“ວັນທີ 14–20 ເດືອນມິຖຸນາ. ຄຳສອນ ແລະ ພັນທະສັນຍາ 64–66: ‘ພຣະຜູ້ເປັນເຈົ້າຮຽກຮ້ອງຫົວໃຈ ແລະ ຈິດໃຈທີ່ເຕັມໃຈ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 14–20 ເດືອນມິຖຸນາ. ຄຳສອນ ແລະ ພັນທະສັນຍາ 64–66,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ທົ່ງໃນຕອນຕາເວັນຂຶ້ນ

ເຂດເດວີສ໌, ລັດມີເຊີຣີ

ວັນທີ 14–20 ເດືອນມິຖຸນາ

ຄຳສອນ ແລະ ພັນທະສັນຍາ 64–66

“ພຣະຜູ້ເປັນເຈົ້າຮຽກຮ້ອງຫົວໃຈ ແລະ ຈິດໃຈທີ່ເຕັມໃຈ”

ປະທານເຮັນຣີ ບີ ໄອຣິງ ໄດ້ກ່າວວ່າ: “ຂ້າພະເຈົ້າມັກອ່ານພຣະຄຳພີດ້ວຍຄຳຖາມທີ່ວ່າ ‘ພຣະເຈົ້າຢາກໃຫ້ເຮົາເຮັດຫຍັງ?’ ຫລື ‘ພຣະອົງຢາກໃຫ້ເຮົາຮູ້ສຶກຫຍັງ?’ ຂ້າພະເຈົ້າຈະພົບເຫັນແນວຄິດ ແລະ ຄວາມຄິດໃໝ່ສະເໝີ ທີ່ຂ້າພະເຈົ້າບໍ່ເຄີຍມີມາກ່ອນ” (“How God Speaks to Me through the Scriptures,” Feb. 6, 2019, blog.ChurchofJesusChrist.org).

ບັນທຶກຄວາມປະທັບໃຈຂອງທ່ານ

ໃນຄວາມຮ້ອນອົບເອົ້າຂອງເດືອນສິງຫາ ປີ 1831, ພວກແອວເດີຫລາຍຄົນໄດ້ເດີນທາງກັບຄືນໄປເມືອງເຄີດແລນ ຫລັງຈາກການສຳຫລວດແຜ່ນດິນຊີໂອນ ໃນລັດມີເຊີຣີ ຕາມການຊີ້ນຳຂອງພຣະຜູ້ເປັນເຈົ້າ. ມັນບໍ່ໄດ້ເປັນການເດີນທາງທີ່ສະບາຍ. ຜູ້ເດີນທາງ—ໂຈເຊັບ ສະມິດ, ອໍລີເວີ ຄາວເດີຣີ, ຊິດນີ ຣິກດອນ, ເອຊະຣາ ບູທ໌, ແລະ ຄົນອື່ນໆ—ທັງຮ້ອນ ແລະ ເມື່ອຍລ້າ, ແລະ ບໍ່ດົນຄວາມຕຶງຄຽດກໍກາຍເປັນການຜິດຖຽງກັນ. ເບິ່ງຄືກັບວ່າ ການສ້າງຊີໂອນ, ເມືອງແຫ່ງຄວາມຮັກ, ເປັນອັນໜຶ່ງດຽວກັນ, ແລະ ສະຫງົບສຸກ, ຈະຕ້ອງໃຊ້ເວລາດົນນານ.

ໂຊກດີທີ່ ການສ້າງຊີໂອນ—ໃນລັດມີເຊີຣີ ໃນປີ 1831 ຫລື ໃນໃຈ ແລະ ໃນຫວອດຂອງເຮົາໃນປະຈຸບັນ—ບໍ່ຮຽກຮ້ອງເຮົາໃຫ້ເປັນຄົນດີພ້ອມ. ກົງກັນຂ້າມ, “ເຈົ້າຖືກຮຽກຮ້ອງໃຫ້ອະໄພ,” ພຣະຜູ້ເປັນເຈົ້າໄດ້ກ່າວ (ຄຳສອນ ແລະ ພັນທະສັນຍາ 64:10). ພຣະອົງຮຽກຮ້ອງ “ຫົວໃຈ ແລະ ຈິດໃຈທີ່ເຕັມໃຈ” (ຂໍ້ທີ 34). ແລະ ພຣະອົງຮຽກຮ້ອງຄວາມອົດທົນ ແລະ ຄວາມພາກພຽນ, ເພາະຊີໂອນຖືກສ້າງຂຶ້ນດ້ວຍຮາກຖານຂອງ “ສິ່ງເລັກນ້ອຍ,” ສຳເລັດໂດຍຜູ້ທີ່ບໍ່ກາຍເປັນຄົນ “ເມື່ອຍລ້າໃນການເຮັດວຽກງານດີ” (ຂໍ້ທີ 33).

ເບິ່ງ Saints, 1:133–34, 136–37 ນຳອີກ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 64:1–11

ເຮົາຖືກຮຽກຮ້ອງໃຫ້ອະໄພແກ່ທຸກຄົນ.

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 64:1–11, ໃຫ້ຄິດກ່ຽວກັບຕອນທີ່ພຣະຜູ້ເປັນເຈົ້າໄດ້ໃຫ້ອະໄພແກ່ທ່ານ. ທ່ານອາດຄິດກ່ຽວກັບບາງຄົນທີ່ທ່ານຕ້ອງໃຫ້ອະໄພ. ຄວາມເຫັນອົກເຫັນໃຈຂອງພຣະຜູ້ຊ່ວຍໃຫ້ລອດມີຜົນກະທົບຕໍ່ຄວາມຮູ້ສຶກຂອງທ່ານເອງ ແລະ ກ່ຽວກັບຄົນອື່ນແນວໃດ? ທ່ານຄິດວ່າເປັນຫຍັງພຣະຜູ້ເປັນເຈົ້າຈຶ່ງບັນຊາເຮົາ “ໃຫ້ອະໄພແກ່ມະນຸດທຸກຄົນ”? (ຂໍ້ທີ 10). ຖ້າຫາກວ່າມັນຍາກສຳລັບທ່ານທີ່ຈະໃຫ້ອະໄພ, ໃຫ້ພິຈາລະນາສິ່ງທີ່ແຫລ່ງຊ່ວຍເຫລືອດັ່ງຕໍ່ໄປນີ້ ສິດສອນກ່ຽວກັບວິທີທີ່ພຣະຜູ້ຊ່ວຍໃຫ້ລອດສາມາດຊ່ວຍແນວໃດ: Jeffrey R. Holland, “The Ministry of Reconciliation,” Ensign ຫລື Liahona, Nov. 2018, 77–79; ຄູ່ມືພຣະຄຳພີ, “ໃຫ້ອະໄພ,” scriptures.ChurchofJesusChrist.org.

ຄຳສອນ ແລະ ພັນທະສັນຍາ 64:31–34

ພຣະເຈົ້າຮຽກຮ້ອງໃຫ້ເຮົາມີຫົວໃຈ ແລະ ຈິດໃຈທີ່ເຕັມໃຈ

ທ່ານເຄີຍຮູ້ສຶກ “ເມື່ອຍລ້າ” ກັບ “ວຽກງານດີ” ທັງໝົດທີ່ທ່ານພະຍາຍາມເຮັດໃຫ້ສຳເລັດບໍ? ໃຫ້ຊອກຫາຂ່າວສານຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 64:31–34. ການມອບ “ຫົວໃຈ ແລະ ຈິດໃຈທີ່ເຕັມໃຈ” ຂອງທ່ານໃຫ້ແກ່ພຣະເຈົ້າ ໝາຍຄວາມວ່າແນວໃດ? (ຂໍ້ທີ 34).

ຄຳສອນ ແລະ ພັນທະສັນຍາ 64:41–43

ຊີໂອນຈະເປັນ “ທຸງສັນຍານໃຫ້ແກ່ຜູ້ຄົນ.”

ທຸງສັນຍານຄື “ທຸງ ຫລື ສັນຍາລັກທີ່ຢູ່ອ້ອມຮອບ ໃນບ່ອນທີ່ຜູ້ຄົນເຕົ້າໂຮມກັນໃນຄວາມເປັນໜຶ່ງໃນຈຸດປະສົງ ຫລື ເອກະລັກ” (ຄູ່ມືພຣະຄຳພີ, “ທຸງສັນຍານ,” scriptures.ChurchofJesusChrist.org). ຊີໂອນ—ຫລື ສາດສະໜາຈັກຂອງພຣະຜູ້ເປັນເຈົ້າ—ໄດ້ເປັນຄືກັນກັບທຸງສັນຍານຕໍ່ທ່ານແນວໃດ? ໃຫ້ພິຈາລະນາຕົວຢ່າງອື່ນໆເຫລົ່ານີ້ ເຖິງສິ່ງທີ່ຖືກຍົກຂຶ້ນ ຄືກັນກັບທຸງສັນຍານ, ເພື່ອເປັນພອນໃຫ້ແກ່ຜູ້ຄົນ: ຈົດບັນຊີ 21:6–9; ມັດທາຍ 5:14–16; ແອວມາ 46:11–20. ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບວິທີທີ່ທ່ານສາມາດຊ່ວຍສາດສະໜາຈັກໃຫ້ເປັນທຸງສັນຍານ ໃນບ່ອນທີ່ທ່ານອາໄສຢູ່? ໃຫ້ຊອກຫາວິທີອື່ນທີ່ພຣະຜູ້ເປັນເຈົ້າບັນຍາຍກ່ຽວກັບຊີໂອນ ຢູ່ໃນ ຄຳສອນ ແລະ ພັນທະສັນຍາ 64:41–43.

*Captain Moroni Bearing the Title of Liberty [ນາຍທັບໂມໂຣໄນຖືປ້າຍແຫ່ງເສລີພາບ],* ໂດຍ ແກຣີ ອີ ສະມິດ

ຄຳສອນ ແລະ ພັນທະສັນຍາ 65

“ຈົ່ງຕຽມທາງຂອງພຣະຜູ້ເປັນເຈົ້າ.”

ມັດທາຍໄດ້ບັນຍາຍກ່ຽວກັບໂຢຮັນບັບຕິສະໂຕ ວ່າເປັນຜູ້ທີ່ຮ້ອງປ່າວວ່າ, “ຈົ່ງຕຽມທາງຂອງພຣະຜູ້ເປັນເຈົ້າ” (ມັດທາຍ 3:3; ເບິ່ງ ເອຊາຢາ 40:3 ນຳອີກ). ໃນ ຄຳສອນ ແລະ ພັນທະສັນຍາ 65, ພຣະຜູ້ເປັນເຈົ້າໃຊ້ພາສາທີ່ຄ້າຍຄືກັນນີ້ ເພື່ອບັນຍາຍກ່ຽວກັບວຽກງານໃນຍຸກສຸດທ້າຍຂອງພຣະອົງ. ທ່ານເຫັນສິ່ງໃດແດ່ທີ່ຄ້າຍຄືກັນລະຫວ່າງສິ່ງທີ່ໂຢຮັນບັບຕິສະໂຕໄດ້ເຮັດ (ເບິ່ງ ມັດທາຍ 3:1–12) ແລະ ສິ່ງທີ່ພຣະຜູ້ເປັນເຈົ້າປະສົງໃຫ້ເຮົາເຮັດ ໃນທຸກວັນນີ້? ທ່ານພົບເຫັນສິ່ງໃດແດ່ຢູ່ໃນການເປີດເຜີຍນີ້ ທີ່ດົນໃຈທ່ານໃຫ້ຊ່ວຍເຮັດໃຫ້ການທຳນາຍທີ່ບັນຈຸຢູ່ໃນນັ້ນເກີດເປັນຈິງ? ໃຫ້ໄຕ່ຕອງວິທີທີ່ທ່ານສາມາດ “ເຮັດໃຫ້ວຽກງານອັນໜ້າອັດສະຈັນໃຈ [ຂອງພຣະເຈົ້າ] ເປັນທີ່ຮູ້ຈັກໃນບັນດາຜູ້ຄົນ” (ຂໍ້ທີ 4).

ຄຳສອນ ແລະ ພັນທະສັນຍາ 66

ພຣະຜູ້ເປັນເຈົ້າຮູ້ຈັກຄວາມຄິດຂອງໃຈເຮົາ.

ບໍ່ດົນຫລັງຈາກທີ່ໄດ້ເຂົ້າຮ່ວມສາດສະໜາຈັກ, ວິວລຽມ ອີ ມິກລີລິນ ໄດ້ຂໍໃຫ້ໂຈເຊັບ ສະມິດ ເປີດເຜີຍພຣະປະສົງຂອງພຣະເຈົ້າສຳລັບລາວ. ໂຈເຊັບບໍ່ຮູ້ວ່າ ວິວລຽມມີຄຳຖາມສ່ວນຕົວຫ້າຂໍ້ທີ່ລາວຫວັງວ່າພຣະຜູ້ເປັນເຈົ້າຈະຕອບ ຜ່ານທາງສາດສະດາຂອງພຣະອົງ. ເຮົາບໍ່ຮູ້ວ່າ ຄຳຖາມຂອງວິວລຽມແມ່ນກ່ຽວກັບຫຍັງ, ແຕ່ເຮົາຮູ້ວ່າ ການເປີດເຜີຍແມ່ນກ່ຽວກັບລາວ, ບັດນີ້, ຄຳສອນ ແລະ ພັນທະສັນຍາ 66, ໄດ້ຕອບຄຳຖາມແຕ່ລະຂໍ້ຂອງວິວລຽມ “ຢ່າງສົມບູນ ແລະ ເພິ່ງພໍໃຈ” (“William McLellin’s Five Questions,” Revelations in Context, 138).

ຂະນະທີ່ທ່ານອ່ານ ພາກທີ 66, ໃຫ້ຄິດກ່ຽວກັບສິ່ງທີ່ພຣະຜູ້ເປັນເຈົ້າຮູ້ຈັກກ່ຽວກັບວິວລຽມ ມິກລີລິນ ແລະ ຄວາມຫ່ວງໃຍ ແລະ ຄວາມເຈດຕະນາໃນໃຈຂອງລາວ. ພຣະຜູ້ເປັນເຈົ້າໄດ້ເປີດເຜີຍໃນແບບໃດ ວ່າພຣະອົງຮູ້ຈັກທ່ານ? ຖ້າຫາກທ່ານມີໃບປິຕຸພອນ, ໃຫ້ຄິດທີ່ຈະສຶກສາມັນ. ເມື່ອທ່ານເຮັດສິ່ງນີ້, ພຣະວິນຍານບໍລິສຸດຈະຊ່ວຍທ່ານໃຫ້ເຂົ້າໃຈກ່ຽວກັບພຣະປະສົງຂອງພຣະເຈົ້າສຳລັບທ່ານແນວໃດ?

ເບິ່ງ Saints, 1:138–40; Gospel Topics, “Patriarchal Blessings,” topics.ChurchofJesusChrist.org ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 64:8–10.ຄວາມສຳພັນຂອງຄອບຄົວໃຫ້ໂອກາດຫລາຍຢ່າງທີ່ຈະຮຽນໃຫ້ອະໄພ. ບາງທີສະມາຊິກຂອງຄອບຄົວສາມາດເວົ້າລົມກັນກ່ຽວກັບວິທີທີ່ການໃຫ້ອະໄພຄົນອື່ນ ເປັນພອນໃຫ້ແກ່ຄອບຄົວຂອງທ່ານແນວໃດ. ພຣະຜູ້ຊ່ວຍໃຫ້ລອດໄດ້ຊ່ວຍເຮົາ ເພື່ອໃຫ້ອະໄພກັນແລະກັນແນວໃດ? ເຮົາ “ທຸກທໍລະມານ” ແນວໃດ (ຂໍ້ທີ 8) ເມື່ອເຮົາບໍ່ໃຫ້ອະໄພຄົນອື່ນ?

ຄຳສອນ ແລະ ພັນທະສັນຍາ 64:33.ພຣະບິດາເທິງສະຫວັນປະສົງໃຫ້ຄອບຄົວຂອງທ່ານເຮັດສິ່ງໃດ ເພື່ອເຮັດໃຫ້ “ວຽກງານອັນຍິ່ງໃຫຍ່” ຂອງພຣະອົງເກີດຂຶ້ນ? ບາງທີມັນເປັນການໄປພຣະວິຫານ, ການແບ່ງປັນພຣະກິດຕິຄຸນໃຫ້ກັບເພື່ອນບ້ານ, ຫລື ການເອົາຊະນະການຂັດແຍ້ງກັນ. ບາງທີສະມາຊິກໃນຄອບຄົວແຕ່ລະຄົນສາມາດຮວບຮວມສິ່ງຂອງທີ່ນ້ອຍໆ ເຊັ່ນກ້ອນຫີນ ຫລື ກະດຸມ, ຫລື ຕ່ອນເຈ້ຍປິດສະໜາທີ່ປະກອບເຂົ້າກັນເປັນຮູບ, ແລະ ໃຊ້ມັນເພື່ອເປັນຕົວແທນໃຫ້ແກ່ “ສິ່ງເລັກນ້ອຍ” ທີ່ເຮົາສາມາດໃຊ້ທຸກວັນ ເພື່ອ “[ວາງ] ຮາກຖານ” ສຳລັບວຽກງານອັນຍິ່ງໃຫຍ່ຂອງພຣະເຈົ້າ. ນຳກັນເປັນຄອບຄົວ, ໃຫ້ເລືອກເອົາສິ່ງນ້ອຍໆຢ່າງໜຶ່ງເຫລົ່ານີ້ ເພື່ອຮວບຮວມໃນອາທິດນີ້.

ຄຳສອນ ແລະ ພັນທະສັນຍາ 66:3.ທ່ານຈະສິດສອນເຖິງຄວາມສຳຄັນຂອງການກັບໃຈແນວໃດ? ທ່ານສາມາດຕັກອາຫານໃສ່ຈານທີ່ເຄິ່ງສະອາດເຄິ່ງເປື້ອນ ແລະ ອ່ານພຣະຄຳຂອງພຣະຜູ້ເປັນເຈົ້າຕໍ່ວິວລຽມ ມິກລີລິນ ທີ່ວ່າ: “ເຈົ້າສະອາດ, ແຕ່ບໍ່ແມ່ນທັງໝົດ.” ແລ້ວໃຫ້ທ່ານລ້າງຈານ ແລະ ຕັກອາຫານໃສ່ ແລະ ກິນອາຫານນັ້ນນຳກັນ ຂະນະທີ່ສົນທະນາກ່ຽວກັບວິທີທີ່ພຣະເຢຊູຄຣິດເຮັດໃຫ້ເປັນໄປໄດ້ສຳລັບເຮົາທີ່ຈະສະອາດທາງວິນຍານ.

ຄຳສອນ ແລະ ພັນທະສັນຍາ 66:10.ຄອບຄົວຂອງທ່ານຈະເຮັດຕາມຄຳແນະນຳຂອງພຣະຜູ້ເປັນເຈົ້າ ທີ່ວ່າ “ຢ່າສະແຫວງຫາທີ່ຈະເຮັດໃຫ້ຫຍຸ້ງຍາກເກີນຄວນ,” ຫລື ຫຍຸ້ງກັບຫລາຍສິ່ງຫລາຍຢ່າງທີ່ຈະເຮັດແນວໃດ? ພວກທ່ານສາມາດເວົ້າລົມກັນກ່ຽວກັບເລື່ອງນາງມາຣີ ແລະ ນາງມາທາ (ເບິ່ງ ລູກາ 10:38–42), ແລະ ສົນທະນາວິທີທີ່ຄອບຄົວຂອງທ່ານສາມາດຫລີກເວັ້ນຈາກຄວາມຫຍຸ້ງຍາກເກີນຄວນກັບສິ່ງທີ່ບໍ່ມີຄ່າທາງນິລັນດອນ.

ສຳລັບແນວຄິດອື່ນໆກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສິດສອນຂອງເຮົາ

ມີເວລາ ແລະ ສາມາດເຂົ້າຫາໄດ້. ບາງເທື່ອເວລາສິດສອນທີ່ດີທີ່ສຸດແມ່ນ ເລີ່ມຕົ້ນດ້ວຍຄຳຖາມ ຫລື ຄວາມເປັນຫ່ວງໃນໃຈຂອງສະມາຊິກໃນຄອບຄົວ. ໃຫ້ສະມາຊິກໃນຄອບຄົວຮູ້ຜ່ານທາງຄຳເວົ້າ ແລະ ການກະທຳຂອງທ່ານວ່າ ທ່ານພ້ອມທີ່ຈະຮັບຟັງເຂົາເຈົ້າ. (ເບິ່ງ Teaching in the Savior’s Way, 16.)