Apendiks B

“Klia mo Gudgudfala Trutok”

Oli rere long Buk blong Momon blong hem i kamaot long taem blong ol las dei, wan taem we tingting i fasfas long evri ples long saed blong doktrin, o long saed blong trutok we i no save finis blong God. Pat blong tabu stamba tingting blong buk ia, hem i, olsem we Nifae i bin luk finis, hem i blong “witnes long saed blong trutok blong [Baebol],” mo blong “soem ol samting we i klia mo gudgudfala” we i bin lus ova long plante handred yia, mo i blong “soem long evri famli, lanwis, mo pipol se Smol Sipsip blong God i Pikinini blong Papa we i no Save Finis, mo Sevya blong wol” (1 Nifae 13:40).

Buk blong Momon i soemaot ol trutok we oli no save finis, we oli bin lus long taem blong Apostasi, mo i ademap wan nambatu witnes, we i kliarem plante trutok we oli tijim insaed long Baebol. Hemia sam eksampol blong ol trutok ia. Lukaotem ol klia mo gudgudfala trutok ia mo sam narawan moa taem we yu stap stadi long Buk blong Momon.

Godhed

• Papa long Heven, Jisas Kraes, mo Tabu Spirit oli trifala defren pipol, be oli stap wan long stamba tingting blong olgeta (luk long 3 Nifae 11:32, 36).

• Sevya we i laef bakegen long ded, i gat wan bodi we oli save tajem (luk long 3 Nifae 11:10–17).

Sam moa skripja abaot Gohed: 2 Nifae 31:6–8; Ita 12:41

Atonmen blong Jisas Kraes

• Jisas Kraes i bin safa from ol sin mo ol hadtaem blong yumi blong mekem se Hem i save olsem wanem blong helpem yumi (luk long Alma 7:11–13).

• Yumi save kam stret evriwan tru long gladhat blong Jisas Kraes (luk long Moronae 10:32–33).

Sam moa skripja abaot Atonmen blong Sevya: 1 Nifae 10:6; 2 Nifae 2:6–9; Jekob 4:11–12; Mosaea 3:1–19; Alma 34:8–16

Plan blong Fasin blong Sevem Man

• Foldaon blong Adam mo Iv i bin wan stamba pat blong plan blong Papa long Heven (luk long 2 Nifae 2:22–27).

• I bin nid blong gat fasin blong go agens, blong mekem se yumi save praktisim fridom blong yumi blong mekem joes (luk long 2 Nifae 2:11–16).

• Bae oli jajem yumi folem ol wok mo ol tingting blong hat blong yumi (luk long Alma 41:3–7).

• “Lek blong faea mo salfa,” i simbol blong trabol tingting blong olgeta we oli no sakem sin (luk long 2 Nifae 9:16–19; Mosaea 3:24–27).

Sam moa skripja abaot plan blong fasin blong sevem man: 2 Nifae 9:11–26; Alma 22:12–14; 34:31–35; 42:1–26

Apostasi mo Restoresen

• Bigfala Apostasi i bin hapen from ol fasin nogud, mo fasin blong no gat bilif (luk long Momon 8:28, 31–41).

• Buk blong Momon i talemaot ol trutok we oli tijim insaed long Baebol (luk long 1 Nifae 13:19–41; 2 Nifae 3:12).

• Jos blong Kraes, bae oli singaotem long nem blong Hem (luk long 3 Nifae 27:3–9).

Sam moa skripja abaot Apostasi: 1 Nifae 13:1–9, 24–29; 2 Nifae 27–28

Sam moa skripja abaot Restoresen: 1 Nifae 14:7–12; 22:7–11; 2 Nifae 3:7–24; 25:17–18

Ol Profet mo Revelesen

• Evri profet oli stap testifae abaot Jisas Kraes (luk long Mosaea 13:33–35).

• Save blong ol trutok long saed blong spirit oli kam tru long Tabu Spirit (luk long Alma 5:45–47).

• Baebol i no tekem evri toktok blong God (luk long 2 Nifae 29:10–13).

• Revelesen we i kam long God i no stop long taem blong yumi tedei (luk long Momon 9: 23–28).

Sam moa skripja abaot ol profet: 1 Nifae 22:1–2; Mosaea 8:16–18; Hileman 13:24–33

Sam moa skripja abaot revelesen: Jekob 4:8; Alma 12:9–11; 17:2–3; Moronae 10:5

Prishud

• Oli bin singaotem sam man we oli bin kasem prishud, mo oli bin mekem olgeta oli rere stat long stat blong wol finis (luk long Alma 13:1–3).

• Wan i mas kasem atoriti we i kam long God blong hem i save prijim gospel (luk long Mosaea 23:17).

Sam moa skripja abaot prishud: Mosaea 18:17–20; Alma 13; Hileman 10:7

Ol Odinens mo Kavenan

• Baptaes i wan mas blong save kasem laef we i no save finis (luk long 2 Nifae 31:4–13, 17–18).

• Baptaes ia, oli mas mekem we man i mas draon andanit long wota (luk long 3 Nifae 11:23–27).

• Ol smol pikinini oli no nid blong kasem baptaes (luk long Moronae 8:8–12).

• Ol odinens, oli mas mekem folem olgeta komanmen blong Kraes, mo wan we i gat stret atoriti nao i mekem ol odinens ia (luk long Mosaea 18:17–18; 3 Nifae 11:21–27; Moronae 4:1).

Sam moa skripja abaot ol odinens: Mosaea 18:8–17; 21:33–35; Alma 13:16; 3 Nifae 18:1–11; Moronae 2–6; 8:4–26

Sam moa skripja abaot ol kavenan: 2 Nifae 11:5; Mosaea 5:1–9; Alma 24:17–18

Mared mo Famli

• Hasban mo waef oli mas lavlavem olgeta (luk long Jekob 3:5–7).

• Ol papa mo mama oli mas resemap pikinini blong olgeta long wan wei we oli save Lod (luk long 1 Nifae 7:1).

Sam moa skripja abaot mared mo famli: 1 Nifae 1:1; 2 Nifae 25:26; Jekob 2:23–28; Inos 1:1; Mosaea 4:14–15; 3 Nifae 18:21

Ol Komanmen

• Lod bae i mekem wan wei i rere blong yumi save mekem olgeta komanmen blong Hem (luk long 1 Nifae 3:7).

• God i promesem blong blesem yumi sapos yumi stap kipim olgeta komanmen blong Hem (luk long Mosaea 2:22–24).

Sam moa skripja abaot ol komanmen: 1 Nifae 17:3; 22:30–31; Alma 37:13, 35; 50:20