“ວັນທີ 29 ເດືອນມີນາ–ວັນທີ 4 ເດືອນເມສາ. ອີດສະເຕີ: ‘ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 29 ເດືອນມີນາ–ວັນທີ 4 ເດືອນເມສາ. ອີດສະເຕີ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຮູບປັ້ນຂອງພຣະຄຣິດ

ວັນທີ 29 ເດືອນມີນາ–ວັນທີ 4 ເດືອນເມສາ

ອີດສະເຕີ

“ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ”

ຂະນະທີ່ທ່ານກະກຽມທີ່ຈະລະນຶກເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ໃນວັນອາທິດບຸນອີດສະເຕີ, ໃຫ້ໄຕ່ຕອງເຖິງວິທີທີ່ການເປີດເຜີຍໃນປະຈຸບັນຊ່ວຍໃຫ້ທ່ານມີສັດທາຫລາຍຂຶ້ນແນວໃດ ວ່າພຣະເຢຊູຄຣິດເທົ່ານັ້ນ ທີ່ເປັນພຣະບຸດອົງດຽວທີ່ຖືກຳເນີດຂອງພຣະເຈົ້າ ແລະ ເປັນພຣະຜູ້ໄຖ່ຂອງໂລກ.

ບັນທຶກຄວາມປະທັບໃຈຂອງທ່ານ

ວັນທີ 3 ເດືອນເມສາ, 1836, ເປັນວັນອາທິດ ບຸນອີດສະເຕີ. ຫລັງຈາກໄດ້ຊ່ວຍປະຕິບັດສິນລະລຶກແກ່ໄພ່ພົນທີ່ໄດ້ມາເຕົ້າໂຮມກັນ ຢູ່ໃນພຣະວິຫານເຄີດແລນ ທີ່ຫາກໍຖືກອຸທິດໃໝ່ໆ, ໂຈເຊັບ ສະມິດ ແລະ ອໍລີເວີ ຄາວເດີຣີ ໄດ້ເຫັນບ່ອນທີ່ມິດງຽບ ຢູ່ຂ້າງຫລັງຜ້າກັ້ງຂອງພຣະວິຫານ ແລະ ໄດ້ຄຸເຂົ່າລົງອະທິຖານຢູ່ໃນໃຈ. ແລ້ວ, ໃນວັນທີ່ສັກສິດນີ້ເອງ ທີ່ຊາວຄຣິດໃນທຸກແຫ່ງຫົນ ໄດ້ລະນຶກເຖິງການຟື້ນຄືນພຣະຊົນຂອງພຣະເຢຊູຄຣິດ, ພຣະຜູ້ຊ່ວຍໃຫ້ລອດທີ່ຊົງຟື້ນ ໄດ້ມາປະກົດຢູ່ໃນພຣະວິຫານຂອງພຣະອົງ, ປະກາດວ່າ, “ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ” (ຄຳສອນ ແລະ ພັນທະສັນຍາ 110:4).

ມັນໝາຍຄວາມວ່າແນວໃດ ທີ່ພຣະເຢຊູຄຣິດ ໄດ້ເປັນ “ເຂົາຜູ້ນັ້ນທີ່ມີຊີວິດ”? ມັນບໍ່ພຽງມີຄວາມໝາຍວ່າ ພຣະອົງໄດ້ລຸກຂຶ້ນຈາກອຸບມຸງໃນມື້ທີສາມ ແລະ ໄດ້ມາປະກົດຕໍ່ອັກຄະສາວົກໄທຄາລີເລຂອງພຣະອົງເທົ່ານັ້ນ. ມັນໝາຍຄວາມວ່າ ພຣະອົງຊົງພຣະຊົນຢູ່ ໃນທຸກວັນນີ້. ພຣະອົງກ່າວຜ່ານທາງສາດສະດາ ໃນທຸກວັນນີ້. ພຣະອົງນຳພາສາດສະໜາຈັກຂອງພຣະອົງ ໃນທຸກວັນນີ້. ພຣະອົງໄດ້ປິ່ນປົວຈິດວິນຍານທີ່ເຈັບປວດ ແລະ ໃຈທີ່ຊອກຊ້ຳ ໃນທຸກວັນນີ້. ສະນັ້ນ ເຮົາຈຶ່ງສາມາດເວົ້າຊ້ຳປະຈັກພະຍານທີ່ມີພະລັງຂອງໂຈເຊັບ ສະມິດ ທີ່ວ່າ: “ຫລັງຈາກປະຈັກພະຍານຫລາຍຢ່າງທີ່ໃຫ້ໄວ້ເຖິງພຣະອົງ, ນີ້ຄືປະຈັກພະຍານ … ຊຶ່ງພວກເຮົາມອບໃຫ້ເຖິງພຣະອົງ: ວ່າພຣະອົງຊົງພຣະຊົນ!” (ຄຳສອນ ແລະ ພັນທະສັນຍາ 76:22). ເຮົາສາມາດໄດ້ຍິນສຸລະສຽງຂອງພຣະອົງ ຢູ່ໃນການເປີດເຜີຍເຫລົ່ານີ້. ເຮົາສາມາດເຫັນພຣະຫັດຂອງພຣະອົງ ຢູ່ໃນຊີວິດຂອງເຮົາ. ແລະ ເຮົາແຕ່ລະຄົນກໍສາມາດຮູ້ສຶກເຖິງ “ຂໍ້ຄວາມແສນຫວານນີ້: ‘ເຮົາຮູ້ພຣະຜູ້ໄຖ່ຊົງພຣະຊົນ!’” (ເພງສວດ ແລະ ເພງຂອງເດັກນ້ອຍ, ເລກທີ 42).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 29:5; 38:7; 62:1; 76:11–14, 20–24; 110:1–10

ພຣະເຢຊູຄຣິດຊົງພຣະຊົນ.

ສາດສະດາໂຈເຊັບ ສະມິດ ໄດ້ເຫັນພຣະຜູ້ຊ່ວຍໃຫ້ລອດທີ່ຊົງຟື້ນຫລາຍເທື່ອ, ແລະ ປະສົບການສອງເທື່ອເຫລົ່ານີ້ ໄດ້ຖືກບັນທຶກໄວ້ຢູ່ໃນ ຄຳສອນ ແລະ ພັນທະສັນຍາ. ຂະນະທີ່ທ່ານອ່ານ ພາກທີ 76:11–14, 20–24; 110:1–10, ແມ່ນຫຍັງທີ່ປະທັບໃຈທ່ານຫລາຍ ກ່ຽວກັບປະຈັກພະຍານຂອງໂຈເຊັບ ສະມິດ? ເປັນຫຍັງປະຈັກພະຍານຂອງເພິ່ນຈຶ່ງມີຄ່າຫລາຍຕໍ່ທ່ານ?

ຕະຫລອດທົ່ວ ຄຳສອນ ແລະ ພັນທະສັນຍາ, ພຣະຜູ້ຊ່ວຍໃຫ້ລອດໄດ້ກ່າວເປັນພະຍານເຖິງພາລະກິດ ແລະ ຄວາມເປັນພຣະເຈົ້າຂອງພຣະອົງເອງ. ທ່ານໄດ້ຮຽນຮູ້ຫຍັງແດ່ກ່ຽວກັບພຣະຄຣິດທີ່ຊົງພຣະຊົນ ຈາກພຣະຄຳຂອງພຣະອົງ ຢູ່ໃນ ຄຳສອນ ແລະ ພັນທະສັນຍາ 29:5; 38:7; 62:1? ທ່ານອາດຄິດທີ່ຈະບັນທຶກການປະກາດເຊັ່ນນີ້ໄວ້ ທີ່ທ່ານພົບເຫັນຂະນະທີ່ທ່ານສຶກສາ ຄຳສອນ ແລະ ພັນທະສັນຍາ.

ເບິ່ງ ໂຈເຊັບ ສະມິດ—ປະຫວັດ 1:17 ນຳອີກ.

ຄຳສອນ ແລະ ພັນທະສັນຍາ 29:26–27; 42:45–46; 63:49; 88:14–17, 27–31; 93:33–34

ເພາະພຣະເຢຊູຄຣິດ, ເຮົາຈຶ່ງຈະໄດ້ຟື້ນຄືນຊີວິດ.

ໂຈເຊັບ ສະມິດ ຮູ້ວ່າການມີຄວາມໂສກເສົ້າກັບການຕາຍຂອງຄົນທີ່ເຮົາຮັກນັ້ນເປັນຈັ່ງໃດ. ອ້າຍນ້ອງສອງຄົນຂອງເພິ່ນ ຊື່ ອາລ໌ວິນ ແລະ ດອນ ຄາໂລສ໌, ໄດ້ເສຍຊີວິດໄປຕອນຍັງໜຸ່ມ. ໂຈເຊັບ ແລະ ເອມມາ ໄດ້ຝັງລູກຫົກຄົນ, ແຕ່ລະຄົນມີອາຍຸຕ່ຳກວ່າສອງປີ. ແຕ່ຈາກການເປີດເຜີຍທີ່ເພິ່ນໄດ້ຮັບ, ໂຈເຊັບໄດ້ເຫັນທັດສະນະເລື່ອງຄວາມຕາຍ ແລະ ແຜນນິລັນດອນຂອງພຣະເຈົ້າ. ໃຫ້ພິຈາລະນາຄວາມຈິງທີ່ເປີດເຜີຍ ຢູ່ໃນ ຄຳສອນ ແລະ ພັນທະສັນຍາ 29:26–27; 42:45–46; 63:49; 88:14–17, 27–31; 93:33–34. ການເປີດເຜີຍເຫລົ່ານີ້ມີຜົນກະທົບຕໍ່ວິທີທີ່ທ່ານຄິດກ່ຽວກັບຄວາມຕາຍແນວໃດ? ການເປີດເຜີຍສາມາດມີຜົນກະທົບຕໍ່ວິທີທີ່ທ່ານດຳລົງຊີວິດແນວໃດ?

ເບິ່ງ 1 ໂກຣິນໂທ 15 ນຳອີກ.

ຄຳສອນ ແລະ ພັນທະສັນຍາ 18:10–13; 19:16–19; 45:3–5; 76:69–70

ພຣະເຢຊູຄຣິດໄດ້ສຳເລັດ “ການຊົດໃຊ້ທີ່ສົມບູນ.”

ວິທີໜຶ່ງທີ່ຈະເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ ໃນຊ່ວງບຸນອີດສະເຕີ ແມ່ນທີ່ຈະສຶກສາການເປີດເຜີຍ ຢູ່ໃນ ຄຳສອນ ແລະ ພັນທະສັນຍາ ທີ່ສິດສອນກ່ຽວກັບການເສຍສະລະຊົດໃຊ້ຂອງພຣະອົງ. ການເປີດເຜີຍບາງຢ່າງ ມີຢູ່ໃນ ຄຳສອນ ແລະ ພັນທະສັນຍາ 18:10–13; 19:16–19; 45:3–5; 76:69–70. ບາງທີທ່ານຄວນບັນທຶກຄວາມຈິງກ່ຽວກັບການຊົດໃຊ້ຂອງພຣະຜູ້ຊ່ວຍໃຫ້ລອດ ທີ່ທ່ານພົບເຫັນຢູ່ໃນຂໍ້ເຫລົ່ານີ້ໄວ້. ເພື່ອໃຫ້ການສຶກສາຂອງທ່ານດີຂຶ້ນກວ່າເກົ່າ, ທ່ານສາມາດຕື່ມບາງສິ່ງໃສ່ກັບສິ່ງທີ່ທ່ານໄດ້ບັນທຶກໄວ້ ໂດຍການຄົ້ນຄວ້າແຫລ່ງອ້າງອີງພຣະຄຳພີ ທີ່ບັນຈຸຢູ່ໃຕ້ຄຳ “ຊົດໃຊ້, ການຊົດໃຊ້” (ຄູ່ມືພຣະຄຳພີ, scriptures.ChurchofJesusChrist.org).

ຕໍ່ໄປນີ້ແມ່ນຄຳຖາມບາງຂໍ້ ທີ່ສາມາດນຳພາທ່ານ ໃນການສຶກສາ:

ເປັນຫຍັງພຣະເຢຊູຄຣິດຈຶ່ງເລືອກທີ່ຈະຮັບທຸກທໍລະມານ?
ເຮົາຕ້ອງເຮັດສິ່ງໃດ ເພື່ອຈະໄດ້ຮັບພອນຂອງການຊົດໃຊ້ຂອງພຣະອົງ?
ເຮົາຈະບອກໄດ້ແນວໃດວ່າ ການຊົດໃຊ້ຂອງພຣະອົງ ມີຜົນກະທົບຕໍ່ຊີວິດຂອງເຮົາແນວໃດ?

Lord of Prayer [ພຣະຜູ້ເປັນເຈົ້າແຫ່ງການອະທິຖານ], ໂດຍ ຢອງຊຸງ ຄິມ

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ກອງປະຊຸມໃຫຍ່ສາມັນ.ເພາະກອງປະຊຸມໃຫຍ່ສາມັນກົງກັບວັນອາທິດ ບຸນອີດສະເຕີ ໃນປີນີ້, ທ່ານຄວນພິຈາລະນາເຖິງວິທີທີ່ຂ່າວສານຂອງກອງປະຊຸມ (ລວມທັງເພງ) ສາມາດເພີ່ມປະຈັກພະຍານໃຫ້ແກ່ຄອບຄົວຂອງທ່ານແນວໃດກ່ຽວກັບພຣະເຢຊູຄຣິດ. ຍົກຕົວຢ່າງ, ລູກຜູ້ນ້ອຍສາມາດແຕ້ມຮູບພຣະຜູ້ຊ່ວຍໃຫ້ລອດ, ຫລື ຍົກຮູບພຣະອົງຂຶ້ນ, ເມື່ອເຂົາໄດ້ຍິນຂ່າວສານ ຫລື ເພງກ່ຽວກັບພຣະເຢຊູຄຣິດ. ສະມາຊິກໃນຄອບຄົວຄົນອື່ນໆກໍສາມາດບັນທຶກຄວາມຈິງທີ່ເຂົາເຈົ້າໄດ້ຍິນກ່ຽວກັບພຣະຜູ້ຊ່ວຍໃຫ້ລອດ. ຫລັງຈາກກອງປະຊຸມ, ສະມາຊິກໃນຄອບຄົວສາມາດສະແດງຮູບແຕ້ມ ຫລື ບັນທຶກຂອງຕົນ ແລະ ແບ່ງປັນປະຈັກພະຍານເຖິງພຣະເຢຊູຄຣິດ.

ຄຳສອນ ແລະ ພັນທະສັນຍາ 88:14–17; 138:17, 50.ຄອບຄົວຂອງທ່ານອາດມັກຊອບກັບການຄິດກ່ຽວກັບການປຽບທຽບ ຫລື ບົດຮຽນທີ່ໃຊ້ສິ່ງຂອງ ເພື່ອອະທິບາຍຄວາມໝາຍຂອງການຕາຍ ແລະ ການຟື້ນຄືນຊີວິດ—ອັນທີ່ສະແດງວ່າ ຮ່າງກາຍ ແລະ ວິນຍານໄດ້ແຍກອອກຈາກກັນ ແລ້ວໄດ້ກັບຄືນເຂົ້າຫາກັນ, ດັ່ງເຊັ່ນ ມື ແລະ ຖົງມື. ຂໍ້ເຫລົ່ານີ້ຊ່ວຍໃຫ້ເຮົາຮູ້ບຸນຄຸນຫລາຍກວ່າເກົ່າ ສຳລັບສິ່ງທີ່ພຣະຜູ້ຊ່ວຍໃຫ້ລອດໄດ້ເຮັດເພື່ອເຮົາແນວໃດ?

“ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ.”ເພື່ອຊຸກຍູ້ການສົນທະນາກ່ຽວກັບປະຈັກພະຍານຂອງສາດສະດາໃນປະຈຸບັນ ເຖິງພຣະຜູ້ຊ່ວຍໃຫ້ລອດ, ທ່ານສາມາດມອບໝາຍໃຫ້ສະມາຊິກໃນຄອບຄົວແຕ່ລະຄົນ ອ່ານພາກໜຶ່ງຂອງເອກະສານ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ” (Ensign ຫລື Liahona, May 2017, ດ້ານໃນຂອງໜ້າປົກ) ແລະ ແບ່ງປັນສິ່ງທີ່ເຂົາເຈົ້າໄດ້ຮຽນຮູ້ກ່ຽວກັບພຣະເຢຊູຄຣິດ. ຄວາມຈິງໃດແດ່ທີ່ເຮົາພົບເຫັນ ຊຶ່ງດົນໃຈເຮົາ?

“ເຮົາຮູ້ພຣະຜູ້ໄຖ່ຊົງພຣະຊົນ.”ເພື່ອຊ່ວຍຄອບຄົວຂອງທ່ານໃຫ້ພິຈາລະນາຫລາຍວິທີທາງທີ່ພຣະຜູ້ຊ່ວຍໃຫ້ລອດທີ່ຊົງຟື້ນ ອວຍພອນເຮົາໃນທຸກວັນນີ້, ພວກທ່ານສາມາດຮ້ອງເພງ “ເຮົາຮູ້ພຣະຜູ້ໄຖ່ຊົງພຣະຊົນ” ນຳກັນ (ເພງສວດ ແລະ ເພງຂອງເດັກນ້ອຍ, ເລກທີ 42) ແລະ ເຊື່ອມໂຍງຄວາມຈິງທີ່ສິດສອນຢູ່ໃນເພງນີ້ ເຂົ້າກັບຂໍ້ພຣະຄຳພີດັ່ງຕໍ່ໄປນີ້: ຄຳສອນ ແລະ ພັນທະສັນຍາ 6:34; 45:3–5; 84:77; 98:18; 138:23. ຄອບຄົວຂອງທ່ານອາດມັກຂຽນເນື້ອເພງວັກໃໝ່ໃຫ້ເພງສວດ ທີ່ສະແດງເຖິງວິທີທີ່ເຂົາເຈົ້າຮູ້ວ່າ ພຣະຜູ້ໄຖ່ຂອງເຂົາເຈົ້າຊົງພຣະຊົນຢູ່.

ສຳລັບວິດີໂອກ່ຽວກັບບຸນອີດສະເຕີ ແລະ ແຫລ່ງຊ່ວຍເຫລືອອື່ນໆ, ໃຫ້ເບິ່ງ Easter.ComeUntoChrist.org.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະອົງຊົງຟື້ນ,” ເພງສວດ ແລະ ເພງຂອງເດັກນ້ອຍ, 60.

ການປັບປຸງການສິດສອນຂອງເຮົາ

ຊອກຫາບົດຮຽນຈາກສິ່ງຂອງປະຈຳວັນ. ໃຫ້ຄິດເຖິງວິທີທີ່ປະສົບການປະຈຳວັນຂອງສະມາຊິກໃນຄອບຄົວທ່ານ ອາດພາໄປສູ່ການສົນທະນາທີ່ມີຄວາມໝາຍ ກ່ຽວກັບຄວາມຈິງຂອງພຣະກິດຕິຄຸນ (ເບິ່ງ Teaching in the Savior’s Way, 4). ຍົກຕົວຢ່າງ, ຝົນຕົກຟ້າລົມສາມາດເປັນໂອກາດໃຫ້ເວົ້າລົມກັນກ່ຽວກັບວິທີທີ່ພຣະເຈົ້າຖອກເທພຣະພອນລົງມາເທິງລູກໆຂອງພຣະອົງແນວໃດ.