“ວັນທີ 22–28 ເດືອນມີນາ. ຄຳສອນ ແລະ ພັນທະສັນຍາ 29: ‘ພຣະເຢຊູຄຣິດຈະເຕົ້າໂຮມຜູ້ຄົນຂອງພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 22–28 ເດືອນມີນາ. ຄຳສອນ ແລະ ພັນທະສັນຍາ 29,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ທຸກຫົວເຂົ່າຈະຄຸລົງ, ໂດຍ ເຈ ເຄີກ ຣິເຈີດສ໌
ວັນທີ 22–28 ເດືອນມີນາ
ຄຳສອນ ແລະ ພັນທະສັນຍາ 29
ພຣະເຢຊູຄຣິດຈະເຕົ້າໂຮມຜູ້ຄົນຂອງພຣະອົງ
ຈຸດປະສົງຢ່າງໜຶ່ງຂອງການສຶກສາພຣະຄຳພີ ແມ່ນທີ່ຈະຮຽນຮູ້ຄຳສອນ, ຫລື ຄວາມຈິງຂອງພຣະກິດຕິຄຸນ ທີ່ຈຳເປັນຕໍ່ຄວາມລອດຂອງເຮົາ. ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 29 ອາທິດນີ້, ໃຫ້ຊອກຫາຄວາມຮູ້ຈາກຄຳສອນທີ່ມີຄວາມໝາຍຕໍ່ທ່ານ.
ບັນທຶກຄວາມປະທັບໃຈຂອງທ່ານ
ເຖິງແມ່ນວ່າສາດສະໜາຈັກຂອງພຣະເຢຊູຄຣິດ ໄດ້ຖືກຈັດຕັ້ງຂຶ້ນໃນປີ 1830, ແຕ່ຄວາມຈິງຂອງພຣະກິດຕິຄຸນຫລາຍຢ່າງ ຍັງບໍ່ໄດ້ຖືກເປີດເຜີຍເທື່ອ, ແລະ ສະມາຊິກຂອງສາດສະໜາຈັກລຸ້ນທຳອິດຫລາຍຄົນ ມີຄຳຖາມ. ເຂົາເຈົ້າໄດ້ອ່ານການທຳນາຍຢູ່ໃນພຣະຄຳພີມໍມອນ ກ່ຽວກັບການເຕົ້າໂຮມອິດສະຣາເອນ ແລະ ການສ້າງສາຊີໂອນ (ເບິ່ງ 3 ນີໄຟ 21). ສິ່ງນັ້ນຈະເກີດຂຶ້ນໄດ້ແນວໃດ? ການເປີດເຜີຍທີ່ໄຮຣຳ ເພຈ໌ ອ້າງວ່າ ຕົວເອງໄດ້ຮັບ ໄດ້ກ່າວເຖິງເລື່ອງນີ້, ຊຶ່ງພຽງແຕ່ເຮັດໃຫ້ສະມາຊິກຢາກຮູ້ຢາກເຫັນຫລາຍຂຶ້ນກວ່າເກົ່າ (ເບິ່ງ ຄຳສອນ ແລະ ພັນທະສັນຍາ 28). ຄົນອື່ນໆກໍຢາກຮູ້ກ່ຽວກັບການຕົກຂອງອາດາມ ແລະ ເອວາ ແລະ ຄວາມຕາຍທາງວິນຍານ. ພຣະຜູ້ເປັນເຈົ້າໄດ້ຕ້ອນຮັບຄຳຖາມເຫລົ່ານີ້ ໃນປີ 1830: “ສິ່ງໃດກໍຕາມທີ່ພວກເຈົ້າຈະທູນຂໍດ້ວຍສັດທາ,” ພຣະອົງໄດ້ບອກໄພ່ພົນ, “ໂດຍການຮ່ວມກັນໃນຄຳອະທິຖານຕາມຄຳບັນຊາຂອງເຮົາ, ແລ້ວພວກເຈົ້າຈະໄດ້ຮັບ” (ຄຳສອນ ແລະ ພັນທະສັນຍາ 29:6). ແລະ ພຣະອົງກໍຕ້ອນຮັບຄຳຖາມຂອງເຮົາໃນທຸກວັນນີ້; ພຣະອົງພຽງແຕ່ລໍຖ້າເຮົາໃຫ້ທູນຖາມພຣະອົງໃນການອະທິຖານ. ຕາມຈິງແລ້ວ, ດັ່ງທີ່ການເປີດເຜີຍທີ່ເຕັມໄປດ້ວຍຄຳສອນ ຢູ່ໃນ ຄຳສອນ ແລະ ພັນທະສັນຍາ 29 ສະແດງໃຫ້ເຫັນ, ບາງເທື່ອພຣະອົງໄດ້ຕອບໂດຍການມອບຄວາມຈິງ ແລະ ຄວາມຮູ້ໃຫ້ເຮົາ ເກີນກວ່າຄຳຖາມທີ່ເຮົາໄດ້ທູນຖາມຢູ່ແລ້ວ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະບິດາເທິງສະຫວັນໄດ້ຈັດຕຽມແຜນທີ່ສົມບູນແບບສຳລັບຄວາມລອດຂອງເຮົາ.
ຄຳສອນ ແລະ ພັນທະສັນຍາ 29 ສິດສອນຄວາມຈິງຫລາຍຢ່າງ ກ່ຽວກັບແຜນຂອງພຣະເຈົ້າສຳລັບລູກໆຂອງພຣະອົງ. ຂະນະທີ່ທ່ານອ່ານ, ໃຫ້ຊອກຫາຄວາມຈິງ ທີ່ທ່ານຮຽນຮູ້ກ່ຽວກັບພາກສ່ວນແຕ່ລະຢ່າງຂອງແຜນ ດັ່ງຕໍ່ໄປນີ້:
-
ຊີວິດກ່ອນໂລກມະຕະ (ເບິ່ງ ຂໍ້ທີ 36–37)
-
ການສ້າງ (ເບິ່ງ ຂໍ້ທີ 31–33)
-
ການຕົກຂອງອາດາມ ແລະ ເອວາ (ເບິ່ງ ຂໍ້ທີ 40–41)
-
ຊີວິດມະຕະ (ເບິ່ງ ຂໍ້ທີ 39, 42–45)
-
ການຊົດໃຊ້ຂອງພຣະເຢຊູຄຣິດ (ເບິ່ງ ຂໍ້ທີ 1, 42–43, 46–50)
-
ການຟື້ນຄືນຊີວິດ (ເບິ່ງ ຂໍ້ທີ 13, 26)
-
ການພິພາກສາຄັ້ງສຸດທ້າຍ (ເບິ່ງ ຂໍ້ທີ 12–13, 27–30)
ທ່ານໄດ້ຮັບຄວາມຮູ້ໃໝ່ຢ່າງໃດແດ່? ຊີວິດຂອງທ່ານຈະແຕກຕ່າງແນວໃດແດ່ ຖ້າຫາກທ່ານບໍ່ເຄີຍຮູ້ກ່ຽວກັບຄວາມຈິງເຫລົ່ານີ້?
ທ່ານສາມາດຮຽນຮູ້ຕື່ມອີກກ່ຽວກັບແຜນຂອງພຣະບິດາເທິງສະຫວັນ ຢູ່ໃນ “ແຜນແຫ່ງຄວາມລອດ” (ຈົ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການຮັບໃຊ້ຂອງຜູ້ສອນສາດສະໜາ, rev. ed. [2018], ChurchofJesusChrist.org/manual/missionary).
ຄຳສອນ ແລະ ພັນທະສັນຍາ 29:1–8
ພຣະເຢຊູຄຣິດຈະເຕົ້າໂຮມຜູ້ຄົນຂອງພຣະອົງກ່ອນການສະເດັດມາຄັ້ງທີສອງຂອງພຣະອົງ.
ພຣະເຢຊູຄຣິດກ່າວເຖິງການເຕົ້າໂຮມຜູ້ຄົນຂອງພຣະອົງ “ດັ່ງແມ່ໄກ່ເຕົ້າໂຮມລູກຂອງມັນໄວ້ໃຕ້ປີກຂອງມັນ” (ຄຳສອນ ແລະ ພັນທະສັນຍາ 29:2). ພາບນີ້ສິດສອນເຮົາຫຍັງແດ່ກ່ຽວກັບພຣະປະສົງຂອງພຣະຜູ້ຊ່ວຍໃຫ້ລອດ ທີ່ຈະເຕົ້າໂຮມທ່ານ? ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 29:1–8, ໃຫ້ຊອກຫາຄວາມຮູ້ກ່ຽວກັບວ່າ ເປັນຫຍັງເຮົາຈຶ່ງເຕົ້າໂຮມ, ກ່ຽວກັບຜູ້ຈະເຕົ້າໂຮມ, ແລະ ເຮົາຈະສາມາດຊ່ວຍເຕົ້າໂຮມ “ຜູ້ທີ່ຖືກເລືອກ” ໄດ້ແນວໃດ (ຂໍ້ທີ 7).
ໃນວັນເວລາຂອງເຮົາ, ການເຕົ້າໂຮມຊີໂອນ ໝາຍເຖິງການໂຮມເຂົ້າກັນຢູ່ໃນສະເຕກຕ່າງໆຂອງຊີໂອນ ຕະຫລອດທົ່ວໂລກ. ການເຕົ້າໂຮມໃນຖານະໄພ່ພົນ ຊ່ວຍເຮົາ “ໃຫ້ຕຽມໃນທຸກສິ່ງ” ເພື່ອຄວາມທຸກຍາກລຳບາກ ທີ່ຈະມາເຖິງກ່ອນການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດໄດ້ແນວໃດ? (ຂໍ້ທີ 8; ເບິ່ງ ຂໍ້ທີ 14–28 ນຳອີກ).
ເບິ່ງ ຫລັກແຫ່ງຄວາມເຊື່ອ 1:10; Russell M. Nelson and Wendy W. Nelson, “Hope of Israel” (worldwide devotional for youth, June 3, 2018, ChurchofJesusChrist.org ນຳອີກ).
ຈັກເທື່ອແລ້ວ, ໂດຍ ລີສ໌ ລີມັນ ສະວິນໂດ
ຄຳສອນ ແລະ ພັນທະສັນຍາ 29:31–35
“ສຳລັບເຮົາທຸກສິ່ງເປັນທາງຝ່າຍວິນຍານ.”
ພຣະບັນຍັດທຸກຂໍ້ມີຄວາມໝາຍທາງຝ່າຍວິນຍານແນວໃດ? ການຮູ້ຈັກວ່າ ພຣະບັນຍັດທຸກຂໍ້ເປັນທາງຝ່າຍວິນຍານ ສິດສອນທ່ານກ່ຽວກັບຈຸດປະສົງຂອງພຣະບັນຍັດແນວໃດ? ທ່ານສາມາດຂຽນພຣະບັນຍັດສອງສາມຂໍ້ ແລະ ພິຈາລະນາຫລັກທຳທາງຝ່າຍວິນຍານ ທີ່ກ່ຽວພັນກັນ.
ຈະມີຫຍັງປ່ຽນແປງ ຖ້າຫາກທ່ານຫລຽວຫາຄວາມໝາຍ ຫລື ຈຸດປະສົງທາງຝ່າຍວິນຍານ ໃນຊີວິດປະຈຳວັນຂອງທ່ານ, ແມ່ນແຕ່ສິ່ງທີ່ເບິ່ງຄືວ່າ ເປັນທາງຝ່າຍໂລກ ຫລື ໜ້າເບື່ອ?
ເບິ່ງ ໂຣມ 8:6; 1 ນີໄຟ 15:30–32 ນຳອີກ.
ຄຳສອນ ແລະ ພັນທະສັນຍາ 29:36–50
ພຣະເຢຊູຄຣິດໄຖ່ເຮົາຈາກການຕົກ.
ການເປີດເຜີຍນີ້ ເລີ່ມຕົ້ນດ້ວຍພຣະຜູ້ເປັນເຈົ້າແນະນຳພຣະອົງເອງວ່າເປັນພຣະຜູ້ໄຖ່ຂອງເຮົາ, ຜູ້ “ໄດ້ຊົດໃຊ້ເພື່ອບາບ [ຂອງເຮົາ]” (ຂໍ້ທີ 1). ການເປີດເຜີຍໄດ້ອະທິບາຍຕື່ມອີກ ເຖິງເຫດຜົນບາງຢ່າງທີ່ເຮົາຈຳເປັນຕ້ອງມີພຣະຜູ້ໄຖ່. ໃຫ້ພິຈາລະນາເຖິງວິທີທີ່ທ່ານຈະໃຊ້ ຂໍ້ທີ 36–50 ເພື່ອອະທິບາຍເຫດຜົນທີ່ເຮົາຈຳເປັນຕ້ອງຖືກໄຖ່ ຜ່ານທາງພຣະຜູ້ຊ່ວຍໃຫ້ລອດ ພຣະເຢຊູຄຣິດ. ໃນປະເພນີຂອງສາດສະໜາຕ່າງໆ, ການຕົກເປັນເລື່ອງທີ່ໂສກເສົ້າ; ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ສິດສອນຜົນສະທ້ອນຂອງການຕົກໃນທາງບວກ? (ເບິ່ງ 1 ໂກຣິນໂທ 15:22; 2 ນີໄຟ 2:6–8, 15–29; ໂມໄຊຢາ 3:1–19; ໂມເຊ 5:9–12 ນຳອີກ.)
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 29.ທ່ານສາມາດໃຊ້ຮູບພາບຢູ່ໃນທ້າຍໂຄງຮ່າງນີ້ ຮ່ວມກັບ ຄຳສອນ ແລະ ພັນທະສັນຍາ 29 ເພື່ອສິດສອນຄອບຄົວຂອງທ່ານກ່ຽວກັບແຜນແຫ່ງຄວາມລອດ. ຍົກຕົວຢ່າງ, ສະມາຊິກໃນຄອບຄົວສາມາດຮຽນຮູ້ກ່ຽວກັບພາກສ່ວນຕ່າງໆຂອງແຜນ ໂດຍການອ່ານ ແລະ ສົນທະນາຂໍ້ທີ່ຖືກແນະນຳ. ເຂົາເຈົ້າສາມາດຊອກຫາຄວາມຈິງອື່ນອີກຢູ່ໃນຫົວຂໍ້ພຣະກິດຕິຄຸນ (topics.ChurchofJesusChrist.org) ຫລື ຢູ່ໃນຄູ່ມືພຣະຄຳພີ (scriptures.ChurchofJesusChrist.org). ໃຫ້ຂຽນສິ່ງທີ່ທ່ານໄດ້ຮຽນຮູ້ລົງໄວ້. ເປັນຫຍັງເຮົາຈຶ່ງຂອບຄຸນ ທີ່ໄດ້ຮູ້ຈັກກ່ຽວກັບແຜນແຫ່ງຄວາມລອດ? ການຮູ້ຈັກກ່ຽວກັບມັນ ເຮັດໃຫ້ມັນມີອິດທິພົນໃນຊີວິດປະຈຳວັນຂອງເຮົາແນວໃດ?
-
ຄຳສອນ ແລະ ພັນທະສັນຍາ 29:2, 7–8.ການຖືກເຕົ້າໂຮມໂດຍພຣະຜູ້ຊ່ວຍໃຫ້ລອດ ໝາຍຄວາມວ່າແນວໃດ? ເຮົາຈະສາມາດຊ່ວຍພຣະອົງເຕົ້າໂຮມຜູ້ທີ່ຖືກເລືອກແນວໃດ?
-
ຄຳສອນ ແລະ ພັນທະສັນຍາ 29:3–5.ເຮົາຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ຢູ່ໃນຂໍ້ເຫລົ່ານີ້ທີ່ຊ່ວຍເຮົາໃຫ້ “ລື້ນເລີງ ແລະ ເບີກບານ”? (ຂໍ້ທີ 5).
-
ຄຳສອນ ແລະ ພັນທະສັນຍາ 29:34–35.ການອ່ານຂໍ້ເຫລົ່ານີ້ ສາມາດໃຫ້ໂອກາດຄອບຄົວຂອງທ່ານ ເພື່ອເວົ້າລົມກັນກ່ຽວກັບເຫດຜົນເບື້ອງຫລັງທາງຝ່າຍວິນຍານຂອງພຣະບັນຍັດບາງປະການ ຫລື ຄຳແນະນຳຢູ່ໃນຄຳທຳນາຍບາງຢ່າງ ທີ່ພວກທ່ານພະຍາຍາມເຮັດຕາມ. ຍົກຕົວຢ່າງ, ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ເຮົາອ່ານພຣະຄຳພີເປັນຄອບຄົວ? ຜົນປະໂຫຍດທາງຝ່າຍວິນຍານຢ່າງໃດແດ່ ທີ່ເຮົາໄດ້ເຫັນຈາກການຮັກສາພຣະບັນຍັດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “Israel, Israel, God Is Calling,” Hymns, no. 7.
ການປັບປຸງການສິດສອນຂອງເຮົາ
ຊອກຫາພຣະເຢຊູຄຣິດ. ພຣະຄຳພີສິດສອນເຮົາວ່າ ການສ້າງທັງໝົດຂອງພຣະເຈົ້າ ເປັນພະຍານເຖິງພຣະເຢຊູຄຣິດ (ເບິ່ງ ໂມເຊ 6:62–63), ສະນັ້ນໃຫ້ຊອກຫາພຣະອົງ ຂະນະທີ່ທ່ານອ່ານພຣະຄຳພີ. ໃຫ້ຄິດທີ່ຈະບັນທຶກ ຫລື ໝາຍຂໍ້ທີ່ສິດສອນກ່ຽວກັບພຣະອົງ.