“ວັນທີ 10–16 ເດືອນພຶດສະພາ. ຄຳສອນ ແລະ ພັນທະສັນຍາ 49–50: ‘ສິ່ງທີ່ມາຈາກພຣະເຈົ້າເປັນຄວາມສະຫວ່າງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 10–16 ເດືອນພຶດສະພາ. ຄຳສອນ ແລະ ພັນທະສັນຍາ 49–50,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ສະນ້ຳຕອນຕາເວັນຂຶ້ນ

ວັນທີ 10–16 ເດືອນພຶດສະພາ

ຄຳສອນ ແລະ ພັນທະສັນຍາ 49–50

“ສິ່ງທີ່ມາຈາກພຣະເຈົ້າເປັນຄວາມສະຫວ່າງ”

“ຄົນທີ່ໄດ້ຮັບຄວາມສະຫວ່າງ, ແລະ ດຳເນີນຢູ່ກັບພຣະເຈົ້າ, ຈະໄດ້ຮັບຄວາມສະຫວ່າງຫລາຍຂຶ້ນ, ແລະ ຄວາມສະຫວ່າງນັ້ນຈະຮຸ່ງແຈ້ງຫລາຍຂຶ້ນໄປເລື້ອຍໆຈົນເຖິງວັນທີ່ສົມບູນ” (ຄຳສອນ ແລະ ພັນທະສັນຍາ 50:24). ໃຫ້ໄຕ່ຕອງວິທີທີ່ທ່ານໄດ້ຮັບຄວາມສະຫວ່າງ ໂດຍການດຳເນີນຢູ່ກັບພຣະເຈົ້າ.

ບັນທຶກຄວາມປະທັບໃຈຂອງທ່ານ

ພຣະຜູ້ຊ່ວຍໃຫ້ລອດຄື “ຜູ້ລ້ຽງທີ່ດີ” ຂອງເຮົາ (ຄຳສອນ ແລະ ພັນທະສັນຍາ 50:44). ພຣະອົງຮູ້ວ່າ ບາງເທື່ອແກະຈະຮ່ວນເຮ ແລະ ຖິ່ນແຫ້ງແລ້ງກັນດານກໍມີຫລາຍສິ່ງທີ່ອັນຕະລາຍ. ສະນັ້ນ ພຣະອົງຈຶ່ງໄດ້ນຳພາເຮົາໄປສູ່ຄວາມປອດໄພແຫ່ງຄຳສອນຂອງພຣະອົງດ້ວຍຄວາມຮັກ, ໃຫ້ໄກຈາກສິ່ງອັນຕະລາຍ ດັ່ງເຊັ່ນ “ວິນຍານເທັດ, ທີ່ໄດ້ອອກໄປໃນແຜ່ນດິນໂລກ, ຫລອກລວງໂລກ” (ຄຳສອນ ແລະ ພັນທະສັນຍາ 50:2). ການຕິດຕາມພຣະອົງໄປ ສ່ວນຫລາຍໝາຍເຖິງການປ່ອຍວາງແນວຄິດ ຫລື ປະເພນີທີ່ບໍ່ຖືກຕ້ອງ. ສິ່ງນີ້ເປັນຄວາມຈິງສຳລັບລີມັນ ຄອບລີ ແລະ ຄົນອື່ນໆຢູ່ໃນລັດໂອໄຮໂອ ຜູ້ທີ່ໄດ້ຮັບເອົາພຣະກິດຕິຄຸນທີ່ຖືກຟື້ນຟູ ແຕ່ຍັງຍຶດຖືຄວາມເຊື່ອບາງຢ່າງ ທີ່ບໍ່ຖືກຕ້ອງຢູ່ຄືເກົ່າ. ໃນ ຄຳສອນ ແລະ ພັນທະສັນຍາ 49, ພຣະຜູ້ເປັນເຈົ້າໄດ້ປະກາດຄວາມຈິງທີ່ດັດແປງຄວາມເຊື່ອເກົ່າຂອງລີມັນ ກ່ຽວກັບຫົວຂໍ້ດັ່ງເຊັ່ນ ການແຕ່ງງານ ແລະ ການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ. ແລະ ເມື່ອຜູ້ປ່ຽນໃຈເຫລື້ອມໃສຢູ່ລັດໂອໄຮໂອ “ໄດ້ຮັບ … ວິນຍານຕ່າງໆ ຊຶ່ງ [ພວກເຂົາ] ບໍ່ສາມາດເຂົ້າໃຈ,” ພຣະຜູ້ເປັນເຈົ້າໄດ້ສິດສອນພວກເຂົາໃຫ້ຮູ້ຈັກສັງເກດເບິ່ງວ່າ ມັນເປັນການສະແດງໃຫ້ປະຈັກທີ່ແທ້ຈິງຂອງພຣະວິນຍານແນວໃດ (ຄຳສອນ ແລະ ພັນທະສັນຍາ 50:15). ພຣະຜູ້ລ້ຽງທີ່ດີມີຄວາມອົດທົນ; ພຣະອົງຮູ້ວ່າໄພ່ພົນລຸ້ນທຳອິດເຫລົ່ານີ້ເປັນ—ຄືກັນກັບເຮົາທຸກຄົນ—“ເດັກນ້ອຍໆ” ຜູ້ “ຕ້ອງເຕີບໂຕຂຶ້ນໃນພຣະຄຸນ ແລະ ໃນຄວາມຮູ້ເລື່ອງຄວາມຈິງ” (ຄຳສອນ ແລະ ພັນທະສັນຍາ 50:40).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 49:5–23

ຄວາມຈິງຂອງພຣະກິດຕິຄຸນສາມາດຊ່ວຍເຮົາຮັບຮູ້ຄຳສອນເທັດໄດ້.

ກ່ອນເຂົ້າຮ່ວມສາດສະໜາຈັກ, ລີມັນ ຄອບລີ ໄດ້ເປັນສະມາຊິກຂອງສາດສະໜາກຸ່ມໜຶ່ງ ທີ່ຮູ້ຈັກກັນວ່າ United Society of Believers in Christ’s Second Appearing, ທັງຮູ້ຈັກກັນວ່າເປັນນິກາຍເຊເກີ (ເບິ່ງ “Leman Copley and the Shakers,” Revelations in Context, 117–21). ຫລັງຈາກໄດ້ເວົ້າລົມກັບລີມັນ, ໂຈເຊັບ ສະມິດ ໄດ້ສະແຫວງຫາຄວາມກະຈ່າງແຈ້ງຈາກພຣະຜູ້ເປັນເຈົ້າກ່ຽວກັບຄຳສອນຂອງນິກາຍເຊເກີບາງຢ່າງ, ແລະ ພຣະຜູ້ເປັນເຈົ້າໄດ້ຕອບດ້ວຍການເປີດເຜີຍ ຢູ່ໃນ ພາກທີ 49.

ທ່ານສາມາດພົບເຫັນຄວາມເຊື່ອຂອງນິກາຍເຊເກີ ຢູ່ໃນຫົວຂໍ້ຂອງ ພາກທີ 49. ໃຫ້ຄິດທີ່ຈະໝາຍສີ ຫລື ໝາຍເຫດຄວາມຈິງ ຢູ່ໃນ ຂໍ້ທີ 5–23 ທີ່ດັດແປງຄວາມເຊື່ອເຫລົ່ານັ້ນ. ໃຫ້ຄິດກ່ຽວກັບຄຳສອນເທັດອື່ນໆ ຫລື ປະເພນີທີ່ບໍ່ຖືກຕ້ອງ ຢູ່ໃນໂລກປະຈຸບັນນີ້. ຄວາມຈິງຂອງພຣະກິດຕິຄຸນຢ່າງໃດແດ່ທີ່ຊ່ວຍທ່ານປ້ອງກັນຕົວເອງຈາກສິ່ງເຫລົ່ານັ້ນ?

ຄຳສອນ ແລະ ພັນທະສັນຍາ 49:15–17

ການແຕ່ງງານລະຫວ່າງຊາຍ ແລະ ຍິງ ເປັນສິ່ງສຳຄັນຫລາຍຕໍ່ແຜນຂອງພຣະເຈົ້າ.

ຄວາມຈິງໃດແດ່ກ່ຽວກັບການແຕ່ງງານທີ່ທ່ານຮຽນຮູ້ຈາກ ຄຳສອນ ແລະ ພັນທະສັນຍາ 49:15–17? ເປັນຫຍັງທ່ານຈຶ່ງຮູ້ສຶກວ່າການແຕ່ງງານລະຫວ່າງຊາຍ ແລະ ຍິງ ຈຶ່ງສຳຄັນຕໍ່ແຜນຂອງພຣະບິດາເທິງສະຫວັນ? ແອວເດີ ເດວິດ ເອ ແບ໊ດນາ ໄດ້ໃຫ້ເຫດຜົນສອງຢ່າງ: “ເຫດຜົນທີ 1: ສະພາບທາງວິນຍານຂອງຊາຍ ແລະ ຍິງ ຊ່ວຍກັນໃຫ້ສົມບູນ ແລະ ດີພ້ອມ, ແລະ ສະນັ້ນ ຊາຍ ແລະ ຍິງຈຶ່ງຖືກເຈດຕະນາໃຫ້ກ້າວໜ້າໄປນຳກັນສູ່ຄວາມສູງສົ່ງ. … ເຫດຜົນທີ 2: ໂດຍແບບແຜນແຫ່ງສະຫວັນ, ຊາຍ ແລະ ຍິງທັງສອງ ຈຳເປັນຕ້ອງນຳລູກໆເຂົ້າມາສູ່ຊ່ວງມະຕະ ແລະ ຈັດຫາສະຖານທີ່ ທີ່ດີທີ່ສຸດສຳລັບການລ້ຽງດູ ແລະ ການບຳລຸງລ້ຽງລູກໆ” (“Marriage Is Essential to His Eternal Plan,” Ensign, June 2006, 83–84).

ເບິ່ງ ປະຖົມມະການ 2:20–24; 1 ໂກຣິນໂທ 11:11; “ຄອບຄົວ:ການປະກາດຕໍ່ໂລກ,” Ensign ຫລື Liahona, May 2017, 145 ນຳອີກ.

ການແຕ່ງງານລະຫວ່າງຊາຍ ແລະ ຍິງ ໄດ້ຖືກແຕ່ງຕັ້ງໄວ້ໂດຍພຣະເຈົ້າ.

ຄຳສອນ ແລະ ພັນທະສັນຍາ 50

ຄຳສອນຂອງພຣະຜູ້ເປັນເຈົ້າ ສາມາດປົກປ້ອງເຮົາຈາກການຫລອກລວງຂອງຊາຕານ.

ຜູ້ປ່ຽນໃຈເຫລື້ອມໃສໃໝ່ຢູ່ໃນລັດໂອໄຮໂອ ມີຄວາມກະຕືລືລົ້ນທີ່ຈະຮັບເອົາການສະແດງໃຫ້ປະຈັກທາງວິນຍານທີ່ສັນຍາໄວ້ຢູ່ໃນພຣະຄຳພີ, ແຕ່ຊາຕານກໍກະຕືລືລົ້ນທີ່ຈະຫລອກລວງພວກເຂົາຄືກັນ. ພວກເຂົາໄດ້ສົງໃສ, ເມື່ອບາງຄົນຮ້ອງຂຶ້ນແບບດັງໆ ຫລື ເປັນລົມ, ສິ່ງນັ້ນແມ່ນອິດທິພົນຂອງພຣະວິນຍານບໍ?

ໃຫ້ວາດພາບເຫັນຕົວເອງຖືກຂໍໃຫ້ຊ່ວຍຜູ້ປ່ຽນໃຈເຫລື້ອມໃສໃໝ່ເຫລົ່ານີ້ໃຫ້ເຂົ້າໃຈວິທີທີ່ຈະຮູ້ຈັກການສະແດງໃຫ້ປະຈັກທີ່ແທ້ຈິງຂອງພຣະວິນຍານບໍລິສຸດ ແລະ ຫລີກເວັ້ນຈາກການຖືກຫລອກລວງໂດຍການປອມແປງຂອງຊາຕານ. ຫລັກທຳໃດແດ່ທີ່ທ່ານພົບເຫັນຢູ່ໃນ ຄຳສອນ ແລະ ພັນທະສັນຍາ 50 ທີ່ທ່ານສາມາດແບ່ງປັນ? (ເບິ່ງ ໂດຍສະເພາະ ຂໍ້ທີ 22–25, 29–34, 40–46).

ເບິ່ງ 2 ຕີໂມທຽວ 3:13–17 ນຳອີກ.

ຄຳສອນ ແລະ ພັນທະສັນຍາ 50:13–24

ຄູສອນ ແລະ ນັກຮຽນໄດ້ຮັບຄວາມຮູ້ນຳກັນ ໂດຍພຣະວິນຍານ.

ວິທີໜຶ່ງທີ່ທ່ານສາມາດສຶກສາ ຄຳສອນ ແລະ ພັນທະສັນຍາ 50:13–24 ແມ່ນການແຕ້ມຮູບຄູສອນ ແລະ ນັກຮຽນ ແລະ, ຢູ່ຂ້າງຂອງແຕ່ລະຮູບ, ໃຫ້ຂຽນຂໍ້ຄວາມ ແລະ ສຳນວນຈາກຂໍ້ເຫລົ່ານີ້ ທີ່ສິດສອນທ່ານກ່ຽວກັບການຮຽນຮູ້ ແລະ ການສິດສອນພຣະກິດຕິຄຸນ. ເມື່ອໃດທີ່ທ່ານເຄີຍມີປະສົບການ ທີ່ສິດສອນທ່ານເຖິງຄວາມສຳຄັນຂອງພຣະວິນຍານ ໃນການສິດສອນ ແລະ ການຮຽນຮູ້? ໃຫ້ພິຈາລະນາສິ່ງທີ່ທ່ານສາມາດເຮັດ ເພື່ອປັບປຸງຄວາມພະຍາຍາມຂອງຕົວເອງ ໃນຖານະຄູສອນ ແລະ ນັກຮຽນພຣະກິດຕິຄຸນ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 49:2.ຄຳວ່າ “ປາດຖະໜາຢາກຮູ້ຄວາມຈິງບາງຢ່າງ, ແຕ່ບໍ່ແມ່ນທັງໝົດ” ໝາຍຄວາມວ່າແນວໃດ? ບາງທີທ່ານຄວນສະແດງຮູບທີ່ພາກສ່ວນໜຶ່ງຖືກປິດໄວ້ ແລະ ໃຫ້ສະມາຊິກໃນຄອບຄົວເດົາເບິ່ງ ວ່າມັນແມ່ນຫຍັງ. ມີຫຍັງເກີດຂຶ້ນເມື່ອເຮົາຮັບເອົາພຽງແຕ່ພາກສ່ວນໜຶ່ງຂອງຄວາມຈິງ? (ເບິ່ງ 2 ນີໄຟ 28:29). ຄວາມສົມບູນຂອງພຣະກິດຕິຄຸນເປັນພອນຕໍ່ເຮົາແນວໃດ?

ຄຳສອນ ແລະ ພັນທະສັນຍາ 49:26–28.ເຮົາໄດ້ຮັບພອນແນວໃດໂດຍຄຳສັນຍາຂອງພຣະຜູ້ເປັນເຈົ້າ ທີ່ວ່າ “ເຮົາຈະນຳໜ້າພວກເຈົ້າ ແລະ ຈະຮັກສາທາງຫລັງຂອງພວກເຈົ້າ; ແລະ ເຮົາຈະຢູ່ທ່າມກາງພວກເຈົ້າ”? ສະມາຊິກໃນຄອບຄົວສາມາດແບ່ງປັນປະສົບການ ເມື່ອເຂົາເຈົ້າຮູ້ສຶກວ່າພຣະຜູ້ເປັນເຈົ້າ “ນຳໜ້າ [ເຂົາເຈົ້າ]” ຫລື ຮູ້ສຶກວ່າພຣະອົງໄດ້ຢູ່ “ໃນທ່າມກາງ [ເຂົາເຈົ້າ].”

ຄຳສອນ ແລະ ພັນທະສັນຍາ 50:23–25.ພວກທ່ານສາມາດເຕົ້າໂຮມກັນຢູ່ໃນຫ້ອງມືດ ເພື່ອອ່ານ ຄຳສອນ ແລະ ພັນທະສັນຍາ 50:23–25 ແລະ ຄ່ອຍໆເຕີມແສງສະຫວ່າງ ໂດຍການໄຕ້ທຽນ ຫລື ເປີດດອກໄຟເພີ່ມ ເທື່ອລະດອກ. ທ່ານກໍສາມາດອ່ານຂໍ້ເຫລົ່ານີ້ ຂະນະທີ່ຕາເວັນຂຶ້ນໃນຕອນເຊົ້າ. ເຮົາສາມາດເຮັດຫຍັງໄດ້ແດ່ ເພື່ອເຮັດໃຫ້ແສງສະຫວ່າງຂອງພຣະກິດຕິຄຸນຂອງເຮົາຮຸ່ງແຈ້ງຂຶ້ນເລື້ອຍໆ? ເມື່ອສະມາຊິກໃນຄອບຄົວຮຽນຮູ້ບາງຢ່າງຕື່ມອີກກ່ຽວກັບພຣະກິດຕິຄຸນລະຫວ່າງອາທິດ, ໃຫ້ຊຸກຍູ້ເຂົາເຈົ້າໃຫ້ແບ່ງປັນມັນກັບຄອບຄົວ ໂດຍການຂຽນຂໍ້ຄວາມໃສ່ເຈ້ຍນ້ອຍ ແລະ ຕິດມັນໃສ່ໂຄມໄຟ ຫລື ແສງສະຫວ່າງອື່ນໆ ຢູ່ໃນເຮືອນ.

ຄຳສອນ ແລະ ພັນທະສັນຍາ 50:40–46.ຫລັງຈາກການອ່ານ ຄຳສອນ ແລະ ພັນທະສັນຍາ 50:40–46, ທ່ານສາມາດສະແດງຮູບພຣະຜູ້ຊ່ວຍໃຫ້ລອດທີ່ມາກັບໂຄງຮ່າງນີ້ ແລະ ຖາມຄຳຖາມ ດັ່ງເຊັ່ນ: ພວກເຈົ້າຮູ້ໄດ້ແນວໃດວ່າພຣະຜູ້ຊ່ວຍໃຫ້ລອດຮັກແກະ? ພຣະຜູ້ຊ່ວຍໃຫ້ລອດເປັນເໝືອນດັ່ງຜູ້ລ້ຽງແກະຕໍ່ເຮົາແນວໃດ? ສຳນວນໃດຈາກພຣະຄຳພີສະທ້ອນເຖິງແນວຄິດທີ່ວ່າ ພຣະຜູ້ຊ່ວຍໃຫ້ລອດເປັນຜູ້ລ້ຽງແກະ ແລະ ເຮົາເປັນແກະຂອງພຣະອົງ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສິດສອນຂອງເຮົາ

ປັບຕົວໄດ້. ໂອກາດສິດສອນທີ່ດີທີ່ສຸດ, ໂດຍສະເພາະຢູ່ໃນບ້ານເຮືອນ, ສ່ວນຫລາຍແມ່ນເກີດຂຶ້ນໂດຍທຳມະຊາດ ແລະ ໂດຍທີ່ບໍ່ຄາດຄິດ: ຕອນກິນເຂົ້ານຳກັນອາດຖືກດົນໃຈໃຫ້ສົນທະນາກ່ຽວກັບການຊື່ນຊົມຢູ່ດ້ວຍພຣະຄຳຂອງພຣະເຈົ້າ, ແລະ ຕອນຝົນຕົກຟ້າລົມສາມາດເປັນໂອກາດທີ່ຈະເປັນພະຍານເຖິງນ້ຳທີ່ປະກອບດ້ວຍຊີວິດ. ຖ້າຫາກທ່ານຕຽມພ້ອມທາງວິນຍານ, ແລ້ວພຣະຜູ້ເປັນເຈົ້າຈະມອບໃຫ້ທ່ານ “ໃນເວລານັ້ນເອງ, ສິ່ງທີ່ພວກເຈົ້າຈະກ່າວ” (ຄຳສອນ ແລະ ພັນທະສັນຍາ 100:6).