“ວັນທີ 26 ເດືອນເມສາ–ວັນທີ 2 ເດືອນພຶດສະພາ. ຄຳສອນ ແລະ ພັນທະສັນຍາ 45: ‘ຄຳສັນຍາ … ຈະສຳເລັດຄົບຖ້ວນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 26 ເດືອນເມສາ–ວັນທີ 2 ເດືອນພຶດສະພາ. ຄຳສອນ ແລະ ພັນທະສັນຍາ 45,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຊາວໜຸ່ມຢູ່ນອກພຣະວິຫານ

ວັນທີ 26 ເດືອນເມສາ–ວັນທີ 2 ເດືອນພຶດສະພາ

ຄຳສອນ ແລະ ພັນທະສັນຍາ 45

“ຄຳສັນຍາ … ຈະສຳເລັດຄົບຖ້ວນ”

ປະທານຣະໂຊ ເອັມ ແນວສັນ ໄດ້ສິດສອນວ່າ: “ໃຫ້ຂຽນແນວຄິດທີ່ມາສູ່ຈິດໃຈຂອງທ່ານໄວ້. ບັນທຶກຄວາມຮູ້ສຶກຂອງທ່ານ ແລະ ເຮັດຕາມການກະຕຸ້ນທີ່ທ່ານໄດ້ຮັບ” (“Revelation for the Church, Revelation for Our Lives,” Ensign ຫລື Liahona, May 2018, 95).

ບັນທຶກຄວາມປະທັບໃຈຂອງທ່ານ

ເຮົາມີຊີວິດຢູ່ໃນຊ່ວງເວລາທີ່ອັນຕະລາຍ, ແລະ ສິ່ງນັ້ນສາມາດເປັນບັນຫາໄດ້. ແມ່ນແຕ່ສານຸສິດຂອງພຣະເຢຊູ, ເມື່ອພວກເຂົາໄດ້ຍິນຄຳທຳນາຍຂອງພຣະອົງເລື່ອງໄພພິບັດທີ່ຈະເກີດຂຶ້ນໃນວັນເວລາຂອງເຮົາ, “ກໍຢ້ານກົວ” (ຄຳສອນ ແລະ ພັນທະສັນຍາ 45:34). ໄພ່ພົນຍຸກສຸດທ້າຍໃນເມືອງເຄີດແລນ, ລັດໂອໄຮໂອ, ກໍມີຄວາມຢ້ານກົວຄືກັນ ເພາະຊ່ວງເວລາທີ່ອັນຕະລາຍ ຊຶ່ງເຂົາເຈົ້າມີຊີວິດຢູ່. ໃນບັນດາສິ່ງອື່ນໆ, ມັນມີ “ການລາຍງານເທັດ … ແລະ ເລື່ອງໂງ່ຈ້າຫລາຍຢ່າງ” ທີ່ທຳລາຍຂ່າວສານພຣະກິດຕິຄຸນ (ຄຳສອນ ແລະ ພັນທະສັນຍາ 45, ຫົວຂໍ້ພາກ). ແຕ່ຄຳຕອບຂອງພຣະຜູ້ເປັນເຈົ້າ, ຕອນນັ້ນ ແລະ ຕອນນີ້, ແມ່ນ “ຢ່າສູ່ຢ້ານ” (ຂໍ້ທີ 35). ແມ່ນແລ້ວ, ມັນມີຄວາມຊົ່ວຮ້າຍ, ແຕ່ກໍຍັງມີຫລັກຖານວ່າ ພຣະເຈົ້າກຳລັງເລັ່ງວຽກງານຂອງພຣະອົງ. ແມ່ນແລ້ວ, ມັນມີສິ່ງອັນຕະລາຍທີ່ບອກໄວ້ລ່ວງໜ້າ ວ່າຈະເກີດຂຶ້ນກ່ອນການສະເດັດມາຄັ້ງທີສອງ, ແລະ ເຮົາຄວນຮູ້ກ່ຽວກັບສິ່ງເຫລົ່ານັ້ນ. ແຕ່ ມັນບໍ່ມີພຽງແຕ່ຄຳເຕືອນເຖິງສິ່ງອັນຕະລາຍເທົ່ານັ້ນ, ມັນກໍຍັງມີເຄື່ອງໝາຍ ສະແດງໃຫ້ເຫັນວ່າຄຳສັນຍາຂອງພຣະເຈົ້າກຳລັງຈະສຳເລັດຄົບຖ້ວນນຳອີກ. ບາງທີ ມັນຈຶ່ງເປັນສາເຫດຂອງການໄດ້ຮັບ ຄຳສອນ ແລະ ພັນທະສັນຍາ 45—ການເປີດເຜີຍທີ່ບັນຍາຍເຄື່ອງໝາຍຫລາຍຢ່າງເຫລົ່ານີ້ ຢ່າງລະອຽດ—ເຮັດໃຫ້ “ໄພ່ພົນຂອງພຣະເຈົ້າຊື່ນຊົມ” (ຫົວຂໍ້ພາກ).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 45:1–5

ພຣະເຢຊູຄຣິດເປັນຜູ້ວິງວອນແທນພວກເຮົານຳພຣະບິດາ.

ທ່ານເຄີຍຮູ້ສຶກບໍ່ພຽບພ້ອມ ຫລື ບໍ່ມີຄ່າຄວນຢູ່ຕໍ່ພຣະພັກຂອງພຣະເຈົ້າຢູ່ບໍ? ທ່ານອາດພົບຄວາມໝັ້ນໃຈ ຢູ່ໃນ ຄຳສອນ ແລະ ພັນທະສັນຍາ 45:1–5. ຖ້ອຍຄຳເຊັ່ນ “ຜູ້ວິງວອນ” ແລະ “ອ້ອນວອນ” ແນະນຳສິ່ງໃດຕໍ່ທ່ານ? ພຣະຜູ້ຊ່ວຍໃຫ້ລອດວິງວອນແທນທ່ານ, ຫລື ອ້ອນວອນສາເຫດຂອງທ່ານແນວໃດ? ການທີ່ຮູ້ວ່າພຣະຄຣິດເປັນຜູ້ວິງວອນແທນທ່ານ ມີຄວາມໝາຍແນວໃດຕໍ່ທ່ານ?

ຖ້ອຍຄຳຕໍ່ໄປນີ້ຈາກປະທານໂຈເຊັບ ຟຽວດິງ ສະມິດ ສາມາດຊ່ວຍທ່ານໄຕ່ຕອງຂໍ້ເຫລົ່ານີ້: “ພຣະເຢຊູ [ເປັນ] ຜູ້ວິງວອນແທນເຮົາ, ອ້ອນວອນເພື່ອເຮົາ ໃນຖານະຜູ້ເປັນກາງ ຜ່ານທາງການປະຕິບັດສາດສະໜາກິດ ແລະ ການທຳງານຂອງພຣະອົງ ເພື່ອໄກ່ເກ່ຍແທນເຮົາ, ເພື່ອໃຫ້ເຮົາເຫັນດີກັບພຣະເຈົ້າ” (ໃນ Conference Report, Oct. 1953, 58).

ເບິ່ງ 2 ນີໄຟ 2:8–9; ໂມໄຊຢາ 15:7–9; ໂມໂຣໄນ 7:27–28; ຄຳສອນ ແລະ ພັນທະສັນຍາ 29:5; 62:1 ນຳອີກ.

ຄຳສອນ ແລະ ພັນທະສັນຍາ 45:9–10

ພຣະກິດຕິຄຸນເປັນທຸງສັນຍານຕໍ່ປະຊາຊາດ.

ໃນສະໄໝບູຮານ, ທຸງສັນຍານຄືປ້າຍ ຫລື ທຸງ ທີ່ຍົກຂຶ້ນຢູ່ໃນການສູ້ຮົບ. ມັນລວມກຳລັງ ແລະ ສາມັກຄີກອງທັບ ແລະ ຊ່ວຍພວກເຂົາໃຫ້ຮູ້ບ່ອນທີ່ຈະໄປເຕົ້າໂຮມ ແລະ ສິ່ງທີ່ຈະເຮັດ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 45:9–10, ໃຫ້ໄຕ່ຕອງວິທີທີ່ພັນທະສັນຍາຂອງພຣະກິດຕິຄຸນໄດ້ເປັນທຸງສັນຍານຕໍ່ທ່ານແນວໃດ. ຊີວິດຂອງທ່ານຈະແຕກຕ່າງແນວໃດແດ່ ຖ້າຫາກທ່ານບໍ່ມີພັນທະສັນຍາເຫລົ່ານີ້?

ເບິ່ງ ເອຊາຢາ 5:26; 11:10–12; ຄຳສອນ ແລະ ພັນທະສັນຍາ 115:5–6 ນຳອີກ.

ຄຳສອນ ແລະ ພັນທະສັນຍາ 45:11–75

ຄຳສັນຍາຂອງພຣະຜູ້ເປັນເຈົ້າຈະສຳເລັດຄົບຖ້ວນ.

ສົງຄາມ, ຄວາມຊົ່ວຮ້າຍ, ແລະ ຄວາມຮ້າງເປົ່າ ຈະເກີດຂຶ້ນກ່ອນການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ. ແຕ່ “ຢ່າສູ່ຢ້ານ,” ພຣະຜູ້ເປັນເຈົ້າໄດ້ກ່າວ, “ເພາະ, ເມື່ອສິ່ງເຫລົ່ານີ້ທັງໝົດຈະເກີດຂຶ້ນ, ພວກເຈົ້າຈະຮູ້ວ່າ ຄຳສັນຍາທີ່ໄດ້ເຮັດໄວ້ກັບພວກເຈົ້າຈະສຳເລັດຄົບຖ້ວນ” (ຄຳສອນ ແລະ ພັນທະສັນຍາ 45:35).

ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 45:11–75, ໃຫ້ຄິດທີ່ຈະເອົາໃຈໃສ່ບໍ່ພຽງແຕ່ເຫດການທີ່ເປັນບັນຫາເທົ່ານັ້ນ ທີ່ໄດ້ຖືກທຳນາຍໄວ້ ແຕ່ໃຫ້ເອົາໃຈໃສ່ຕໍ່ພອນທີ່ພຣະຜູ້ເປັນເຈົ້າສັນຍານຳອີກ (ຍົກຕົວຢ່າງ, ຄຳສັນຍາຢູ່ໃນ ຂໍ້ທີ 54–59 ກ່ຽວກັບການຄອບຄອງໃນໄລຍະໜຶ່ງພັນປີຂອງພຣະຜູ້ຊ່ວຍໃຫ້ລອດ). ທ່ານສາມາດເຮັດສິ່ງນີ້ໂດຍການຂຽນຂໍ້ເຫລົ່ານີ້ໄວ້ ຫລື ຕິດປ້າຍ ຫລື ໝາຍຂໍ້ເຫລົ່ານີ້. ທ່ານພົບເຫັນຫຍັງແດ່ທີ່ຊ່ວຍທ່ານ “[ບໍ່ໃຫ້] ຢ້ານ” ກ່ຽວກັບຍຸກສຸດທ້າຍ?

ຄຳສອນ ແລະ ພັນທະສັນຍາ 45:31–32, 56–57

“ຢືນຢູ່ໃນສະຖານທີ່ສັກສິດ,” ແລະ ບໍ່ຫວັ່ນໄຫວ.

ເຫດຜົນຢ່າງໜຶ່ງທີ່ພຣະຜູ້ຊ່ວຍໃຫ້ລອດ ແລະ ສາດສະດາຂອງພຣະອົງສິດສອນເຮົາກ່ຽວກັບເຄື່ອງໝາຍຂອງການສະເດັດມາຄັ້ງທີສອງ ແມ່ນເພື່ອຊ່ວຍເຮົາໃຫ້ກະກຽມ. ທ່ານຮຽນຮູ້ຫຍັງແດ່ ຢູ່ໃນ ຄຳສອນ ແລະ ພັນທະສັນຍາ 45:31–32, 56–57 ກ່ຽວກັບການກະກຽມສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ? ມັນອາດເປັນປະໂຫຍດທີ່ຈະທົບທວນຄຳອຸປະມາເລື່ອງ ຍິງສາວບໍລິສຸດສິບຄົນ, ຢູ່ໃນ ມັດທາຍ 25:1–13. ພຣະຜູ້ຊ່ວຍໃຫ້ລອດໄດ້ປຽບທຽບນ້ຳມັນຢູ່ໃນຄຳອຸປະມາກັບຄວາມຈິງ ແລະ ກັບພຣະວິນຍານສັກສິດ (ເບິ່ງ ຄຳສອນ ແລະ ພັນທະສັນຍາ 45:57). ທ່ານໄດ້ຮັບຄວາມຮູ້ໃດແດ່ ເມື່ອທ່ານອ່ານຄຳອຸປະມາໃນວິທີນີ້?

Parable of the Ten Virgins [ຄຳອຸປະມາເລື່ອງຍິງສາວບໍລິສຸດສິບຄົນ], ໂດຍ ແດນ ເບີ

ຄຳສອນ ແລະ ພັນທະສັນຍາ 45:11–15, 66–71

ຊີໂອນຄືສະຖານທີ່ ທີ່ປອດໄພສຳລັບໄພ່ພົນຂອງພຣະເຈົ້າ.

ໄພ່ພົນໃນວັນເວລາຂອງໂຈເຊັບ ສະມິດ ໄດ້ມີຄວາມກະຕືລືລົ້ນທີ່ຈະສ້າງສາຊີໂອນ, ເຢຣູຊາເລັມໃໝ່, ດັ່ງທີ່ບັນຍາຍຢູ່ໃນພຣະຄຳພີມໍມອນ (ເບິ່ງ ອີເທີ 13:2–9) ແລະ ໃນພຣະຄຣິສຕະທຳຄຳພີທີ່ດົນໃຈ ຊຶ່ງຖືກດັດແປງໃໝ່ ໂດຍໂຈເຊັບ ສະມິດ (ເບິ່ງ ໂມເຊ 7:62–64). ທ່ານຮຽນຮູ້ຫຍັງແດ່ກ່ຽວກັບຊີໂອນ—ທັງເມືອງບູຮານໃນວັນເວລາຂອງເອໂນກ ແລະ ເມືອງໃນຍຸກສຸດທ້າຍ—ຈາກ ຄຳສອນ ແລະ ພັນທະສັນຍາ 45:11–15, 66–71?

ທຸກວັນນີ້ພຣະບັນຊາໃຫ້ສະຖາປະນາຊີໂອນ ແມ່ນອ້າງເຖິງການສະຖາປະນາອານາຈັກຂອງພຣະເຈົ້າ ໃນບ່ອນໃດກໍຕາມທີ່ເຮົາອາໄສຢູ່—ບ່ອນໃດກໍຕາມທີ່ລູກໆຂອງພຣະເຈົ້າເຕົ້າໂຮມເຂົ້າໃນຄວາມປອດໄພແຫ່ງ “ພັນທະສັນຍາອັນເປັນນິດ” ຂອງພຣະອົງ (ຂໍ້ທີ 9). ທ່ານສາມາດເຮັດຫຍັງໄດ້ແດ່ ເພື່ອຊ່ວຍສ້າງສາຊີໂອນ ໃນບ່ອນທີ່ທ່ານອາໄສຢູ່?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 45:3–5.ຜູ້ວິງວອນເຮັດຫຍັງແທນເຮົາ? ໃຫ້ເວົ້າລົມກັນກ່ຽວກັບເຫດຜົນທີ່ພຣະຜູ້ຊ່ວຍໃຫ້ລອດຖືກເອີ້ນວ່າ ຜູ້ວິງວອນແທນເຮົາ.

ຄຳສອນ ແລະ ພັນທະສັນຍາ 45:9–10.ຖ້າຫາກຄອບຄົວຂອງທ່ານມີ “ທຸງສັນຍານ,” ທີ່ເປັນຕົວແທນໃຫ້ແກ່ຄຳໝັ້ນສັນຍາຂອງທ່ານຕໍ່ພຣະກິດຕິຄຸນ, ມັນຈະເປັນທຸງແບບໃດ? ມັນອາດເປັນສິ່ງມ່ວນຊື່ນ ທີ່ຈະເຮັດທຸງນຳກັນເປັນຄອບຄົວ ແລະ ສົນທະນາວິທີທີ່ພວກທ່ານສາມາດຊ່ວຍເຫລືອຄົນອື່ນໃຫ້ຕິດຕາມທຸງສັນຍານແຫ່ງພຣະກິດຕິຄຸນ.

ຄຳສອນ ແລະ ພັນທະສັນຍາ 45:32.“ສະຖານທີ່ສັກສິດ” ຂອງເຮົາແມ່ນຢູ່ໃສ? ຄຳວ່າ “ບໍ່ຫວັ່ນໄຫວ” ໝາຍຄວາມວ່າແນວໃດ? ເຮົາຈະເຮັດໃຫ້ບ້ານເຮືອນຂອງເຮົາເປັນສະຖານທີ່ສັກສິດໄດ້ແນວໃດ?

ຄຳສອນ ແລະ ພັນທະສັນຍາ 45:39–44.ທ່ານຈະຊ່ວຍສະມາຊິກໃນຄອບຄົວໃຫ້ເຂົ້າໃຈຄວາມໝາຍຂອງການຄອຍຖ້າການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດໄດ້ແນວໃດ? ບາງທີທ່ານຄວນຄິດກ່ຽວກັບເຫດການໃດໜຶ່ງທີ່ທ່ານລໍຖ້າ ແລະ ແບ່ງປັນວິທີທີ່ທ່ານ “ເຝົ້າເບິ່ງ” ເຫດການນັ້ນ. ຫລື ທ່ານຄວນອົບອາຫານບາງຢ່າງນຳກັນ ແລະ ເຝົ້າເບິ່ງເຄື່ອງໝາຍທີ່ບົ່ງບອກວ່າມັນສຸກໃຫ້ກິນໄດ້ແລ້ວ. ເຮົາກຳລັງເຮັດຫຍັງເພື່ອເຝົ້າເບິ່ງການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ?

ຄຳສອນ ແລະ ພັນທະສັນຍາ 45:55.ການອ່ານ 1 ນີໄຟ 22:26 ແລະ ພຣະນິມິດ 20:1–3 ສາມາດຊ່ວຍຄອບຄົວຂອງທ່ານໃຫ້ເຂົ້າໃຈ ວິທີທີ່ຊາຕານ “ຈະຖືກມັດໄວ້” ລະຫວ່າງໜຶ່ງພັນປີ. ເຮົາຈະມັດຊາຕານໄວ້ ໃນຊີວິດຂອງເຮົາແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27; ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ” ນຳອີກ.

ການປັບປຸງການສຶກສາສ່ວນຕົວ

ໃຊ້ແຫລ່ງຊ່ວຍເຫລືອການສຶກສາ. ໃຫ້ໃຊ້ໝາຍເຫດຢູ່ທາງລຸ່ມໜ້າປຶ້ມ ຄູ່ມືພຣະຄຳພີ ເພື່ອເພີ່ມຄວາມຮູ້ໃນເລື່ອງພຣະຄຳພີ.