“ວັນທີ 21–27 ເດືອນມິຖຸນາ. ຄຳສອນ ແລະ ພັນທະສັນຍາ 67–70: ‘ມີຄ່າ … ເກີນກວ່າຄວາມຮັ່ງມີໃດໆຢູ່ໃນໂລກນີ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 21–27 ເດືອນມິຖຸນາ. ຄຳສອນ ແລະ ພັນທະສັນຍາ 67–70,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ວັນທີ 21–27 ເດືອນມິຖຸນາ

ຄຳສອນ ແລະ ພັນທະສັນຍາ 67–70

“ມີຄ່າ … ເກີນກວ່າຄວາມຮັ່ງມີໃດໆຢູ່ໃນໂລກນີ້”

ເຖິງແມ່ນວ່າການເປີດເຜີຍຫລາຍຢ່າງ ຢູ່ໃນຄຳສອນ ແລະ ພັນທະສັນຍາ ແມ່ນກ່າວຕໍ່ຜູ້ຄົນໃດໜຶ່ງໂດຍສະເພາະ ໃນສະຖານະການໃດໜຶ່ງໂດຍສະເພາະ, ແຕ່ການເປີດເຜີຍ “ເປັນປະໂຫຍດສຳລັບມະນຸດທັງປວງ” (“ປະຈັກພະຍານຂອງອັກຄະສາວົກສິບສອງ ເຖິງຄວາມຈິງຂອງພຣະຄຳພີຄຳສອນ ແລະ ພັນທະສັນຍາ,” ຄຳນຳຕໍ່ຄຳສອນ ແລະ ພັນທະສັນຍາ). ຂະນະທີ່ທ່ານສຶກສາ, ໃຫ້ຊອກຫາຄວາມຈິງ ແລະ ຫລັກທຳທີ່ເປັນປະໂຫຍດສຳລັບທ່ານ.

ບັນທຶກຄວາມປະທັບໃຈຂອງທ່ານ

ຈາກປີ 1828 ເຖິງ 1831, ສາດສະດາ ໂຈເຊັບ ສະມິດ ໄດ້ຮັບການເປີດເຜີຍຫລາຍຢ່າງຈາກພຣະຜູ້ເປັນເຈົ້າ, ລວມທັງຄຳແນະນຳຈາກສະຫວັນສຳລັບບຸກຄົນ, ຄຳແນະນຳເລື່ອງການປົກຄອງສາດສະໜາຈັກ, ແລະ ພາບນິມິດທີ່ດົນໃຈຂອງຍຸກສຸດທ້າຍ. ແຕ່ໄພ່ພົນຫລາຍຄົນຍັງບໍ່ໄດ້ອ່ານມັນເທື່ອ. ການເປີດເຜີຍຍັງບໍ່ໄດ້ຖືກຈັດພິມເທື່ອ, ແລະ ສຳເນົາຈຳນວນໜ້ອຍໜຶ່ງທີ່ມີໃຫ້ໃຊ້ ກໍຂຽນເອົາ ໄວ້ໃນເຈ້ຍເປັນແຜ່ນໆ ທີ່ສະມາຊິກສົ່ງຕໍ່ໃຫ້ກັນອ່ານ ແລະ ຜູ້ສອນສາດສະໜາໄດ້ເອົາໄປນຳ.

ແລ້ວ, ໃນເດືອນພະຈິກ ປີ 1831, ໂຈເຊັບໄດ້ເອີ້ນໃຫ້ມີການປະຊຸມສະພາຜູ້ນຳຂອງສາດສະໜາຈັກ ເພື່ອສົນທະນາເລື່ອງການຈັດພິມການເປີດເຜີຍ. ຫລັງຈາກຮູ້ເຖິງພຣະປະສົງຂອງພຣະຜູ້ເປັນເຈົ້າແລ້ວ, ຜູ້ນຳເຫລົ່ານີ້ຈຶ່ງໄດ້ວາງແຜນທີ່ຈະຈັດພິມປຶ້ມພຣະບັນຍັດ—ກ່ອນພຣະຄຳພີຄຳສອນ ແລະ ພັນທະສັນຍາ ໃນປະຈຸບັນນີ້. ບໍ່ດົນທຸກຄົນຈະສາມາດອ່ານພຣະຄຳຂອງພຣະເຈົ້າທີ່ໄດ້ເປີດເຜີຍຜ່ານທາງສາດສະດາທີ່ມີຊີວິດຢູ່ດ້ວຍຕົວເອງ, ຊຶ່ງເປັນຫລັກຖານທີ່ແຈ້ງຊັດວ່າ “ຂໍກະແຈແຫ່ງຄວາມລຶກລັບຂອງອານາຈັກຂອງພຣະຜູ້ຊ່ວຍໃຫ້ລອດຂອງເຮົາໄດ້ຖືກຝາກຝັງໄວ້ກັບມະນຸດອີກເທື່ອໜຶ່ງ.” ເພາະດ້ວຍເຫດຜົນເຫລົ່ານີ້ ແລະ ຫລາຍໆເຫດຜົນອື່ນອີກ, ໄພ່ພົນໃນເວລານັ້ນ ແລະ ໃນເວລານີ້ ຈຶ່ງຄິດວ່າ ການເປີດເຜີຍເຫລົ່ານີ້ “ມີຄ່າ … ເກີນກວ່າຄວາມຮັ່ງມີໃດໆຢູ່ໃນໂລກນີ້” (ຄຳສອນ ແລະ ພັນທະສັນຍາ 70, ຫົວຂໍ້ພາກ).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 67:1–9; 68:3–6

ພຣະເຈົ້າຈະຢູ່ຄຽງຂ້າງຜູ້ຮັບໃຊ້ຂອງພຣະອົງ ແລະ ຍຶດໝັ້ນກັບຖ້ອຍຄຳທີ່ພວກເພິ່ນກ່າວໃນພຣະນາມຂອງພຣະອົງ.

ການຕັດສິນໃຈທີ່ຈະພິມການເປີດເຜີຍ ໄດ້ຮັບໂດຍໂຈເຊັບ ສະມິດ ເບິ່ງຄືວ່າເປັນເລື່ອງງ່າຍ, ແຕ່ຜູ້ນຳຂອງສາດສະໜາຈັກລຸ້ນທຳອິດ ບໍ່ແນ່ໃຈວ່າມັນເປັນແນວຄິດທີ່ດີ. ຄວາມເປັນຫ່ວງຢ່າງໜຶ່ງແມ່ນກ່ຽວກັບຄວາມບົກຜ່ອງໃນພາສາທີ່ໂຈເຊັບ ສະມິດ ໄດ້ໃຊ້ເພື່ອຂຽນການເປີດເຜີຍ. ການເປີດເຜີຍທີ່ໄດ້ຮັບຢູ່ໃນ ພາກທີ 67 ເປັນຄຳຕອບຕໍ່ຄວາມເປັນຫ່ວງນັ້ນ. ທ່ານຮຽນຮູ້ຫຍັງແດ່ກ່ຽວກັບສາດສະດາ ແລະ ການເປີດເຜີຍຈາກ ຂໍ້ທີ 1–9? ຄວາມຮູ້ເພີ່ມເຕີມໃດແດ່ທີ່ທ່ານໄດ້ຮັບຈາກ 68:3–6?

ກ່ອນປຶ້ມພຣະບັນຍັດໄດ້ຖືກຈັດພິມ, ຜູ້ນຳຂອງສາດສະໜາຈັກຫລາຍຄົນໄດ້ເຊັນປະຈັກພະຍານທີ່ເປັນລາຍລັກອັກສອນ ວ່າການເປີດເຜີຍຢູ່ໃນປຶ້ມນັ້ນເປັນຄວາມຈິງ.

ຄຳສອນ ແລະ ພັນທະສັນຍາ 68:1–8

ການດົນໃຈຈາກພຣະວິນຍານບໍລິສຸດສະທ້ອນໃຫ້ເຫັນເຖິງພຣະປະສົງຂອງພຣະຜູ້ເປັນເຈົ້າ.

ຖ້ອຍຄຳຢູ່ໃນຂໍ້ເຫລົ່ານີ້ ໄດ້ຖືກກ່າວ ຕອນທີ່ອໍສັນ ຮາຍດ໌ ແລະ ຄົນອື່ນໆຖືກເອີ້ນ “ໃຫ້ປະກາດພຣະກິດຕິຄຸນອັນເປັນນິດ, ໂດຍພຣະວິນຍານຂອງພຣະເຈົ້າທີ່ຊົງພຣະຊົນຢູ່, ຈາກຜູ້ຄົນກຸ່ມໜຶ່ງຫາຜູ້ຄົນອີກກຸ່ມໜຶ່ງ, ແລະ ຈາກແຜ່ນດິນໜຶ່ງຫາອີກແຜ່ນດິນໜຶ່ງ” (ຂໍ້ທີ 1). ການປະກາດຢູ່ໃນ ຂໍ້ທີ 4 ຊ່ວຍບາງຄົນທີ່ກຳລັງຖືກສົ່ງໄປສັ່ງສອນພຣະກິດຕິຄຸນແນວໃດ? ຖ້ອຍຄຳເຫລົ່ານີ້ກ່ຽວຂ້ອງກັບທ່ານແນວໃດ? ໃຫ້ຄິດເຖິງຕອນທີ່ທ່ານໄດ້ຮັບ “ການດົນໃຈໂດຍພຣະວິນຍານບໍລິສຸດ” (ຂໍ້ທີ 3) ເພື່ອໃຫ້ເວົ້າ ຫລື ເຮັດບາງສິ່ງ. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ສາມາດໃຫ້ຄວາມໝັ້ນໃຈແກ່ທ່ານ ທີ່ຈະເຮັດຕາມການກະຕຸ້ນທາງວິນຍານ?

ຄຳສອນ ແລະ ພັນທະສັນຍາ 68:25–28

ພໍ່ແມ່ມີໜ້າທີ່ຮັບຜິດຊອບທີ່ຈະສິດສອນລູກໆຂອງຕົນ.

ຊິດສະເຕີ ໂຈຍ ດີ ໂຈນສ໌, ປະທານອົງການປະຖົມໄວສາມັນ, ໄດ້ສິດສອນວ່າ, “ຈຸດສຳຄັນທີ່ຈະຊ່ວຍລູກໆໃຫ້ກາຍເປັນຄົນທີ່ຕ້ານທານກັບຄວາມບາບໄດ້ ແມ່ນທີ່ຈະເລີ່ມຕົ້ນຕັ້ງແຕ່ໄວອ່ອນໆ ເພື່ອສິດສອນຄຳສອນ ແລະ ຫລັກທຳພຣະກິດຕິຄຸນຂັ້ນເລີ່ມຕົ້ນ—ຈາກພຣະຄຳພີ, ຫລັກແຫ່ງຄວາມເຊື່ອ, ປຶ້ມ ສຳລັບຄວາມເຂັ້ມແຂງຂອງຊາວໜຸ່ມ ເພງປະຖົມໄວ, ເພງສວດ, ແລະ ປະຈັກພະຍານສ່ວນຕົວຂອງເຮົາເອງ—ທີ່ຈະນຳພາເດັກນ້ອຍໄປຫາພຣະຜູ້ຊ່ວຍໃຫ້ລອດ” (“A Sin-Resistant Generation,” Ensign ຫລື Liahona, May 2017, 88).

ອີງຕາມ ຄຳສອນ ແລະ ພັນທະສັນຍາ 68:25–28, ມີ “ຄຳສອນພຣະກິດຕິຄຸນຂັ້ນເລີ່ມຕົ້ນ” ຢ່າງໃດແດ່ທີ່ຊິດສະເຕີ ໂຈນສ໌ ໄດ້ກ່າວເຖິງ ທີ່ພໍ່ແມ່ຄວນສິດສອນລູກໆຂອງຕົນ? ເປັນຫຍັງໜ້າທີ່ຮັບຜິດຊອບທີ່ສຳຄັນນີ້ ຈຶ່ງຖືກມອບໃຫ້ພໍ່ແມ່? ທ່ານຈະເວົ້າຈັ່ງໃດກັບພໍ່ແມ່ຜູ້ທີ່ຮູ້ສຶກວ່າຕົວເອງບໍ່ດີພໍ ທີ່ຈະສິດສອນສິ່ງເຫລົ່ານີ້ໃຫ້ກັບລູກໆຂອງຕົນ?

ຄອບຄົວກຳລັງສຶກສາ — ບ້ານເຮືອນເປັນສະຖານທີ່ໃນອຸດົມຄະຕິສຳລັບລູກໆທີ່ຈະຮຽນຮູ້ພຣະກິດຕິຄຸນ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 67:10–14.ຄວາມອິດສາບັງບຽດ, ຄວາມຢ້ານກົວ, ແລະ ຄວາມທະນົງຕົວ ກີດກັນເຮົາຈາກການເຂົ້າໃກ້ຊິດພຣະຜູ້ເປັນເຈົ້າໃຫ້ຫລາຍກວ່າເກົ່າແນວໃດ? ເປັນຫຍັງ “ມະນຸດທີ່ມີຈິດໃຈທຳມະດາ” ຈຶ່ງບໍ່ສາມາດຢູ່ໃນທີ່ປະທັບຂອງພຣະຜູ້ເປັນເຈົ້າໄດ້? (ຂໍ້ທີ 12; ເບິ່ງ ໂມໄຊຢາ 3:19) ນຳອີກ. ເຮົາພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ດົນໃຈເຮົາໃຫ້ “ອົດທົນຈົນກວ່າ [ເຮົາ] ຈະຖືກເຮັດໃຫ້ດີພ້ອມ”? (ຂໍ້ທີ 13).

ຄຳສອນ ແລະ ພັນທະສັນຍາ 68:3–4.ສະມາຊິກໃນຄອບຄົວສາມາດແບ່ງປັນປະສົບການທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າ ວ່າຖ້ອຍຄຳຂອງຜູ້ຮັບໃຊ້ຂອງພຣະຜູ້ເປັນເຈົ້າ ຄື “ພຣະປະສົງຂອງພຣະຜູ້ເປັນເຈົ້າ,” “ພຣະດຳລັດຂອງພຣະຜູ້ເປັນເຈົ້າ,” ແລະ “ອຳນາດຂອງພຣະເຈົ້າໄປສູ່ຄວາມລອດ” (ຂໍ້ທີ 4). ຫລື ເຂົາເຈົ້າສາມາດຊອກຫາຂ່າວສານຂອງກອງປະຊຸມໃຫຍ່ສາມັນເມື່ອບໍ່ດົນມານີ້ ທີ່ກ່ຽວຂ້ອງກັບການທ້າທາຍທີ່ຄອບຄົວຂອງທ່ານອາດກຳລັງປະເຊີນຢູ່.

ຄຳສອນ ແລະ ພັນທະສັນຍາ 68:25–35.ຂໍ້ເຫລົ່ານີ້ບັນຈຸຄຳແນະນຳທີ່ສຳຄັນຕໍ່ “ຜູ້ອາໄສຂອງຊີໂອນ” (ຂໍ້ທີ 26). ເຮົາໄດ້ຮັບການດົນໃຈໃຫ້ປັບປຸງສິ່ງໃດແດ່ ຫລັງຈາກໄດ້ອ່ານຂໍ້ເຫລົ່ານີ້ແລ້ວ? ມັນອາດເປັນເລື່ອງມ່ວນຊື່ນ ທີ່ຈະສ້າງຮູບພາບທີ່ສະແດງຫລັກທຳບາງຢ່າງ ຢູ່ໃນຂໍ້ເຫລົ່ານີ້ ແລະ ເຊື່ອງມັນໄວ້ຫລາຍບ່ອນຢູ່ໃນເຮືອນຂອງທ່ານ. ແລ້ວ, ໃນສອງສາມມື້ຈາກນັ້ນ ເມື່ອມີຄົນຊອກເຫັນຮູບ, ທ່ານສາມາດສວຍໂອກາດໃຊ້ມັນ ເພື່ອສິດສອນກ່ຽວກັບຫລັກທຳນັ້ນ. ເປັນຫຍັງບ້ານເຮືອນຈຶ່ງເປັນສະຖານທີ່ ທີ່ດີທີ່ສຸດສຳລັບເດັກນ້ອຍທີ່ຈະຮຽນຮູ້ສິ່ງເຫລົ່ານີ້?

ຄຳສອນ ແລະ ພັນທະສັນຍາ 69:1–2.ອໍລີເວີ ຄາວເດີຣີ ໄດ້ຖືກສົ່ງໄປລັດມີເຊີຣີ ກັບສຳເນົາການເປີດເຜີຍຂອງສາດສະດາ ເພື່ອເອົາໄປພິມ, ພ້ອມດ້ວຍເງິນທີ່ຈະຊ່ວຍສ້າງສາດສະໜາຈັກຢູ່ທີ່ນັ້ນ. ຄຳແນະນຳໃດທີ່ພຣະຜູ້ເປັນເຈົ້າໄດ້ມອບໃຫ້ ຢູ່ໃນ ຂໍ້ທີ 1 ກ່ຽວກັບການເດີນທາງຂອງອໍລີເວີ? ເປັນຫຍັງມັນຈຶ່ງສຳຄັນທີ່ຈະຢູ່ກັບ “ຄົນທີ່ຈິງໃຈ ແລະ ຊື່ສັດ”? (ຂໍ້ທີ 1). ຕອນໃດທີ່ໝູ່ເພື່ອນມີອິດທິພົນຕໍ່ເຮົາ ໃນການຕັດສິນໃຈເຮັດສິ່ງທີ່ດີ ຫລື ບໍ່ດີ? ເຮົາຈະມີອິດທິພົນໃນທາງດີຕໍ່ຄົນອື່ນໄດ້ແນວໃດ?

ຄຳສອນ ແລະ ພັນທະສັນຍາ 70:1–4.ພຣະຜູ້ເປັນເຈົ້າໄດ້ມອບໜ້າທີ່ຮັບຜິດຊອບໃຫ້ພວກແອວເດີບາງຄົນ ເພື່ອດູແລການຈັດພິມການເປີດເຜີຍ. ເຖິງແມ່ນວ່າເຮົາບໍ່ໄດ້ຮັບໜ້າທີ່ຮັບຜິດຊອບນັ້ນໂດຍສະເພາະ, ແຕ່ໃນທາງໃດທີ່ເຮົາຖືກນັບວ່າເປັນ “ຜູ້ພິທັກຮັກສາການເປີດເຜີຍ ແລະ ບັນຍັດທັງຫລາຍ”? (ຂໍ້ທີ 3).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຮັກທີ່ບ້ານ,” ເພງສວດ ແລະ ເພງຂອງເດັກນ້ອຍ, 48.

ການປັບປຸງການສິດສອນຂອງເຮົາ

ນຳໃຊ້ພຣະຄຳພີໃນຊີວິດຂອງເຮົາ. ຫລັງຈາກໄດ້ອ່ານຂໍ້ພຣະຄຳພີແລ້ວ, ໃຫ້ເຊື້ອເຊີນສະມາຊິກໃນຄອບຄົວໃຫ້ນຳໃຊ້ມັນໃນຊີວິດຂອງເຂົາເຈົ້າ. ຍົກຕົວຢ່າງ, ທ່ານສາມາດເຊື້ອເຊີນເຂົາເຈົ້າໃຫ້ຄິດເຖິງສະຖານະການທີ່ຄ້າຍຄືກັນນັ້ນ ທີ່ເຂົາເຈົ້າອາດປະເຊີນ ຊຶ່ງມີພາກສ່ວນໃນຫລັກທຳພຣະກິດຕິຄຸນຢ່າງດຽວກັນ.

ໂຮງພິມກະແຣນດິນ — ປຶ້ມພຣະບັນຍັດ, ກ່ອນພຣະຄຳພີຄຳສອນ ແລະ ພັນທະສັນຍາ, ໄດ້ຖືກພິມດ້ວຍເຄື່ອງຈັກທີ່ຄືກັນນີ້.