“ວັນທີ 7–13 ເດືອນມິຖຸນາ. ຄຳສອນ ແລະ ພັນທະສັນຍາ 63: ‘ສິ່ງທີ່ມາຈາກເບື້ອງເທິງເປັນສິ່ງສັກສິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 7–13 ເດືອນມິຖຸນາ. ຄຳສອນ ແລະ ພັນທະສັນຍາ 63,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

Spring Hill, Daviess County, Missouri [ເມືອງສະປຣິງຮຽວ, ເຂດເດວີສ໌, ລັດມີເຊີຣີ], ໂດຍ ກາທ໌ ຣໍບິນສັນ ໂອບອນ

ວັນທີ 7–13 ເດືອນມິຖຸນາ

ຄຳສອນ ແລະ ພັນທະສັນຍາ 63

“ສິ່ງທີ່ມາຈາກເບື້ອງເທິງເປັນສິ່ງສັກສິດ”

ພຣະຜູ້ເປັນເຈົ້າໄດ້ກ່າວວ່າ, “ເຈົ້າຈະໄດ້ຮັບພຣະວິນຍານຜ່ານທາງການອະທິຖານ” (ຄຳສອນ ແລະ ພັນທະສັນຍາ 63:64). ໃຫ້ຄິດທີ່ຈະອະທິຖານຂໍໃຫ້ພຣະວິນຍານນຳພາການສຶກສາຂອງທ່ານ.

ບັນທຶກຄວາມປະທັບໃຈຂອງທ່ານ

ສະຖານທີ່ສຳລັບເມືອງຊີໂອນ ໄດ້ຖືກເລືອກ. ຜູ້ນຳຂອງສາດສະໜາຈັກໄດ້ໄປຢ້ຽມຢາມຂົງເຂດ ແລະ ໄດ້ອຸທິດມັນ ໃຫ້ເປັນສະຖານທີ່ເຕົ້າໂຮມສຳລັບໄພ່ພົນ. ອີງຕາມປະຫວັດຂອງໂຈເຊັບ ສະມິດ, “ແຜ່ນດິນຊີໂອນເປັນສິ່ງສຳຄັນທີ່ສຸດທາງຝ່າຍໂລກໃນຄວາມຄິດຂອງພວກເຮົາ” (ຄຳສອນ ແລະ ພັນທະສັນຍາ 63, ຫົວຂໍ້ພາກ). ແຕ່ຄວາມຄິດເຫັນກ່ຽວກັບຊີໂອນແມ່ນບໍ່ກົງກັນ. ໄພ່ພົນຫລາຍຄົນໄດ້ມີຄວາມກະຕືລືລົ້ນ ທີ່ຈະເລີ່ມຕົ້ນການເຕົ້າໂຮມ ຢູ່ລັດມີເຊີຣີ. ກົງກັນຂ້າມ, ຜູ້ຄົນເຊັ່ນ ເອຊະຣາ ບູທ໌ ໄດ້ຜິດຫວັງກັບແຜ່ນດິນຊີໂອນ ແລະ ໄດ້ບອກກ່າວເຖິງຄວາມຮູ້ສຶກຂອງເຂົາເຈົ້າ. ຕາມຈິງແລ້ວ, ເມື່ອໂຈເຊັບກັບໄປເມືອງເຄິດແລນ ຈາກລັດມີເຊີຣີ, ເພິ່ນພົບເຫັນວ່າຄວາມແຕກແຍກ ແລະ ການປະຖິ້ມຄວາມເຊື່ອ ໄດ້ລັກລອບເຂົ້າມາຫາສາດສະໜາຈັກ ຂະນະທີ່ເພິ່ນບໍ່ຢູ່. ມັນແມ່ນໃນສະພາບການນີ້ເອງ ທີ່ເພິ່ນໄດ້ຮັບການເປີດເຜີຍ ຢູ່ໃນ ຄຳສອນ ແລະ ພັນທະສັນຍາ 63. ໃນການເປີດເຜີຍນີ້ພຣະຜູ້ເປັນເຈົ້າໄດ້ກ່າວເຖິງການຊື້ທີ່ດິນ ແລະ ຍ້າຍໄພ່ພົນໄປລັດມີເຊີຣີ. ແຕ່ໃນບັນດາວຽກງານຫລາຍຢ່າງທີ່ຈຳເປັນຕ້ອງເຮັດ ກໍເປັນເວລາເໝາະສົມທີ່ຈະເຕືອນວ່າ: “ເຮົາ, ພຣະຜູ້ເປັນເຈົ້າ, ເອີ່ຍສຽງຂອງເຮົາ, ແລະ ມັນຈະຕ້ອງຖືກເຊື່ອຟັງ” (ຂໍ້ທີ 5). ສຸລະສຽງຂອງພຣະອົງ, ພຣະປະສົງຂອງພຣະອົງ, ແລະ ພຣະບັນຊາຂອງພຣະອົງ—ທັງໝົດ “[ມາ] ຈາກເບື້ອງເທິງ”—ຊຶ່ງບໍ່ຄວນປະຕິບັດຕໍ່ແບບເຍາະເຍີ້ຍ ຫລື ແບບເສີຍໆ. ມັນ “ເປັນສິ່ງສັກສິດ, ແລະ ຕ້ອງກ່າວເຖິງດ້ວຍຄວາມລະມັດລະວັງ” (ຂໍ້ທີ 64).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 63:1–6, 32–37

ພຣະພິໂລດຂອງພຣະຜູ້ເປັນເຈົ້າຈະລຸກລາມ ຕ້ານຄົນຊົ່ວ ແລະ ຄົນກະບົດ.

ເມື່ອໄດ້ຮັບການເປີດເຜີຍນີ້, ໂຈເຊັບ ສະມິດ ໄດ້ປະເຊີນກັບການວິຈານຢ່າງໜັກ ຈາກສະມາຊິກຫລາຍຄົນຂອງສາດສະໜາຈັກ ຜູ້ທີ່ໄດ້ຫັນມາຕໍ່ຕ້ານເພິ່ນ (ເບິ່ງ “Ezra Booth and Isaac Morley,” Revelations in Context, 130–36). ພຣະຜູ້ເປັນເຈົ້າໄດ້ເຕືອນຫຍັງແດ່ ຢູ່ໃນ ຄຳສອນ ແລະ ພັນທະສັນຍາ 63:1–6, 32–37 ກ່ຽວກັບ “ຄົນຊົ່ວ ແລະ ຄົນກະບົດ”? ຄຳເຕືອນເຫລົ່ານັ້ນເປັນຫລັກຖານເຖິງຄວາມຮັກຂອງພຣະເຈົ້າແນວໃດ?

ຄຳສອນ ແລະ ພັນທະສັນຍາ 63:7–12

ເຄື່ອງໝາຍເກີດຂຶ້ນໂດຍສັດທາ ແລະ ພຣະປະສົງຂອງພຣະເຈົ້າ.

ເຄື່ອງໝາຍ ຫລື ສິ່ງມະຫັດສະຈັນພຽງເທົ່ານັ້ນ ຈະບໍ່ຊ່ວຍໃຫ້ສັດທາຍືນຍົງ. ໃນຕົ້ນປີ 1831 ເອຊະຣາ ບູທ໌, ນັກເທດສະໜາຂອງນິກາຍເມໂທດິສ ຢູ່ໃນເມືອງເຄີດແລນ, ໄດ້ຕັດສິນໃຈຮັບບັບຕິສະມາ ຫລັງຈາກທີ່ລາວໄດ້ເຫັນໂຈເຊັບ ສະມິດ ປິ່ນປົວແຂນຂອງນາງແອວສາ ຈອນສັນ ຢ່າງມະຫັດສະຈັນ ທີ່ເປັນເພື່ອນຂອງຄອບຄົວບູທ໌.

ແລະ ພຽງແຕ່ພາຍໃນສອງສາມເດືອນ, ບູທ໌ ກໍເສື່ອມສັດທາ ແລະ ກາຍເປັນຄົນວິຈານສາດສະດາ. ສິ່ງນີ້ເປັນໄປໄດ້ແນວໃດ, ເຖິງແມ່ນວ່າລາວໄດ້ເຫັນການມະຫັດສະຈັນແລ້ວ? ໃຫ້ໄຕ່ຕອງກ່ຽວກັບເລື່ອງນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 63:7–12. ທ່ານຄວນພິຈາລະນາວ່າ ເປັນຫຍັງບາງຄົນຈຶ່ງຮັບເອົາເຄື່ອງໝາຍ “ສຳລັບຄວາມດີຂອງມະນຸດ ອັນນຳໄປສູ່ລັດສະໝີພາບ [ຂອງພຣະເຈົ້າ]” (ຂໍ້ທີ 12) ແລະ ບາງຄົນຮັບເອົາເຄື່ອງໝາຍ “ໄປສູ່ … ການກ່າວໂທດ” (ຂໍ້ທີ 11). ອີງຕາມສິ່ງທີ່ທ່ານໄດ້ອ່ານ, ທ່ານຄິດວ່າ ພຣະຜູ້ເປັນເຈົ້າ ປະສົງໃຫ້ທ່ານຄິດ ແລະ ຮູ້ສຶກຫຍັງແດ່ກ່ຽວກັບເຄື່ອງໝາຍ?

ເບິ່ງ ມັດທາຍ 16:1–4; ໂຢຮັນ 12:37; ມໍມອນ 9:10–21; ອີເທີ 12:12, 18 ນຳອີກ.

ຄຳສອນ ແລະ ພັນທະສັນຍາ 63:13–23

ພົມມະຈັນໝາຍເຖິງການຮັກສາຄວາມຄິດ ແລະ ການກະທຳໃຫ້ບໍລິສຸດ.

ຜູ້ຄົນສ່ວນຫລາຍຈະຮັບຮູ້ວ່າ ການຫລິ້ນຊູ້ເປັນສິ່ງທີ່ຜິດ. ແຕ່ໃນ ຄຳສອນ ແລະ ພັນທະສັນຍາ 63:13–19, ພຣະຜູ້ຊ່ວຍໃຫ້ລອດໄດ້ເຮັດໃຫ້ແຈ່ມແຈ້ງວ່າ ຕັນຫາກໍມີຜົນສະທ້ອນທາງວິນຍານທີ່ຮ້າຍແຮງຄືກັນ. “ເປັນຫຍັງຕັນຫາຈຶ່ງເປັນບາບທີ່ຮ້າຍແຮງ?” ແອວເດີ ແຈັບຟະຣີ ອາ ຮໍແລນ ໄດ້ຖາມ. “ນອກເໜືອໄປຈາກການທຳລາຍຈິດວິນຍານຂອງເຮົາທັງໝົດແລ້ວ, ຂ້າພະເຈົ້າຄິດວ່າ ມັນເປັນບາບ ເພາະວ່າມັນຫລຸດຄຸນຄ່າຄວາມສຳພັນທີ່ສູງສຸດ ແລະ ສັກສິດທີ່ສຸດ ຊຶ່ງພຣະເຈົ້າໄດ້ປະທານໃຫ້ແກ່ມະນຸດ—ຄວາມຮັກທີ່ຊາຍ ແລະ ຍິງມີຕໍ່ກັນແລະກັນ ແລະ ຄວາມປາດຖະໜາທີ່ຄູ່ສາມີພັນລະຍາມີ ເພື່ອນຳລູກໆມາສູ່ຄອບຄົວດ້ວຍຄວາມຕັ້ງໃຈ ໃຫ້ເປັນນິລັນດອນ” (“Place No More for the Enemy of My Soul,” Ensign ຫລື Liahona, May 2010, 44).

ຜົນສະທ້ອນຢ່າງໃດແດ່ ທີ່ພຣະຜູ້ເປັນເຈົ້າໄດ້ກ່າວເຖິງ ຢູ່ໃນ ຄຳສອນ ແລະ ພັນທະສັນຍາ 63:13–19 ທີ່ຈະມາສູ່ຜູ້ທີ່ບໍ່ກັບໃຈຈາກຄວາມຄິດ ແລະ ການກະທຳທີ່ບໍ່ບໍລິສຸດ? ໃຫ້ສັງເກດເບິ່ງພອນທີ່ພຣະຜູ້ຊ່ວຍໃຫ້ລອດສັນຍາ ຢູ່ໃນ ຂໍ້ທີ 20 ແລະ 23 ຕໍ່ຜູ້ທີ່ຊື່ສັດ. ພອນຢ່າງໃດແດ່ທີ່ໄດ້ມາສູ່ຊີວິດທ່ານ ຈາກການເຊື່ອຟັງກົດພົມມະຈັນ? ພຣະຜູ້ຊ່ວຍໃຫ້ລອດໄດ້ຊ່ວຍທ່ານໃຫ້ບໍລິສຸດຢູ່ຄືເກົ່າ ຫລື ກາຍເປັນຄົນບໍລິສຸດແນວໃດ?

ເບິ່ງ ຄຳສອນ ແລະ ພັນທະສັນຍາ 121:45; Linda S. Reeves, “Worthy of Our Promised Blessings,” Ensign ຫລື Liahona, Nov. 2015, 9–11 ນຳອີກ.

ຜູ້ຊາຍ ແລະ ຜູ້ຍິງ ຢູ່ໃກ້ພຣະວິຫານ — ເຮົາໄດ້ຮັບພອນເມື່ອເຮົາຮັກສາຄວາມຄິດ ແລະ ການກະທຳໃຫ້ບໍລິສຸດ.

ຄຳສອນ ແລະ ພັນທະສັນຍາ 63:24–46

ພຣະຜູ້ເປັນເຈົ້າຊີ້ນຳການງານທາງຝ່າຍວິນຍານ ແລະ ທາງຝ່າຍໂລກ ຂອງໄພ່ພົນຂອງພຣະອົງ.

ຫລັງຈາກພຣະຜູ້ເປັນເຈົ້າໄດ້ແຈ້ງບອກບ່ອນທີ່ຊີໂອນຈະຖືກສ້າງຂຶ້ນ, ໄພ່ພົນຢູ່ໃນລັດໂອໄຮໂອ ຕ້ອງການ ການຊີ້ນຳກ່ຽວກັບວ່າ ຈະເລີ່ມຕົ້ນຍົກຍ້າຍເມື່ອໃດ ແລະ ຈະໄປຫາເງິນຈາກໃສ ເພື່ອຊື້ທີ່ດິນ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 63:24–46, ໃຫ້ຊອກຫາການຊີ້ນຳທາງຝ່າຍວິນຍານ ແລະ ທາງຝ່າຍໂລກ ທີ່ພຣະຜູ້ເປັນເຈົ້າໄດ້ມອບໃຫ້ກ່ຽວກັບຊີໂອນ. ການຊີ້ນຳທາງຝ່າຍວິນຍານ ແລະ ທາງຝ່າຍໂລກແນວໃດແດ່ ທີ່ພຣະຜູ້ເປັນເຈົ້າໄດ້ມອບໃຫ້ທ່ານ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 63:7–12.ເລື່ອງລາວກ່ຽວກັບເອຊະຣາ ບູທ໌ ໜີໄປຈາກສາດສະໜາຈັກ ເຖິງແມ່ນໄດ້ເປັນພະຍານເຖິງການປິ່ນປົວຂອງນາງແອວສາ ຈອນສັນ ແລ້ວກໍຕາມ (ເບິ່ງ ລາຍລະອຽດສັ້ນໆ ຢູ່ໃນ “ແນວຄິດສຳລັບການສຶກສາພຣະຄຳພີເປັນສ່ວນຕົວ” ແລະ ຮູບພາບທີ່ມາກັບໂຄງຮ່າງນີ້) ອາດກະຕຸ້ນການສົນທະນາກ່ຽວກັບສິ່ງມະຫັດສະຈັນ. ບາງທີຄອບຄົວຂອງທ່ານສາມາດເວົ້າລົມກ່ຽວກັບສິ່ງມະຫັດສະຈັນທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າ, ລວມທັງປະສົບການຈາກຄອບຄົວຂອງທ່ານ ຫລື ປະຫວັດຄອບຄົວຂອງທ່ານ. ການໃຊ້ສັດທາຂອງເຂົາເຈົ້າຈຳເປັນຕໍ່ການໄດ້ຮັບສິ່ງມະຫັດສະຈັນເຫລົ່ານີ້ແນວໃດ? ຄຳສອນ ແລະ ພັນທະສັນຍາ 63:7–12 ສິດສອນກ່ຽວກັບຄວາມສຳພັນລະຫວ່າງສັດທາ ແລະ ສິ່ງມະຫັດສະຈັນແນວໃດ?

ຄຳສອນ ແລະ ພັນທະສັນຍາ 63:13–19.ເຮົາຈະສາມາດປົກປ້ອງຕົວເອງຈາກອິດທິພົນທີ່ບໍ່ມີຄ່າຄວນ, ລວມທັງຮູບພາບລາມົກໄດ້ແນວໃດ? (ທ່ານສາມາດພົບເຫັນແຫລ່ງຕ່າງໆທີ່ເປັນປະໂຫຍດສຳລັບຄອບຄົວ ຢູ່ທີ່ AddressingPornography.ChurchofJesusChrist.org.) ມີພອນຢ່າງໃດແດ່ສຳລັບການດຳລົງຊີວິດຕາມກົດພົມມະຈັນ?

ຄຳສອນ ແລະ ພັນທະສັນຍາ 63:23.ທ່ານຈະຊ່ວຍຄອບຄົວຂອງທ່ານໃຫ້ເຂົ້າໃຈ ວິທີທີ່ “ຄວາມລຶກລັບແຫ່ງອານາຈັກ,” ຫລື ຄວາມຈິງຂອງພຣະກິດຕິຄຸນ, ຄືກັນກັບ “ນ້ຳທີ່ປະກອບດ້ວຍຊີວິດ” ແນວໃດ? ຍົກຕົວຢ່າງ, ພວກທ່ານສາມາດເດີນທາງໄປຫາບໍ່ນ້ຳອຸ່ນ ຫລື ແມ່ນ້ຳ ທີ່ຢູ່ໃກ້ (ຫລື ສາຍວິດີໂອ ຫລື ສະແດງຮູບພາບກ່ຽວກັບນ້ຳ). ຄວາມຈິງຂອງພຣະກິດຕິຄຸນເປັນເໝືອນດັ່ງນ້ຳແນວໃດ?

ຄຳສອນ ແລະ ພັນທະສັນຍາ 63:58.ຄຳເຕືອນໃດແດ່ທີ່ເຮົາພົບເຫັນ ຢູ່ໃນ ພາກທີ 63? ມີຄຳເຕືອນຢ່າງໃດແດ່ທີ່ເຮົາໄດ້ຍິນຈາກຜູ້ນຳຂອງສາດສະໜາຈັກ ໃນທຸກວັນນີ້?

ຄຳສອນ ແລະ ພັນທະສັນຍາ 63:58–64.ເອົາສົມບັດທີ່ມີຄ່າຂອງຄອບຄົວ ມາໃຫ້ຄອບຄົວຂອງທ່ານເບິ່ງ. ເຮົາກະທຳຕໍ່ສິ່ງເຫລົ່ານີ້ຕ່າງຈາກສິ່ງອື່ນໆ ທີ່ບໍ່ມີຄ່າເທົ່າກັບສິ່ງເຫລົ່ານີ້ແນວໃດ? ຄຳສອນ ແລະ ພັນທະສັນຍາ 63:58–64 ສິດສອນເຮົາຫຍັງແດ່ກ່ຽວກັບສິ່ງທີ່ເຮົາສາມາດເຮັດດ້ວຍຄວາມຄາລະວະຕໍ່ສິ່ງທີ່ສັກສິດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຄວາມເມດຕາເລີ່ມຈາກເຮົາ,” ເພງສວດ ແລະ ເພງຂອງເດັກນ້ອຍ, 69.

ການປັບປຸງການສຶກສາສ່ວນຕົວ

ດຳລົງຊີວິດຕາມສິ່ງທີ່ທ່ານຮຽນຮູ້. “ເມື່ອທ່ານຮູ້ສຶກເຖິງຄວາມປິຕິຍິນດີ ທີ່ມາຈາກການເຂົ້າໃຈພຣະກິດຕິຄຸນ, ທ່ານຈະຢາກໃຊ້ສິ່ງທີ່ທ່ານຮຽນຮູ້. ພະຍາຍາມດຳລົງຊີວິດໃຫ້ສອດຄ່ອງກັບສິ່ງທີ່ທ່ານເຂົ້າໃຈ. ເມື່ອເຮັດແບບນັ້ນ ສັດທາ, ຄວາມຮູ້, ແລະ ປະຈັກພະຍານຂອງທ່ານຈະເຂັ້ມແຂງຂຶ້ນ” (ຈົ່ງສອນພຣະກິດຕິຄຸນຂອງເຮົາ, 21).

ໂຈເຊັບ ສະມິດ ຈັບມືຜູ້ຍິງ — *Healing of Elsa Johnson’s Shoulder [ການປິ່ນປົວບ່າໄຫລ່ຂອງນາງແອວສາ ຈອນສັນ],* ໂດຍ ແຊມ ລໍເລີ