 Nibwaai 18:1–12

I kona n iangoa Iesu n au tai ni kana te toa.

A mwaiti bwaai aika a kona n aki karaua te ataei n tain te bootaki n toa. Ko na kanga ni buokiia ataei n am kiraati n ataa kakawakin iangoan te Tia Kamaiu ao Ana tangira ibukiia n tain te otenanti ae tabu aio?

Waaki ni Kakukurei aika a Kona ni Karaoaki

• Kaoiia ataei bwa a na tuangko bwa tera ae e riki n tain te bootaki n toa. Wareki kiibu man rongorongon Iesu ngke e karaoa te toa nakoia Nibwaite (taraa 3 Nibwaai 18:1–12), ao tuangia atei bwa a na teirake ngkana a ongo te bwai ae titebo ma are ti karaoia n te bootaki n toa. Tera ae e tangiria Kristo bwa ti na “uringnga” ke n iangoia n tain te bootaki n toa? (taraa 3 Nibwaai 18:7, 11).

• Aneneia i nanom, anene, ke katanga te anene n taromauri ke aia anene kaain te Moanrinan n aia tai ataei n karani tamnei ake a na buokiia n uringa te Tia Kamaiu n tain te bootaki n toa (taraa ana iteraniba te waaki ni kakukurei n te wiiki aei). Kaungaia bwa a na tarai tamnei aikai ni buokiia bwa a uringa Iesu n te tai are a kana iai te toa.

3 Nibwaai 18:15, 20–21, 24; 19:16–17, 30

Iesu e reireinai aron te tataro.

Tera ae ko reiakinna ibukin te tataro n am tai ni kamatebwaia 3 Nibwaai 17–19? Ko na kanga ni kabongana te bwai are ko reiakinna n reireinia ataei aron te tataro?

Waaki ni Kakukurei aika a Kona ni Karaoaki

• Kaoti tamneia aomata aika tataro (n aron ake inanon “Mwakoro 46: Iesu Kristo E Anga reirei ao n Tataro ma Nibwaite” inanon Karaki man Ana Boki Moomon, 128–30). Kaoiia ataei bwa a na kotei baike a karaoaki n te tamnei ae kaotia bwa aomata aikai a tataro. Wareka 3 Nibwaai 19:16–17 ni kamatataa bwa Iesu e reireinira aron te tataro. Angania ataei bwa a na tuangko bwa tera aia namakin ngkana a tataro.

• Wareka 3 Nibwaai 18:21, ao kaoiia ataei bwa a na korei tamneia ma aia utu n tataro. Kaungaia ataei bwa a na kaoiia aia utu bwa a na tataro ma ngaia.

• Bootaki anenea te kuna ae reirei taekan te tataro, n aron “A Child’s Prayer” (Aia Boki n Anene Ataei, 12–13). Kaoiia ataei bwa a na tibwauaia bwa tera ae a reiakinna n te tataro man te anene anne. Kaota am koaua n te tataro.

Reirei te Reirei: Ataei aika a Ikawai

3 Nibwaai 17

Te Tia Kamaiu e tangiria natin Tamara are i Karawa.

Beretitenti Ezra Taft Benson e reirei: “I berita nakoimi, ataei aika tangiraki, bwa anera a na buoki naba ngkami. Tao kam aki kona n noriia, ma a tauraoi ni buokiko, ao ko na namakinna bwa iai ngaiia” (“To the Children of the Church,” Ensign, Meei 1989, 83).

Waaki ni Kakukurei aika a Kona ni Karaoaki

• Bootaki wareki kiibu man 3 Nibwaai 17 ake ko namakin bwa a na uaana nakoia ataei ake ko reireinia. N am tai ni wareki kiibu nako, tuangia ataei bwa a na rinea te taeka ke te mwakoro n taeka ae a taku bwa e kakawaki ao imwiina n tibwauaia bwa bukin tera a kakawaki taeka aikanne nakoia. Kaota am koaua bwa Iesu e bati n tangiriia ataei, ao aio bukina ngke E kakabwaiaia ao e tataro ibukiia.

• Kaoiia ataei bwa a na tibwauaia bwa tao tera aia namakin ngke arona bwa a mena ibuakoia ataei ake a kakabwaiaki iroun te Tia Kamaiu. Ngkana e kona, kaota te witeo ae “My Joy Is Full” (ChurchofJesusChrist.org) ni buokiia bwa a na katamaneia te bwai ae riki aei. Tera ae e karaoia te Tia Kamaiu ni kaota ana tangira? Tera ae ti kona ni karaoia ni katauraoira ni mena irarikina ngkana E a manga oki?

3 Nibwaai 18:1–12

N au tai ni kana te toa, I kona n onrake n te Tamnei ae Raoiroi.

Ti kona n reiakinna man 3 Nibwaai 18 aron kakawakin te toa nakon te Tia Kamaiu. Ko na kanga ni buokiia ataei n namakinna bwa e kakawaki ibukiia?

Waaki ni Kakukurei aika a Kona ni Karaoaki

• Buokia ataei bwa a wareka 3 Nibwaai 18:1–12. Tera ae a reiakinna ibukin te toa man kiibu aikai? Buokiia ni wareka tataron te toa n Reirei ao Berita aika Tabu 20:77 ao 79 ao ni kakaei taeka ma mwakoro n taeka n te tataro aika a kuneaki naba inanon 3 Nibwaai 18:1–12. Tera nanon taeka ao mwakoro n taeka aikai? Ti na kanga ni katauraoi imwain kanakin te toa? Tera ae ti berita, ke ni berita n ae tabu, bwa ti na karaoi ngkana ti kana te toa?

• Bootaki anenea te kuna iaon taekan te rau, n aron “Reverently, Quietly” (Aia Boki n Anene Ataei, 26). E na kanga te rau n tain anaakin te toa ni buokira n namakin te Tamnei? E kanga ni buokira ni karaoi rinerine aika raoiroi?

3 Nibwaai 18:15–24; 19:6–9, 15–36

Te tataro e na buokai ni kaan nakon Tamara are i Karawa.

Ti kona n namakina Tamara are i Karawa bwa e kaan ma ngaira rinanon te tataro. Tera rongorongo iaon te tataro n 3 Nibwaai 18–19 aika a na buokiia ataei ake ko reirei ma ngaai bwa a na katamaroa aia tataro?

Waaki ni Kakukurei aika a Kona ni Karaoaki

• Korei kiibu aikai iaon mwakoro ni beeba, ao anga nakoia ataei ke nakoia kurubu n ataei: 3 Nibwaai 18:15; 3 Nibwaai 18:20; 3 Nibwaai 18:21; 3 Nibwaai 19:19; ao 3 Nibwaai 19:24. Kaoiia ataei bwa a na wareware man koroboki aika tabu, n tarai baika a reirei Iesu Kristo ma Ana reirei iaon te tataro. Tuangia bwa a na ribootini baike a reiakin nakon te kiraati.

• Iaon te burakibooki, korea ae I karabwako ibukin . Angania ataei teuana te miniti bwa a na iangoi bwaai aika mwaiti ake a kona ni kabwanina te kibuntaeka. Bukin tera e kakawaki iroura bwa ti na kaota ara karabwarabwa nakon Tamara are i Karawa? Imwina korea I bubutiko ibukin iaon te burakibooti, ao bootaki wareka 3 Nibwaai 18:18–21 ao 19:9, 23, n taraia bwa tera ae ti riai n tataro ibukiia.

• Kaota am koaua ke tibwaa te bwai ae ko a tia n rinanona iaon mwaakan te tataro, ao kaungaia ataei bwa a na tibwaua aia koaua ma baika a tia n rinanona.

Kaungaa te Kamatebwai n te Mweenga

Kaungaia ataei bwa a na marooro nakoia aia karo ke kaain aia utu bwa e na kanga ni uaana riki aia waaki n te bootaki n toa n te Tabati are i mwina.

Kanakoraoan Ara Anga reirei

Buokiia ataei aika a uarereke n reireiaki man koroboki aika tabu. Ni buokiia ataei bwa a na reiakinaki man koroboki aika tabu, kabanea am tai iaon te kibu teuana ke te koroboki ke bon boton raoi te kibuntaeka. Ko kona ni kaoiia ataei bwa a na teirake ngkana a ongo te taeka ke te mwakoro n taeka ae onoti.