“Abentekiti C: Taan Kakoaua Aika Teniman” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Abentekiti C,” Nakomai, Iriirai—Ibukiia Aomata n Tatabemaniia ao Utu 2020
Abentekiti C
Taan Kakoaua Aika Teniman
E raka iaon nimaua te ririki—man te tai are te anera Moronaai e moan kawara Iotebwa Timiti ni karokoa 1829—Iotebwa bon tii ngaia te aomata ae e kariaiakaki bwa e na noori bwaatua koora. E riki aio man te kakabuakaka ao te iowawa mai irouia naake a kakoaua bwa e keweniia aomata. Ngaia are iangoa aron kukurein Iotebwa ngke, e raira Ana Boki Moomon, e reiakinna bwa te Uea e na kariaia tabeman bwa a na noori bwaatua ao ana “kakoaua te boki ma kanoana” (2 Nibwaai 27:12–14; taraa naba 2 Nibwaai 11:3; Ita 5:2–4).
N Tuun 1829, Oliver Cowdery, David Whitmer, ao Martin Harris a tuatua ibukin te kariaia bwa a na riki bwa Taan Kakoaua aika teniman are e a kaman taekinaki irouia burabeti n Ana Boki Moomon. E kariaia te Uea nanoia (taraa RB 17) ao e kanakoa te anera, are e kaotia nakoia bwaatua. A kinaki mwaane aikai bwa Taan Kakoaua Aika Teniman, ao aia koaua ae koreaki e kairaki ni katotoon nako Ana Boki Moomon.1
Beretitenti Dallin H. Oaks e kabwarabwara bwa a kanga aia koaua Taan Kakoaua Aika Teniman n rangi n anainano: Aia koaua Taan Kakoaua Aika Teniman nakon Ana Boki Moomon a teimatoa bwa te rongorongo ae matoatoa. Ngaiia ni kateniman iai bukina ao aia tai aika mwaiti bwa a na kakewea aia koaua ngkana arona bwa e boni kewe, ke ni bitii taekaia ngkana arona bwa e boni kewe. E bon ataaki, ibukin aki booraoia n iango ke bakantang ni kairekerekeia ma taan kairiiri n te ekaretia ake tabeman, taan kakoaua aika teniman aikai a kabaneaki man Ana Ekaretia Iesu Kristo Ibukiia Aika Itiaki ni Boong aika Kaitira imwain koron waniua te ririki imwiin boreetian aia koaua. Naaka teniman aikai a maenako kawaia, n akea nanoia ni boutokaia i bon imarenaia ni karaoa te kewe. Ma ni karokoa tokin maiuia—n te tai ae maan 12 nakon 50 te ririki imwiin kabaneakiia man te Ekaretia—akea temanna mai ibuakoia taan kakoaua aikai ae e tionako man ana koaua ae boretiaki ke n taekina te bwai ae e na karekea te nanokokoraki ni koauana.”2
Ni karokoa tokin maiuia, Taan Kakoaua aika Teniman aki kamwaieieaki n aia koaua nakon Ana Boki Moomon.
Oliver Cowdery
Imwiin manga bwabetitoakina nakon te Ekaretia ao e aki maan imwain matena, e kawaraki Oliver iroun te mitinare, Unimwaane Jacob Gates, are e rinanon Richmond, Missouri, iaon kawaina nakon ana mition i England. Unimwaane Gates e titirakina Oliver ibukin ana koaua n Ana Boki Moomon. Natin Unimwaane Gates te mwaane e kauringa te bwai ae karaoia Oliver:
“N titirakinna ibukin ana koaua ngaia are e riinga Oliver n ae korakora. Akea te taeka ae kaekaa, ma e teirake man ana kaintekateka, ao e nako nakon n nen te boki, e anaa Ana Boki Moomon, e nakon aia koaua Taan Kakoaua Aika Teniman, ao e warekia ma nanona ni koaua taeka are e a tia n anga arana, e kaniia uabwi te ririki imwaina. E taraa au karo, e taku: ‘Jacob, I tangiria bwa ko na uringa te bwai ae I taekinna nakoim. Ngai te aomata ae mate, ao tera te bwai ae na karaka arou ngkana I taekina te kewe nakoim? I ataia,’ e taku, ‘bwa ana Boki Moomon e rairaki man ana bwaintituaraoi ao mwaakan te Atua. Matau a noria, a ongo taningau, ao e ringaki otau, ao I ataia bwa te bwai are I kakoaua a bon koaua. Bon tiaki te mii, e aki matebuaka iangoana—e bon koaua.’”3
David Whitmer
N ana ririki ake imwiina, e atai maningongo David Whitmer ae e a tia ni kakewei ana koaua n Ana Boki Moomon. Ni kaekaan bukibuki aikai, e a manga kamatoa ana koaua David n te reta are boretiaki n te beeba ni kaongora n te tabo, te Richmond Conservator:
“N te aro bwa e na ataa te koaua te aonaaba, au kantaninga ngkai, n tei, n arona are mai imwaina, ni kabanean tabeua au ririki ni maiu, ao ni mwaakan te Atua n te taina ibukira ni kabane, ni karaoa te rongorongo aei:
“Bwa bon akea te tai ae I a tia ni kakewea te koaua anne, ke mwakorona, are e a kaman man te tai are boretiaki ma te Boki anne, bwa temanna mai ibuakoia taan kakoaua aika teniman. Naake a kinaai raoi, a na ataia bwa I a tia n tainako n teimatoa n onimaki nakon te koaua anne. Ao a na akea te aomata ae e na mwamwanaa ke n nanokokoraki n au iango ibukin te bwai aei, I kamatoa riki koauan au rongorongo ni kabane, n aron are e karaoaki ao ni boretiaki.
“‘Ane iai taningana n ongo ao ke e ongo,’ bon akea bureburean te aba iai! Tera ae koreaki e koreaki—ao ane e wareka Ana Boki Moomon e na ota iai.”4
Martin Harris
N aron Oliver Cowdery, Martin Harris e kitana te Ekaretia tabeua te tai ma imwiina e a manga bwabetitoaki. N ana ririki ake imwiina, e ataaki man uotakin katotoon Ana Boki Moomon iaan baina ao e kakoauaa koauana nakoia ni kabane ake a ongora: “I ataa Ana Boki Moomon bwa e bon rangi ni koaua. Ao e ngae ngke a na kakewea koauan te boki anne aomata ni kabane, I aki tangiria bwa N na karaoia. E teimatoa nanou. O te Atua, e teimatoa nanou! I ataia raoi ao ni koaua.”5
George Godfrey, raoraon Martin, e koroia: “Tabeua te aoa imwain matena … I titirakina [Martin] ngkana e tuai n namakinna ae iai mwakoron teutana, te iraa ao te kewe inanon bwaai ake a koreaki ao n tuangaki rokon Ana Boki Moomon, ao e kaeka n are e a tia ni karaoia … ao e taku: ‘Ana Boki Moomon bon akea te kewe iai. I ataa te bwai ae I ataia. I a tia n noora te bwai ae I nooria ao I a tia n ongo te bwai ae I a tia n ongo. I a tia n noora te bwatua ae raoiroi are ngaia ae koreaki iai Ana Boki Moomon. E kaoti te anera nakoiu ao tabeman ao ni kakoaua koauan te rekooti, ao ngke arona bwa I a tia ni kariaia ni karaoa te kewe ao ni berita n ae kewe nakon te koaua I kaotia ngkai bwa N na bon tia n riki bwa te aomata ae kaubwai, ma I aki kona ni kakoauai irarikin bwaai ake I a tia ni karaoi ao ni karaoi ngkai ibukina bwa a koaua bwaai aikai.’”6
“E na Kaoti Ana Taeka Rinanoia Taan Kakoaua Aika a Mwaiti”
Aia koaua Taan Kakoaua Aika Teniman a rangi n anainano n iangoakin aia atatai ngke a kakaonimaki ao n aki kakaonimaki n te Ekaretia.7 Rinanona ni kabane, David, ao Martin a aki katoka kakoauaan te bwai ae a tia n taneiai iai ao ni kaota koauan ae Ana Boki Moomon ae e rairaki man ana bwaintituaraoi ao mwaakan te Atua. Ao tiaki tii ngaiia.
N taai ake ngkoa, e taekinna Nibwaai, “Mangaia ae e na waaki te Uea ae te Atua ni kaoti taekan te boki; ao e na kaoti ana taeka rinanoia taan kakoaua aika a mwaiti n aron nooran raoiroina irouia e na butimwaea ana taeka” (2 Nibwaai 27:14). Irarikin te Burabeti Iotebwa Timiti ao Taan Kakoaua Aika Teniman, e rineia naba waniman Taan Kakoaua te Uea bwa a na noori bwaatua. Aia koaua a karinaki naba inanon katotoon ni kabane Ana Boki Moomon. N aron Oliver, Tawita, ao Martin, taan Kakoaua Aika Waniman a teimatoa ni koaua nakon aia koaua n Ana Boki Moomon ao aia kakoaua ni bwaatua koora.
William E. McLellin bon ngaia te moan aomata ae rairaki nakon te Ekaretia ae atai taan kakoaua n Ana Boki Moomon. N tokina William e kitana te Ekaretia, ma e teimatoa n rootaki n ae korakora man taian koaua aika e a tia n ongo mairouia taan kakoaua.
“Ngkai N na titiraki,” E koroia McLellin ni kaan nakon tokin maiuna, “n na kanga n nanououa ma kurubu ni kakoaua aika kakaonimaki, ni kaota te koaua ae tataneiai te aba iai ao te koaua ae matoatoa? N aia kabanea n raoiroi mwaane aikai n te ririki, a noora te anera n te mii, ao a kaota aia koaua nakoia aomata ni kabane. Ao waniman aomata a noori bwaatua, ao a ringnga. Ma ngaia are mwaane aikai a atai bwaai ni kabane ae a taekinna bwa a koaua raoi. A karaoa anne ngke a uarereke, ao ngkai a ikawai a taekin naba bwaai ae aekan aikanne.”8
E ngae ngke ti tuai n nori bwaatua koora n aron are a karaoia Taan Kakoaua Aika Teniman, ti kona ni karekea te korakora man aia koaua. E ngae ngkana a kataaki kateia ao kawakinaia ao maiuia a riki ngkana a kakamaku ibukin aia koaua, mwaane aika ninikoria aikai a kakorakoraaki bwa a na teimatoa ni karokoa a mate.