“ວັນທີ 31 ເດືອນພຶດສະພາ–ວັນທີ 6 ເດືອນມິຖຸນາ. ຄຳສອນ ແລະ ພັນທະສັນຍາ 60–62: ‘ເນື້ອໜັງທັງປວງຢູ່ໃນມືຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 31 ເດືອນພຶດສະພາ–ວັນທີ 6 ເດືອນມິຖຸນາ. ຄຳສອນ ແລະ ພັນທະສັນຍາ 60–62,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ແມ່ນ້ຳມີເຊີຣີ

Campfire on the Missouri [ກອງໄຟຢູ່ຄ້າຍລັດມີເຊີຣີ], ໂດຍ ບຣາຍແອນ ມາກ ເທເລີ

ວັນທີ 31 ເດືອນພຶດສະພາ–ວັນທີ 6 ເດືອນມິຖຸນາ

ຄຳສອນ ແລະ ພັນທະສັນຍາ 60–62

“ເນື້ອໜັງທັງປວງຢູ່ໃນມືຂອງເຮົາ”

ປະທານເອສະຣາ ແທັບ ເບັນສັນ ໄດ້ສິດສອນວ່າ ເມື່ອເຮົາສຶກສາພຣະຄຳພີ, “ປະຈັກພະຍານຈະເພີ່ມທະວີຂຶ້ນ. ຄຳໝັ້ນສັນຍາຈະໝັ້ນຄົງ. ຄອບຄົວຈະໄດ້ຮັບການປົກປ້ອງ. ການເປີດເຜີຍສ່ວນຕົວຈະຫລັ່ງໄຫລມາ” (“The Power of the Word,” Ensign, May 1986, 81).

ບັນທຶກຄວາມປະທັບໃຈຂອງທ່ານ

ໃນເດືອນມິຖຸນາ ປີ 1831, ໂຈເຊັບ ສະມິດ ໄດ້ຈັດກອງປະຊຸມໃຫຍ່ຂຶ້ນກັບພວກແອວເດີຂອງສາດສະໜາຈັກ ຢູ່ເມືອງເຄີດແລນ. ຢູ່ທີ່ນັ້ນ, ພຣະຜູ້ເປັນເຈົ້າໄດ້ຈັດຕັ້ງພວກແອວເດີບາງຄົນໃຫ້ມີຄູ່ສອນ ແລະ ໄດ້ສົ່ງເຂົາເຈົ້າອອກໄປຫາເຂດແຈ໊ກສັນ, ລັດມີເຊີຣີ, ດ້ວຍຄຳສັ່ງໃຫ້: “ສັ່ງສອນໄປລະຫວ່າງທາງ” (ຄຳສອນ ແລະ ພັນທະສັນຍາ 52:10). ພວກແອວເດີຫລາຍຄົນກໍໄດ້ເຮັດຕາມນັ້ນຢ່າງພາກພຽນ, ແຕ່ບາງຄົນກໍບໍ່ໄດ້ເຮັດ. ສະນັ້ນ ເມື່ອເຖິງເວລາເດີນທາງກັບເມືອງເຄີດແລນ, ພຣະຜູ້ເປັນເຈົ້າໄດ້ກ່າວວ່າ, “ກັບ [ພວກແອວເດີ] ບາງຄົນ ເຮົາບໍ່ພໍໃຈນຳຫລາຍປານໃດ, ເພາະພວກເຂົາບໍ່ເປີດປາກ, ແຕ່ໄດ້ເຊື່ອງຊ້ອນພອນສະຫວັນທີ່ເຮົາໄດ້ມອບໃຫ້ພວກເຂົາ, ເພາະຄວາມຢ້ານກົວມະນຸດ” (ຄຳສອນ ແລະ ພັນທະສັນຍາ 60:2). ເຮົາຫລາຍຄົນສາມາດຮູ້ສຶກເສຍໃຈກັບພວກແອວເດີເຫລົ່ານັ້ນ—ເຮົາກໍອາດຮູ້ສຶກລັງເລໃຈທີ່ຈະເປີດປາກຂອງເຮົາ ແລະ ແບ່ງປັນພຣະກິດຕິຄຸນຄືກັນ. ບາງທີເຮົາກໍຄືກັນ ອາດຖືກຂັດຂວາງໂດຍ “ຄວາມຢ້ານກົວມະນຸດ.” ບາງທີເຮົາຄິດສົງໃສຄວາມມີຄ່າຄວນ ຫລື ຄວາມສາມາດຂອງຕົວເອງ. ບໍ່ວ່າຈະເປັນດ້ວຍເຫດຜົນໃດກໍຕາມ, ພຣະຜູ້ເປັນເຈົ້າ “ຮູ້ຈັກຄວາມອ່ອນແອຂອງມະນຸດ ແລະ ຮູ້ຈັກວິທີຊ່ວຍເຫລືອ [ເຮົາ]” (ຄຳສອນ ແລະ ພັນທະສັນຍາ 62:1). ໃນຫລາຍບ່ອນຕະຫລອດທົ່ວການເປີດເຜີຍເຫລົ່ານີ້ ຜູ້ສອນສາດສະໜາລຸ້ນທຳອິດ ໄດ້ຮັບຄວາມໝັ້ນໃຈ ອັນທີ່ສາມາດຊ່ວຍເຮົາໃຫ້ເອົາຊະນະຄວາມຢ້ານກົວຂອງເຮົາ ທີ່ຈະແບ່ງປັນພຣະກິດຕິຄຸນ—ຫລື ຄວາມຢ້ານກົວອື່ນໆ ທີ່ເຮົາອາດປະເຊີນ ທີ່ວ່າ: “ເຮົາ, ພຣະຜູ້ເປັນເຈົ້າ, ປົກຄອງຢູ່ໃນຟ້າສະຫວັນເບື້ອງເທິງ.” “ເຮົາສາມາດເຮັດໃຫ້ພວກເຈົ້າບໍລິສຸດ.” “ເພາະວ່າເນື້ອໜັງທັງປວງຢູ່ໃນມືຂອງເຮົາ.” ແລະ “ຈົ່ງເບີກບານເຖີດ, ເດັກນ້ອຍໆເອີຍ; ເພາະເຮົາຢູ່ໃນທ່າມກາງພວກເຈົ້າ.” (ຄຳສອນ ແລະ ພັນທະສັນຍາ 60:4, 7; 61:6, 36.)

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 60; 62

ພຣະຜູ້ເປັນເຈົ້າພໍພຣະໄທເມື່ອເຮົາເປີດປາກຂອງເຮົາເພື່ອແບ່ງປັນພຣະກິດຕິຄຸນ.

ເຮົາທຸກຄົນກໍເຄີຍມີປະສົບການ ເມື່ອເຮົາສາມາດແບ່ງປັນພຣະກິດຕິຄຸນໃຫ້ກັບຄົນອື່ນ, ແຕ່ດ້ວຍເຫດຜົນໃດໜຶ່ງ, ເຮົາບໍ່ໄດ້ເຮັດ. ຂະນະທີ່ທ່ານອ່ານພຣະຄຳຂອງພຣະຜູ້ເປັນເຈົ້າ ຕໍ່ຜູ້ສອນສາດສະໜາລຸ້ນທຳອິດ ຜູ້ “ບໍ່ເປີດປາກ,” ໃຫ້ຄິດກ່ຽວກັບໂອກາດຂອງທ່ານເອງທີ່ຈະແບ່ງປັນພຣະກິດຕິຄຸນ. ປະຈັກພະຍານຂອງທ່ານກ່ຽວກັບພຣະກິດຕິຄຸນ ເປັນເໝືອນດັ່ງ “ພອນສະຫວັນ,” ຫລື ຊັບສົມບັດຈາກພຣະເຈົ້າແນວໃດ? ບາງເທື່ອເຮົາ “ເຊື່ອງຊ້ອນພອນສະຫວັນ [ຂອງເຮົາ] ແນວໃດ”? (ຄຳສອນ ແລະ ພັນທະສັນຍາ 60:2; ເບິ່ງ ມັດທາຍ 25:14–30 ນຳອີກ).

ພຣະຜູ້ເປັນເຈົ້າໄດ້ຕີສອນຜູ້ສອນສາດສະໜາລຸ້ນທຳອິດ, ແຕ່ພຣະອົງກໍຍັງໄດ້ພະຍາຍາມດົນໃຈເຂົາເຈົ້ານຳອີກ. ມີຂ່າວສານທີ່ໃຫ້ກຳລັງໃຈແນວໃດແດ່ຈາກພຣະອົງ ທີ່ທ່ານເຫັນຢູ່ໃນ ພາກທີ 60 ແລະ 62? ຂ່າວສານເຫລົ່ານີ້ສ້າງຄວາມໝັ້ນໃຈຂອງທ່ານແນວໃດແດ່ ໃນການແບ່ງປັນພຣະກິດຕິຄຸນ? ໃນວັນຂ້າງໜ້າ, ໃຫ້ຊອກຫາໂອກາດທີ່ຈະເປີດປາກຂອງທ່ານ ແລະ ແບ່ງປັນສິ່ງທີ່ພຣະເຈົ້າໄດ້ຝາກຝັງໄວ້ກັບທ່ານ.

ເບິ່ງ ຄຳສອນ ແລະ ພັນທະສັນຍາ 33:8–10; 103:9–10; Dieter F. Uchtdorf, “Missionary Work: Sharing What Is in Your Heart,” Ensign ຫລື Liahona, May 2019, 15–18 ນຳອີກ.

ພຣະເຈົ້າປະສົງໃຫ້ເຮົາແບ່ງປັນພຣະກິດຕິຄຸນໃຫ້ກັບຄົນອື່ນ.

ຄຳສອນ ແລະ ພັນທະສັນຍາ 61:5–6, 14–18

ນ້ຳທັງໝົດຖືກສາບແຊ່ງໂດຍພຣະຜູ້ເປັນເຈົ້າບໍ?

ຄຳເຕືອນຂອງພຣະຜູ້ເປັນເຈົ້າຢູ່ໃນ ຄຳສອນ ແລະ ພັນທະສັນຍາ 61 ພາກສ່ວນໜຶ່ງ ແມ່ນຄຳເຕືອນກ່ຽວກັບໄພອັນຕະລາຍທີ່ຜູ້ຄົນຂອງພຣະອົງອາດປະເຊີນ ຂະນະທີ່ເດີນທາງໄປຊີໂອນ ທາງແມ່ນ້ຳມີເຊີຣີ, ຊຶ່ງຮູ້ຈັກກັນດີວ່າເປັນໄລຍະທີ່ເປັນອັນຕະລາຍຫລາຍ. ຄຳເຕືອນນີ້ບໍ່ຄວນຖືກແປຄວາມໝາຍວ່າ ເຮົາຄວນຫລີກເວັ້ນຈາກການເດີນທາງນ້ຳ. ພຣະຜູ້ເປັນເຈົ້າມີ “ອຳນາດທັງປວງ,” ລວມທັງອຳນາດເໜືອຜືນນ້ຳ (ຂໍ້ທີ 1).

ຄຳສອນ ແລະ ພັນທະສັນຍາ 61–62

ພຣະຜູ້ເປັນເຈົ້າມີລິດເດດທັງປວງ ແລະ ສາມາດຄຸ້ມຄອງເຮົາ.

ໃນລະຫວ່າງການເດີນທາງກັບເມືອງເຄີດແລນ, ໂຈເຊັບ ສະມິດ ແລະ ຜູ້ນຳຄົນອື່ນໆ ໄດ້ປະເຊີນກັບບັນຫາທີ່ເກືອບເອົາຊີວິດບໍ່ລອດ ໃນແມ່ນ້ຳມີເຊີຣີ. ພຣະຜູ້ເປັນເຈົ້າໄດ້ໃຊ້ໂອກາດນີ້ເພື່ອເຕືອນ ແລະ ໃຫ້ຄຳແນະນຳແກ່ຜູ້ຮັບໃຊ້ຂອງພຣະອົງ. ທ່ານພົບເຫັນຫຍັງແດ່ ຢູ່ໃນ ຄຳສອນ ແລະ ພັນທະສັນຍາ 61 ທີ່ຊຸກຍູ້ທ່ານໃຫ້ໄວ້ວາງໃຈໃນພຣະຜູ້ເປັນເຈົ້າ ເມື່ອທ່ານປະເຊີນກັບການທ້າທາຍຂອງທ່ານເອງ? ຍົກຕົວຢ່າງ, ເປັນຫຍັງມັນຈຶ່ງສຳຄັນທີ່ຈະຮູ້ວ່າ ພຣະເຈົ້າແມ່ນ “ຈາກເປັນນິດເຖິງເປັນນິດ”? (ຂໍ້ທີ 1).

ມີຄວາມຮູ້ທີ່ຄ້າຍຄືກັນນີ້ ຢູ່ໃນ ພາກທີ 62. ພຣະຜູ້ເປັນເຈົ້າສິດສອນທ່ານຫຍັງແດ່ກ່ຽວກັບພຣະອົງເອງ ແລະ ອຳນາດຂອງພຣະອົງ ຢູ່ໃນການເປີດເຜີຍນີ້?

ໃຫ້ໄຕ່ຕອງປະສົບການທີ່ເສີມສ້າງສັດທາ ທີ່ທ່ານເຄີຍມີ ຕອນທີ່ພຣະຜູ້ເປັນເຈົ້າໄດ້ຊ່ວຍທ່ານເອົາຊະນະຄວາມຍາກລຳບາກທາງວິນຍານ ຫລື ທາງຮ່າງກາຍ.

ຄຳສອນ ແລະ ພັນທະສັນຍາ 62

ພຣະຜູ້ເປັນເຈົ້າປະສົງໃຫ້ເຮົາຕັດສິນໃຈເຮັດບາງສິ່ງ “ດັ່ງທີ່ [ເຮົາ] ເຫັນວ່າດີ.”

ບາງເທື່ອພຣະຜູ້ເປັນເຈົ້າໄດ້ຊີ້ບອກເຮົາໃນບາງຢ່າງໂດຍສະເພາະ, ແລະ ໃນບາງເລື່ອງພຣະອົງກໍປ່ອຍໃຫ້ເຮົາຕັດສິນໃຈເອງ. ທ່ານເຫັນຫລັກທຳຂໍ້ນີ້ສາທິດຢູ່ໃນ ຄຳສອນ ແລະ ພັນທະສັນຍາ 62 ແນວໃດ? (ເບິ່ງ ຄຳສອນ ແລະ ພັນທະສັນຍາ 60:5; 61:22 ນຳອີກ). ທ່ານເຫັນຫລັກທຳຂໍ້ນີ້ຢູ່ໃນຊີວິດຂອງທ່ານແນວໃດ? ເປັນຫຍັງມັນຈຶ່ງເປັນການດີສຳລັບເຮົາ ທີ່ຈະຕັດສິນໃຈເຮັດບາງຢ່າງ ໂດຍປາດສະຈາກການຊີ້ນຳໃດໜຶ່ງໂດຍສະເພາະຈາກພຣະເຈົ້າ?

ເບິ່ງ ອີເທີ 2:18–25; ຄຳສອນ ແລະ ພັນທະສັນຍາ 58:27–28 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 60:2–3.ເປັນຫຍັງຜູ້ສອນສາດສະໜາລຸ້ນທຳອິດຈຶ່ງລັງເລໃຈທີ່ຈະແບ່ງປັນພຣະກິດຕິຄຸນ? ເປັນຫຍັງບາງເທື່ອເຮົາຈຶ່ງລັງເລໃຈ? ໃຫ້ຄິດທີ່ຈະຫລິ້ນລະຄອນກ້ອມ ເຖິງວິທີທີ່ສະມາຊິກໃນຄອບຄົວສາມາດແບ່ງປັນພຣະກິດຕິຄຸນ ໃນສະຖານທີ່ຕ່າງໆ.

ຄຳສອນ ແລະ ພັນທະສັນຍາ 61:36–39.ມີເຫດຜົນແນວໃດແດ່ ທີ່ເຮົາເຫັນຢູ່ໃນຂໍ້ເຫລົ່ານີ້ ທີ່ເຮົາຄວນ “ເບີກບານ”? (ເບິ່ງ ໂຢຮັນ 16:33 ນຳອີກ). ບາງທີຄອບຄົວຂອງທ່ານຄວນຂຽນ ຫລື ແຕ້ມຮູບກ່ຽວກັບບາງສິ່ງທີ່ເຮັດໃຫ້ເຂົາເຈົ້າມີຄວາມສຸກ ແລະ ໃຫ້ເກັບເຈ້ຍເຫລົ່ານັ້ນໄວ້ໃນຂວດ “ເບີກບານ”. (ໃຫ້ແນ່ໃຈວ່າ ມີຮູບພຣະຜູ້ຊ່ວຍໃຫ້ລອດຢູ່ນຳ ແລະ ເຕືອນເຮົາເຖິງຄວາມຮັກຂອງພຣະອົງທີ່ມີໃຫ້ເຮົາ.) ຕະຫລອດອາທິດເມື່ອສະມາຊິກໃນຄອບຄົວຕ້ອງການສິ່ງເຕືອນໃຈເຖິງເຫດຜົນທີ່ຈະມີຄວາມສຸກ, ໃຫ້ເຂົາເຈົ້າເລືອກເອົາບາງສິ່ງຈາກຂວດນັ້ນ.

ຄຳສອນ ແລະ ພັນທະສັນຍາ 61:36.ທ່ານຈະສາມາດຊ່ວຍຄອບຄົວຂອງທ່ານໃຫ້ຈື່ຈຳວ່າ ພຣະຜູ້ຊ່ວຍໃຫ້ລອດຢູ່ “ໃນທ່າມກາງ [ເຮົາ]” ແນວໃດ? ພວກທ່ານສາມາດຕັດສິນໃຈນຳກັນ ວ່າຄວນວາງສະແດງຮູບຂອງພຣະອົງໄວ້ຢູ່ບ່ອນໃດທີ່ຈະເຫັນໄດ້ງ່າຍ ຢູ່ໃນເຮືອນຂອງພວກທ່ານ. ເຮົາຈະສາມາດເຊື້ອເຊີນພຣະຜູ້ຊ່ວຍໃຫ້ລອດໃຫ້ສະຖິດຢູ່ໃນຊີວິດປະຈຳວັນຂອງເຮົາໄດ້ແນວໃດ?

ຄຳສອນ ແລະ ພັນທະສັນຍາ 62:3.ບາງທີທ່ານຄວນມີການປະຊຸມສະແດງປະຈັກພະຍານຂອງຄອບຄົວ ຫລັງຈາກການອ່ານບົດນີ້. ເພື່ອອະທິບາຍວ່າປະຈັກພະຍານຄືຫຍັງ, ທ່ານສາມາດແບ່ງປັນພາກສ່ວນໜຶ່ງຂອງຂ່າວສານຂອງປະທານ ເອັມ ຣະໂຊ ບາເລີດ “Pure Testimony” (Ensign ຫລື Liahona, Nov. 2004, 40–43). ເປັນຫຍັງມັນຈຶ່ງສຳຄັນທີ່ຈະບັນທຶກປະຈັກພະຍານຂອງເຮົາໄວ້?

ຄຳສອນ ແລະ ພັນທະສັນຍາ 62:5, 8.ເປັນຫຍັງພຣະຜູ້ເປັນເຈົ້າຈຶ່ງບໍ່ມອບພຣະບັນຍັດກ່ຽວກັບທຸກໆດ້ານຂອງຊີວິດຂອງເຮົາ? ອີງຕາມ ຂໍ້ທີ 8, ເຮົາຈະຕັດສິນໃຈແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ບອກມາ ສັດຈະຄືຫຍັງ,” ເພງສວດ ແລະ ເພງຂອງເດັກນ້ອຍ, 34.

ການປັບປຸງການສຶກສາສ່ວນຕົວ

ປ່ອຍໃຫ້ພຣະວິນຍານຊົງນຳການສຶກສາຂອງທ່ານ. ປ່ອຍໃຫ້ພຣະວິນຍານບໍລິສຸດນຳພາທ່ານ. ໃຫ້ມີຄວາມຮູ້ສຶກໄວຕໍ່ການສື່ມຂອງພຣະອົງ ຂະນະທີ່ພຣະອົງນຳພາທ່ານໄປຫາສິ່ງທີ່ທ່ານຕ້ອງການທີ່ຈະຮຽນຮູ້ໃນທຸກວັນ, ແມ່ນແຕ່ຖ້າຫາກວ່າການສື່ມຂອງພຣະອົງແນະນຳທ່ານໃຫ້ອ່ານ ຫລື ສຶກສາຫົວຂໍ້ທີ່ແຕກຕ່າງຈາກທີ່ທ່ານສຶກສາຕາມປົກກະຕິ ຫລື ໃນວິທີທີ່ແຕກຕ່າງກໍຕາມ.