“ວັນທີ 24–30 ເດືອນພຶດສະພາ. ຄຳສອນ ແລະ ພັນທະສັນຍາ 58–59: ‘ທຸ້ມເທຢ່າງກະຕືລືລົ້ນໃນອຸດົມການດີ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 24–30 ເດືອນພຶດສະພາ. ຄຳສອນ ແລະ ພັນທະສັນຍາ 58–59,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຖະໜົນເມືອງອິນດີເພັນເດັນສ໌ ລັດມີເຊີຣີ

Independence, Missouri [ເມືອງອິນດີເພັນເດັນສ໌ ລັດມີເຊີຣີ], ໂດຍ ອາລ໌ ຣາວສ໌

ວັນທີ 24–30 ເດືອນພຶດສະພາ

ຄຳສອນ ແລະ ພັນທະສັນຍາ 58–59

“ທຸ້ມເທຢ່າງກະຕືລືລົ້ນໃນອຸດົມການດີ”

ປະທານດາລິນ ເອັຈ ໂອກສ໌ ໄດ້ສິດສອນວ່າ, “ພຣະຄຳພີເຫລົ່ານີ້ຈະຊ່ວຍເຮົາໃຫ້ແກ້ບັນຫາກ່ຽວກັບຄຳຖາມສ່ວນຕົວຂອງເຮົາທັງໝົດ ເພາະວ່າໂດຍການອ່ານມັນ ເຮົາເຊື້ອເຊີນ ແລະ ເຮັດໃຫ້ຕົວເອງເໝາະສົມສຳລັບການດົນໃຈຈາກພຣະວິນຍານບໍລິສຸດ, ຊຶ່ງຈະນຳພາເຮົາໄປຫາຄວາມຈິງທັງໝົດ” (ໃນ David A. Edwards, “Are My Answers in There?” New Era, May 2016, 42).

ບັນທຶກຄວາມປະທັບໃຈຂອງທ່ານ

ເມື່ອພວກແອວເດີຂອງສາດສະໜາຈັກໄດ້ເຫັນສະຖານທີ່ຂອງເມືອງຊີໂອນເປັນເທື່ອທຳອິດ—ເມືອງອິນດີເພັນເດັນສ໌, ລັດມີເຊີຣີ—ມັນບໍ່ເປັນຄືສິ່ງທີ່ເຂົາເຈົ້າຄາດຄິດ. ບາງຄົນຄິດວ່າ ເຂົາເຈົ້າຈະພົບເຫັນຊຸມຊົນທີ່ຈະເລີນຮຸ່ງເຮືອງ ແລະ ຂະຫຍັນໝັ່ນພຽນ ພ້ອມດ້ວຍກຸ່ມໄພ່ພົນທີ່ເຂັ້ມແຂງ. ກົງກັນຂ້າມ ເຂົາເຈົ້າໄດ້ພົບເຫັນປະຊາກອນກະແຈກກະຈາຍກັນຢູ່, ຂາດຄວາມສີວິໄລທີ່ເຂົາເຈົ້າຄຸ້ນເຄີຍ ແລະ ຜູ້ຄົນຢູ່ທີ່ນັ້ນເປັນຄົນຫຍາບຄາຍ ຊຶ່ງຕັ້ງຖິ່ນຖານຢູ່ຊາຍແດນ ແທນທີ່ຈະເປັນໄພ່ພົນ. ມັນກັບເປັນວ່າ ພຣະຜູ້ເປັນເຈົ້າບໍ່ໄດ້ຂໍໃຫ້ເຂົາເຈົ້າພຽງແຕ່ ມາຫາ ຊີໂອນ—ພຣະອົງປະສົງໃຫ້ເຂົາເຈົ້າ ສ້າງ ຊີໂອນ.

ເມື່ອຄວາມຄາດຫວັງຂອງເຮົາບໍ່ກົງກັບຄວາມເປັນຈິງ, ເຮົາສາມາດຈື່ຈຳສິ່ງທີ່ພຣະຜູ້ເປັນເຈົ້າໄດ້ບອກໄພ່ພົນໃນປີ 1831 ວ່າ: “ພວກເຈົ້າບໍ່ສາມາດຫລຽວເຫັນແຜນການຂອງພຣະເຈົ້າຂອງພວກເຈົ້າດ້ວຍຕາທຳມະຊາດຂອງພວກເຈົ້າໃນເວລານີ້ … ແລະ ລັດສະໝີພາບທີ່ຈະຕາມມາຫລັງຈາກຄວາມທຸກຍາກລຳບາກຢ່າງຫລວງຫລາຍ” (ຄຳສອນ ແລະ ພັນທະສັນຍາ 58:3). ແມ່ນແລ້ວ, ຊີວິດແມ່ນເຕັມໄປດ້ວຍຄວາມທຸກຍາກລຳບາກ, ແມ່ນແຕ່ຄວາມຊົ່ວຮ້າຍ, ແຕ່ເຮົາສາມາດ “ເຮັດໃຫ້ເກີດຄວາມຊອບທຳຢ່າງຫລວງຫລາຍໄດ້; ເພາະ ພະລັງຢູ່ໃນຕົວ [ເຮົາ]” (ຂໍ້ທີ 27–28).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 58:1–5, 26–33, 44; 59:23

ພອນມີມາອີງຕາມເວລາຂອງພຣະເຈົ້າ ແລະ ຄວາມພາກພຽນຂອງເຮົາ.

ໄພ່ພົນໄດ້ວາງຮາກຖານຂອງຊີໂອນຢູ່ໃນເຂດແຈ໊ກສັນ, ລັດມີເຊີຣີ, ບ່ອນທີ່ເຂົາເຈົ້າໄດ້ອົດທົນກັບການທົດລອງຫລາຍຢ່າງ. ເຂົາເຈົ້າຫວັງແທ້ໆວ່າ ໃນຊ່ວງຊີວິດຂອງເຂົາເຈົ້າ ເຂດນີ້ຈະ ຈະເລີນຮຸ່ງເຮືອງເປັນສະຖານທີ່ ບ່ອນທີ່ໄພ່ພົນທຸກຄົນສາມາດມາເຕົ້າໂຮມ. ເຖິງຢ່າງໃດກໍຕາມ, ໄພ່ພົນໄດ້ຖືກຂັບໄລ່ອອກຈາກເຂດແຈ໊ກສັນ ພາຍໃນສອງສາມປີ, ແລະ ພຣະຜູ້ເປັນເຈົ້າໄດ້ເປີດເຜີຍວ່າ ຜູ້ຄົນຂອງພຣະອົງຈະຕ້ອງ “ລໍຖ້າຊົ່ວໄລຍະໜຶ່ງສຳລັບການໄຖ່ຊີໂອນ” (ຄຳສອນ ແລະ ພັນທະສັນຍາ 105:9).

ຂະນະທີ່ທ່ານສຶກສາຂ່າວສານດັ່ງຕໍ່ໄປນີ້, ໃຫ້ຊອກຫາເຫດຜົນທີ່ພອນຖືກກັກໄວ້ສຳລັບເວລານັ້ນ. ຄຳຖາມຢູ່ຂ້າງລຸ່ມສາມາດຊ່ວຍທ່ານໃຫ້ໄຕ່ຕອງ.

ຄຳສອນ ແລະ ພັນທະສັນຍາ 58:1–5; 59:23. ຂ່າວສານໃດແດ່ຢູ່ໃນຂໍ້ເຫລົ່ານີ້ທີ່ເພີ່ມຄວາມເຂັ້ມແຂງໃຫ້ແກ່ຄວາມສາມາດຂອງທ່ານ ເພື່ອສູ້ກັບຄວາມທຸກຍາກລຳບາກ ດ້ວຍຄວາມອົດທົນຫລາຍກວ່າເກົ່າ? ພອນຢ່າງໃດແດ່ທີ່ທ່ານໄດ້ຮັບຫລັງຈາກຄວາມທຸກຍາກລຳບາກ? ທ່ານຄິດວ່າເປັນຫຍັງພອນບາງຢ່າງມີມາພຽງແຕ່ຫລັງຈາກຄວາມທຸກຍາກລຳບາກ?

ຄຳສອນ ແລະ ພັນທະສັນຍາ 58:26–33. ການ “ທຸ້ມເທຢ່າງກະຕືລືລົ້ນໃນອຸດົມການດີ” ມີບົດບາດແນວໃດຢູ່ໃນການເຮັດໃຫ້ຄຳສັນຍາຂອງພຣະເຈົ້າບັນລຸຄວາມສຳເລັດ? ຄວາມເຊື່ອຟັງຂອງທ່ານມີບົດບາດແນວໃດ?

ຄຳສອນ ແລະ ພັນທະສັນຍາ 58:44. ແມ່ນຫຍັງຄືຄວາມສຳພັນລະຫວ່າງ “ການອະທິຖານດ້ວຍສັດທາ” ແລະ ພຣະປະສົງຂອງພຣະຜູ້ເປັນເຈົ້າສຳລັບເຮົາ?

ຄຳສອນ ແລະ ພັນທະສັນຍາ 59, ຫົວຂໍ້ພາກ

ພໍລີ ໄນ້ ແມ່ນໃຜ?

ພໍລີ ໄນ້ ແລະ ສາມີຂອງນາງ, ໂຈເຊັບ ໄນ້ ຜູ້ພໍ່, ເປັນໜຶ່ງໃນຜູ້ທີ່ເຊື່ອ ເລື່ອງການເອີ້ນຂອງໂຈເຊັບ ສະມິດ ໃຫ້ເປັນສາດສະດາ. ພໍລີ ແລະ ໂຈເຊັບ ໄດ້ໃຫ້ຄວາມຊ່ວຍເຫລືອທີ່ສຳຄັນຕໍ່ສາດສະດາ ໃນວຽກງານການແປພຣະຄຳພີມໍມອນ. ຄອບຄົວໄນ້ໄດ້ໜີຈາກເມືອງໂຄນສະວຽວ, ລັດນິວຢອກ, ໄປເຕົ້າໂຮມກັບໄພ່ພົນຢູ່ລັດໂອໄຮໂອ ແລະ ຕໍ່ມາໄດ້ຖືກບັນຊາໃຫ້ຍ້າຍໄປເຂດແຈ໊ກສັນ, ລັດມີເຊີຣີ. ຂະນະທີ່ເຂົາເຈົ້າເດີນທາງ, ສຸຂະພາບຂອງພໍລີ ໄດ້ຊຸດໂຊມລົງ, ແຕ່ນາງໄດ້ຕັ້ງໃຈວ່າ ຈະຕ້ອງເຫັນຊີໂອນ ກ່ອນນາງຕາຍ. ນາງໄດ້ຢູ່ລັດມີເຊີຣີ ພຽງສອງສາມວັນ ກ່ອນນາງໄດ້ເສຍຊີວິດ. ຄຳສອນ ແລະ ພັນທະສັນຍາ 59 ໄດ້ຮັບໃນມື້ທີ່ນາງໄດ້ເສຍຊີວິດ, ແລະ ຂໍ້ທີ 1 ແລະ 2 ເບິ່ງຄືວ່າ ກ່ຽວກັບນາງໂດຍສະເພາະ.

ຄຳສອນ ແລະ ພັນທະສັນຍາ 59:9–19

ການຮັກສາວັນຊະບາໂຕໃຫ້ສັກສິດ ຈະນຳພອນທາງໂລກ ແລະ ທາງວິນຍານມາໃຫ້.

ຫລັງຈາກໄດ້ສັນຍາທີ່ຈະໃຫ້ພອນແກ່ໄພ່ພົນໃນຊີໂອນ “ດ້ວຍບັນຍັດທີ່ບໍ່ແມ່ນໜ້ອຍ,” ພຣະຜູ້ເປັນເຈົ້າໄດ້ເນັ້ນພຣະບັນຍັດຂໍ້ໜຶ່ງໂດຍສະເພາະ: ການບັນຊາເພື່ອໃຫ້ກຽດແກ່ “ວັນສັກສິດ” ຂອງພຣະອົງ (ຄຳສອນ ແລະ ພັນທະສັນຍາ 59:4, 9). ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 59:9–19, ໃຫ້ໄຕ່ຕອງເຫດຜົນຂອງການໃຫ້ກຽດວັນຊະບາໂຕ ເປັນສິ່ງສຳຄັນຫລາຍຕໍ່ໄພ່ພົນເຫລົ່ານັ້ນ ຂະນະທີ່ເຂົາເຈົ້າສະແຫວງຫາທີ່ຈະສ້າງຊີໂອນແນວໃດ.

ທ່ານກໍສາມາດໄຕ່ຕອງຄຳຖາມເຫລົ່ານີ້ ເຊັ່ນ: ເຮົາໄດ້ໃຊ້ວັນຊະບາໂຕ ໃນວິທີທີ່ພຣະຜູ້ເປັນເຈົ້າເຈດຕະນາບໍ? ການຮັກສາວັນຊະບາໂຕໃຫ້ສັກສິດ ຊ່ວຍເຮົາ “ປາດສະຈາກມົນທິນຂອງໂລກ” ຕໍ່ໄປ ໄດ້ແນວໃດ? (ຂໍ້ທີ 9). ເຮັດແນວໃດເຮົາຈຶ່ງຈະສາມາດມີ “ຄວາມຈົງຮັກພັກດີແດ່ພຣະຜູ້ສູງສຸດ” ໄດ້? (ຂໍ້ທີ 10).

ຫລັງຈາກການອ່ານຂໍ້ເຫລົ່ານີ້, ທ່ານໄດ້ຮັບການດົນໃຈໃຫ້ເຮັດແນວໃດແດ່ ເພື່ອຈະໄດ້ຮັກສາວັນຊະບາໂຕໃຫ້ສັກສິດຢ່າງສົມບູນ? ປະຖົມມະການ 2:2–3; ອົບພະຍົບ 20:8–11; 31:13, 16; ພຣະບັນຍັດສອງ 5:12–15; ເອຊາຢາ 58:13–14; ມາຣະໂກ 2:27; ໂຢຮັນ 20:1–19; ກິດຈະການ 20:7.

ທ່ານອາດໄດ້ຮັບຜົນປະໂຫຍດຈາກວິດີໂອໃດໜຶ່ງຂອງຈຳນວນວິດີໂອຢ່າງຫລວງຫລາຍ ຫລື ແຫລ່ງຊ່ວຍເຫລືອອື່ນໆ ກ່ຽວກັບວັນຊະບາໂຕ ຢູ່ທີ່ sabbath.ChurchofJesusChrist.org.

ເບິ່ງ Russell M. Nelson, “The Sabbath Is a Delight,” Ensign ຫລື Liahona, May 2015, 129–32; Bible Dictionary, “Sabbath ນຳອີກ.”

ການຮັບສ່ວນສິນລະລຶກຄື ພາກສ່ວນຂອງການຮັກສາວັນຊະບາໂຕໃຫ້ສັກສິດ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 58:26–29.ບາງທີສະມາຊິກໃນຄອບຄົວສາມາດຂຽນບາງສິ່ງທີ່ເຂົາເຈົ້າ “ທຸ້ມເທຢ່າງກະຕືລືລົ້ນ”. ສິ່ງທັງໝົດເຫລົ່ານັ້ນເປັນ “ອຸດົມການດີ” ບໍ? ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ເຮົາ “ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈ [ຂອງເຮົາ] ເອງ”? ຂໍໃຫ້ສະມາຊິກໃນຄອບຄົວແຕ່ລະຄົນຄິດເຖິງສິ່ງທີ່ເຂົາເຈົ້າສາມາດເຮັດ ໃນອາທິດນີ້ ເພື່ອ “ເຮັດໃຫ້ເກີດຄວາມຊອບທຳຢ່າງຫລວງຫລາຍ.” ຈາກນັ້ນ ເຂົາເຈົ້າສາມາດລາຍງານສິ່ງທີ່ເຂົາເຈົ້າໄດ້ເຮັດ.

ຄຳສອນ ແລະ ພັນທະສັນຍາ 58:42–43.ສະມາຊິກໃນຄອບຄົວຮູ້ສຶກແນວໃດ ເມື່ອເຂົາເຈົ້າອ່ານຂໍ້ເຫລົ່ານີ້? ຂໍ້ເຫລົ່ານີ້ຊ່ວຍບາງຄົນທີ່ຕ້ອງການ ການກັບໃຈແນວໃດ?

ຄຳສອນ ແລະ ພັນທະສັນຍາ 59:3–19.ຄຳວ່າ “ສວມມົງກຸດ … ດ້ວຍບັນຍັດ” ໝາຍຄວາມວ່າແນວໃດ? (ຂໍ້ທີ 4). ຂະນະທີ່ທ່ານອ່ານພຣະບັນຍັດ ຢູ່ໃນ ຂໍ້ທີ 5–19, ໃຫ້ສົນທະນາກ່ຽວກັບພອນທີ່ທ່ານໄດ້ຮັບ ໂດຍການເຊື່ອຟັງຕໍ່ພຣະບັນຍັດແຕ່ລະຂໍ້ເຫລົ່ານີ້.

ທ່ານກໍສາມາດສັງເກດເບິ່ງ ຄຳວ່າ “ຊື່ນຊົມ,” “ປິຕິຍິນດີ,” “ຊື່ນບານ,” ແລະ “ຍິນດີ” ກໍຖືກໃຊ້ເພື່ອບັນຍາຍພຣະບັນຍັດ ເພື່ອໃຫ້ກຽດວັນຊະບາໂຕ ນຳອີກ. ທ່ານຈະເຮັດໃຫ້ວັນຊະບາໂຕຂອງທ່ານເຕັມໄປດ້ວຍຄວາມຊື່ນຊົມຫລາຍກວ່າເກົ່າໄດ້ແນວໃດ? ບາງທີຄອບຄົວຂອງທ່ານສາມາດຫລິ້ນເກມຈັບຄູ່ ໂດຍການຂຽນຂໍ້ຄວາມໃສ່ໃນເຈ້ຍນ້ອຍ ທີ່ສະແດງໃຫ້ເຫັນສິ່ງທີ່ພວກທ່ານສາມາດເຮັດ ເພື່ອຮັກສາວັນຊະບາໂຕໃຫ້ສັກສິດ.

ຄຳສອນ ແລະ ພັນທະສັນຍາ 59:18–21.ເຮົາສາມາດເຮັດຫຍັງແດ່ເພື່ອ “ສາລະພາບວ່າ … ພຣະຫັດ [ຂອງພຣະເຈົ້າ] ຢູ່ໃນທຸກສິ່ງທັງປວງ”? (ຂໍ້ທີ 21). ໃຫ້ຄິດທີ່ຈະອອກໄປຍ່າງຫລິ້ນ ຫລື ເບິ່ງຮູບພາບ, ສັງເກດເບິ່ງ “ສິ່ງປະທັບຕາ ແລະ … ຍິນດີໃນໃຈ” (ຂໍ້ທີ 18). ພວກທ່ານສາມາດຖ່າຍຮູບ ຫລື ແຕ້ມຮູບ ກ່ຽວກັບສິ່ງທີ່ພວກທ່ານພົບເຫັນ ແລະ ແລ້ວເວົ້າລົມກັນກ່ຽວກັບສິ່ງທີ່ພວກທ່ານສາມາດສະແດງຄວາມກະຕັນຍູຕໍ່ສິ່ງເຫລົ່ານີ້. ເຮົາໄດ້ເຫັນພຣະຫັດຂອງພຣະເຈົ້າຢູ່ໃນຊີວິດຂອງເຮົາແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສິດສອນຂອງເຮົາ

ແບ່ງປັນຂໍ້ພຣະຄຳພີ. ໃຫ້ເວລາສະມາຊິກໃນຄອບຄົວເພື່ອແບ່ງປັນຂ່າວສານຈາກພຣະຄຳພີ ທີ່ເຂົາເຈົ້າພົບເຫັນໃນການສຶກສາສ່ວນຕົວ ແລະ ມີຄວາມໝາຍຕໍ່ເຂົາເຈົ້າ.