Apendiks A

?Olsem Wanem Nao Spirit I Witnes long Mi se Buk blong Momon I Tru?

Maet yu harem finis abaot promes blong Moronae we i go long evriwan we i stap ridim Buk blong Momon: “Sapos bae yufala i askem wetem wan tru hat, wetem wan tru tingting blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit” (Moronae 10:4). Be, i minim wanem blong save trutok “tru long paoa blong Tabu Spirit”? ?Olsem wanem nao yu save taem Tabu Spirit i stap toktok i kam long yu?

Bae i gud blong tingbaot se Tabu Spirit i stap toktok wetem yumi long sam wei we oli defren long ol wei we yumi stap toktok wetem wanwan long yumi. Be, Papa long Heven i wantem helpem yu blong yu lanem blong luksave Spirit. Hem i givim long yu Buk blong Momon, mo insaed long hem i gat plante defren fetful wokman oli tokbaot eksperiens blong olgeta wetem voes blong Lod.

Eksampol. Nifae i talem long ol brata blong hem se Lod i bin toktok long olgeta “long wan voes we i kwaet mo i smol,” mo i no minim se i wan voes we oli save harem wetem sora blong olgeta. Wanem i stap, Nifae i talem long ol brata blong hem se oli “nomo save harem wan samting long hat blong [olgeta],” mo oli nomo save “filim ol toktok blong hem” (1 Nifae 17:45, oli ademap italik). Inos i tokbaot ansa blong ol prea blong hem olsem se “voes blong Lod” i bin kam “long maen blong [hem]” (Inos 1:10). Nao, tingting long ol toktok ia olsem se i voes we i bin kam long heven taem we Sevya we i bin laef bakegen long ded i bin kamaot long graon ia, Plante: “I no wan strong voes, mo tu, i no wan laod voes; be, … i bin stikim stret sol blong olgeta, mo i mekem se hat blong olgeta i bon” (3 Nifae 11:3).

Maet yu bin gat finis samfala eksperiens olsem, o mebi ol eksperiens blong yu oli defren. Tabu Spirit i stap toktok long plante defren kaen wei, mo revelesen i save kam long wanwan long yumi long defren wei. Mo taem Spirit i stap insaed long laef blong yumi, bambae yumi luk paoa blong Hem we i stap lidim yumi long plante wei. Aposol Pol i tokbaot “frut blong Spirit”—ol filing blong “stap lavem ol man, mo stap glad, mo gat pis long tingting, … gat tingting [we] i longfala, mo gat sore long man, mo [gat] fasin [we] i gud nomo, [stap] ol kwaet man, mo [gat kontrol]” wetem plante narafalawan (Galesia 5:22–23).

Hemia sam narafala tijing mo eksampol we oli kam long Buk blong Momon abaot Tabu Spirit. Taem yu stap ridim olgeta, bae yu save luk se Tabu Spirit i bin stap toktok long yu i bitim we yu bin luksave, i stap witnesem long yu se, i tru se Buk blong Momon i rili toktok blong God.

Fasin blong Talem Tangkyu mo Glad

Buk blong Momon, i stat wetem profet Lihae we i stap luk wan bigfala visen. Long visen ia, oli givim wan buk long hem mo oli invaetem hem blong ridim buk ia. “Taem hem i stap ridim,” histri ia i talem, “hem i bin kam fulap long Spirit blong Lod.” Eksperiens ia i lidim Lihae blong presem God from “paoa, mo gudfasin, mo sore” blong [Hem] mo sol blong Lihae “i glad, mo ful hat blong hem i fulap from ol samting we hem i bin luk” (1 Nifae 1:12, 14–15).

?Yu yu bin gat wan semmak eksperiens olsem finis? ?Weswe? ?Taem yu stap ridim Buk blong Momon i stap fulumap yuwetem fasin blong talem tangkyu from gud fasin mo sore blong God o no ? ?I gat samfala ples long Buk blong Momon we i mekem sol blong yu i glad tumas? Olgeta filing ia oli paoa blong Spirit blong lidim tingting blong yu, we i stap testifae long yu se ol toktok we yu stap ridim, oli kam long God mo oli stap tijim trutok blong Hem.

Wan Hat we I Jenis

Afta we hem i prijim wan gudfala toktok abaot Atonmen blong Jisas Kraes (luk long Mosaea 2–4), King Benjamin i bin wantem blong save sapos ol pipol blong hem “oli bin bilivim ol toktok we hem i bin talemaot long olgeta.” Oli ansa mo talem se oli bin bilivim mesej blong hem. ?From wanem? “From Spirit blong Lod we I Gat Ol Paoa, we i bin mekem wan bigfala jenis long mifala, o insaed long ol hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem” (Mosaea 5:1–2).

Mebi yu bin luk sam semmak samting olsem insaed long hat blong yu taem yu bin stap ridim Buk blong Momon. Eksampol, maet yu filim insperesen blong kam wan moa gud man o woman, blong yu tanem baksaed long sin, o blong mekem wan samting we i kaen long wan. Hemia i witnes long saed blong spirit we yu stap lukaotem we i talem se buk ia, i kam long God. Olsem we Momon i bin tijim: “Evri samting we i stap askem mo switim blong mekem samting we i gud, mo blong lavem God, mo blong wok blong hem, i kamaot long God” (Moronae 7:13; luk tu long 2 Nifae 33:4, 10; Alma 19:33; Ita 4:11–12).

Wan Maen we Laet i Saenem

Taem we Alma i bin wantem blong helpem Ol Man blong Soram, “blong go traem ol toktok blong [Hem]” mo save olgetawan se testemoni blong hem i tru o no, Alma i bin komperem toktok blong God long wan sid: “Sapos yufala i givim ples, blong oli save planem wan sid insaed long hat blong yufala,” Hem i eksplenem, “bae hem i stat blong kam bigwan insaed jes blong yufala; mo taem we yufala i filim we trutok ia i stap solap, bae yufala i stat blong talem insaed long yufala—Hemia i mas wan gudfala sid ia, o se trutok ia i gud, from hem i stat blong leftemap sol blong mi; yes, hem i stat blong givim moa laet long save blong mi, yes, hem i stat blong kam swit long mi” (Alma 32:27–28).

Yu “givim ples” long ol toktok blong Buk blong Momon insaed long hat blong yu taem yu letem ol toktok ia oli lidim laef blong yu mo i lidim yu long ol joes blong yu. ?Olsem wanem nao ol toktok ia bambae oli “leftemap sol blong [yu]” mo “givim moa laet long save blong [yu]”? Maet bae yu filim se yu stap kam strong moa long saed blong spirit. Maet bae yu filim se yu gat moa lav mo yu open moa long ol narawan. Maet bae yu luk tu se yu andastanem ol samting i gud moa, speseli ol samting long saed blong spirit—i olsem se wan laet i stap saen long maen blong yu. Mo maet bae yu agri se doktrin we oli stap tijim insaed long Buk blong Momon “i kam swit.” Ol kaen filing olsem oli save helpem yu blong andastanem se yu yu rili kasem wan witnes long saed blong spirit abaot trutok, olsem we Alma i bin talem: “O afta, ?samting ia i no tru? Mi talem long yufala, Yes, from we hemia i laet; mo eni samting we i laet, hem i gud, from we oli save luksave, from hemia, yufala i mas save se hem i gud” (Alma 32:35).

Yu No Nid blong Stap Askem Samting long Yuwan

Hemia i samfala wei we Spirit i stap toktok wetem yumi. I gat plante nara wei tu. Gohed blong lukaotem ol janis blong stap lisin long voes blong Spirit, mo bambae yu gohed blong kasem witnes, we i gogohed, we i stap konfemem se Buk blong Momon i tru.

Presiden Russel M. Nelson i bin promesem: “Yu no nid blong askem yuwan abaot wanem i tru. Yu no nid blong askem yuwan huia stret i sef blong yu trastem. Tru long revelesen we i kam long yuwan, yu save kasem witnes blong yuwan se Buk blong Momon i toktok blong God, se Josef Smit i wan profet, mo hemia i Jos blong Lod. Nomata wanem ol narawan oli talem o mekem, i no gat wan i save tekemaot wan witnes we Spirit i talem long hat mo maen blong yu abaot wanem i tru.” (“Revelesen blong Jos, Revelesen blong Laef blong Yumi,” Ensign o Liahona, Mei 2018, 93).