“Okitobwa 19–25. 3 Nibwaai 27–4 Nephi: ‘Akea Riki te Botanaomata n ai Aroia ae a Kukurei Riki,’” Nakomai, Iriirai—Ibukiia Aomata n Tatabemaniia ao Utu 2020 (2020)
“Okitobwa 19–25. 3 Nibwaai 27–4 Nibwaai,” Nakomai, Iriirai—Ibukiia Aomata n Tatabemaniia ao Utu: 2020
Ana Tataro Kristo, iroun Derek Hegsted
Okitobwa 19–25
3 Nibwaai 27–4 Nibwaai
“Akea Riki te Botanaomata n ai Aroia ae a Kukurei Riki”
E tuangiia Ana reirei te Uea bwa a na koroi bwaai aika taneiai ma ngaai (taraa 3 Nibwaai 27:23–24). N am tai ni kamatebwai, koroi atatai n te tamnei aika ko a tia n rinanoi.
Korei Am Namakin
Ana reirei Iesu Kristo tiaki tii rabakau aika a tikiraoi aika a na iangoaki. A raka riki nakon anne—a kantaningaaki bwa a na bitii maiura. Te boki n te ka 4 Nibwaai e katauraoa te katooto ae moan te kamimi n te bwai aei, ni kaotia bwa e kanga ana euangkerio te Tia Kamaiu n ae bwanin ni kona ni bita te aomata. N rimwiaki ma ana mwakuri n ibuobuoki Iesu, itabararaa inanon tienture imarenaia Nibwaite ao Reimwanaite a roko n tokiia. Uoua aaba aika a kinaaki ibukin aia kaiangatoa ao aia kamoamoa a “katiteuanaaki, natin Kristo” (4 Nibwaai 1:17), ao a moanna n iai te “katiteboaki imarenaia” (4 Nibwaai 1:3). Ana “tangira te Atua … are e maeka inanoia aomata,” ao “akea riki te botanaomata n ai aroia ae a kukurei riki ibuakoia aomata ni kabane ake a tia ni karikaki ni bain te Atua” (4 Nibwaai 1:15–16). Aio aron ana reirei te Tia Kamaiu ni bitiia Nibwaite ao Reimwanaite. A kanga ni bitiko?
Iango ibukin Am Kamatebwai I Bon Iroum ni Koroboki Aika Tabu
Ana Ekaretia Iesu Kristo e aranaki n Arana.
Ngke a moanna ni katea Ana Ekaretia ana reirei te Tia Kamaiu ni kabutaa te aba, e rio te titiraki, nakoia tabeman, e taraa n ae te iango ae aki kakawaki—tera raoi aran te Ekaretia? (taraa 3 Nibwaai 27:1–3). Tera ae ko reiakinna ibukin kakawakin te ara aei man ana kaeka te Tia Kamaiu n 3 Nibwaai 27:4–12? N te 1838 te Uea e kaoka aran Ana Ekaretia n te bong aei (taraa RB 115:4). Iangoi taeka n tatabeua nako n te ara anne. A kanga taeka aikai ni buokiira n ataia bwa antai ngaira, tera ae ti kakoaua, ao ti na kanga ni mwakuriia?
Taraa naba Russell. M. Nelson, “Etin raoi aran te Ekaretia,” Ensign ke Riaona, Nob. 2018, 87–80; M. Russell Ballard, “Kakawakin te Ara,” Ensign ke Liahona, Nob. 2011, 79–82.
Ngke I tataro i nanou, I riki bwa ana reirei Iesu ae kakaonimaki riki.
Tera ae ko na taekinna ngkana e titirakiniko te Tia Kamaiu, n aron are E titirakiniia Ana reirei, “Tera te bwai ae kam tangiria mai irou?” (3 Nibwaai 28:1). Iangoa taekan te bwai aei n am tai ni wareka aia atatai ana reirei te Tia Kamaiu 3 Nibwaai 28:1–11. Tera ae ko reiakinna ibukin te bwai ae a tangiria n nanoia ana reirei Iesu man aia kaeka nakon Ana titiraki? Beretitenti Dallin H. Oaks e reirei: “Ni karekea kawaira ae akea tokina, ti na tangira ao ni mwakuri ibukin bwaai aika a kainnanoaki n riki bwa te aomata ae akea tokina. … Ti na tangira n riki n aron [Iesu Kristo]” (“Desire,” Ensign ke Riaona, Meei 2011, 44–45). Tera ae ko kona ni karaoia ni karaoa te bwai ae tangiria nanom bwa e na raoiroi riki? (Ibukin rongorongon riki tabeua ibukin “te bitaki ae korakora i aon [rabwatara]” ana reirei Iesu ake teniman, taraa 3 Nibwaai 28:37 ao “Translated Beings,” Kairi nakon Koroboki aika Tabu, scriptures.ChurchofJesusChrist.org.)
Te rairaki nakon Iesu Kristo ao Ana euangkerio e na kairiko nakon te katiteuanaaki ao te kukurei.
Ko kona n iangoia bwa e na kanga arona ni maeka inanon ririki imwain rokon te Tia Kamaiu? A kanga aomata ni kateimatoa te rau mai ieta aei n te tai ae maan—ae kaniia 200 te ririki? Ngkana ko kamatebwaia 4 Nibwaai 1:1–18, iangoia ni karaoa ke ni koroi rinerine ake a karaoi aomata bwa aonga n taneiai ma kakabwaia n te maiu aei.
Iangoa te bwai ae ko kona ni karaoia ni buokiia am utu, uoote, ke te kaomiuniti bwa a na maeka n te katiteuanaaki ma te kukurei n ae korakora, n aroia ae a karaoia aomata n 4 Nibwaai . Tera ana reirei Iesu Kristo ae ko kona ni maeka riki inanona n ae bwanin bwa ko aonga ni kakoroa nanon te kouru aei? Tera ae ko kona ni karaoia ni buokiia tabeman bwa a na ataia ao ni maiuakin reirei aikai?
Te buakaka e na kairiko nakon te kaokoroaki ao te nanokawaki.
N ae kananokawaki, aia botaki kaain Tion ae kabwarabwaraaki n 4 Nibwaai (taraa naba Mote 7:18) n tokina a kabwaraaki. Ngkana ko wareka 4 Nibwaai 1:19–49, tarai anua ao katei are e a karika te bootaki aei bwa a na maenako. Iai kanikinaa aika ko noori n taian anua ao katei aikai i bon iroum?
Taraa naba “Mwakoro 18: Tarataraiko man te Kainikatonga,” Aia Reirei Beretitenti n te Ekaretia: Ezra Taft Benson (2014), 229–40.
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
3 Nibwaai 27:13–21
Kiibu aikai a kona ni buokiia kaain te utu n ataa raoi riki te bwai ae nanonna te Tia Kamaiu ngkana E taekina “au euangkerio.” Imwiin warekan ao maroroakinan kiibu aikai, ko kona n titirakiniiia kaain te utu n tatabemaniia nako bwa a na kakimototoa te bwai ae nanonaki n te euangkerio n te tiententi ae ti teuana.
3 Nibwaai 27:23–26
E uara te bwai ae ti karaoia ni korean mwiin bwaai aika ti a tia “n noori ao n ongo”—n tatabemaniira ke n te utu? Bukin tera e kakawaki kawakinan te rekooti ni bwaai n tamnei?
3 Nibwaai 27:30–31
Ni buokiia kaain te utu bwa a na ataa kimwareirein te Tia Kamaiu aika a kabwarabwaraaki ni kiibu aikai, ko kona ni karaoa te takakaro are a karabaia iai kaain te utu ao kaain te utu are teuana a na kataia ni kakaaia. E kona aei n kairiia nakon te marooro bwa bukin tera e kakawaki bwa ko na kakaaia kaain te utu n tatabemaniia nako n te aro bwa “akea mai ibuakoia ae bua.” Ti na kanga ni kona ni buokiia kaain ara utu bwa a na teimatoa ni korakora n te euangkerio ke n oki ngkana a tia ni kitanna?
3 Nibwaai 28:17–18, 36–40
Tera ae ti kona n reiakinna man ana banna ni katooto Moomon ngke e aki ota ni bwaai ni kabane iaon te bitaki are e a tia n riki nakoia ana eirei Nibwaite ake teniman? Tera ae ti kona ni karaoia ngkana ti aki ota ni bwaai ni kabane ibukin reirein te euangkerio? Beretitenti Dieter F. Uchtdorf e reirei: “E tabe ibukim te Atua. E na kakauongo ao E na kaekai am titiraki. Kaekaan am tataro a na roko n oin Ana kawai ao ni bon oin Ana tai, ngaia are, ko kainnanoia n reireiniko aron te kakauongo nakon Bwanaana” (“Receiving a Testimony of Light and Truth,” Ensign ke Riaona, Nobembwa. 2014, 21).
4 Nibwaai 1:15
Ni kauarerekea te ikakawi inanon mweengam, tao a kona kaain te utu ni katea aia kouru bwa ana rangin n itangitangiri riki imarenaia n te wiiki aei. Imwiin banen te wiiki, rinanon ami waaki ni bootaki ao maroroakinna bwa e kanga kaotan te tangira ae korakora riki n riinga ami utu.
Ibukin iango riki tabeua ibukin reiakinaia, ataei n te kamataata n te wiiki aei inanon Nakomai, Iriirai—Ibukin te Moanrinan.
Kanakoraoan Am Kamatebwai
Ukoukora te kaotioti ni katoabong. Te kaotioti e aki toki n roko “teutana imwiin teutana” (2 Nibwaai 28:30). Ngkana ko iangoi kiibu aika ko reiakin, iango ao namakin ana kona n roko nakoim rinanon te bong anne. Tai iangoa te kamatebwai n te euangkerio bwa kaanga te bwai ae ko “karekea te tai ibukin” ma kanga te bwai ae ko kakaraoia n tainako (taraa Reirei n Ana Kawai te Tia Kamaiu, 12).
Kristo ma ana Reirei Nibwaite ake Teniman, iroun Gary L. Kapp