Abentekiti A

E Kanga Te Tamnei ni Kakoauaa Nakoiu Bwa Ana Boki Moomon e Bon Koaua?

Ko bae n tia n ongo ana berita Moronaai nakoia ni kabane naake a wareka Ana Boki Moomon: “Ngkana arona bwa kam bubuti ma te nano ae koaua ma nanomi raoi, ao te onimaki iroun Kristo, e na bon kaota koauan [Ana Boki Moomon] nakoimi, ni mwaakan te Tamnei ae Raoiroi” (Moronaai 10:4). Ma tera ae nanonaki n ataa te koaua “man mwaakan te Tamnei ae Raoiroi”? N na kanga n ataia ngkana e taetae nakoiu te Tamnei ae Raoiroi?

E na kona n ibuobuoki n uringnga bwa e reitaki te Tamnei ae Raoiroi ma ngaira ni kawai aika a rangin ni kaokoro man kawai aika ti taneiai n reitaki iai i imarenara. Ma Tamara are i Karawa E tangiria ni buokiko n reireiniko ni kiinaa te Tamnei. E a tia n anganaki Ana Boki Moomon, ike a kabwarabwarai aia taneiai ana toro aika a kakaonimaki ma bwanaan te Uea.

Te katooto, Nibwaai e tuangiia tarina bwa e a tia te Uea n taetae nakoia “te bwanaa ae maaraara ma ni beebete ,” e ngae ngke te bwanaa ae aaki riai bwa ana ongo n taningaia. Ni koauana, e taku Nibwaai bwa tarina “aki namakinna” ao aki kona n “namakin ana taeka” (1 Nibwaai 17:45, e kairaki te itariki). Enoti e kabwarabwara kaekaaan ana tataro bwa “bwanaan te Uea” e a roko “nakon [ana] iango” (Enoti 1:10). Ao iangoi bwanaa aikai ni kabwarabwara te bwanaa are e roko ai i karawa ngke e kaoti te Tia Kamaiu are e a uti n te Aba ni Mari: “tiaki te bwanaa ae matoatoa, ma e ngae n anne, … e bon niniia nako kabin nanoia, ma ni kabuea nanoia” (3 Nibwaai 11:3).

Tao e na kaman tia n reke am atatai ae ti tebo ma aikai, ke tao a kaokoro am atatai. Te Tamnei ae Raoiroi e reitaki ni kawai aika akakaokoro, ao e kona n roko te kaotioti nakoira n tatabemaniira n ae kakaokoro. Ao ngkana e mena te Tamnei inanon maiura, ti na noora ana kairoro nako aora ni kawai aika a mwaiti. Te Abotoro e taekina “uaan te Tamnei”—namakinan te “tangira, te kimwareirei, te rau, te taotaonaki n nano, te atataiaomata, te raoiroi, te kakaonimaki, te nimamannei, tau baang,” ibuakoia aika a mwaiti riki (I-Karatia 5:22–23).

Aika tabeua riki reirei ao katooto man Ana Boki Moomon iaon taekan te Tamnei ae Raoiroi. Ngkana ko wareki, ko na nooria bwa e a tia te Tamnei ae Raoiroi n taetae nakoim nakon ae ko ataia, ni kaota ana koaua nakoim ae Ana Boki Moomon bon ana taeka ni koaua te Atua.

Te Kukurei ao Te Kimwareirei

E moanaki Ana Boki Moomon ma te burabeti ae Riaai n noora te mii ni burabeti ae kamimi. N te mii aei, e anganaki te boki ao e tuangaki bwa e na warekia. “Ngke e wareware,” e taekinaki n te rekooti, “e kaonaki n Tamnein te Uea.” Te atatai aei e kaira Riaai ni kamoamoa te Atua ibukin “mwaakana, ma raoiroim, ma am nanoanga,” ao Riaai “e kimwareirei tamneina, ao e onrake nanona” (1 Nibwaai 1:12, 14–15).

Ko a tia ni karekea te aeka n atatai anne? E a tia warekan Ana Boki Moomon ni kaona nanom ma te kakaitau ibukin raoiroin ao Ana nanoanga te Atua? A tia koroboki n Ana Boki Moomon ni karika tamneim bwa e na kimwareirei? Namakin aikai bon ana kairoro te Tamnei, ni kakoaua nakoim bwa taeka aika ko wareki a roko mairoun te Atua ao n reirei Ana koaua.

Te Nano ae Bitaki

Imwiin te kabwarabwara ae moan te kamimi iaon Ana Mwakuri ni Kamaiu Iesu Kristo (taraa Motiaea 2–4), Te Uea Beniamina e tangiria n ataia ngkana ana aomata a “kakoauai taeka ake e a tia n taekin nakoia.” A kaeka ni kangai bwa a kakoaua ana rongorongo. Bukin tera? “Ibukin Tamnein te Uea ae Moan te Mwaaka, are e a tia ni karika te bitaki ae moan te korakora iroura, ke inanora, n te aro are akea te nano ni kan karaoa ae buakaka, ma n teimatoa ni karaoa ae raoiroi” (Motiaea 5:1–2).

Tao ko a tia n noora te bwai ae titebo inanom ngkai ko a tia ni wareka Ana Boki Moomon. Te katooto, ko bae n tia ni kaungaaki bwa ko na riki bwa te aomata ae nakoraoi riki, n totokoa te bure, ke ni karaoa te bwai ae akoi ibukin temanna. Aio te kakoaua n tamnei ae ko ukoukoria ibukina bwa te boki e bon roko mairoun te Atua. Bwa n aron are e reirei Moomon, “Bwaai ni kabane aika a kakao ma n anai nano nakonkaraoan te raoiroi, ao nakon tangiran te Atua, ma te toro irouna, e bon roko mai iroun te Atua” (Moronaai 7:13; taraa naba 2 Nibwaai 33:4, 10; Aramwa 19:33; Ita 4:11–12).

Te Iango ae Kaotaki

Ngke e tangiria Aramwa bwa e na buokiia Tioramwaite “kakatai iaon [ana] taeka” ao n ataia bon ibukiia bwa e koaua ana koaua, n aki kabotaua ana taeka te Atua nakon te koraa: “Ao ngkanne, ngkana ti angan te koraa nnena, bwa e na unikaki inanom,” e kabwarabwara, “e na bon rikirake inanom; ao ngkana ko namakini namakin aika a kakamwakuri, kam na kangai inanomi—E na bon riai bwa te koraa ae raoiroi aio, ke bwa e raoiroi te taeka, bwa e moanna ni kabubura tamneiu; eng, e moanna ni kaota riki ootau, eng, e moanna ni kangkang irou.” (Aramwa 32:27–28).

Ko “anga nnena” inanom ibukin taeka n Ana Boki Moomon ngkana ko kariaia bwa a na kaira maium ao ni kairi am rinerine. Ao ana kanga taeka aikai “ni kabubura [tamneim]” ao ni “kaota riki [otam]”? Ko kona n namakinna ae e a moanna ni korakora riki n tamneim. Ko bae n namakinna bwa ko a namakinna ae ko a tangira riki ao n iraorao ma naake tabeman. Ko bae ni kunea naba bwa e a nakoraoi riki otam, riki iaon bwaai n tamnei—e taraa n ae kanga e otanako te ota n am iango. Ao ko na bae ni kariaia ae te reirei are e reiakinaki n Ana Boki Moomon e “kangkang.” Te namakin anne e kona ni buokiko n ataia bwa ko a tia ni karekea ni koaua kakoauaan te tamnei, n aron are e katanoata Aramwa: “O ngkanne, tiaki bwa e koaua aio? I kangai nakoimi, Eng, ibukina bwa e oota; ao te bwai ae e oota, e raoiroi, ibukina bwa ko kona n ataia, ngaia are ko na riai n ataia bwa e raoiroi” (Aramwa 32:35).

Ko Aki Riai ni Miimi

Aikai tabeua kawai aika e reitaki ia te Tamnei. A mwaiti riki. Teimatoa n taratara ibukin taai ni kakauongo nakon bwanaan te Tamnei, ao ko na karekea teimatoan, ao kakoauaan ana kakoaua ni koauan Ana Boki Moomon.

E a tia ni berita Beretitenti Russell M. Nelson: “Ko na aki miimi iaon te bwai ae koaua. Ko na aki mimi bwa antai ae ko na kona raoi n onimakinna. Rinanon am kaotioti, ko kona ni karekea oin am kakoaua bwa Ana Boki Moomon bon ana taeka te Atua, bwa Iotebwa Timiti bon te burabeti, ao aio bon ana Ekaretia te Uea. N aki tabe ma te bwai ae a na taekinna ke ni karaoia tabeman, akea temanna ae kona n ana te kakoaua ae anganaki nanom ao am iangoi iaon taekan te bwai ae koaua” (“Te Kaotioti Ibukin te Ekaretia, Te Kaotioti ibukin Maiura,” Ensign ke Riaona, Meei 2018, 95).