Iaretaite a kitana Babera, iroun Albin Veselka

Nobembwa 9–15

Ita 1–5

“Raeuaka Rabunan te Ataibwai”

Ngkai ko rinanoi baike ko reiakin n am kamatebwai n Ita 1–5, tera koaua aika ko namakin aika a na buokiia ataei ni kunea? Tao iai iango n te kabwarabwara aei ae kona n ibuobuoki.

Korei Am Namakin

Kaoa te Tibwatibwa

Kaota tamnein tarin Iareta (taraa kabwarabwara n te wiiki aei i nanon Nakomai Iriirai—Ibukia Aomata n Tatabemania ao Utu). Kaoiia ataei bwa a na tibwaua te bwai ae a ataia ibukina.

Reirei te Reirei: Ataei aika a Uarereke Riki

Ita 1:33–43; 2:16–25; 3:1–6

Te Tama are i Karawa e ongo ao e kaekai au tataro.

Karakinan tarin Iareta e kaoti tabeua kawai are e kona iai te Atua ni buokiira ngkana ti tataro.

Waaki ni Kakukurei aika a Kona ni Karaoaki

• Kaoiia tabeman kaain te uoote aika a rabakau te taetae teuana bwa a na taekin tabeua kibuntaeka n te taetae anne ibukin am kiraati (ke katanga te rawerawe n te taetae teuana). Anganiia ataei bwa aongkoa a bwaati te taetae teuana, ao katerea bwa e rangi ni kaangaanga te oota imarenara ngkana e kaokoro ara taetae. Kabongana aei ni kabwarabwara rongorongon te Taua are Babera n Karikanbwai 11:1–9 ao Ita 1:33. Wareka Ita 3:13 ao 15, ao kamatata aron tarin Iareta n tataro bwa Ngaia ma raoraona ma ana utu a na kona n oota i marenaia (taraa Ita 1:34–37). Wareware ao buokiia ataei bwa a na n oota n ana kaeka te Uea nakon ana tataro n Ita 1:35. Ko kona naba ni kabongana “Mwakoro 50: Iaretaite A Kitana Babera” (Karaki man Ana Boki Moomon, 143–44, ke te witeo ae e irekereke ma ngaia iaon ChurchofJesusChrist.org).

• Kaoiia ataei bwa a aongkoa a karaoa te bwaati, n aron are kabwarabwaraki n Ita 2:16–17. Kamatatai aia kaangaanga Iaretaite ma aia bwaati (taraa Ita 2:19), ao titirakiniia ataei bwa tera ae a na karaoia ma kaangaanga akanne. Wareka Ita 2:18–19 n reireiniia ataei bwa e kanga tarin Iareta n uota ana kaangaanga nakon te Uea n te tataro. Kaota am koaua bwa ti kona n tataro n taainako ngkana iai ara titiraki ke ara kaangaanga.

• Kakimototoa Ita 2:19–3:6 ni kabwarabwara bwa tera ana kaeka te Uea nakon ana titiraki tarin Iareta ibukin taian bwaati. Kamenai 16 atibu ni kabuta te umwanreirei, ao kaoiia ataei bwa a na wareki mwaitia imwin kuneaia. Kaota te tamnei are inanon kabwarabwara n te wiiki aei inanon Nakomai Iriirai—Ibukia Aomata n Tatabemania ao Utu, ao angania ataei bwa a na manga karakina te karaki (taraa naba te iteraniba ibukin te waaki ni kakukurei n te wiiki aei).

Ita 3:13, 15

I karikaki ni katotongan te Atua.

Ngke tarin Iareta e noora te Uea, e reiakinna bwa “a bon karikaki aomata ni kabaneia man te moantai n aiaron [Katotongana]” (Ita 3:15).

Waaki ni Kakukurei aika a Kona ni Karaoaki

• Kaota tamnein te Tia Kamaiu, ao kaoiia ataei bwa a na kotei mwakoron Rabwatana aika kakaokoro. Kamatata bwa ngke tarin Iareta e noora Iesu Kristo, e reiakinna bwa taraara ni kabane titebo ma Iesu. N am tai ni kotei mwakoron te rabwata n te tamnei, kaoiia bwa a na kotei mwakoron naba rabwataia. Kaota am koaua bwa ti karikaki bwa ti aonga ni katotonga Tamara are i Karawa ao Iesu Kristo.

• Bootaki anenea te kuna ae irekereke ma rabwatara, n aron “Head, Shoulders, Knees, and Toes” (Aia Boki n Anene Ataei, 275). Buokiia ataei bukin tera a karabwarabwa ibukin mwakoron nako rabwataia aika a kakaokoro.

E karikaki te aomata ni katotongan te Atua.

Reirei te Reirei: Ataei aika a Ikawai

Ita 1:33–43; 2; 3:1–17

I kona n karekei kaotioti bwa a na buokai.

Ko na kanga ni buokiia ataei n reiakina te kaotioti man ana katoto tarin Iareta? Tera bwaai aika ko a tia n rinanona ae ko kona n tibwauaia ngke e buokiko te Uea n anganiko kaekaan am kaangaanga ke am titiraki?

Waaki ni Kakukurei aika a Kona ni Karaoaki

• Imwain te kiraati, korea te mwakoro n taeka ae “Teirake, tanrikaki, ao tekateka” n taetae aika kaokoro iaon mwakoro ni beeba (Ko kona ni kabongana te raitaeka n te aonraain ke ana ibuobuoki temanna ae bwaati te taetae teuana). Anga teuana te mwakoro ni beeba nakoia ataei n tatabeman, ao kaoiia bwa a na kataia n ira te kaetieti. Kabongana aio ni buokiia ni kabwarabwara bwa tera ae kaungaa n ana tataro Iareta are n Ita 1:33–37. Bootaki ni wareki kibu aikai, ao tuangia ataei bwa a na taraia raoi bwa tera ana namakin te Uea ibukin Iareta ao raoraona ao ana utu. Tera ae ti reiakinna man te rongorongo aei ibukin te tataro?

• Anganiia ataei n tatabeman bwa a na wareki kibu aikai, ao buokiia ni kakaea ana titiraki ke ana kaangaanga tarin Iareta: Ita 1:33–35; Ita 1:36–37; ao Ita 2:18–20. Tera ae e karaoia tarin Iareta ibukin kaangaanga ke titiraki aikai? E kanga ni buokiia te Uea n aikai? Kaoiia ataei bwa a na iangoi kaangaanga ake a kainnanoa iai te ibuobuoki. A na kanga n ira ana katoto tarin Iareta ni kakaei kaekaan aia kaangaanga? Tibwaua te bwai ae ko a ti n rinanona ike ko tataro iai ibukin te ibuobuoki ao e buokiko te Uea.

Ita 3:4–17

I karikaki ni katotongan te Atua.

Ataei ake ko reireiniia a na kaitara man rongorongo aika kewe ibukin te Atua, ngaiia, ao rabwataia n aomata. Kibu aikai bon taai n reirei koaua aika akea tokiia iaon atuun rongorongo aikai.

Waaki ni Kakukurei aika a Kona ni Karaoaki

• Warekia ma ataei Ita 3:6–16, ao buokiia bwa a na korei baike e reiakin tarin Iareta ibukin te Uea man te taneiai aei. Bukin tera e kakawaki ataakin bwai aikai? Te katoto, e kanga ni bitaki aron ara taratara ibukin rabwatara ngkai ti ataia bwa ti karikaki ni katotongan te Uea?

• Korea te rabwata ao te tamnei iaon te burakibooti. Kaoiia ataei bwa a na taekin tein nako te rabwata ( iai kunra, raraara, ao a mwaiti riki), ao korei aia reke iaon te burakibooti. Bootaki ni wareka Ita 3:4–17, ao kaoiia ataei bwa a na tarai baike a reiakin ibukin tamneia. Kaota am koaua bwa rabwatara a “karikaki ni katotongan [Iesu]” (Ita 3:15).

Ita 5:2–4

Taan kakoaua aika teniman a kaota aia koaua ibukin ana Boki Moomon.

Moronaai E taetae ni burabetia bwa taan kakoaua aika teniman a na buoka kaotan koauan ana Boki Moomon. Ko kona ni kabongana te taetae ni burabeti aei ni kakorakora aia koaua ataei ao ni kaungaia bwa a na riki bwa taan kakoaua ibukin ana Boki Moomon n oin aia kawai.

Waaki ni Kakukurei aika a Kona ni Karaoaki

• Korei tabeua taeka aika kakawaki iaon te burakibooti man Ita 5:2–4, n aron bwaatua, te mwaaka, te koaua, taan kakoaua, ao te koaua. Wareki kiibu aikai ma ataei, ao kaoiia bwa a na toki ngkana kam boo ma taeka akana iaon te burakibooti ao maroroakinna bwa bukin tera a kakawaki taeka aikai. N reireiniia ataei taekaia Taan kakoaua aika Teniman, ko kona n nakon “Mwakoro 7: Taan kakoaua a noori Bwaatua koora” (Karaki man Reirei ao Berita aika Tabu, 31–33) ao “Aia koaua Taan kakoaua aika Teniman” n ana Boki Moomon. Bukin tera te Atua e tangiriia teniman aomata bwa a na noori bwatuua koora?

• Tuangiia ataei bwa ko kanga n ataia bwa e koaua ana Boki Moomon. Kaoiia ataei bwa a na tibwauaia bwa bukin tera a kakoaua. Buokiia bwa a na iangoi kawai aika a kona n riki iai bwa taan kakoauaa ana Boki Moomon, ao kaungai nanoia bwa a na tibwauaia ma tabemwaang n te wiiki aio.

Kaungaa te Kamatebwai n te Mweenga

Kaoiia ataei bwa a na iangoa te bwai teuana ae a kona ni bubuti ana ibuobuoki Tamara are i Karawa, n aron are e karaoia tarin Iareta. Kaungaia bwa a na ukora Ana ibuobuoki rinanon te tataro.

Kanakoraoan Ara Anga reirei

Anga reirei n tain taian mwakuri ni kauring. N te tai are ataei a karaoi mwakuri ni kauring n aron te korotamnei ke ni mwakuri iaon te iteraniba ibukin te waaki ni kakukurei, ko kona ni kabongana te tai anne ni kamatatai koaua ake a tia n reiakinaki man mwakuri ni kauring akanne.