“ວັນທີ 17–23 ເດືອນພຶດສະພາ. ຄຳສອນ ແລະ ພັນທະສັນຍາ 51–57: ‘ຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 17–23 ເດືອນພຶດສະພາ. ຄຳສອນ ແລະ ພັນທະສັນຍາ 51–57,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
First Furrow [ຮ່ອງທຳອິດ], ໂດຍ ເຈມສ໌ ເທເລີ ຮາວູດ
ວັນທີ 17–23 ເດືອນພຶດສະພາ
ຄຳສອນ ແລະ ພັນທະສັນຍາ 51–57
“ຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ”
ການສຶກສາພຣະຄຳພີຊ່ວຍທ່ານຮັບຮູ້ສຸລະສຽງຂອງພຣະຜູ້ເປັນເຈົ້າ, ເພາະວ່າພຣະຄຳພີໄດ້ຖືກມອບໃຫ້ໂດຍພຣະອົງ ຜ່ານທາງພຣະວິນຍານຂອງພຣະອົງ (ເບິ່ງ ຄຳສອນ ແລະ ພັນທະສັນຍາ 18:34–36).
ບັນທຶກຄວາມປະທັບໃຈຂອງທ່ານ
ຕໍ່ສະມາຊິກຂອງສາດສະໜາຈັກ ໃນລະຫວ່າງປີ 1830, ການເຕົ້າໂຮມໄພ່ພົນ ແລະ ການສ້າງເມືອງຊີໂອນ ໄດ້ເປັນວຽກງານທາງວິນຍານ ແລະ ທາງໂລກ, ພ້ອມດ້ວຍຫລາຍຢ່າງທີ່ຕ້ອງຈັດການໃຫ້ຮຽບຮ້ອຍ: ບາງຄົນຕ້ອງໄດ້ຊື້ ແລະ ແບ່ງປັນທີ່ດິນໃນບ່ອນທີ່ໄພ່ພົນສາມາດຕັ້ງຖິ່ນຖານ. ບາງຄົນຕ້ອງໄດ້ພິມໜັງສື ແລະ ຈັດພິມຢ່າງອື່ນໆ. ແລະ ບາງຄົນຕ້ອງດູແລຮ້ານຄ້າ ເພື່ອຈັດຫາສິ່ງຂອງໃຫ້ຜູ້ທີ່ຢູ່ໃນຊີໂອນ. ໃນການເປີດເຜີຍ ທີ່ມີບັນທຶກຢູ່ໃນ ຄຳສອນ ແລະ ພັນທະສັນຍາ 51–57, ພຣະຜູ້ເປັນເຈົ້າໄດ້ກຳນົດ ແລະ ແນະນຳຜູ້ຄົນໃຫ້ຈັດການກັບໜ້າທີ່ເຫລົ່ານີ້, ແລະ ພຣະອົງໄດ້ລະບຸ ເມືອງອິນດີເພັນເດັນສ໌, ລັດມີເຊີຣີ, ໃຫ້ເປັນ “ສະຖານທີ່ສູນກາງ” ຂອງຊີໂອນ (ຄຳສອນ ແລະ ພັນທະສັນຍາ 57:3).
ແຕ່ຂະນະທີ່ຄວາມຊຳນານໃນດ້ານເຊັ່ນການຊື້ທີ່ດິນ, ການພິມ, ແລະ ການດູແລຮ້ານຄ້າ ເປັນສິ່ງສຳຄັນຕໍ່ວຽກງານທາງໂລກ ຂອງການສ້າງສາຊີໂອນ, ການເປີດເຜີຍເຫລົ່ານີ້ ກໍຍັງສິດສອນວ່າ ພຣະຜູ້ເປັນເຈົ້າປາດຖະໜາໃຫ້ໄພ່ພົນຂອງພຣະອົງ ກາຍເປັນຜູ້ທີ່ມີຄ່າຄວນພໍທາງວິນຍານ ເພື່ອຈະຖືກເອີ້ນວ່າຜູ້ຄົນຂອງຊີໂອນ. ພຣະອົງຮຽກຮ້ອງເຮົາແຕ່ລະຄົນໃຫ້ “ຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ,” ໂດຍການມີວິນຍານທີ່ສຳນຶກຜິດ, “ຍຶດໝັ້ນ” ໃນໜ້າທີ່ຮັບຜິດຊອບທີ່ເຮົາໄດ້ຖືກກຳນົດໃຫ້ເຮັດ (ເບິ່ງ ຄຳສອນ ແລະ ພັນທະສັນຍາ 51:19; 52:15; 54:2). ຖ້າຫາກເຮົາສາມາດເຮັດສິ່ງນັ້ນໄດ້—ບໍ່ວ່າຄວາມຊຳນານທາງໂລກຂອງເຮົາຈະເປັນຈັ່ງໃດ—ພຣະຜູ້ເປັນເຈົ້າສາມາດໃຊ້ເຮົາໃຫ້ສ້າງສາຊີໂອນ, ແລະ ພຣະອົງ “ຈະເລັ່ງສ້າງເມືອງໃນເວລາອັນເໝາະສົມ” (ຄຳສອນ ແລະ ພັນທະສັນຍາ 52:43).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າປະສົງໃຫ້ເຮົາເປັນຄົນຊື່ສັດ, ທ່ຽງທຳ, ແລະ ເປັນຜູ້ພິທັກຮັກສາທີ່ສະຫລາດ.
ຖ້າຫາກທ່ານໄດ້ເປັນສະມາຊິກຂອງສາດສະໜາຈັກ ໃນປີ 1831, ທ່ານອາດຖືກເຊື້ອເຊີນໃຫ້ດຳລົງຊີວິດຕາມກົດແຫ່ງການອຸທິດຖວາຍ ໂດຍການເຊັນມອບຊັບສິນຂອງທ່ານ ໃຫ້ສາດສະໜາຈັກ ຜ່ານທາງອະທິການ. ແລ້ວໃນກໍລະນີສ່ວນຫລາຍ, ເພິ່ນຈະມອບສິ່ງທີ່ທ່ານບໍລິຈາກຄືນໃຫ້ທ່ານ, ບາງເທື່ອຄືນໃຫ້ຫລາຍກວ່າເກົ່າ. ແຕ່ມັນຈະບໍ່ເປັນພຽງແຕ່ຊັບສິນຂອງທ່ານອີກຕໍ່ໄປ—ມັນເປັນສິ່ງທີ່ທ່ານພິທັກຮັກສາ.
ທຸກວັນນີ້ ວິທີການແມ່ນແຕກຕ່າງ, ແຕ່ຫລັກທຳຂອງການອຸທິດຖວາຍ ແລະ ການພິທັກຮັກສາ ຍັງສຳຄັນຢູ່ຄືເກົ່າ ໃນວຽກງານຂອງພຣະຜູ້ເປັນເຈົ້າ. ໃຫ້ພິຈາລະນາຂໍ້ຄວາມເຫລົ່ານີ້ ຈາກແອວເດີ ຄວິນຕິນ ແອວ ຄຸກ ທີ່ວ່າ: “ເຮົາມີຊີວິດຢູ່ໃນຊ່ວງເວລາທີ່ອັນຕະລາຍ ຕອນທີ່ຫລາຍຄົນເຊື່ອວ່າເຮົາບໍ່ຕ້ອງຮັບຜິດຊອບຕໍ່ພຣະເຈົ້າ ແລະ ວ່າເຮົາບໍ່ມີໜ້າທີ່ຮັບຜິດຊອບສ່ວນຕົວ ຫລື ພິທັກຮັກສາຕົວເອງ ຫລື ຄົນອື່ນ. ຫລາຍຄົນໃນໂລກມັກໃຫ້ຕົວເອງໄດ້ຮັບຄວາມພໍໃຈກ່ອນ … [ແລະ] ບໍ່ເຊື່ອວ່າເຂົາເປັນຜູ້ດູແລພີ່ນ້ອງຂອງເຂົາ. ເຖິງຢ່າງໃດກໍຕາມ, ໃນສາດສະໜາຈັກ, ເຮົາເຊື່ອວ່າ ການພິທັກຮັກສາເຫລົ່ານີ້ ເປັນການໄວ້ວາງໃຈທີ່ສັກສິດ” (“Stewardship—a Sacred Trust,” Ensign ຫລື Liahona, Nov. 2009, 91).
ຂະນະທີ່ທ່ານອ່ານ ພາກທີ 51, ໃຫ້ຄິດກ່ຽວກັບສິ່ງທີ່ພຣະເຈົ້າໄດ້ຝາກຝັງໄວ້ກັບທ່ານ. ຄຳວ່າ “ພິທັກຮັກສາ” (ຂໍ້ທີ 19) ແລະ “ອຸທິດຖວາຍ” (ຂໍ້ທີ 5) ໝາຍຄວາມວ່າແນວໃດ, ແລະ ສອງຄຳເຫລົ່ານັ້ນໝາຍເຖິງສິ່ງໃດ ກ່ຽວກັບຄວາມຄາດໝາຍຂອງພຣະເຈົ້າໃນຕົວທ່ານ? ຫລັກທຳໃດແດ່ທີ່ທ່ານພົບເຫັນຢູ່ໃນ ພາກທີ 51 ແລະ ຖ້ອຍຄຳຂອງແອວເດີ ຄຸກ ທີ່ສິດສອນທ່ານເຖິງຄວາມໝາຍຂອງການເປັນຜູ້ພິທັກຮັກສາ? (ເບິ່ງ ໂດຍສະເພາະ ຂໍ້ທີ 9, 15–20).
ເບິ່ງ ມັດທາຍ 25:14–30 ນຳອີກ.
ຄຳສອນ ແລະ ພັນທະສັນຍາ 52:14–19
ພຣະເຈົ້າໄດ້ມອບແບບແຜນໃຫ້ ເພື່ອຫລີກເວັ້ນຈາກການຫລອກລວງ.
ໂດຍທີ່ຫລາຍຄົນໄດ້ບອກເຖິງການສະແດງໃຫ້ປະຈັກທາງວິນຍານ, ຈຶ່ງເຮັດໃຫ້ໄພ່ພົນລຸ້ນທຳອິດເປັນຫ່ວງກັບການຖືກຫລອກ. ເຂົາເຈົ້າຈະຮູ້ໄດ້ແນວໃດວ່າ ແມ່ນໃຜທີ່ “ຖືກຮັບຮູ້ໂດຍ [ພຣະເຈົ້າ]”? (ຂໍ້ທີ 15). ໃນ ຄຳສອນ ແລະ ພັນທະສັນຍາ 52:14–19, ພຣະຜູ້ເປັນເຈົ້າໄດ້ມອບແບບແຜນທີ່ມີປະໂຫຍດໃຫ້. ທ່ານຈະນຳໃຊ້ແບບແຜນນີ້ ເພື່ອຄົ້ນພົບຂ່າວສານເທັດຢູ່ໃນໂລກແນວໃດ? ທ່ານກໍສາມາດໃຊ້ແບບແຜນນີ້ຄືກັນ ໃນການປະເມີນຕົວເອງ: ໃຫ້ຄິດໃຊ້ສຳນວນຕ່າງໆຈາກຂໍ້ເຫລົ່ານີ້ ເພື່ອຂຽນຄຳຖາມ ດັ່ງເຊັ່ນ “ເມື່ອເຮົາກ່າວ, ວິນຍານຂອງເຮົາສຳນຶກຜິດຫລືບໍ່?”
ເຮົາສາມາດຫັນໄປຫາພຣະຜູ້ເປັນເຈົ້າ ເມື່ອເຮົາເຈັບປວດໂດຍການເລືອກຂອງຄົນອື່ນ.
ພາກສ່ວນໜຶ່ງຂອງການໄປເຕົ້າໂຮມກັນຢູ່ລັດໂອໄຮໂອ, ໄພ່ພົນກຸ່ມໜຶ່ງທີ່ນຳພາໂດຍ ນິວເອັນ ໄນ້ ໄດ້ໄປເຖິງທີ່ນັ້ນ ຈາກເມືອງໂຄນສະວຽວ, ລັດນິວຢອກ, ແລະ ຕ້ອງການທີ່ພັກອາໄສ. ລີມັນ ຄອບລີ ມີໄຮ່ນາຕອນໃຫຍ່ຢູ່ໃກ້ເມືອງເຄີດແລນ, ແລະ ລາວໄດ້ເຮັດພັນທະສັນຍາທີ່ຈະປ່ອຍໃຫ້ໄພ່ພົນມາຕັ້ງຖິ່ນຖານຢູ່ໃນທີ່ດິນຂອງລາວ. ເຖິງຢ່າງໃດກໍຕາມ, ບໍ່ດົນຫລັງຈາກທີ່ເຂົາເຈົ້າໄດ້ໄປຕັ້ງຖິ່ນຖານຢູ່ທີ່ນັ້ນ, ນາຍຄອບລີໄດ້ຫວັ່ນໄຫວເລື່ອງສັດທາ, ໄດ້ເຮັດຜິດພັນທະສັນຍາຂອງລາວ, ແລະ ໄດ້ຂັບໄລ່ໄພ່ພົນອອກຈາກທີ່ດິນຂອງລາວ.
ດັ່ງທີ່ມີບັນທຶກຢູ່ໃນ ພາກທີ 54, ພຣະຜູ້ເປັນເຈົ້າໄດ້ບອກນິວເອັນ ໄນ້ ໃຫ້ຮູ້ກ່ຽວກັບສິ່ງທີ່ໄພ່ພົນຄວນເຮັດ ໃນສະຖານະການຂອງເຂົາເຈົ້າ. ທ່ານພົບເຫັນສິ່ງໃດຢູ່ໃນການເປີດເຜີຍນີ້ ທີ່ສາມາດຊ່ວຍທ່ານ ເມື່ອຄົນອື່ນເຮັດຜິດຄຳໝັ້ນສັນຍາ ຫລື ການເລືອກອື່ນໆທີ່ບໍ່ສະຫລາດ ມີຜົນກະທົບຕໍ່ທ່ານແນວໃດ?
ສະຖານທີ່ຂອງໄຮ່ນາຢູ່ໃນລັດໂອໄຮໂອ ບ່ອນທີ່ລີມັນ ຄອບລີ ໄດ້ສັນຍາທີ່ຈະມອບໃຫ້ສາດສະໜາຈັກ.
ຄຳສອນ ແລະ ພັນທະສັນຍາ 56:14–20
ຄົນທີ່ມີໃຈບໍລິສຸດຍ່ອມເປັນສຸກ.
ຢູ່ໃນຂໍ້ເຫລົ່ານີ້, ພຣະຜູ້ເປັນເຈົ້າໄດ້ກ່າວກັບທັງຄົນຮັ່ງມີ ແລະ ຄົນຍາກຈົນ; ມັນອາດເປັນສິ່ງໜ້າສົນໃຈທີ່ຈະປຽບທຽບຄຳແນະນຳຂອງພຣະອົງກັບຜູ້ຄົນສອງກຸ່ມເຫລົ່ານີ້. ສິ່ງໃດຢູ່ໃນຂໍ້ເຫລົ່ານີ້ທີ່ກ່ຽວຂ້ອງກັບທ່ານເປັນສ່ວນຕົວ? ການເອົາໃຈໃສ່ຕໍ່ຄວາມຮັ່ງມີ ເຮັດໃຫ້ຈິດວິນຍານຂອງທ່ານ “ເປື່ອຍເນົ່າ” ແນວໃດ? (ຂໍ້ທີ 16). ການມີ “ໃຈບໍລິສຸດ” ໝາຍຄວາມວ່າແນວໃດຕໍ່ທ່ານ (ຂໍ້ທີ 18) ກ່ຽວກັບສິ່ງຂອງທາງໂລກ?
ເບິ່ງ ຢາໂຄບ 2:17–21 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 51:9.ທ່ານສາມາດຫລິ້ນເກມທີ່ຄອບຄົວມັກຫລິ້ນ ແລະ ແລ້ວໃຫ້ເວົ້າລົມກັນກ່ຽວກັບວິທີທີ່ຜົນຂອງເກມຈະເປັນແນວໃດ ຖ້າຫາກມີຄົນຂີ້ຫລັກ. ເປັນຫຍັງມັນຈຶ່ງສຳຄັນທີ່ຈະ “ປະຕິບັດຢ່າງຊື່ສັດ” ຕໍ່ກັນແລະກັນ? ຄວາມຊື່ສັດຊ່ວຍເຮົາໃຫ້ເປັນ “ອັນໜຶ່ງດຽວກັນ” ໄດ້ແນວໃດ?
-
ຄຳສອນ ແລະ ພັນທະສັນຍາ 52:14–19.ຂະນະທີ່ພວກທ່ານສົນທະນາກັນກ່ຽວກັບແບບແຜນທີ່ບັນຍາຍຢູ່ໃນຂໍ້ເຫລົ່ານີ້, ຄອບຄົວຂອງພວກທ່ານອາດມັກເບິ່ງແບບແຜນຢ່າງອື່ນ ທີ່ພວກທ່ານໃຊ້—ດັ່ງເຊັ່ນ ແບບແຜນການຫຍິບເສື້ອຜ້າ ຫລື ແບບແຜນການຫັດຖະກຳ. ພວກທ່ານສາມາດຊ່ວຍກັນເຮັດບາງສິ່ງຈາກແບບແຜນ ຂະນະທີ່ເວົ້າລົມກັນກ່ຽວກັບແບບແຜນທີ່ພຣະຜູ້ເປັນເຈົ້າໄດ້ມອບໃຫ້ ເພື່ອຫລີກເວັ້ນຈາກການຫລອກລວງ.
-
ຄຳສອນ ແລະ ພັນທະສັນຍາ 53:1.ໃຫ້ຄິດທີ່ຈະແບ່ງປັນປະສົບການໃດໜຶ່ງກັບຄອບຄົວຂອງທ່ານ ເມື່ອທ່ານ, ຄືກັນກັບຊິດນີ ກຽວເບີດ, ໄດ້ທູນຖາມພຣະຜູ້ເປັນເຈົ້າ “ກ່ຽວກັບການເອີ້ນຂອງເຈົ້າ.”
-
ຄຳສອນ ແລະ ພັນທະສັນຍາ 54:2; 57:6–7.ຄຳວ່າ “ຍຶດໝັ້ນ” ໝາຍຄວາມວ່າແນວໃດ (ຄຳສອນ ແລະ ພັນທະສັນຍາ 54:2) ໃນສິ່ງທີ່ພຣະເຈົ້າໄດ້ຂໍໃຫ້ເຮົາເຮັດ? ທ່ານສາມາດເຊື້ອເຊີນສະມາຊິກໃນຄອບຄົວໃຫ້ຢືນຂຶ້ນ ແລະ ບອກເຖິງບາງສິ່ງທີ່ພຣະເຈົ້າໄດ້ຂໍໃຫ້ເຂົາເຈົ້າເຮັດ.
-
ຄຳສອນ ແລະ ພັນທະສັນຍາ 55.ພຣະຜູ້ເປັນເຈົ້າໄດ້ໃຊ້ຄວາມສາມາດຂອງວິວລຽມ ແຟ້ວສ໌ ໃຫ້ເປັນນັກຂຽນ ແລະ ນັກພິມແນວໃດ? ຢູ່ໃນປຶ້ມເພງສວດ ມີຫລາຍເພງທີ່ວິວລຽມ ແຟ້ວສ໌ ເປັນຜູ້ແຕ່ງ ດັ່ງເຊັ່ນ “ພຣະຜູ້ໄຖ່ແຫ່ງອິດສະຣາເອນ,” “ໂອ້ພຣະບິດາຜູ້ນິລັນ,” ແລະ “ພຣະວິນຍານພຣະເຈົ້າ.” ບາງທີສະມາຊິກໃນຄອບຄົວຂອງທ່ານສາມາດເວົ້າລົມກັນກ່ຽວກັບພອນສະຫວັນ ແລະ ຄວາມສາມາດທີ່ເຂົາເຈົ້າເຫັນໃນກັນແລະກັນ. ພອນສະຫວັນຂອງເຮົາຊ່ວຍໃນວຽກງານຂອງພຣະເຈົ້າແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.
ການປັບປຸງການສຶກສາສ່ວນຕົວ
ມີບັນທຶກສ່ວນຕົວກ່ຽວກັບການສຶກສາ. ທ່ານອາດພົບເຫັນວ່າມັນເປັນປະໂຫຍດທີ່ຈະໃຊ້ປຶ້ມບັນທຶກສ່ວນຕົວ ຫລື ປຶ້ມນ້ອຍເພື່ອຂຽນຄວາມຄິດ, ແນວຄິດ, ຄຳຖາມ, ຫລື ຄວາມປະທັບໃຈ ທີ່ມາສູ່ທ່ານໄວ້ ຂະນະທີ່ທ່ານສຶກສາ.
ອະທິການ ພາດທຣິດ ໄດ້ຮັບສິ່ງອຸທິດຖວາຍ, ໂດຍ ອາບິນ ເວແຊວກາ