E koroboki Nibwaai iaon bwatua aika koora

Moomon e kauarerekei korobokin Bwaatua, iroun Tom Lovell

Okitobwa 26–Nobembwa 1

Moomon 1–6

“Ao I tangiria bwa N na kona ni kairoroia ni kabane … bwa a na Rairinanoia”

Bwaai ake a kabwarabwaraaki n Moomon 1–6 e kona ni kaangaanga irouia ataei bwa a na ota raoi, ma a kona n reiakin reirei man rongorongon Moomon ni maiuakina te raoiroi inanon te aonaaba ae buakaka. Ko na kanga ni kabonganai ana taneiai n reireiniia ataei bwa a na kangaa n tiku ni koaua nakon te euangkerio?

Korei Am Namakin

te aikaon ibukin te tibwatibwa

Kaoa te Tibwatibwa

Tera ae a ataia ataei n taekan Moomon? Kaoiia bwa a na tibwauai bwaai ake a atai ke a reiakinna ma aia utu. Kaota tamnein Moomon n aron are inanon te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu e kona n ibuobuoki.

te aikaon ibukin te anga reirei

Reirei te Reirei: Ataei aika a Uarereke

Moomon 1:1–3

I kona n raoiroi n ai aron Moomon.

E ngae ngke a uarereke ataei ake ko reireiniia, a kona ni karikirakea anuaia n te maiu n tamnei, ni maiuakina ae raoiroi.

Waaki ni Kakukurei aika a Kona ni Karaoaki

• Wareka Moomon 1:1–3 nakoia ataei, ke kabongana “Mwakoro 49: Moomon ao Ana Angareirei” (Karaki man Ana Boki Moomon, 138–42, ke te witeo are e irekereke ma ngaia iaon ChurchofJesusChrist.org). Kaoiia bwa a na kakauongo bwa iraua ana ririki Moomon ngke e anganna ana mition ae onoti Amaron. Ngkanne tuangiia bwa a na katei mwaitina ni baiia. Ni buokiia ataei n iangoia bwa uarerekera Moomon n te tai anne, kaota tamnein temanna ae 10 ana ririki. Buokiia bwa a na oota n anua ake e noori Amaron iroun Moomon ngke e uarereke, ao kakoaua bwa ataei a kona n riki n ai aron Moomon ngkai a iriira Iesu Kristo.

• Karaoa te takakaro are ataei a na kaokioka te mwakuri are ko karaoia. Ngkanne kaoti tamnein bwaai ake e karaoi Iesu, ao taekina aron ae ti kona iai n iriiria (taraa Bokin Tamnein te Euangkerio, nambwa. 33–35, 41–42). Maroroakin kawai ake e iriira iai Iesu Kristo Moomon—te katoto, man tataekinan te euangkerio, kaungakiia aomata bwa a na ongotaeka iroun te Atua, n tangiriia tabeman.

Moomon 3:3, 9

Tamara are i Karawa e anganai kakabwaia aika bati.

Ana reirei Moomon e kona ni buokiia ataei ni kinai kakabwaia ake e anganiira Tamara are i Karawa.

Waaki ni Kakukurei aika a Kona ni Karaoaki

• Wareka Moomon 3:3 ao 9 nakoia ataei, ao kabwarabwara bwa Nibwaite a aki ataia ae a tia ni kakabwaiaki iroun Tamara arei Karawa. Buokiia ataei n iangoi kakabwaia ake e a tia n anganiia Tamara are i Karawa. Kaoti tamnei ke bwaai n anganiia iango tabeua. Tera ae ti kona ni karaoia n te bong aei ni kaotia bwa ti kakaitau nakon Tamara are i Karawa ibukin kakabwaiakira?

• Buokiia ataei n iangoi kakabwaia ake e a tia n anganiia Tamara are i Karawa ao tuangiia bwa a na korei tamnein bwaai tabeua man kakabwaia akanne. Kaoiia bwa a na katinei aia tamnei n te auti n te tabo are a kona n noori iai ao n uringnga bwa e a tia ni kakabwaiaia Tamara are i Karawa ni kawai aika a bati. Ko kona naba ni kaoiia bwa a na kinai kakabwaia ake a roko mairoun Tamara are i Karawa ngkai a anenea te moan kibu ibukin “I Thank Thee, Dear Father” (Aia Boki n Anene Ataei, 7).

Moomon 3:12

Tamara are i Karawa e tangirai bwa N na tangiriia aomata nako.

Kona kanga ni buokiia ataei ake ko reireiniia ni karekea te namakin n tangiriia naake irarikiia?

Waaki ni Kakukurei aika a Kona ni Karaoaki

• Tuangiia ataei n tatabemaniia bwa a na korea tamnein te aomata iaon te burakibooti, ao katereterea aroia aomata n tatabemaniia ake a korei a taraa ni kaokoro ma ake tabeman. Korea te aati ae bubura ni katobibi tamnei ni kabane. Buokiia ataei bwa a na ataia bwa Tamara are i Karawa e tangiriira bwa ti na tangiriia aomata ni kabane. Wareka Moomon 3:12, katuruturui taeka aika “tangira” ao “tangiraki.” Tera ae e karaoia Moomon ni kaota ana tangira nakoia tabeman?

• Ikotaki anene n anenea taekan tangiriia tabeman, n aron ae “Jesus Said Love Everyone” (Aia Boki n Anene Ataei, 61), ngkai ko kaoti tamneia ataei ni katobibia te aonaaba. Kakoaua n ana tangira te Atua nakoia natina ni kabane. Katiaa te iteraniba ibukin te waaki ni kakukurei ma ataei.

te aikaon ibukin te anga reirei

Reirei te Reirei: Ataei aika a Ikawai

Moomon 1:1–3; 2:1, 23–24; 3:1–3, 12, 17–22

I kona n raoiroi n ai aron Moomon.

Moomon e bon rangi n uarereke ngke Amaron e ataia bwa e kona ni mwiokoaki ni kawakin rekooti aika a tabu. Tera anua aika raraoi aika ko noori irouia ataei ake ko reireiniia?

Waaki ni Kakukurei aika a Kona ni Karaoaki

• Kaoiia ataei n tatabemaniia bwa a na wareki barakaraba aikai, ao buokiia n tibwa te bwai are a reiakinna iroun Moomon: Moomon 1:1–3; 2:1, 23–24; ao 3:1–3, 12, 20–22. Ngkanne tibwai anua aika a raraoi ake ko noori irouia ataei n tatabemaniia.

• Kaota tamnein Moomon (taraa te tamnei n kabwarabwara n te wiiki aei n Nakomai, Iriirai— Ibukiia Aomata n Tatabemaniia ao Utu). Buokiia ataei n nooria bwa ibukina bwa Moomon e tau ni mwiokoaki ao ni onimakinaki ni kawakin aia rekooti Nibwaai, ti karekea ana Boki Moomon n te bong aei. Taetae ma ataei iaon te bwai ae nanonaki ni mwiokoaki ao n onimakinaki. Kaoiia bwa a na iangoi kawai ake a kona ni katabeaki riki iai.

  Moomon ngke e ataeinimwaane

  Moomon, 10 ana ririki, iroun Scott M. Snow

Moomon 2:8–15; 5:10–11

Te nanokawaki ae kaota te karinerine nakon te Atua e kairiiri nakon te bitaki ae koaua.

Moomon e nooria Nibwaite ake a buakaka bwa a nanokawaki, ma nanokawakiia tiaki are e na kaungaia n rairinanoia (taraa Moomon 2:13). Ko na kanga ni buokiia ataei n ataa te kaokoro imarenan te nanokawaki n aonaaba ao te nanokawaki ae kaota te karinerine nakon te atua are e kairi nakon te rairannano?

Waaki ni Kakukurei aika a Kona ni Karaoaki

• Korei atuun maroroo aikai iaon te burakibooti: Te nanokawaki are e kairiiri nakon te rairannano ao Te nanokawaki are e aki kairiiri nakon te rairannano. Kaoiia ataei bwa a na onomwi ni wareki kibu man Moomon 2:8, 10–15. Buokiia ni korei bwaai ake a reiakinii iaon nanokawaki iaan atuuna ae riai iaon te burakibooti. Ti na kanga ni kakoaua bwa te nanokawaki are ti namakinna ibukin ara bure e kairiira nakon te bitaki?

• Kaoiia kain te bitobiriki ke ana karo temanna te ataei n tibwaia ma te kiraati bwa e kanga te nanokawaki ae kaota te karinerine nakon te atua ni kona ni buokiira ni bitaki n riki n ai aron riki Tamara arei Karawa ao Iesu Kristo. Bukin tera e kakaawaki bwa ti na kina ngkana ti namakina te nanokawaki ae kaota te karinerine nakon te atua ke te nanokawaki n aonaaba? Kaoiia ataei bwa a na ukeukeria n Moomon 2:12 ni kakaea bukina bwa e aera te rairannano e konaa ni karika “nano[ra] … ni kukurei” (Moomon 2:12).

Moomon 3:12

I kona n namakina ana tangira Tamara are i Karawa ibukiia tabeman.

E beebete n tainako tangirakiia naake a tangiriira ao ake a tatangiriira, ma e kabwarabwara Moomon bwa n raonaki ma ana ibuobuoki Tamara are i Karawa, ti kona n tangiriia naake a kakoaua ao a karaoa ae kaokoro ma ngaira.

Waaki ni Kakukurei aika a Kona ni Karaoaki

• Buoka te ataei ni wareka Moomon 3:12, ao kaoa te ataei bwa e na korea te tiententi are e kakimototoa te bwai are a reiakinna mairoun Moomon iaon tangirakiia tabeman. Kaoiia ataei bwa a na tibwai bwaai ake a korei. Ti na kanga n namakina ana tangira te Atua ibukiia tabeman? (taraa Moronaai 7:48). Tera ae ti kona ni karaoia ni kaota ara tangira ibukiia aomata n ara kiraati ao n ara utu?

• Kaoiia ataei bwa a na katia te iteraniba ibukin te waaki ni kakukurei n te wiiki aei. Buokiia bwa a na iangoi kawai aika a nano ni kona n rootia tabeman ma te tangira nakoia naake a kaokoro ma ngaira.

te aikaon ibukin te kamatebwai

Kaungaa te Kamatebwai n te Mweenga

Kaungaia ataei bwa a na katekei n te tabo teuana te iteraniba ni waaki ni kakukurei n te wiiki aei ni mweengaia bwa a aonga ni kona ni kauringaki bwa a na kaota te tangira nakoia tabeman. Anganiia aia tai n te kiraati ae e na roko bwa a na tibwa te bwai are a karaoia.

Kanakoraoan Ara Anga reirei

Karaoi waaki ni kakukurei ni kaboraoia ma aia ririki ataei ake ko reireiniia. Ataei ake a uarereke a kainnanoi kabwarabwara aika bwarabwara raoi ao a reiakinii ni kawai aika a beebete. Ngkai a ikawai, a kona n anga riki ae mwaiti ao n tamaroa riki n tibwakin aia iango. Anganiia ni kabane ataei aia tai ni kaineti ma aia ririki bwa a na tibwatibwa, kakoaua, ao n irii, ao kakoaua bwa ko anga te ibuobuoki are e kainnanoaki. (Taraa Reirei n Ana Kawai te Tia Kamaiu, 25–26.)

te iteraniba ibukin waaki ni kakukurei: I kona n tangiriia aomata nako