“ວັນທີ 15–21 ເດືອນມີນາ. ຄຳສອນ ແລະ ພັນທະສັນຍາ 27–28: ‘ທຸກສິ່ງຈະຕ້ອງຖືກເຮັດໄປຕາມລະບຽບ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 15–21 ເດືອນມີນາ. ຄຳສອນ ແລະ ພັນທະສັນຍາ 27–28,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ວັນທີ 15–21 ເດືອນມີນາ
ຄຳສອນ ແລະ ພັນທະສັນຍາ 27–28
“ທຸກສິ່ງຈະຕ້ອງຖືກເຮັດໄປຕາມລະບຽບ”
ແອວເດີ ດີ ທອດ ຄຣິສໂຕເຟີສັນ ໄດ້ກ່າວວ່າ ຂະນະທີ່ທ່ານສຶກສາພຣະຄຳພີ ແລະ ບັນທຶກຄວາມປະທັບໃຈໄວ້, “ທ່ານຈະມີບ່ອນຢູ່ໃນໃຈ ສຳລັບພຣະຄຳຂອງພຣະເຈົ້າ, ແລະ ພຣະອົງຈະກ່າວກັບທ່ານ” (“When Thou Art Converted,” Ensign ຫລື Liahona, May 2004, 11).
ບັນທຶກຄວາມປະທັບໃຈຂອງທ່ານ
ການເປີດເຜີຍຍັງເປັນຄວາມຄິດໃໝ່ຢູ່ສຳລັບໄພ່ພົນ ຂະນະທີ່ການຟື້ນຟູສືບຕໍ່ເປີດເຜີຍ. ສະມາຊິກຂອງສາດສະໜາລຸ້ນທຳອິດຮູ້ວ່າ ສາດສະດາໂຈເຊັບ ສະມິດ ສາມາດໄດ້ຮັບການເປີດເຜີຍສຳລັບສາດສະໜາຈັກ, ແຕ່ຄົນອື່ນສາມາດໄດ້ຮັບຢູ່ບໍ? ຄຳຖາມຄືກັນນີ້ກາຍເປັນຄຳຖາມທີ່ສຳຄັນ ເມື່ອໄຮຣຳ ເພຈ໌, ພະຍານຄົນໜຶ່ງໃນພະຍານແປດຄົນເຖິງແຜ່ນຈາລຶກຄຳ, ເຊື່ອວ່າລາວໄດ້ຮັບການເປີດເຜີຍສຳລັບສາດສະໜາຈັກ. ໄພ່ພົນທີ່ຊື່ສັດຫລາຍຄົນໄດ້ເຊື່ອວ່າ ການເປີດເຜີຍເຫລົ່ານີ້ມາຈາກພຣະເຈົ້າ. ພຣະຜູ້ເປັນເຈົ້າໄດ້ຕອບໂດຍການສິດສອນວ່າ ໃນສາດສະໜາຈັກຂອງພຣະອົງ “ທຸກສິ່ງຈະຕ້ອງຖືກເຮັດໄປຕາມລະບຽບ” (ຄຳສອນ ແລະ ພັນທະສັນຍາ 28:13), ຊຶ່ງໝາຍຄວາມວ່າ ມີແຕ່ຄົນດຽວເທົ່ານັ້ນ ທີ່ “ໄດ້ຮັບການແຕ່ງຕັ້ງໃຫ້ຮັບບັນຍັດ ແລະ ການເປີດເຜີຍ” ສຳລັບທັງສາດສະໜາຈັກ (ຄຳສອນ ແລະ ພັນທະສັນຍາ 28:2). ເຖິງຢ່າງໃດກໍຕາມ, ຄົນອື່ນກໍສາມາດໄດ້ຮັບການເປີດເຜີຍສ່ວນຕົວຢູ່ ສຳລັບພາກສ່ວນຂອງເຂົາເຈົ້າໃນວຽກງານຂອງພຣະຜູ້ເປັນເຈົ້າ. ຕາມຈິງແລ້ວ, ພຣະຄຳຂອງພຣະຜູ້ເປັນເຈົ້າຕໍ່ອໍລີເວີ ຄາວເດີຣີ ເປັນຄຳເຕືອນສຳລັບເຮົາທຸກຄົນວ່າ: “ມັນຈະຖືກມອບໃຫ້ແກ່ເຈົ້າ … ວ່າເຈົ້າຈະເຮັດສິ່ງໃດ” (ຄຳສອນ ແລະ ພັນທະສັນຍາ 28:15).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນ ແລະ ພັນທະສັນຍາ 27:1–4
ເຮົາຄວນຮັບສິນລະລຶກດ້ວຍການທີ່ເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ.
ນາງຊາລີ ໄນ້ ແລະ ນາງເອມມາ ສະມິດ ໄດ້ຮັບບັບຕິສະມາ ໃນເດືອນມິຖຸນາ ປີ 1830, ແຕ່ການຢືນຢັນຂອງເຂົາເຈົ້າ ໄດ້ຖືກລົບກວນໂດຍກຸ່ມອັນຕະພານ. ສອງເດືອນຕໍ່ຈາກນັ້ນ, ນາງຊາລີ ແລະ ນິວເອັນ ສາມີຂອງນາງ, ໄດ້ມາຢ້ຽມຢາມນາງເອມມາ ແລະ ໂຈເຊັບ, ແລະ ເຂົາເຈົ້າໄດ້ຕັດສິນໃຈວ່າ ຄວນທຳການຢືນຢັນໃນເວລານັ້ນ ແລະ ກຸ່ມເຂົາເຈົ້າຈະໄດ້ຮັບສິນລະລຶກນຳກັນ. ຂະນະທີ່ເພິ່ນໄດ້ອອກໄປເອົາເຫລົ້າອະງຸ່ນເພື່ອມາທຳພິທີສິນລະລຶກ, ໂຈເຊັບໄດ້ຖືກຢຸດໂດຍທູດອົງໜຶ່ງ. ທູດໄດ້ສິດສອນເພິ່ນຫຍັງແດ່ກ່ຽວກັບສິນລະລຶກ? (ເບິ່ງ ຄຳສອນ ແລະ ພັນທະສັນຍາ 27:1–4).
ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບວິທີທີ່ພຣະຜູ້ຊ່ວຍໃຫ້ລອດປະສົງໃຫ້ທ່ານເຂົ້າຫາສິນລະລຶກ? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພາະສິ່ງທີ່ທ່ານໄດ້ຮຽນຮູ້?
ສິນລະລຶກເຕືອນເຮົາເຖິງການເສຍສະລະຂອງພຣະຜູ້ຊ່ວຍໃຫ້ລອດ.
ຄຳສອນ ແລະ ພັນທະສັນຍາ 27:15–18
ຍຸດທະພັນຂອງພຣະເຈົ້າຈະຊ່ວຍເຮົາຢືນຕໍ່ຕ້ານຄວາມຊົ່ວຮ້າຍໄດ້.
ປະທານເອັມ ຣະໂຊ ບາເລີດ ໄດ້ກ່າວວ່າ: “ບໍ່ມີສິ່ງໃດທີ່ເຮົາສາມາດເຮັດ ທີ່ຍິ່ງໃຫຍ່ ແລະ ສຳຄັນຫລາຍໄປກວ່າການສວມຍຸດທະພັນທາງວິນຍານຂອງເຮົາ. ພະລັງທາງວິນຍານທີ່ແທ້ຈິງ ມາຈາກການກະທຳອັນເລັກນ້ອຍຫລາຍໆຢ່າງ ທີ່ຖືກຕ່ຳເຂົ້າກັນເປັນເນື້ອຜ້າປົກປ້ອງທາງວິນຍານ ແລະ ເປັນເຄື່ອງປ້ອງກັນຈາກຄວາມຊົ່ວຮ້າຍທັງປວງ” (“Be Strong in the Lord,” Ensign, July 2004, 8).
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 27:15–18, ທ່ານຄວນເຮັດແຜນຜັງ ຄືກັນກັບອັນທີ່ຢູ່ຂ້າງລຸ່ມ. ທ່ານຈະເຮັດສິ່ງໃດ ເພື່ອສວມຍຸດທະພັນແຕ່ລະຊິ້ນສ່ວນຂອງພຣະເຈົ້າ?
|
ຊິ້ນສ່ວນຂອງຍຸດທະພັນ |
ພາກສ່ວນຂອງຮ່າງກາຍທີ່ຖືກປົກປ້ອງ |
ສິ່ງທີ່ພາກສ່ວນຂອງຮ່າງກາຍເປັນຕົວແທນໃຫ້ |
|---|---|---|
|
ແຜ່ນປົກເອິກແຫ່ງຄວາມຊອບທຳ |
ຫົວໃຈ |
ຄວາມປາດຖະໜາ ແລະ ຄວາມຮັກຂອງເຮົາ |
|
ໝວກເຫລັກແຫ່ງຄວາມລອດ |
ຫົວ ຫລື ຄວາມຄິດ |
ເບິ່ງ ເອເຟໂຊ 6:11–18; 2 ນີໄຟ 1:23 ນຳອີກ.
ສາດສະດາທີ່ມີຊີວິດຢູ່ ເປັນຜູ້ກ່າວແທນພຣະເຈົ້າ ສຳລັບສາດສະໜາຈັກ.
ໃຫ້ຄິດເອງວ່າ ມັນຈະເປັນແນວໃດຖ້າຫາກໃຜໆກໍສາມາດໄດ້ຮັບພຣະບັນຍັດ ແລະ ການເປີດເຜີຍສຳລັບທັງສາດສະໜາຈັກຂອງພຣະອົງ. ເມື່ອໄຮຣຳ ເພຈ໌ ໄດ້ປະກາດວ່າລາວໄດ້ຮັບການເປີດເຜີຍເຊັ່ນນັ້ນ, ມັນໄດ້ເກີດຄວາມສັບສົນຢູ່ໃນບັນດາສະມາຊິກຂອງສາດສະໜາຈັກ. ໃນ ຄຳສອນ ແລະ ພັນທະສັນຍາ 28, ພຣະຜູ້ເປັນເຈົ້າໄດ້ເປີດເຜີຍລະບຽບສຳລັບການເປີດເຜີຍຢູ່ໃນສາດສະໜາຈັກຂອງພຣະອົງ. ທ່ານຮຽນຮູ້ຫຍັງແດ່ຈາກພາກນີ້ ກ່ຽວກັບບົດບາດສະເພາະຂອງປະທານຂອງສາດສະໜາຈັກ? ທ່ານຮຽນຮູ້ຫຍັງແດ່ຈາກພຣະຄຳຂອງພຣະຜູ້ເປັນເຈົ້າຕໍ່ອໍລີເວີ ຄາວເດີຣີ ຢູ່ໃນ ຂໍ້ທີ 3? ທ່ານຮຽນຮູ້ຫຍັງແດ່ຈາກພາກນີ້ ກ່ຽວກັບວິທີທີ່ພຣະເຈົ້າສາມາດຊີ້ນຳທ່ານ?
ຄຳສອນ ແລະ ພັນທະສັນຍາ 28:8–9
ເປັນຫຍັງການໄປເຜີຍແຜ່ຂອງອໍລີເວີ ຄາວເດີຣີ ຕໍ່ຊາວເລມັນ ຈຶ່ງສຳຄັນຫລາຍ?
ຈຸດປະສົງຢ່າງໜຶ່ງຂອງພຣະຄຳພີມໍມອນແມ່ນ “ເພື່ອວ່າຊາວເລມັນຈະມີຄວາມຮູ້ເລື່ອງບັນພະບຸລຸດຂອງເຂົາ, ແລະ ເພື່ອວ່າເຂົາຈະຮູ້ກ່ຽວກັບ ຄຳສັນຍາຂອງພຣະຜູ້ເປັນເຈົ້າ” (ຄຳສອນ ແລະ ພັນທະສັນຍາ 3:20). ສິ່ງນີ້ແມ່ນກົງກັບຄຳສັນຍາທີ່ພຣະຜູ້ເປັນເຈົ້າໄດ້ເຮັດໄວ້ກັບສາດສະດາຫລາຍທ່ານຂອງພຣະຄຳພີມໍມອນ (ເບິ່ງ, ຍົກຕົວຢ່າງ, 1 ນີໄຟ 13:34–41; ເອໂນດ 1:11–18; ຮີລາມັນ 15:12–13). ສະມາຊິກຂອງສາດສະໜາຈັກລຸ້ນທຳອິດ ຖືວ່າຊາວອິນເດຍແດງ ເປັນເຊື້ອສາຍຂອງຜູ້ຄົນຢູ່ໃນພຣະຄຳພີມໍມອນ. (ປະຈຸບັນນີ້ ສາດສະໜາຈັກຮັບຮູ້ເປັນທາງການວ່າ ຊາວເລມັນ “ເປັນບັນພະບຸລຸດຂອງຊາວອິນເດຍແດງ” [ຄຳນຳຕໍ່ພຣະຄຳພີມໍມອນ].)
ການເຜີຍແຜ່ນີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ ແລະ ວຽກງານຂອງພຣະອົງ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 27:1–2.ເຮົາຈະສາມາດຈື່ຈຳໄດ້ດີກວ່າເກົ່າແນວໃດ ເຖິງການເສຍສະລະຂອງພຣະຜູ້ຊ່ວຍໃຫ້ລອດເພື່ອເຮົາ ຂະນະທີ່ເຮົາຮັບສ່ວນສິນລະລຶກ?
-
ຄຳສອນ ແລະ ພັນທະສັນຍາ 27:5–14.ເຮົາຮູ້ຫຍັງແດ່ກ່ຽວກັບສາດສະດາຢູ່ໃນຂໍ້ເຫລົ່ານີ້? ທ່ານສາມາດຊອກຫາຂໍ້ມູນກ່ຽວກັບເຂົາເຈົ້າ ຢູ່ໃນຄູ່ມືພຣະຄຳພີ (scriptures.ChurchofJesusChrist.org). ພອນຢ່າງໃດແດ່ທີ່ໄດ້ຖືກເປີດໃຫ້ເຮົາ ຜ່ານທາງຂໍກະແຈທີ່ພວກເພິ່ນດຳລົງ? ສຳລັບລາຍລະອຽດເພີ່ມເຕີມກ່ຽວກັບຂໍກະແຈບາງຢ່າງເຫລົ່ານີ້, ໃຫ້ເບິ່ງ ມັດທາຍ 16:16–19; ຄຳສອນ ແລະ ພັນທະສັນຍາ 110:11–16.
-
ຄຳສອນ ແລະ ພັນທະສັນຍາ 27:15–18.ບາງທີຄອບຄົວຂອງທ່ານອາດມັກຫລິ້ນລະຄອນກ້ອມ ທຳທ່າສູ້ຮົບ ດ້ວຍການໃສ່ສິ່ງທີ່ເປັນຕົວແທນໃຫ້ແກ່ຍຸດທະພັນຂອງພຣະເຈົ້າ, ເຊັ່ນ ໝວກ, ເສື້ອກັກ, ຜ້າກັນເປື້ອນ, ຫລື ເກີບ. ຍຸດທະພັນຊ່ວຍປົກປ້ອງເຮົາແນວໃດ ໃນການຕໍ່ສູ້? ໃຫ້ສົນທະນາບາງສິ່ງກ່ຽວກັບອິດທິພົນຂອງຄວາມຊົ່ວຮ້າຍ ທີ່ຄອບຄົວຂອງທ່ານໄດ້ປະເຊີນ ແລະ ເຖິງສິ່ງທີ່ທ່ານສາມາດເຮັດ ເພື່ອຈະໄດ້ສວມຍຸດທະພັນທາງວິນຍານ.
-
ຄຳສອນ ແລະ ພັນທະສັນຍາ 28:2–7.ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບການເອີ້ນຂອງສາດສະດາ? ບາງທີສະມາຊິກໃນຄອບຄົວສາມາດທົບທວນຂ່າວສານທີ່ຜ່ານມາ ຈາກສາດສະດາທີ່ມີຊີວິດຢູ່ ແລະ ແບ່ງປັນວິທີທີ່ຄຳແນະນຳຂອງເພິ່ນ ຊ່ວຍເຮົາຕິດຕາມພຣະເຢຊູຄຣິດແນວໃດ.
-
ຄຳສອນ ແລະ ພັນທະສັນຍາ 28:11.ເມື່ອເຮົາຢາກຕັກເຕືອນບາງຄົນ, ເປັນຫຍັງມັນຈຶ່ງສຳຄັນ ທີ່ຈະຈັດການ “ລະຫວ່າງເຈົ້າກັບລາວເທົ່ານັ້ນ”?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຂອບພຣະໄທສຳລັບສາດສະດາ,” ເພງສວດ ແລະ ເພງຂອງເດັກນ້ອຍ, ເລກທີ 40.
ການປັບປຸງການສຶກສາສ່ວນຕົວ
ສຶກສາຖ້ອຍຄຳຂອງສາດສະດາ ແລະ ອັກຄະສາວົກຂອງຍຸກສຸດທ້າຍ. ອ່ານສິ່ງທີ່ສາດສະດາຂອງຍຸກສຸດທ້າຍ ໄດ້ສິດສອນກ່ຽວກັບຫລັກທຳທີ່ທ່ານພົບເຫັນຢູ່ໃນພຣະຄຳພີ. ໃຫ້ຄິດທົບທວນດັດຊະນີຫົວຂໍ້ຂອງກອງປະຊຸມໃຫຍ່ສາມັນ ຢູ່ທີ່ conference.ChurchofJesusChrist.org ຫລື ຢູ່ໃນແອພ ຫ້ອງສະໝຸດພຣະກິດຕິຄຸນ.