“ວັນທີ 5–11 ເດືອນກໍລະກົດ. ຄຳສອນ ແລະ ພັນທະສັນຍາ 76: ‘ຍິ່ງໃຫຍ່ຈະເປັນລາງວັນຂອງພວກເຂົາ ແລະ ນິລັນດອນຈະເປັນລັດສະໝີພາບຂອງພວກເຂົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 5–11 ເດືອນກໍລະກົດ. ຄຳສອນ ແລະ ພັນທະສັນຍາ 76,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຈັກກະວານໃນອາວະກາດ

Refuge [ທີ່ຫລົບໄພ], ໂດຍ ຊາລີນ ເອໂບ

ວັນທີ 5–11 ເດືອນກໍລະກົດ

ຄຳສອນ ແລະ ພັນທະສັນຍາ 76

“ຍິ່ງໃຫຍ່ຈະເປັນລາງວັນຂອງພວກເຂົາ ແລະ ນິລັນດອນຈະເປັນລັດສະໝີພາບຂອງພວກເຂົາ”

ໃນ ພາກທີ 76, ພຣະຜູ້ເປັນເຈົ້າໄດ້ກ່າວວ່າ ພຣະອົງປະສົງທີ່ຈະເປີດເຜີຍຄວາມຈິງຕໍ່ເຮົາຫລາຍຂະໜາດໃດ (ເບິ່ງ ຂໍ້ທີ 7–10). ໃຫ້ອ່ານພຣະຄຳພີດ້ວຍສັດທາ ວ່າພຣະອົງສາມາດ ແລະ ຈະເປີດເຜີຍ “ເລື່ອງຂອງພຣະເຈົ້າ” ຕໍ່ທ່ານ (ຂໍ້ທີ 12) ໃນສິ່ງທີ່ທ່ານຕ້ອງການຢາກຮູ້. ແລ້ວໃຫ້ບັນທຶກຄວາມຮູ້ທີ່ທ່ານໄດ້ຮັບ “ຂະນະທີ່ [ທ່ານ] ຍັງຢູ່ໃນພຣະວິນຍານ” (ຂໍ້ທີ 28, 80, 113).

ບັນທຶກຄວາມປະທັບໃຈຂອງທ່ານ

“ຈະມີຫຍັງເກີດຂຶ້ນກັບເຮົາ ຫລັງຈາກເຮົາຕາຍ?” ເກືອບທຸກສາດສະໜາຢູ່ໃນໂລກ ໄດ້ພິຈາລະນາຄຳຖາມນີ້ ບໍ່ວ່າໃນຮູບແບບໃດ ກໍຮູບແບບໜຶ່ງ. ເປັນເວລາຫລາຍສັດຕະວັດ, ປະເພນີຂອງຊາວຄຣິດຫລາຍຢ່າງ, ອີງຕາມຄຳສອນໃນພຣະຄຣິສຕະທຳຄຳພີ, ໄດ້ສິດສອນເຖິງສະຫວັນ ແລະ ນະລົກ, ເຖິງທີ່ສຸຂະເສີມສຳລັບຄົນຊອບທຳ ແລະ ບ່ອນທຸກທໍລະມານສຳລັບຄົນຊົ່ວ. ແຕ່ຄອບຄົວມະນຸດທັງປວງພຽງສາມາດແຍກອອກເປັນໄດ້ແຕ່ສອງຝ່າຍຢ່າງເຄັ່ງຄັດຄື ດີ ແລະ ຊົ່ວ ເທົ່ານັ້ນບໍ? ແລະ ຄຳວ່າ ສະຫວັນ ມີຄວາມໝາຍວ່າແນວໃດແທ້ໆ? ໃນເດືອນກຸມພາ ປີ 1832, ໂຈເຊັບ ສະມິດ ແລະ ຊິດນີ ຣິກດອນ ໄດ້ສົງໃສຖ້າຫາກມັນບໍ່ມີຫລາຍກວ່ານີ້ບໍ ທີ່ຕ້ອງຮູ້ຈັກກ່ຽວກັບເລື່ອງນີ້ (ເບິ່ງ ຄຳສອນ ແລະ ພັນທະສັນຍາ 76, ຫົວຂໍ້ພາກ).

ແນ່ນອນມັນມີ. ຂະນະທີ່ໄຕ່ຕອງກ່ຽວກັບສິ່ງເຫລົ່ານີ້, ພຣະຜູ້ເປັນເຈົ້າໄດ້ “ສຳພັດຕາແຫ່ງຄວາມເຂົ້າໃຈ [ຂອງພວກເພິ່ນ] ແລະ ມັນໄດ້ເປີດ” (ຂໍ້ທີ 19). ໂຈເຊັບ ແລະ ຊິດນີ ໄດ້ຮັບການເປີດເຜີຍທີ່ສວຍງາມຫລາຍ, ທີ່ກວ້າງຂວາງຫລາຍ, ທີ່ຮຸ່ງເຫລື້ອມຫລາຍ, ຈົນວ່າໄພ່ພົນເອີ້ນມັນວ່າ “ພາບນິມິດ.” ມັນໄດ້ເປີດປະຕູສະຫວັນ ແລະ ໃຫ້ລູກໆຂອງພຣະເຈົ້າໄດ້ເຫັນພາບນິລັນດອນທີ່ເກີນຄວາມຄາດຄິດ. ພາບນິມິດໄດ້ເປີດເຜີຍວ່າ ສະຫວັນຍິ່ງໃຫຍ່ ແລະ ກວ້າງຂວາງ ແລະ ມີສິ່ງລວມຢູ່ໃນນັ້ນຫລາຍກວ່າທີ່ຜູ້ຄົນໄດ້ເຊື່ອກັນມາກ່ອນ. ພຣະເຈົ້າມີຄວາມເມດຕາ ແລະ ທ່ຽງທຳຫລາຍກວ່າທີ່ເຮົາສາມາດເຂົ້າໃຈໄດ້. ແລະ ລູກໆຂອງພຣະເຈົ້າມີຈຸດໝາຍປາຍທາງນິລັນດອນ ທີ່ສະຫງ່າລາສີກວ່າທີ່ເຮົາຄາດຄິດ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 76

ຄວາມລອດມີມາຜ່ານທາງພຣະເຢຊູຄຣິດ, ພຣະບຸດຂອງພຣະເຈົ້າ.

ເມື່ອວິວເຝີດ ວູດຣັບ ໄດ້ອ່ານພາບນິມິດທີ່ບັນຍາຍຢູ່ໃນ ພາກທີ 76, ເພິ່ນໄດ້ກ່າວວ່າ, “ຂ້າພະເຈົ້າຮູ້ສຶກຮັກພຣະຜູ້ເປັນເຈົ້າຫລາຍກວ່າທີ່ຜ່ານມາ ໃນຊີວິດຂອງຂ້າພະເຈົ້າ” (ເບິ່ງ “ສຽງຂອງການຟື້ນຟູ” ຢູ່ໃນທ້າຍຂອງໂຄງຮ່າງນີ້). ບາງທີທ່ານອາດມີຄວາມຮູ້ສຶກທີ່ຄ້າຍຄືກັນນີ້ ຂະນະທີ່ທ່ານອ່ານການເປີດເຜີຍນີ້. ເພາະບໍ່ມີພອນໃດທີ່ສະຫງ່າລາສີ ທີ່ບັນຍາຍຢູ່ໃນ ພາກທີ 76 ຈະເປັນໄປໄດ້ ຖ້າປາດສະຈາກພຣະຜູ້ຊ່ວຍໃຫ້ລອດ. ບາງທີທ່ານສາມາດຊີ້ບອກແຕ່ລະຂໍ້ ຢູ່ໃນ ພາກທີ 76 ທີ່ກ່າວເຖິງອົງພຣະເຢຊູຄຣິດເຈົ້າ. ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບພຣະອົງ ແລະ ບົດບາດຂອງພຣະອົງ ໃນແຜນຂອງພຣະເຈົ້າ? ຂໍ້ເຫລົ່ານີ້ມີອິດທິພົນຕໍ່ຄວາມຮູ້ສຶກຂອງທ່ານກ່ຽວກັບພຣະອົງແນວໃດ? ຂະນະທີ່ທ່ານອ່ານ ແລະ ໄຕ່ຕອງ, ທ່ານອາດໄດ້ຮັບຄວາມປະທັບໃຈກ່ຽວກັບວິທີທີ່ທ່ານສາມາດ “ໄດ້ຮັບປະຈັກພະຍານເຖິງພຣະເຢຊູ” ແລະ “ກ້າຫານ” ຫລາຍກວ່າເກົ່າໃນປະຈັກພະຍານນັ້ນ (ຂໍ້ທີ 51, 79).

ຄຳສອນ ແລະ ພັນທະສັນຍາ 76:39–44, 50–112

ພຣະເຈົ້າປາດຖະໜາໃຫ້ “ວຽກງານທຸກຢ່າງໃນພຣະຫັດຂອງພຣະອົງ” ໄດ້ຮັບຄວາມລອດ.

ບາງຄົນ, ລວມທັງສະມາຊິກຂອງສາດສະໜາຈັກລຸ້ນທຳອິດ, ໄດ້ຄັດຄ້ານຕໍ່ພາບນິມິດ ຢູ່ໃນ ພາກທີ 76 ເພາະມັນສິດສອນວ່າ ເກືອບທຸກຄົນຈະໄດ້ຮັບຄວາມລອດ ແລະ ໄດ້ຮັບລັດສະໝີພາບໃນບາງລະດັບ. ການຄັດຄ້ານຂອງເຂົາເຈົ້າ, ພາກສ່ວນໜຶ່ງ, ອາດມາຈາກຄວາມເຂົ້າໃຈຜິດກ່ຽວກັບພຣະເຈົ້າ ແລະ ຄວາມສຳພັນຂອງພຣະອົງຕໍ່ເຮົາ. ຂະນະທີ່ທ່ານອ່ານການເປີດເຜີຍນີ້, ທ່ານຮຽນຮູ້ຫຍັງແດ່ກ່ຽວກັບຄຸນລັກສະນະຂອງພຣະເຈົ້າ ແລະ ແຜນຂອງພຣະອົງສຳລັບລູກໆຂອງພຣະອົງ?

ໃຫ້ພິຈາລະນາຄວາມແຕກຕ່າງລະຫວ່າງການຖືກໄຖ່ (ຈາກຄວາມຕາຍທາງຮ່າງກາຍ ແລະ ທາງວິນຍານ; ເບິ່ງ ຂໍ້ທີ 39, 43–44) ແລະ ການໄດ້ຮັບຄວາມສູງສົ່ງ (ການອາໄສຢູ່ກັບພຣະເຈົ້າ ແລະ ການກາຍເປັນເໝືອນດັ່ງພຣະອົງ; ເບິ່ງ ຂໍ້ທີ 50–70).

ເບິ່ງ ໂຢຮັນ 3:16–17; ຄຳສອນ ແລະ ພັນທະສັນຍາ 132:20–25 ນຳອີກ.

ຄຳສອນ ແລະ ພັນທະສັນຍາ 76:50–70, 92–95.

ພຣະບິດາເທິງສະຫວັນຂອງເຮົາ ປະສົງໃຫ້ເຮົາໄດ້ຮັບຊີວິດນິລັນດອນ ຢູ່ໃນອານາຈັກຊັ້ນສູງ.

ທ່ານເຄີຍສົງໃສຢູ່ບໍ—ຫລື ເປັນຫ່ວງ—ກ່ຽວກັບຖ້າຫາກທ່ານມີຄ່າຄວນພໍ ສຳລັບອານາຈັກຊັ້ນສູງ? ເມື່ອທ່ານອ່ານຄຳບັນຍາຍກ່ຽວກັບຜູ້ທີ່ໄດ້ຮັບລັດສະໝີພາບນີ້ (ເບິ່ງ ຂໍ້ທີ 50–70, 92–95), ແທນທີ່ພຽງແຕ່ຊອກຫາສິ່ງຕ່າງໆທີ່ທ່ານຄວນເຮັດ, ໃຫ້ຊອກຫາສິ່ງທີ່ພຣະເຈົ້າໄດ້ກະທຳ—ແລະ ກຳລັງກະທຳຢູ່—ເພື່ອຊ່ວຍທ່ານໃຫ້ກາຍເປັນເໝືອນດັ່ງພຣະອົງ. ການອ່ານພາບນິມິດໃນທາງນີ້ ມີຜົນກະທົບຕໍ່ຄວາມຮູ້ສຶກຂອງທ່ານກ່ຽວກັບຄວາມພະຍາຍາມສ່ວນຕົວຂອງທ່ານແນວໃດ?

ທ່ານກໍຄວນຄິດກ່ຽວກັບວ່າ ມັນເປັນພອນທີ່ຍິ່ງໃຫຍ່ຂະໜາດໃດ ທີ່ຮູ້ລາຍລະອຽດເຫລົ່ານີ້ ກ່ຽວກັບອານາຈັກຊັ້ນສູງ. ພາບນິມິດເຖິງລັດສະໝີພາບຊັ້ນສູງນີ້ ມີຜົນກະທົບຕໍ່ມຸມມອງຂອງທ່ານ ທີ່ຈະດຳລົງຊີວິດໃນແຕ່ລະວັນແນວໃດ?

ເບິ່ງ ໂມເຊ 1:39; Joy D. Jones, “Value beyond Measure,” Ensign ຫລື Liahona, Nov. 2017, 13–15; J. Devn Cornish, “Am I Good Enough? Will I Make It?” Ensign ຫລື Liahona, Nov. 2016, 32–34 ນຳອີກ.

ໂຈເຊັບ ສະມິດ ໄດ້ເຫັນພາບນິມິດກ່ຽວກັບລະດັບຂອງລັດສະໝີພາບ ຢູ່ໃນຫ້ອງນີ້.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 76:22–24, 50–52, 78–79, 81–82.ເຮົາຮຽນຮູ້ຫຍັງແດ່ໃນຂໍ້ເຫລົ່ານີ້ກ່ຽວກັບຄວາມສຳຄັນຂອງປະຈັກພະຍານຂອງເຮົາ? ປະຈັກພະຍານຂອງເຮົາມີບົດບາດຢ່າງໃດແດ່ ຢູ່ໃນຈຸດໝາຍປາຍທາງນິລັນດອນຂອງເຮົາ? ມັນອາດເປັນປະໂຫຍດທີ່ຈະເປີດເບິ່ງຄວາມໝາຍຂອງຄຳວ່າ ກ້າຫານ ເພື່ອສົນທະນາວິທີທີ່ຈະມີຄວາມ “ກ້າຫານໃນປະຈັກພະຍານເຖິງພຣະເຢຊູ” (ຂໍ້ທີ 79). ພວກທ່ານກໍສາມາດຮ້ອງເພງ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ 70 ນຳອີກ).

ຄຳສອນ ແລະ ພັນທະສັນຍາ 76:24.ຄອບຄົວຂອງທ່ານອາດສັງເກດເຫັນຄວາມສຳພັນລະຫວ່າງຄວາມຈິງ ຢູ່ໃນ ພາກທີ 76 ແລະ ສິ່ງທີ່ສິດສອນ ຢູ່ໃນ “ເຮົາເປັນລູກຂອງພຣະເຈົ້າ” (ເພງສວດ ແລະ ເພງຂອງເດັກນ້ອຍ, 64); ໜຶ່ງໃນຄວາມຈິງເຫລົ່ານີ້ ມີຢູ່ໃນ ຄຳສອນ ແລະ ພັນທະສັນຍາ 76:24. ໂລກນີ້ຈະແຕກຕ່າງແນວໃດ ຖ້າຫາກທຸກຄົນເຂົ້າໃຈວ່າ ເຮົາທຸກຄົນເປັນລູກຂອງພຣະເຈົ້າ? ຄວາມຈິງນີ້ມີຜົນກະທົບຕໍ່ວິທີທີ່ເຮົາປະຕິບັດຕໍ່ຄົນອື່ນແນວໃດ? ບາງທີການເບິ່ງຮູບພາບ ບຸດ ແລະ ທິດາທີ່ແຕກຕ່າງກັນຂອງພຣະເຈົ້າ ຢູ່ໃນໂລກນີ້ ສາມາດຊ່ວຍຄອບຄົວຂອງທ່ານໃຫ້ໄຕ່ຕອງກ່ຽວກັບຄຳຖາມນີ້.

ໃຫ້ຄິດທີ່ຈະຮ້ອງເພງ “ເຮົາເປັນລູກຂອງພຣະເຈົ້າ” ນຳກັນ ແລະ ຊອກຫາຄວາມສຳພັນຢ່າງອື່ນກັບຫລັກທຳ ຢູ່ໃນ ພາກທີ 76 (ເບິ່ງ, ຍົກຕົວຢ່າງ, ຂໍ້ທີ 12, 62, 96).

ຄຳສອນ ແລະ ພັນທະສັນຍາ 76:40–41.ຖ້າຫາກເຮົາສະຫລຸບ “ຂ່າວອັນໜ້າຊື່ນຊົມ” (ຂໍ້ທີ 40), ຫລື ຂ່າວປະເສີດ, ຢູ່ໃນຂໍ້ເຫລົ່ານີ້ ໃນໜັງສືພິມໜ້າຕົ້ນ ຫລື ໃນຫ້ອງສື່ສານອອນລາຍ, ເຮົາຈະເວົ້າສິ່ງໃດ? ຂ່າວອັນໜ້າຊື່ນຊົມຢ່າງອື່ນໃດແດ່ທີ່ເຮົາພົບເຫັນ ຢູ່ໃນ ພາກທີ 76?

ຄຳສອນ ແລະ ພັນທະສັນຍາ 76:50–70.ທ່ານຈະຊ່ວຍຄອບຄົວຂອງທ່ານໃຫ້ມີຄວາມຕື່ນເຕັ້ນ ແລະ ກະກຽມສຳລັບຊີວິດນິລັນດອນ ຢູ່ໃນອານາຈັກຊັ້ນສູງໄດ້ແນວໃດ? ພວກທ່ານສາມາດຊ່ວຍກັນຊອກຫາຮູບພາບ, ຂໍ້ພຣະຄຳພີ, ແລະ ຄຳສອນຂອງສາດສະດາ ອັນທີ່ເຂົ້າກັບສຳນວນ ຢູ່ໃນ ຄຳສອນ ແລະ ພັນທະສັນຍາ 76:50–70. ທ່ານອາດພົບເຫັນສິ່ງເຫລົ່ານີ້ຢູ່ໃນວາລະສານຂອງສາດສະໜາຈັກ, ຢູ່ທີ່ ChurchofJesusChrist.org, ຫລື ຢູ່ໃນໝາຍເຫດຢູ່ທາງລຸ່ມໜ້າປຶ້ມພຣະຄຳພີ. ແລ້ວ ທ່ານສາມາດຮວບຮວມຮູບພາບເຫລົ່ານີ້, ຂໍ້ພຣະຄຳພີ, ແລະ ຄຳສອນໄວ້ຢູ່ໃນໂປສເຕີ້ ທີ່ສາມາດເຕືອນຄອບຄົວຂອງທ່ານເຖິງເປົ້າໝາຍນິລັນດອນຂອງພວກທ່ານ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຮູ້ພຣະຜູ້ໄຖ່ຊົງພຣະຊົນ,” ເພງສວດ ແລະ ເພງຂອງເດັກນ້ອຍ, 42.

ຮູບພາບ

ຮູບເຄື່ອງໝາຍສຽງຂອງການຟື້ນຟູ

ສຽງຂອງການຟື້ນຟູ: ປະຈັກພະຍານເຖິງ “ພາບນິມິດ”

ວິວເຝີດ ວູດຣັບ

ວິວເຝີດ ວູດຣັບ ໄດ້ເຂົ້າຮ່ວມສາດສະໜາຈັກ ໃນເດືອນທັນວາ ປີ 1833, ເກືອບເຖິງສອງປີ ຫລັງຈາກໂຈເຊັບ ສະມິດ ແລະ ຊິດນີ ຣິກດອນ ໄດ້ຮັບພາບນິມິດ ທີ່ບັນທຶກຢູ່ໃນ ຄຳສອນ ແລະ ພັນທະສັນຍາ 76. ເພິ່ນໄດ້ອາໄສຢູ່ລັດນິວຢອກ ໃນເວລານັ້ນ ແລະ ໄດ້ຍິນກ່ຽວກັບ “ພາບນິມິດ” ຈາກຜູ້ສອນສາດສະໜາຮັບໃຊ້ຢູ່ໃນຂົງເຂດນັ້ນ. ຫລາຍປີຕໍ່ມາ ເພິ່ນໄດ້ກ່າວເຖິງຄວາມປະທັບໃຈຂອງເພິ່ນ ກ່ຽວກັບການເປີດເຜີຍນີ້:

“ຂ້າພະເຈົ້າໄດ້ຖືກສິດສອນແຕ່ຕອນຍັງນ້ອຍວ່າ ມັນມີສະຫວັນແຫ່ງໜຶ່ງ ແລະ ມີນະລົກແຫ່ງໜຶ່ງ, ແລະ ຖືກບອກວ່າ ຄົນຊົ່ວທັງໝົດມີການລົງໂທດຢ່າງໜຶ່ງ ແລະ ຄົນຊອບທຳມີລັດສະໝີພາບຢ່າງໜຶ່ງ. …

“… ເມື່ອຂ້າພະເຈົ້າໄດ້ອ່ານພາບນິມິດ … , ມັນໃຫ້ຄວາມຮູ້ແກ່ຈິດໃຈຂອງຂ້າພະເຈົ້າ ແລະ ເຮັດໃຫ້ຂ້າພະເຈົ້າມີຄວາມຊື່ນຊົມອັນຍິ່ງໃຫຍ່, ມັນໄດ້ປະກົດຕໍ່ຂ້າພະເຈົ້າວ່າ ພຣະເຈົ້າຜູ້ໄດ້ເປີດເຜີຍຫລັກທຳນັ້ນແກ່ມະນຸດແມ່ນສະຫລາດສະຫລຽວ, ທ່ຽງທຳ, ແລະ ຈິງແທ້, ມີທັງຄຸນສົມບັດ ແລະ ປະສາດທັງຫ້າທີ່ດີ ແລະ ມີຄວາມຮູ້, ຂ້າພະເຈົ້າຮູ້ສຶກວ່າພຣະອົງສະເໝີຕົ້ນສະເໝີປາຍກັບຄວາມຮັກ, ຄວາມເມດຕາ, ຄວາມຍຸດຕິທຳ ແລະ ການພິພາກສາ, ແລະ ຂ້າພະເຈົ້າຮູ້ສຶກຮັກພຣະຜູ້ເປັນເຈົ້າຫລາຍກວ່າທີ່ຜ່ານມາ ໃນຊີວິດຂອງຂ້າພະເຈົ້າ.”¹

“ພາບ ‘ນິມິດ’ [ຄື] ການເປີດເຜີຍ ຊຶ່ງໄດ້ໃຫ້ຄວາມສະຫວ່າງ, ຄວາມຈິງ, ແລະ ຫລັກທຳ ຫລາຍກວ່າການເປີດເຜີຍໃດໆ ທີ່ບັນຈຸຢູ່ໃນປຶ້ມອື່ນໆ ທີ່ເຮົາເຄີຍມີ. ມັນເຮັດໃຫ້ເຮົາເຂົ້າໃຈຢ່າງແຈ່ມແຈ້ງ ເຖິງສະພາບໃນປະຈຸບັນຂອງເຮົາ, ບ່ອນທີ່ເຮົາມາຈາກ, ແລະ ບ່ອນທີ່ເຮົາຈະໄປຫາ. ມະນຸດທຸກຄົນສາມາດຮູ້ໄດ້ ຜ່ານທາງການເປີດເຜີຍນັ້ນ ເຖິງພາກສ່ວນ ແລະ ສະພາບຂອງຕົນ ທີ່ຈະເປັນແນວໃດ.”²

“ກ່ອນຂ້າພະເຈົ້າໄດ້ເຫັນໂຈເຊັບ ຂ້າພະເຈົ້າໄດ້ເວົ້າວ່າ ຂ້າພະເຈົ້າບໍ່ສົນໃຈວ່າ ເພິ່ນເຖົ້າ, ຫລື ເພິ່ນໜຸ່ມ, ບໍ່ສົນໃຈວ່າເພິ່ນມີໜ້າຕາຈັ່ງໃດ—ບໍ່ສົນໃຈວ່າຜົມຂອງເພິ່ນຊິຍາວ ຫລື ສັ້ນ; ຊາຍທີ່ໄດ້ຮັບການເປີດເຜີຍນັ້ນແມ່ນສາດສະດາຂອງພຣະເຈົ້າ. ຂ້າພະເຈົ້າຮູ້ດ້ວຍຕົວເອງ.”³

ຟີບີ ຄຣໍສ໌ບີ ແພ໊ກ

ຕອນນາງຟີບີ ແພ໊ກ ໄດ້ຟັງ ໂຈເຊັບ ແລະ ຊິດນີ ສິດສອນກ່ຽວກັບ “ພາບນິມິດ,” ນາງໄດ້ອາໄສຢູ່ລັດມີເຊີຣີ ແລະ ລ້ຽງດູລູກຫ້າຄົນ ດ້ວຍຕົວຄົນດຽວ. ພາບນິມິດປະທັບໃຈ ແລະ ດົນໃຈນາງຫລາຍ ຈົນວ່ານາງໄດ້ຂຽນຂໍ້ຄວາມດັ່ງຕໍ່ໄປນີ້ ເພື່ອແບ່ງປັນສິ່ງທີ່ນາງໄດ້ຮຽນຮູ້ ກັບຍາດພີ່ນ້ອງຂອງນາງ:

“ພຣະຜູ້ເປັນເຈົ້າກຳລັງເປີດສິ່ງລຶກລັບຂອງອານາຈັກສະຫວັນຕໍ່ລູກໆຂອງພຣະອົງ. … ໂຈເຊັບ ສະມິດ ແລະ ຊິດນີ ຣິກດອນ ໄດ້ມາຢ້ຽມຢາມພວກເຮົາໃນລະດູໃບໄມ້ປົ່ງແລ້ວນີ້, ແລະ ພວກເຮົາໄດ້ມີການປະຊຸມທີ່ປິຕິຍິນດີຫລາຍ ຂະນະທີ່ພວກເພິ່ນຢູ່ທີ່ນີ້, ແລະ ຄວາມລຶກລັບຫລາຍຢ່າງໄດ້ຖືກເປີດເຜີຍແກ່ພວກເຮົາ, ຊຶ່ງໄດ້ເຮັດໃຫ້ຂ້ອຍໄດ້ຮັບການປອບໃຈຫລາຍ. ພວກເຮົາສາມາດມອງເຫັນຄວາມຖ່ອມຂອງພຣະເຈົ້າ ໃນການກະກຽມປາສາດແຫ່ງສັນຕິສຸກໄວ້ໃຫ້ລູກໆຂອງພຣະອົງ. ແລະ ຜູ້ທີ່ບໍ່ຮັບເອົາຄວາມສົມບູນຂອງພຣະກິດຕິຄຸນ ແລະ ຢືນເປັນນັກຮົບທີ່ກ້າຫານ ໃນອຸດົມການຂອງພຣະຄຣິດ ຈະບໍ່ສາມາດຢູ່ໃນທີ່ປະທັບຂອງພຣະບິດາ ແລະ ພຣະບຸດໄດ້. ແຕ່ມີບ່ອນທີ່ຖືກຕຽມໄວ້ສຳລັບທຸກຄົນຜູ້ທີ່ບໍ່ຮັບເອົາ, ແຕ່ມັນເປັນບ່ອນທີ່ມີລັດສະໝີພາບໜ້ອຍກວ່າ ການໄດ້ຢູ່ໃນອານາຈັກຊັ້ນສູງ. ຂ້ອຍຈະບໍ່ພະຍາຍາມເວົ້າຫຍັງຫລາຍຕື່ມອີກ ກ່ຽວກັບສິ່ງເຫລົ່ານີ້ ເພາະບັດນີ້ມັນໄດ້ຖືກຂຽນໄວ້ ແລະ ມັນຈະອອກໄປຫາຊາວໂລກ. ແລະ ບາງທີເຈົ້າຈະມີໂອກາດອ່ານມັນດ້ວຍຕົວເອງ, ແລະ ຖ້າຫາກເຈົ້າເຮັດ, ຂ້ອຍຫວັງວ່າເຈົ້າຈະອ່ານດ້ວຍຄວາມລະມັດລະວັງ ແລະ ດ້ວຍການອະທິຖານຢູ່ໃນໃຈ, ເພາະສິ່ງເຫລົ່ານີ້ມີຄ່າພໍທີ່ຈະໃຫ້ສັງເກດ. ແລະ ຂ້ອຍຢາກໃຫ້ເຈົ້າຄົ້ນຄວ້າມັນ, ເພາະມັນເປັນສິ່ງທີ່ຈະເຮັດໃຫ້ເຮົາມີຄວາມສຸກ ຢູ່ໃນໂລກນີ້ ແລະ ໃນໂລກທີ່ຈະມາເຖິງ.”⁴