“ວັນທີ 28 ເດືອນມິຖຸນາ–ວັນທີ 4 ເດືອນກໍລະກົດ. ຄຳສອນ ແລະ ພັນທະສັນຍາ 71–75: ‘ບໍ່ມີອາວຸດໃດທີ່ຖືກປະກອບຂຶ້ນເພື່ອຕໍ່ຕ້ານພວກເຈົ້າຈະ ຈະເລີນໄດ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 28 ເດືອນມິຖຸນາ–ວັນທີ 4 ເດືອນກໍລະກົດ. ຄຳສອນ ແລະ ພັນທະສັນຍາ 71–75,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

Dear to the Heart of the Shepherd [ເປັນທີ່ຮັກຂອງພຣະຜູ້ລ້ຽງ], ໂດຍ ຊາຍມັນ ດູວີ

ວັນທີ 28 ເດືອນມິຖຸນາ–ວັນທີ 4 ເດືອນກໍລະກົດ

ຄຳສອນ ແລະ ພັນທະສັນຍາ 71–75

“ບໍ່ມີອາວຸດໃດທີ່ຖືກປະກອບຂຶ້ນເພື່ອຕໍ່ຕ້ານພວກເຈົ້າຈະ ຈະເລີນໄດ້”

ແອວເດີ ຄວິນຕິນ ແອວ ຄຸກ ໄດ້ສິດສອນວ່າ, “ພຣະວິນຍານບໍລິສຸດຈະມີອິດທິພົນຫລາຍທີ່ສຸດ ຕອນທີ່ເຂົາເຈົ້າສຶກສາພຣະຄຳພີ ແລະ ອະທິຖານເປັນສ່ວນຕົວຢູ່ທີ່ບ້ານ” (“Deep and Lasting Conversion to Heavenly Father and the Lord Jesus Christ,” Ensign ຫລື Liahona, Nov. 2018, 10).

ບັນທຶກຄວາມປະທັບໃຈຂອງທ່ານ

ນັບຕັ້ງແຕ່ຕອນເພິ່ນຍັງນ້ອຍ, ໂຈເຊັບ ສະມິດ ໄດ້ປະເຊີນກັບການວິຈານ—ແມ່ນແຕ່ປະເຊີນກັບສັດຕູ—ຂະນະທີ່ເພິ່ນພະຍາຍາມເຮັດວຽກງານຂອງພຣະເຈົ້າ. ແຕ່ມັນຄົງເປັນສິ່ງຊ້ຳໃຈທີ່ສຸດໂດຍສະເພາະ ໃນທ້າຍປີ 1831 ເມື່ອເອຊະຣາ ບູທ໌ ໄດ້ເລີ່ມຕົ້ນຕຳໜິສາດສະໜາຈັກໃນສາທາລະນະ, ເພາະໃນກໍລະນີນີ້ ຜູ້ວິຈານແມ່ນອະດີດຜູ້ທີ່ເຊື່ອ. ເອຊະຣາໄດ້ເຫັນໂຈເຊັບໃຊ້ອຳນາດຂອງພຣະເຈົ້າ ເພື່ອປິ່ນປົວຜູ້ຍິງຄົນໜຶ່ງ. ລາວໄດ້ຖືກເຊື້ອເຊີນໃຫ້ໄປກັບໂຈເຊັບ ຕອນໄປສຳຫລວດເບິ່ງແຜ່ນດິນຊີໂອນເປັນເທື່ອທຳອິດ ຢູ່ໃນລັດມີເຊີຣີ. ແຕ່ລາວໄດ້ເສຍສັດທານັບແຕ່ນັ້ນມາ ແລະ, ໃນຄວາມພະຍາຍາມທີ່ຈະເຮັດໃຫ້ສາດສະດາເສຍຫາຍ, ລາວໄດ້ຈັດພິມຈົດໝາຍຫລາຍສະບັບຕິດຕໍ່ກັນ ຢູ່ໃນໜັງສືພິມ ຢູ່ລັດໂອໄຮໂອ. ແລະ ຄວາມພະຍາຍາມຂອງລາວ ເບິ່ງຄືວ່າໄດ້ຜົນ ເພາະ: “ຄວາມຮູ້ສຶກບໍ່ດີທີ່ເກີດຂຶ້ນກັບສາດສະໜາຈັກ” ຢູ່ໃນເຂດນັ້ນ (ຄຳສອນ ແລະ ພັນທະສັນຍາ 71, ຫົວຂໍ້ພາກ). ຜູ້ທີ່ເຊື່ອຄວນເຮັດສິ່ງໃດ ໃນກໍລະນີເຊັ່ນນັ້ນ? ເຖິງແມ່ນບໍ່ມີຄຳຕອບດຽວສຳລັບທຸກສະຖານະການ, ແຕ່ເບິ່ງຄືວ່າ ສ່ວນຫລາຍ—ລວມທັງໃນກໍລະນີນີ້ ໃນປີ 1831—ຄຳຕອບຂອງພຣະຜູ້ເປັນເຈົ້າ ຄືທີ່ຈະປົກປ້ອງຄວາມຈິງ ແລະ ດັດແປງຄຳຕົວະ ໂດຍ “ການປະກາດພຣະກິດຕິຄຸນ” (ຂໍ້ທີ 1). ແມ່ນແລ້ວ, ວຽກງານຂອງພຣະຜູ້ເປັນເຈົ້າ ຈະມີຜູ້ຄົນວິຈານສະເໝີ, ແຕ່ໃນທີ່ສຸດ, “ບໍ່ມີອາວຸດໃດທີ່ຖືກປະກອບຂຶ້ນເພື່ອຕໍ່ຕ້ານ [ມັນ] ຈະ ຈະເລີນໄດ້” (ຂໍ້ທີ 9).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 71

ພຣະຜູ້ເປັນເຈົ້າຈະເຮັດໃຫ້ຜູ້ວິຈານສັບສົນກ່ຽວກັບວຽກງານຂອງພຣະອົງ ໃນເວລາຂອງພຣະອົງເອງ.

ເຮົາອາດເປັນຫ່ວງເມື່ອເຮົາໄດ້ຍິນຜູ້ຄົນວິຈານ ຫລື ເວົ້າເຍາະເຍີ້ຍສາດສະໜາຈັກ ຫລື ຜູ້ນຳຂອງສາດສະໜາຈັກ, ໂດຍສະເພາະເມື່ອເຮົາຢ້ານວ່າຜູ້ຄົນທີ່ເຮົາຮູ້ຈັກ ແລະ ຮັກ ຈະເຊື່ອຄຳວິຈານນັ້ນ. ເມື່ອບາງສິ່ງທີ່ຄ້າຍຄືກັນນີ້ໄດ້ເກີດຂຶ້ນຢູ່ໃນລັດໂອໄຮໂອ ໃນປີ 1831 (ເບິ່ງ ຫົວຂໍ້ພາກຂອງຄຳສອນ ແລະ ພັນທະສັນຍາ 71), ຂ່າວສານຂອງພຣະຜູ້ເປັນເຈົ້າຕໍ່ໂຈເຊັບ ສະມິດ ແລະ ຊິດນີ ຣິກດອນ ແມ່ນກ່ຽວກັບສັດທາ, ບໍ່ແມ່ນກ່ຽວກັບຄວາມຢ້ານກົວ. ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 71, ທ່ານພົບເຫັນສິ່ງໃດທີ່ສ້າງສັດທາຂອງທ່ານໃນພຣະຜູ້ເປັນເຈົ້າ ແລະ ວຽກງານຂອງພຣະອົງ? ແມ່ນຫຍັງທີ່ປະທັບໃຈທ່ານຫລາຍກ່ຽວກັບຄຳແນະນຳທີ່ພຣະຜູ້ເປັນເຈົ້າໄດ້ມອບໃຫ້ຜູ້ຮັບໃຊ້ຂອງພຣະອົງ ໃນສະຖານະການນີ້?

ຄຳສອນ ແລະ ພັນທະສັນຍາ 72

ອະທິການຄື ຜູ້ພິທັກຮັກສາ ການງານທາງຝ່າຍໂລກ ແລະ ທາງຝ່າຍວິນຍານຂອງອານາຈັກຂອງພຣະຜູ້ເປັນເຈົ້າ.

ເມື່ອນິວເອັນ ເຄ ວິດນີ ໄດ້ຖືກເອີ້ນໃຫ້ຮັບໃຊ້ເປັນອະທິການຄົນທີສອງຂອງສາດສະໜາຈັກ, ໜ້າທີ່ຂອງເພິ່ນແມ່ນແຕກຕ່າງໜ້ອຍໜຶ່ງຈາກອະທິການເຫລົ່ານັ້ນ ໃນປະຈຸບັນ. ຍົກຕົວຢ່າງ, ອະທິການ ວິດນີ ໄດ້ດູແລຝ່າຍທີ່ດິນທີ່ຖືກອຸທິດຖວາຍ ແລະ ການອະນຸຍາດໃຫ້ຍ້າຍໄປຕັ້ງຖິ່ນຖານຢູ່ລັດມີເຊີຣີ, ຢູ່ໃນແຜ່ນດິນຊີໂອນ. ແຕ່ຂະນະທີ່ທ່ານອ່ານກ່ຽວກັບການເອີ້ນ ແລະ ໜ້າທີ່ຂອງເພິ່ນ ຢູ່ໃນ ຄຳສອນ ແລະ ພັນທະສັນຍາ 72, ທ່ານອາດສັງເກດເຫັນການກ່ຽວຂ້ອງບາງຢ່າງກັບສິ່ງທີ່ອະທິການເຮັດໃນທຸກວັນນີ້—ຢ່າງໜ້ອຍໃນຄວາມຕັ້ງໃຈ, ຖ້າບໍ່ແມ່ນຢ່າງໃດຢ່າງໜຶ່ງໂດຍສະເພາະ, ຂອງໜ້າທີ່ຂອງພວກເພິ່ນ. ຍົກຕົວຢ່າງ, ໃນທາງໃດແດ່ທີ່ທ່ານ “ລາຍງານເລື່ອງລາວ” ຕໍ່ອະທິການຂອງທ່ານ? (ຂໍ້ທີ 5). ໃນທາງໃດແດ່ທີ່ອະທິການ “ຮັກສາຄັງຂອງພຣະຜູ້ເປັນເຈົ້າ” ແລະ ຄວບຄຸມສິ່ງທີ່ອຸທິດຖວາຍຂອງສະມາຊິກໃນຫວອດ? (ເບິ່ງ ຂໍ້ທີ 10, 12). ອະທິການໄດ້ຊ່ວຍທ່ານແນວໃດ?

ຖັງ ແລະ ຖົງອາຫານ — ນິວເອັນ ເຄ ວິດນີ ໄດ້ຄວບຄຸມສາງຂອງອະທິການ.

ຄຳສອນ ແລະ ພັນທະສັນຍາ 73

ເຮົາສາມາດສະແຫວງຫາໂອກາດທີ່ຈະແບ່ງປັນພຣະກິດຕິຄຸນ.

ຫລັງຈາກທີ່ໂຈເຊັບ ສະມິດ ແລະ ຊິດນີ ຣິກດອນ ໄດ້ກັບຄືນຈາກພາລະກິດການສັ່ງສອນ ເພື່ອແກ້ໄຂຄວາມເສຍຫາຍບາງຢ່າງທີ່ເອຊະຣາ ບູທ໌ ໄດ້ເຮັດ (ເບິ່ງ ຄຳສອນ ແລະ ພັນທະສັນຍາ 71), ພຣະຜູ້ເປັນເຈົ້າໄດ້ບອກພວກເພິ່ນໃຫ້ກັບໄປເຮັດວຽກງານການແປພຣະຄຣິສຕະທຳຄຳພີ (ເບິ່ງ Bible Dictionary, “ການແປຂອງໂຈເຊັບ ສະມິດ”). ແຕ່ພຣະອົງຍັງປະສົງໃຫ້ພວກເພິ່ນສືບຕໍ່ສັ່ງສອນພຣະກິດຕິຄຸນ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 73, ໃຫ້ພິຈາລະນາວິທີທີ່ທ່ານສາມາດເຮັດໃຫ້ການສັ່ງສອນພຣະກິດຕິຄຸນ ເປັນວຽກງານທີ່, “ເຮັດໄດ້” ຕໍ່ໄປ (ຂໍ້ທີ 4)—ຫລື ເປັນເລື່ອງຈິງ—ເປັນພາກສ່ວນໃນຊີວິດຂອງທ່ານ ໃນບັນດາໜ້າທີ່ຮັບຜິດຊອບຢ່າງອື່ນໆຂອງທ່ານແນວໃດ.

ຄຳສອນ ແລະ ພັນທະສັນຍາ 75:1–12

ພຣະຜູ້ເປັນເຈົ້າອວຍພອນຜູ້ທີ່ປະກາດພຣະກິດຕິຄຸນຂອງພຣະອົງຢ່າງຊື່ສັດ.

ໃນການຕອບຮັບຕໍ່ພຣະບັນຊາ ທີ່ໃຫ້ “ອອກໄປທົ່ວໂລກ” ເພື່ອສັ່ງສອນພຣະກິດຕິຄຸນ (ຄຳສອນ ແລະ ພັນທະສັນຍາ 68:8), ພວກແອວເດີທີ່ຊື່ສັດຫລາຍຄົນ ໄດ້ສະແຫວງຫາຂໍ້ມູນເພີ່ມເຕີມກ່ຽວກັບວິທີທີ່ພຣະຜູ້ເປັນເຈົ້າປະສົງທີ່ຈະບັນລຸພຣະບັນຊານີ້. ທ່ານພົບເຫັນຂໍ້ຄວາມ ຫລື ສຳນວນໃດ ຢູ່ໃນ ຄຳສອນ ແລະ ພັນທະສັນຍາ 75:1–12 ທີ່ຊ່ວຍທ່ານໃຫ້ເຂົ້າໃຈເຖິງວິທີສັ່ງສອນພຣະກິດຕິຄຸນຢ່າງມີປະສິດທິພາບ? ພອນຢ່າງໃດແດ່ທີ່ພຣະຜູ້ເປັນເຈົ້າສັນຍາຕໍ່ຜູ້ສອນສາດສະໜາທີ່ຊື່ສັດ? ໃຫ້ພິຈາລະນາຄຳແນະນຳ ແລະ ພອນເຫລົ່ານີ້ ວ່າກ່ຽວຂ້ອງກັບທ່ານແນວໃດ ຂະນະທີ່ທ່ານແບ່ງປັນພຣະກິດຕິຄຸນ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 71.ໂຈເຊັບ ສະມິດ ແລະ ຊິດນີ ຣິກດອນ ໄດ້ຖືກຂໍໃຫ້ເຮັດຫຍັງ ຂະນະທີ່ຄົນອື່ນກ່າວວິຈານສາດສະໜາຈັກ ແລະ ຜູ້ນຳຂອງສາດສະໜາຈັກ? ເຮົາ “ຕຽມວິທີທາງ” ສຳລັບຜູ້ຄົນ ທີ່ຈະຮັບເອົາການເປີດເຜີຍຂອງພຣະເຈົ້າໃນທາງໃດ? (ຄຳສອນ ແລະ ພັນທະສັນຍາ 71:4).

ຄຳສອນ ແລະ ພັນທະສັນຍາ 72:2.ອະທິການໄດ້ເປັນພອນໃຫ້ແກ່ຄອບຄົວຂອງເຮົາແນວໃດ? ອະທິການຂອງເຮົາໄດ້ຂໍໃຫ້ເຮົາເຮັດຫຍັງ, ແລະ ເຮົາຈະສະໜັບສະໜູນເພິ່ນແນວໃດ? ບາງທີຄອບຄົວຂອງທ່ານສາມາດເຮັດບັດຂອບໃຈອະທິການຂອງພວກທ່ານ ສຳລັບການຮັບໃຊ້ຂອງເພິ່ນ.

ຄຳສອນ ແລະ ພັນທະສັນຍາ 73:3–4.ຄອບຄົວຂອງທ່ານຈະໄດ້ຮັບຜົນປະໂຫຍດບໍຈາກການຮຽນຮູ້ກ່ຽວກັບການແປພຣະຄຣິສຕະທຳຄຳພີຂອງໂຈເຊັບ ສະມິດ? (ເບິ່ງ Bible Dictionary, “ການແປຂອງໂຈເຊັບ ສະມິດ”). ທ່ານສາມາດຄົ້ນຄວ້າສອງສາມຂໍ້ທີ່ຖືກດັດແປງໃໝ່ ຢູ່ໃນການແປຂອງໂຈເຊັບ ສະມິດ ແລະ ສົນທະນາກ່ຽວກັບຄວາມຈິງອັນລ້ຳຄ່າ ທີ່ພຣະຜູ້ເປັນເຈົ້າໄດ້ເປີດເຜີຍຜ່ານທາງສາດສະດາ. ສຳລັບບາງຕົວຢ່າງ, ໃຫ້ເບິ່ງການແປ ປະຖົມມະການ 14:25–40 ແລະ ປະຖົມມະການ 50:24–38 ຂອງໂຈເຊັບ ສະມິດ ໃນ Bible appendix; various footnotes ໃນ ມັດທາຍ 4:1–11; ແລະ ລູກາ 2:46, footnote c.

ຄຳສອນ ແລະ ພັນທະສັນຍາ 74:7.ຂໍ້ນີ້ສິດສອນເຮົາຫຍັງແດ່ກ່ຽວກັບພຣະເຢຊູຄຣິດ ແລະ ເດັກນ້ອຍ?

ຄຳສອນ ແລະ ພັນທະສັນຍາ 75:3–5, 13, 16.ທ່ານສາມາດຊ່ວຍເຫລືອຄອບຄົວຂອງທ່ານໃຫ້ເຂົ້າໃຈວິທີທີ່ພຣະຜູ້ເປັນເຈົ້າປະສົງໃຫ້ເຮົາຮັບໃຊ້ພຣະອົງ ໂດຍການເວົ້າລົມກັນກ່ຽວກັບຄວາມແຕກຕ່າງລະຫວ່າງການເປັນຄົນ “ກຽດຄ້ານ” ແລະ “[ການ] ທຳງານດ້ວຍກຳລັງ [ຂອງເຮົາ].” ບາງທີທ່ານສາມາດເລືອກວຽກບ້ານບາງຢ່າງ ແລະ ເຊື້ອເຊີນສະມາຊິກໃນຄອບຄົວໃຫ້ສາທິດວິທີເຮັດວຽກບ້ານເຫລົ່ານັ້ນ ແບບກຽດຄ້ານ ແລ້ວເຮັດດ້ວຍກຳລັງຂອງເຂົາເຈົ້າ. ເຮົາຈະຮັບໃຊ້ພຣະຜູ້ເປັນເຈົ້າດ້ວຍສຸດກຳລັງຂອງເຮົາແນວໃດ? ອີງຕາມ ຄຳສອນ ແລະ ພັນທະສັນຍາ 75:3–5, 13, 16, ພຣະອົງສັນຍາຫຍັງແດ່ກັບຜູ້ຮັບໃຊ້ທີ່ຊື່ສັດຂອງພຣະອົງ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ສິດທິຊົນມາ,” ເພງສວດ ແລະ ເພງຂອງເດັກນ້ອຍ, 2.

ການປັບປຸງການສຶກສາສ່ວນຕົວ

ຊອກຫາຖ້ອຍຄຳ ແລະ ສຳນວນທີ່ດົນໃຈ. ຂະນະທີ່ທ່ານອ່ານ, ພຣະວິນຍານອາດເຮັດໃຫ້ທ່ານສົນໃຈກັບຖ້ອຍຄຳ ຫລື ສຳນວນໃດໜຶ່ງໂດຍສະເພາະ. ໃຫ້ຄິດທີ່ຈະຂຽນຖ້ອຍຄຳ ຫລື ສຳນວນ ຈາກ ຄຳສອນ ແລະ ພັນທະສັນຍາ 71–75 ທີ່ດົນໃຈທ່ານລົງໄວ້.

ຮູບພາບຊາຍໜຸ່ມກັບຜູ້ນຳຖານະປະໂລຫິດ ໂດຍ ດີ ຄີທ໌ ລາສັນ