E Koroboki Moronaai iaon Bwaatua aika Koora, iroun Dale Kilborn

Nobembwa 2–8

Moomon 7–9

“I Taetae Nakoimi n aron ae Aongkoa iai Ngkami”

N am tai ni wareka Moomon 7–9, iangoia bwa tera ae ko rangi n tangiria bwa a na ataia ataei ake ko reiakiniia. Katauraoi kawai ake ko na reireinia iai koaua ake ko namakin bwa a na kakabwaiai maiuia.

Korei Am Namakin

Kaoa te Tibwatibwa

Kabuta teuana ana Boki Moomon. Kaoiia ataei, ngkana e roko irouia te boki, bwa a na tibwa teuana te bwai are a tia n reiakinna man te boki. Ngkana a kainnanoa te ibuobuoki, kauringiia baike a tia n reiakin n te kiraati.

Reirei te Reirei: Ataei aika a Uarereke

Moomon 7:8–10

Ana boki Moomon ao te Baibara a uaia ni kakoaua Iesu Kristo.

E reirei Moomon bwa e koreaki ana Boki Moomon bwa ti aonga ni kakoaua te Baibara ao bwa naake a kakoaua te Baibara a na kakoaua naba ana Boki Moomon.

Mwakuri ni Kakukurei aika a kona ni Karaoaki

• Kaota nakoia ataei atun te iteraniba n ana Boki Moomon, ao kotea taekan atun te iteraniba n am tai ni warekia, ni katurua te taeka ae kakoauan taekan. Buokia ataei bwa a na iangoi tabeua riki boki aika tabu ake a reireinira taekan Iesu. Kaotia nakoia bwa n te Baibara ao iai te O Tetemanti ao te Nu Tetemanti. Tuangia ataei bwa a na taekina “O Tetemanti, Nu Tetemanti” ngkana ko kotea te Baibara ao “Kakoauan Taekan” ngkana ko kotea Ana Boki Moomon.

• Kaota mwaben te aonaaba ke te iteraniba ibukin te waaki ni kakukurei ibukin te reirei aei, n ikotaki ma te Baibara ao Ana Boki Moomon. Kabonganai bwaai aikai n reireinia ataei bwa te Baibara bon rekootin ana reirei Iesu n aonon Ierutarem ni kabuta ao Ana Boki Moomon bon rekootin Ana reirei i Amerika.

• Rinei baika a riki ao koaua ake a kakoauaki n te Baibaira ao n Ana Boki Moomon naba, n aron Bungiakin Iesu, te mate, ao te Mangauti. Kaoti tamnei man Bokin Tamnein te Euangkerio ake a kabwarabwarai baika a riki ao koaua aikai. Tuangia ataei bwa a na kabwarabwarai baike a noori n taian tamnei, ao kabwarabwara nakoia bwa te Baibara ao Ana Boki Moomon a uaia n reirei taekan bwaai aikai.

Moomon 8:3

I kona n rinea te Eti e ngae ngke I namakinna bwa i tei n ti ngai.

Moronaai bon ti ngaia ae raoiroi mai buakoia Nibwaite, ma e teimatoa nakon ana koaua. Buokiia ataei bwa a na reiakinaki man ana banna ni katoto.

Waaki ni Kakukurei aika a Kona ni Karaoaki

• Wareka Moomon 8:3, ao kabwarabwara bwa Moronaai e tei n ti ngaia, ma e teimatoa naba ni kawakin tuaa nako, n ikotaki ma te tua bwa e na katia Ana Boki Moomon. Tibwa te tai are ko kakaonimaki iai e ngae ngke ko namakinna bwa ti ngkoe.

• Imwin maroroakinan bannan Moronaai, tibwai tabeua katoto n are te ataei e na motikia bwa e na rinea te eti ke e na aki, e ngae ngke akea ae tataraia. Tera ae e na karaoia Moronaai?

• Anenea teuana te kuna ma ataei iaon rinean te eti, n aron “Stand for the Right” (Aia Boki n Anene Ataei, 159). Bukin tera e kakawaki rinean te eti n taainako, e ngae ngkai ti ngkoe?

Moomon 9:7–21

Te Atua bon “Atuan taian kakai.”

Buokia ataei bwa a na matata bwa taian kakai a kakawaki inanon ana mwakuri te Atua ao bwa e na karaoi kakai te Atua ngkana iai aia onimaki Ana aomata.

Waaki ni Kakukurei aika a Kona ni Karaoaki

• Kabwarabwara bwa te kakai bon te bwai ae karaoia te Atua ni kaota Mwaakana ao ni kakabwaiai maiura (taraa Bible Dictionary, “Miracles”). Wareki taeka ao mwakoro n taeka man Moomon 9:11–13, 17 aika a kaoti tabeua ana kakai te Atua. Buokia ataei bwa a na iangoi tabeua riki kakai ake ni koroboki aika tabu (tamnei man Bokin Tamnein te Euangkerio, n aron nambwa. 26, 40, 41, ao 83, a kona ni ibuobuoki). Kaota am koaua bwa te Atua e karaoi kakai n taai ake ngkoa ao E teimatoa ni karaoi kakai ni karokoa boong aikai.

• Tibwa te bwai ae e a tia n riki nakoim ngke ko noora iai te kakai n te Ekaretia ni boong aikai ke ni bon oin maium. Kaota am koaua bwa te Atua bon “Atuan taian kakai” (Moomon 9:11).

Reirei te Reirei: Ataei aika a Ikawai

Moomon 7:8–10

Ana boki Moomon ao te Baibara a uaia ni kakoaua Iesu Kristo.

E reirei Moomon bwa ana “euangkerio Kristo … kaotaki [nakoira]” inanon te Baibara ao n Ana Boki Moomon naba. Iangoia bwa ko na kanga ni reireinia ataei bwa boki aika a tabu aikai a kakawaki nakoira.

Waaki ni Kakukurei aika a Kona ni Karaoaki

• Korea Moomon 7:9 iaon te burakibooti, ma katikui taeka aika aei ao anne. Korea naba aei iaon te burakibooti aei = Ana Boki Moomon ao anne = te Baibara. Kaoiia ataei bwa a na wareka Moomon 7:9 ni kabaibati ao kabonganai mwakoro n taeka ake iaon te burakibooti ni kabwanina are e aki bwanin. Tera ae ti reiakinna ibukin te Baibara ao Ana Boki Moomon man kibu aikai?

• Kaota Ana Boki Moomon ao te Baibara. Tibwai tabeua karaki man boki aikai, kaoti tamnei ngkana a tauraoi (taraa te Bokin Tamnein te Euangkerio). Kaoiia ataei bwa a na kotea te boki are e roko mai iai te karaki. Bukin tera ti kainnanoi boki aikai?

• Korei ni kakateuana taeka man te kawaniua n taekan ara onimaki iaon beeba aika a uarereke. Anga teuana ke uoua te taeka nakoia ataei n tatabemania, ao kaoiia ataei bwa a na bootaki ni mwakuri ni kaeti nnen taeka akanne. Ngkanne tuangia bwa a na kaokioka taekan ara onimaki anne tabeua te tai. Tera ae e reireinira?

  

  Ana Boki Moomon e kakoaua taekan Iesu Kristo.

Moomon 8:1–7

I kona n rinea te Eti e ngae ngke I namakinna bwa I tei n ti ngai.

Ana motinnano Moronaai ni “kakoroa ana tua [tamana],” e ngae ngke e a tia ni mate tamana, e kona ni kaungaia ataei bwa a na ongotaeka nakon ana tua nako te Atua.

Waaki ni Kakukurei aika a Kona ni Karaoaki

• Wareka Moomon 8:1–7 ma ataei, ao kaoiia bwa a na tibwai tera aia namakin ngke arona bwa ngaia Moronaai. Tuangia bwa a na taraa riki kibu 1, 3, ao 4 ni kakaea bwa tera ae tuangaki Moronaai bwa e na karaoia. E kanga Moronaai ni “kakoroa ana tua [tamana]”? Ti na kanga ni katotonga riki Moronaai?

• Kaoiia ataei bwa a na bane ni korea te waaki are a na karaoa iai te rinerine imarenan ae e eti ao ae kairua e ngae ngke akea ae tataraira. Karini aia iango inanon te turumwa, ao angania aei te tai bwa a na rinea teuana te beeba ao n tibwaia bwa tera ae a na karaoia ni katotonga Moronaai.

Moomon 8:24–26; 9:7–26

Te Atua bon “Atuan taian kakai.”

E mwaiti aomata ni boong aikai ake a aki kakoua bwa a ririki naba ngkai taian kakai. Kabonganai ana reirei Moronaai ni kibu aikai n reireinia ataei bwa ngkai iai ara onimaki, ao ti na kona n noora te Atua ni karaoi kakai inanon maiura.

Waaki ni Kakukurei aika a Kona ni Karaoaki

• Kaota te kaetieti ibukin karaoan te amwarake nakoia ataei. Tera ae e na riki ngkana iai bwain te kuka ae ko mwaninga? Kaoiia ataei bwa a na wareka Moomon 8:24 ao 9:20–21 ni kakaea te “rengarenga” are e riai n iai iroura bwa e aonga ni kaoti kakai te Atua. Anga tabeua taian kakai—ae bubura ke ae uarereke—are ko a tia n nooria n te Ekaretia ke inanon maium. Kaoiia ataei bwa a na tibwauai katotoon te kakai are mairouia.

• Kamaenakoia ataei nakon uoua te tiim. Kaoiia tiim aikai bwa a na kakaei kakai inanon tabeua ke bon ni kabane kibu aikai: Moomon 8:24; 9:11–13, 16–18, 21–25. Tera ae ti kona n taekinna nakon te aomata ae e taku bwa a toki taian kakai? (taraa Moomon 9:9, 15–21).

Kaungaa te Kamatebwai n te Mweenga

Kaoiia ataei bwa a na reitaki ma temanna kaain aia utu bwa e na tibwaua teuana te kakai are e kakorakora ana koaua.

Kanakoraoan Ara Anga reirei

Ataei a kona ni kinaa uaan te Tamnei. Reireiniia ataei bwa namakinan te rau, te tangira, ao te kimwareirei are a karekea ngkana a taetae ke n anenea taekan Iesu Kristo ma Ana euangkerio e roko mai iroun te Tamnei ae Raoiroi. (taraa Reirei n Ana Kawai te Tia Kamaiu, 11).