Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí

Ko Hai ʻOku Fakataumuʻa Ki ai e Naunau Ko ʻEní?

Ko e naunau ko ʻení ʻoku fakataumuʻa ia ki he fakafoʻituituí mo e fāmili kotoa pē ʻi he Siasí. Naʻe fakataumuʻa ia ke tokoniʻi koe ke ke ako e ongoongoleleí—ʻiate koe pē pe fakataha mo ho fāmilí. Kapau kuo teʻeki ke ke ako maʻu pē ki he ongoongoleleí ʻi he kuohilí, ʻe ala tokoni ʻa e naunau ko ʻení ke ke kamata leva. Kapau kuó ke ʻosi ako maʻu pē ki he ongoongoleleí, ʻe ala tokoni ʻa e naunau ko ʻení ke ke maʻu ha ngaahi aʻusia ʻoku ʻuhingamālie angé.

Te u Fakaʻaongaʻi Fēfē ʻa e Naunau Ko ʻEní?

Fakaʻaongaʻi ʻa e naunau ko ʻení ʻi ha founga pē ʻe ala tokoni kiate koé. ʻE lava ke hoko ia ko haʻo fakahinohino pe maʻuʻanga tokoni ki hono ako fakataautaha mo fakafāmili e folofolá. Te ke lava foki ʻo fakaʻaongaʻi ia ki he efiafi fakafāmili ʻi ʻapí. ʻOku fakamamafaʻi ʻe he ngaahi fokotuʻutuʻú ha ngaahi tefitoʻi moʻoni mahuʻinga ʻi he Tohi ʻa Molomoná, fokotuʻu atu ha ngaahi fakakaukau mo e ʻekitivitī tokoni ki hono ako fakafoʻituituí mo fakafāmilí, pea fakaʻatā mo ha feituʻu ke hiki ai e ngaahi ongo ʻokú ke maʻú.

Mahalo kuó ke ʻosi ako maʻu pē mo ho fāmilí ki he ongoongoleleí. Hangē ko ‘ení, mahalo pe ʻokú ke lau ha folofola kehe mei he Tohi ʻa Molomoná ki ha kalasi semineli pe ʻinisititiuti. ʻOku ʻikai fakataumuʻa ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fetongi pe feʻauʻauhi mo e ʻū meʻa lelei ʻokú ke lolotonga fakahokó. ʻE lava ke ʻi ai ha ngaahi founga ke ke ako mei he Tohi ʻa Molomoná mo ke kei lava pē ʻo fakahoko hoʻo ngaahi ako folofola kehé. Hangē ko ʻení, te ke lava ʻo hokohoko atu hono lau ha tohi folofola ʻe taha ki hoʻo ako fakataautaha e folofolá pea lau ʻa e Tohi ʻa Molomoná mo ho fāmilí (pe ko hono liliu ki ha founga ʻe taha). Muimui ki he fakahinohino ʻa e Laumālié ke fakapapauʻi e founga te ke fakahoko ai hoʻo ako e folofola ʻa e ʻOtuá.

ʻOku Fekauʻaki Fēfē ʻa e Naunau Ko ʻEní mo e Meʻa ʻOku Hoko ʻi he Siasí?

ʻOku fakamāʻopoʻopo ʻa e ngaahi fokotuʻutuʻu ʻi he nāunau ko ʻení ʻo fakatatau ki ha taimi tēpile laukonga fakauike. ʻOku muimui ʻa e Haʻu, ʻo Muimui ʻIate Au—Maʻá e Palaimelí mo e Haʻu ʻo Muimui ʻIate Au—Maʻá e Lautohi Faka-Sāpaté ki he taimi-tēpile tatau. Ke tokoniʻi hoʻo ngaahi feinga ke ako mo moʻui ʻaki e ongoongoleleí ʻi ʻapí, ʻe ʻoatu ʻe hoʻo kau faiako he lotú ha ngaahi faingamālie ke ke vahevahe ai hoʻo ngaahi aʻusiá, fakakaukaú, mo e ngaahi fehuʻi fekauʻaki mo e ngaahi potufolofola kuó ke ako ʻi ʻapí.

Koeʻuhí ʻoku akoʻi e Lautohi Faka-Sāpaté tuʻo ua pē he māhiná, ʻe lava ke fili ʻa e kau faiako Lautohi Faka-Sāpaté ke hiki fakalaka pe fakatahaʻi ʻa e ngaahi fokotuʻutuʻú ki he vave ʻo e taimi-tēpile fakauiké. Mahalo foki ʻe fie maʻu eni ki he ngaahi uike ʻoku ʻikai fakahoko ai ha ngaahi fakataha angamahení koeʻuhi ko ha konifelenisi fakasiteikí pe ngaahi ʻuhinga kehe. ʻOku fakaafeʻi koe ke hokohoko atu hoʻo ako e Tohi ʻa Molomoná ʻi ʻapi lolotonga e ngaahi uike ko ʻení.

ʻOku Fie Maʻu Nai Ke u Muimui ki he Taimi Tēpilé?

ʻE tokoni atu e taimi-tēpilé ke ʻosi hoʻo lau e Tohi ʻa Molomoná ʻi he fakaʻosinga ʻo e taʻú. ‘Ikai ngata aí, ʻe hoko e muimui he taimi-tēpile tatau pē mo e niʻihi kehe ʻi homou uōtí ke fakaiku ki ha ngaahi aʻusia mahuʻingamālie ʻi he Siasí. Kae ʻoua te ke ongoʻi haʻisia ki he taimi-tēpilé; ko ha fakahinohino pē ia ke tokoniʻi koe ke ke taimiʻi lelei hoʻo fokotuʻutuʻú. Ko e meʻa mahuʻingá ko hoʻo ako fakafoʻituitui mo fakafāmili ʻa e ongoongoleleí.