“ວັນທີ 19–25 ເດືອນເມສາ. ຄຳສອນ ແລະ ພັນທະສັນຍາ 41–44: ‘ກົດຂອງເຮົາໃນການປົກຄອງສາດສະໜາຈັກຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 19–25 ເດືອນເມສາ. ຄຳສອນ ແລະ ພັນທະສັນຍາ 41–44,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ວັນທີ 19–25 ເດືອນເມສາ

ຄຳສອນ ແລະ ພັນທະສັນຍາ 41–44

“ກົດຂອງເຮົາໃນການປົກຄອງສາດສະໜາຈັກຂອງເຮົາ”

“ຖ້າພວກເຈົ້າຈະຖາມ,” ພຣະຜູ້ເປັນເຈົ້າສັນຍາ, “ພວກເຈົ້າຈະໄດ້ຮັບການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້” (ຄຳສອນ ແລະ ພັນທະສັນຍາ 42:61). ທ່ານສາມາດຖາມຄຳຖາມໃດແດ່ ເພື່ອຈະໄດ້ຮັບການເປີດເຜີຍທີ່ທ່ານຕ້ອງການ?

ບັນທຶກຄວາມປະທັບໃຈຂອງທ່ານ

ຄວາມເຕີບໂຕຂອງສາດສະໜາຈັກຢ່າງວ່ອງໄວ ລະຫວ່າງປີ 1830 ແລະ 1831—ໂດຍສະເພາະຄວາມຮີບຮ້ອນຂອງຜູ້ປ່ຽນໃຈເຫລື້ອມໃສໃໝ່ ທີ່ຈະມາຫາເມືອງເຄີດແລນ, ລັດໂອໄຮໂອ—ເປັນສິ່ງທີ່ໜ້າຕື່ນເຕັ້ນ ແລະ ເປັນກຳລັງໃຈໃຫ້ໄພ່ພົນ. ແຕ່ມັນກໍນຳການທ້າທາຍບາງຢ່າງມາໃຫ້ນຳອີກ. ທ່ານຈະຊ່ວຍໃຫ້ຜູ້ທີ່ເຊື່ອກຸ່ມໃຫຍ່ເປັນອັນໜຶ່ງດຽວກັນຢ່າງໄວໄດ້ແນວໃດ, ໂດຍສະເພາະເມື່ອເຂົາເຈົ້າເອົາຄຳສອນ ແລະ ການປະຕິບັດຕາມຄວາມເຊື່ອເກົ່າມານຳ? ຍົກຕົວຢ່າງ, ເມື່ອໂຈເຊັບ ສະມິດ ໄດ້ໄປເຖິງເມືອງເຄີດແລນ ໃນຕົ້ນເດືອນກຸມພາ ປີ 1831, ເພິ່ນໄດ້ພົບເຫັນສະມາຊິກໃໝ່ແບ່ງປັນສິ່ງຂອງທີ່ເປັນສ່ວນລວມໃຫ້ກັນດ້ວຍຄວາມພະຍາຍາມຢ່າງຈິງໃຈ ຕາມແບບຊາວຄຣິດໃນພຣະຄຳພີໃໝ່ (ເບິ່ງ ກິດຈະການ 4:32–37). ພຣະຜູ້ເປັນເຈົ້າໄດ້ທຳການປ່ຽນແປງທີ່ສຳຄັນບາງຢ່າງ ແລະ ໄດ້ໃຫ້ຄວາມແຈ່ມແຈ້ງກ່ຽວກັບເລື່ອງນີ້ ແລະ ເລື່ອງອື່ນໆ, ສ່ວນໃຫຍ່ແມ່ນຜ່ານທາງການເປີດເຜີຍ ທີ່ບັນທຶກ ຢູ່ໃນ ຄຳສອນ ແລະ ພັນທະສັນຍາ 42, ຊຶ່ງພຣະອົງໄດ້ເອີ້ນວ່າ “ກົດຂອງເຮົາໃນການປົກຄອງສາດສະໜາຈັກຂອງເຮົາ” (ຂໍ້ທີ 59). ໃນການເປີດເຜີຍນີ້, ເຮົາໄດ້ຮຽນຮູ້ເຖິງຄວາມຈິງທີ່ເປັນ ພື້ນຖານໃນການສະຖາປະນາສາດສະໜາຈັກຂອງພຣະຜູ້ເປັນເຈົ້າ ໃນຍຸກສຸດທ້າຍ, ຮ່ວມທັງຄຳສັນຍາທີ່ສຳຄັນ ຊຶ່ງໃຫ້ຄວາມແຈ່ມແຈ້ງວ່າ ມີສິ່ງອື່ນອີກທີ່ຈະຮຽນຮູ້ເພີ່ມເຕີມສະເໝີ ທີ່ວ່າ: “ຖ້າພວກເຈົ້າຈະຖາມ, ພວກເຈົ້າຈະໄດ້ຮັບການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້” (ຄຳສອນ ແລະ ພັນທະສັນຍາ 42:61).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 41

“ຄົນໃດທີ່ຍອມຮັບກົດຂອງເຮົາ ແລະ ປະຕິບັດຕາມ, ຄົນໆນັ້ນເປັນສານຸສິດຂອງເຮົາ.”

ເມື່ອເຖິງຕົ້ນປີ 1831, ໄພ່ພົນໄດ້ເລີ່ມຕົ້ນເຕົ້າໂຮມກັນຢູ່ລັດໂອໄຮໂອ, ກະຕືລືລົ້ນທີ່ຈະຮັບເອົາກົດທີ່ພຣະເຈົ້າໄດ້ສັນຍາວ່າຈະເປີດເຜີຍຢູ່ທີ່ນັ້ນ (ເບິ່ງ ຄຳສອນ ແລະ ພັນທະສັນຍາ 38:32). ແຕ່ທຳອິດ, ພຣະຜູ້ເປັນເຈົ້າໄດ້ສິດສອນວິທີທີ່ສານຸສິດຂອງພຣະອົງຄວນ ກະກຽມ ທີ່ຈະຮັບເອົາກົດຂອງພຣະອົງ. ຫລັກທຳໃດແດ່ທີ່ທ່ານພົບເຫັນຢູ່ໃນ ຂໍ້ທີ 1–5 ທີ່ຊ່ວຍໄພ່ພົນໃຫ້ໄດ້ຮັບກົດຂອງພຣະເຈົ້າ? ຫລັກທຳເຫລົ່ານີ້ຊ່ວຍທ່ານໃຫ້ໄດ້ຮັບຄຳແນະນຳຈາກພຣະອົງແນວໃດ?

ຄຳສອນ ແລະ ພັນທະສັນຍາ 42

ກົດຂອງພຣະເຈົ້າປົກຄອງສາດສະໜາຈັກຂອງພຣະອົງ ແລະ ສາມາດປົກຄອງຊີວິດເຮົາ.

ໄພ່ພົນໄດ້ນັບຖືວ່າ ການເປີດເຜີຍທີ່ມີຢູ່ໃນ ຄຳສອນ ແລະ ພັນທະສັນຍາ 42:1–72 ເປັນການເປີດເຜີຍຢ່າງໜຶ່ງທີ່ສຳຄັນທີ່ສຸດ ທີ່ສາດສະດາໄດ້ຮັບ. ມັນຢູ່ໃນບັນດາການເປີດເຜີຍທີ່ຖືກຈັດພິມກ່ອນໝູ່, ໄດ້ຖືກພິມຢູ່ໃນໜັງສືພິມຂອງລັດໂອໄຮໂອສອງບ່ອນ, ແລະ ມັນຖືກຮູ້ຈັກພຽງແຕ່ວ່າເປັນ “ກົດ.” ຫລັກທຳຫລາຍຢ່າງຢູ່ໃນພາກນີ້ ໄດ້ຖືກເປີດເຜີຍໂດຍພຣະຜູ້ເປັນເຈົ້າມາແລ້ວ. ເຖິງແມ່ນພາກນີ້ບໍ່ໄດ້ລວມພຣະບັນຍັດທຸກປະການທີ່ພຣະຜູ້ເປັນເຈົ້າປະສົງໃຫ້ໄພ່ພົນຂອງພຣະອົງເຊື່ອຟັງ, ແຕ່ມັນມີຄຸນຄ່າພໍທີ່ຈະເອົາໄປໄຕ່ຕອງວ່າເປັນຫຍັງຫລັກທຳເຫລົ່ານີ້ ຈຶ່ງສຳຄັນທີ່ຈະກ່າວລຶ້ມຄືນຕໍ່ສາດສະໜາຈັກທີ່ຫາກໍຖືກຟື້ນຟູ.

ມັນຈະເປັນການດີທີ່ທ່ານຈະອ່ານ ພາກທີ 42 ເປັນສ່ວນສັ້ນໆ ດັ່ງຕົວຢ່າງຕໍ່ໄປນີ້ ແລະ ຊອກຫາຫລັກທຳທີ່ສິດສອນຢູ່ໃນແຕ່ລະສ່ວນ. ເມື່ອທ່ານເຮັດເຊັ່ນນັ້ນ, ໃຫ້ພິຈາລະນາວິທີທີ່ກົດນີ້ໄດ້ນຳພາສາດສະໜາຈັກ ສາມາດຊ່ວຍທ່ານນຳພາຊີວິດສ່ວນຕົວຂອງທ່ານແນວໃດ.

ຂໍ້ທີ 4–9, 11–17, 56–58

ເບິ່ງ 3 ນີໄຟ 15:9 ນຳອີກ.

ຄຳສອນ ແລະ ພັນທະສັນຍາ 42:30–42

ໄພ່ພົນໄດ້ “ອຸທິດຊັບສິນ [ຂອງເຂົາເຈົ້າ]” ແນວໃດ ເພື່ອຊ່ວຍເຫລືອຄົນຍາກຈົນ?

ພາກສ່ວນທີ່ສຳຄັນຂອງກົດ ຊຶ່ງຖືກເປີດເຜີຍຢູ່ໃນ ພາກທີ 42 ໄດ້ຖືກຮູ້ຈັກກັນວ່າເປັນກົດແຫ່ງການອຸທິດຖວາຍ ແລະ ການພິທັກຮັກສາ. ກົດນີ້ໄດ້ສອນໄພ່ພົນເຖິງວິທີທີ່ເຂົາເຈົ້າ, ຄືກັນກັບຜູ້ຕິດຕາມພຣະຄຣິດໃນສະໄໝບູຮານ, ສາມາດມີ “ສິ່ງຂອງທັງໝົດເປັນຂອງສ່ວນລວມ” (ກິດຈະການ 2:44; 4 ນີໄຟ 1:3), ໂດຍທີ່ “ບໍ່ມີຄົນຍາກຈົນໃນບັນດາພວກເຂົາ” (ໂມເຊ 7:18). ໄພ່ພົນໄດ້ອຸທິດຖວາຍຊັບສິນຂອງຕົນ ໂດຍການມອບມັນໃຫ້ແກ່ພຣະຜູ້ເປັນເຈົ້າ, ຜ່ານທາງອະທິການ (ເບິ່ງ ຄຳສອນ ແລະ ພັນທະສັນຍາ 42:30–31). ອະທິການໄດ້ມອບສິ່ງທີ່ເຂົາເຈົ້າຕ້ອງການ ຄືນໃຫ້ເຂົາເຈົ້າ (ເບິ່ງ ຂໍ້ທີ 32)—ຕາມທຳມະດາແລ້ວ ເປັນສິ່ງທີ່ເຂົາເຈົ້າໄດ້ອຸທິດຖວາຍ ແລະ ຫລາຍກວ່ານັ້ນ. ສະມາຊິກໄດ້ບໍລິຈາກສ່ວນທີ່ເຫລືອຂອງຕົນ ເພື່ອຊ່ວຍຄົນຍາກຈົນ (ເບິ່ງ ຂໍ້ທີ 33–34). ກົດນີ້ເປັນພອນຢ່າງໃຫຍ່ຫລວງຕໍ່ໄພ່ພົນ, ໂດຍສະເພາະຕໍ່ຜູ້ທີ່ໄດ້ປະຖິ້ມທຸກຢ່າງເພື່ອໄປຢູ່ລັດໂອໄຮໂອ. ໄພ່ພົນຢ່າງຫລວງຫລາຍມີໃຈເພື່ອແຜ່ໃນການບໍລິຈາກຂອງເຂົາເຈົ້າ.

ເຖິງແມ່ນວ່າເຮົາປະຕິບັດມັນໃນວິທີທີ່ແຕກຕ່າງໃນທຸກວັນນີ້, ແຕ່ໄພ່ພົນຍຸກສຸດທ້າຍ ຍັງໃຊ້ຊີວິດຕາມກົດແຫ່ງການອຸທິດຖວາຍຢູ່. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 42:30–42, ໃຫ້ໄຕ່ຕອງວິທີທີ່ທ່ານສາມາດອຸທິດຖວາຍສິ່ງທີ່ພຣະເຈົ້າໄດ້ປະທານໃຫ້ທ່ານ ເພື່ອສ້າງສາອານາຈັກຂອງພຣະອົງ ແລະ ເປັນພອນໃຫ້ແກ່ຄົນຂັດສົນ.

Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ

ຄຳສອນ ແລະ ພັນທະສັນຍາ 42:61, 65–68; 43:1–16

ພຣະເຈົ້າປະທານການເປີດເຜີຍເພື່ອນຳພາສາດສະໜາຈັກຂອງພຣະອົງ.

ໃຫ້ວາດພາບວ່າ ທ່ານກຳລັງສົນທະນາກັບສະມາຊິກໃໝ່ຄົນໜຶ່ງຂອງສາດສະໜາຈັກ ຜູ້ຕື່ນເຕັ້ນຫລາຍທີ່ຮູ້ວ່າ ສາດສະໜາຈັກຖືກນຳພາໂດຍການເປີດເຜີຍ. ທ່ານຈະສາມາດໃຊ້ ຄຳສອນ ແລະ ພັນທະສັນຍາ 43:1–16 ເພື່ອອະທິບາຍໃຫ້ລາວຮູ້ວ່າ ແບບແຜນຂອງພຣະຜູ້ເປັນເຈົ້າສຳລັບການນຳພາສາດສະໜາຈັກຂອງພຣະອົງ ແມ່ນຜ່ານທາງສາດສະດາແນວໃດ? ທ່ານຈະສາມາດໃຊ້ ຄຳສອນ ແລະ ພັນທະສັນຍາ 42:61, 65–68 ເພື່ອສິດສອນກ່ຽວກັບການໄດ້ຮັບການເປີດເຜີຍສ່ວນຕົວແນວໃດ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 41:1–5.ມີຕົວຢ່າງໃດແດ່ກ່ຽວກັບກົດໝາຍແພ່ງ, ແລະ ວິທີທີ່ກົດໝາຍເຫລົ່ານັ້ນເປັນຜົນປະໂຫຍດຕໍ່ເຮົາແນວໃດ? ກົດຂອງພຣະບິດາເທິງສະຫວັນ ຫລື ພຣະບັນຍັດເປັນພອນໃຫ້ເຮົາແນວໃດ? ສະມາຊິກໃນຄອບຄົວສາມາດແຕ້ມຮູບກ່ຽວກັບຕົວເອງເຊື່ອຟັງກົດຂອງພຣະເຈົ້າ.

ຄຳສອນ ແລະ ພັນທະສັນຍາ 42:45, 88.ແມ່ນຫຍັງຈະຊ່ວຍຄອບຄົວຂອງທ່ານໃຫ້ “ຢູ່ນຳກັນໃນຄວາມຮັກ”? (ເບິ່ງ ໂມໄຊຢາ 4:14–15 ນຳອີກ). ໃຫ້ຄິດຂຽນ ຫລື ເວົ້າສິ່ງທີ່ເປັນທາງບວກ ກ່ຽວກັບກັນແລະກັນ ຫລື ຮ້ອງເພງສວດກ່ຽວກັບຄວາມຮັກພາຍໃນຄອບຄົວ, ດັ່ງເຊັ່ນ “ຮັກທີ່ບ້ານ” (ເພງສວດ ແລະ ເພງຂອງເດັກນ້ອຍ, ເລກທີ 48).

ຄຳສອນ ແລະ ພັນທະສັນຍາ 42:61.ບາງທີທ່ານສາມາດອ່ານຂໍ້ນີ້ ຂະນະທີ່ຕໍ່ puzzle (ຮູບປິດສະໜາ) ເຂົ້າກັນ. ໃຫ້ໃຊ້ຮູບປິດສະໜາເພື່ອສອນວິທີທີ່ພຣະເຈົ້າເປີດເຜີຍຄວາມລຶກລັບຂອງພຣະອົງ—“ການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້.” ສະມາຊິກໃນຄອບຄົວສາມາດແບ່ງປັນວິທີທີ່ພຣະເຈົ້າໄດ້ເປີດເຜີຍຄວາມຈິງຕໍ່ເຂົາເຈົ້າ ເທື່ອລະເລັກລະນ້ອຍ.

ຄຳສອນ ແລະ ພັນທະສັນຍາ 43:25.ບາງທີມັນມີບາງສິ່ງທີ່ຄອບຄົວຂອງທ່ານສາມາດໃຊ້ ເພື່ອເຮັດສຽງຝົນຕົກຟ້າຮ້ອງ ໃນການແນະນຳຕໍ່ການສົນທະນາ ກ່ຽວກັບ ຂໍ້ທີ 25. ສຸລະສຽງຂອງພຣະຜູ້ເປັນເຈົ້າຄື “ສຽງຟ້າຮ້ອງແນວໃດ”? ໃຫ້ຄົ້ນຄວ້າຂໍ້ນີ້ນຳກັນ ເພື່ອຊອກຫາວິທີທີ່ພຣະຜູ້ເປັນເຈົ້າອາດເອີ້ນເຮົາໃຫ້ກັບໃຈ. ເຮົາຈະສາມາດຕອບຮັບຕໍ່ສຸລະສຽງຂອງພຣະຜູ້ເປັນເຈົ້າໄດ້ດີກວ່າເກົ່າແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72; ໃຫ້ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ.”

ການປັບປຸງການສິດສອນຂອງເຮົາ

ບັນຍາກາດທີ່ບຳລຸງລ້ຽງ ແລະ ຮູ້ສຶກເຖິງຄວາມຮັກ. ວິທີທີ່ສະມາຊິກໃນຄອບຄົວຮູ້ສຶກກ່ຽວກັບກັນແລະກັນ ແລະ ປະຕິບັດຕໍ່ກັນ ສາມາດເປັນອິດທິພົນທີ່ມີຄວາມໝາຍເລິກຊຶ້ງໃຫ້ແກ່ບັນຍາກາດໃນບ້ານເຮືອນຂອງທ່ານໄດ້. ໃຫ້ຊ່ວຍສະມາຊິກທຸກຄົນໃນຄອບຄົວເຮັດພາກສ່ວນຂອງເຂົາເຈົ້າ ໃນການເຮັດໃຫ້ບ້ານເຮືອນເປັນບ່ອນທີ່ໜ້າຮັກ ແລະ ໜ້ານັບຖື ເພື່ອວ່າທຸກຄົນຈະຮູ້ສຶກສະບາຍໃຈ ເມື່ອແບ່ງປັນປະສົບການ, ຖາມຄຳຖາມ, ແລະ ສະແດງປະຈັກພະຍານ. (ເບິ່ງ Teaching in the Savior’s Way, 15.)

Joseph Smith Preaching in Nauvoo [ໂຈເຊັບ ສະມິດ ສັ່ງສອນຢູ່ໃນເມືອງນາວູ], ໂດຍ ແຊມ ລໍເລີ