“ວັນທີ 19–25 ເດືອນກໍລະກົດ. ຄຳສອນ ແລະ ພັນທະສັນຍາ 81–83: ບ່ອນທີ່ ‘ຖືກປະທານໃຫ້ຫລາຍ ກໍຈະຖືກຮຽກຮ້ອງຫລາຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 19–25 ເດືອນກໍລະກົດ. ຄຳສອນ ແລະ ພັນທະສັນຍາ 81–83,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ພຣະຄຣິດ ແລະ ເຈົ້ານາຍມະຫາເສດຖີໜຸ່ມ

Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ

ວັນທີ 19–25 ເດືອນກໍລະກົດ

ຄຳສອນ ແລະ ພັນທະສັນຍາ 81–83

ບ່ອນທີ່ “ຖືກປະທານໃຫ້ຫລາຍ ກໍຈະຖືກຮຽກຮ້ອງຫລາຍ”

ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 81–83, ໃຫ້ຂຽນຫລັກທຳທີ່ສາມາດຊ່ວຍທ່ານເຮັດຄວາມດີໃນທ່າມກາງຄອບຄົວຂອງທ່ານ, ໝູ່ເພື່ອນ, ແລະ ຄົນອື່ນໆໄວ້.

ບັນທຶກຄວາມປະທັບໃຈຂອງທ່ານ

ໃນເດືອນມີນາ ປີ 1832, ພຣະຜູ້ເປັນເຈົ້າໄດ້ເອີ້ນ ເຈຊີ ກໍສ໌ ໃຫ້ເປັນທີ່ປຶກສາຂອງໂຈເຊັບ ສະມິດ ໃນຝ່າຍປະທານຂອງຖານະປະໂລຫິດສູງ (ຕອນນີ້ເອີ້ນວ່າ ຝ່າຍປະທານສູງສຸດ). ຄຳສອນ ແລະ ພັນທະສັນຍາ 81 ເປັນການເປີດເຜີຍຕໍ່ບຣະເດີ ກໍສ໌, ແນະນຳເພິ່ນກ່ຽວກັບການເອີ້ນໃໝ່ຂອງເພິ່ນ ແລະ ສັນຍາພອນກັບເພິ່ນ ສຳລັບການຮັບໃຊ້ຢ່າງຊື່ສັດ. ແຕ່ ເຈຊີ ກໍສ໌ ບໍ່ໄດ້ຮັບໃຊ້ຢ່າງຊື່ສັດ. ສະນັ້ນ ເຟຣ໌ເດຣິກ ຈີ ວິວລຽມສ໌ ຈຶ່ງໄດ້ຖືກເອີ້ນໃຫ້ຮັບຕຳແໜ່ງແທນເພິ່ນ, ແລະ ຊື່ຂອງບຣະເດີ ກໍສ໌ ກໍໄດ້ຖືກແທນດ້ວຍຊື່ຂອງບຣະເດີ ວິວລຽມສ໌ ຢູ່ໃນການເປີດເຜີຍ.

ສິ່ງນັ້ນເບິ່ງຄືວ່າເປັນລາຍລະອຽດເລັກນ້ອຍ, ແຕ່ມັນບອກເຖິງຄວາມຈິງທີ່ສຳຄັນ: ການເປີດເຜີຍສ່ວນຫລາຍ ຢູ່ໃນຄຳສອນ ແລະ ພັນທະສັນຍາ ແມ່ນກ່າວເຖິງຜູ້ຄົນໃດໜຶ່ງໂດຍສະເພາະ, ແຕ່ເຮົາສາມາດຊອກຫາວິທີທີ່ຈະນຳໃຊ້ມັນ ໃນຕົວເຮົາເອງໄດ້ (ເບິ່ງ 1 ນີໄຟ 19:23). ຄຳແນະນຳຂອງພຣະຜູ້ເປັນເຈົ້າຕໍ່ເຟຣ໌ເດຣິກ ຈີ ວິວລຽມສ໌ ເພື່ອ “ໃຫ້ກຳລັງຫົວເຂົ່າທີ່ອ່ອນເພຍ” ສາມາດຫັນແນວຄິດຂອງເຮົາໄປຫາຜູ້ຄົນທີ່ເຮົາສາມາດເພີ່ມຄວາມເຂັ້ມແຂງໃຫ້ໄດ້ (ຄຳສອນ ແລະ ພັນທະສັນຍາ 81:5). ຄຳແນະນຳຂອງພຣະຜູ້ເປັນເຈົ້າ ສຳລັບສະມາຊິກຂອງ ກຸ່ມທຸລະກິດເອກະພາບ ເພື່ອ “ໃຫ້ພວກເຈົ້າຜູກມັດຕົນເອງໂດຍພັນທະສັນຍານີ້” ເພື່ອສະໜອງຄວາມຕ້ອງການທາງໂລກຂອງສາດສະໜາຈັກ ສາມາດຫັນຄວາມຄິດຂອງເຮົາໄປຫາ ພັນທະສັນຍາຂອງເຮົາເອງ. ແລະ ຄຳສັນຍາຂອງພຣະຜູ້ເປັນເຈົ້າ ວ່າພຣະອົງຈະ “ເຮັດຕາມສັນຍາເມື່ອພວກເຈົ້າເຮັດຕາມສິ່ງທີ່ເຮົາກ່າວ” ສາມາດຫັນແນວຄິດຂອງເຮົາໄປຫາຄຳສັນຍາຂອງພຣະອົງຕໍ່ເຮົາ ເມື່ອເຮົາເຊື່ອຟັງ (ຄຳສອນ ແລະ ພັນທະສັນຍາ 82:10, 15). ນັ້ນຄືສິ່ງທີ່ມັນຄວນເປັນ, ເພາະພຣະຜູ້ເປັນເຈົ້າ ໄດ້ປະກາດອີກວ່າ, “ສິ່ງໃດກໍຕາມທີ່ເຮົາກ່າວກັບຄົນໜຶ່ງ ກໍຄືກັນກັບເຮົາກ່າວກັບທຸກຄົນ” (ຂໍ້ທີ 5).

ເບິ່ງ “Newel K. Whitney and the United Firm,” “Jesse Gause: Counselor to the Prophet,” Revelations in Context, 142–47, 155–57.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 81

ເຮົາສາມາດຊື່ສັດໃນການເຮັດສິ່ງທີ່ພຣະຜູ້ເປັນເຈົ້າຂໍຮ້ອງຈາກເຮົາ.

ບາງເທື່ອທ່ານກໍສົງໃສຢູ່ບໍ ເຖິງວິທີທີ່ທ່ານສາມາດບັນລຸໜ້າທີ່ຮັບຜິດຊອບອັນສຳຄັນ ໃນຊີວິດຂອງທ່ານ? ໃນຖານະທີ່ປຶກສາຂອງສາດສະດາໂຈເຊັບ ສະມິດ, ແນ່ນອນທີ່ເຟຣ໌ເດຣິກ ຈີ ວິວລຽມສ໌ ໄດ້ມີໜ້າທີ່ຮັບຜິດຊອບທີ່ສຳຄັນຫລາຍຢ່າງ. ໃນ ພາກທີ 81, ພຣະຜູ້ເປັນເຈົ້າໄດ້ມອບຄຳແນະນຳໃຫ້ເພິ່ນ ເຖິງວິທີທີ່ເພິ່ນຈະສຳເລັດໜ້າທີ່ຮັບຜິດຊອບເຫລົ່ານັ້ນໄດ້. ທ່ານພົບເຫັນຫຍັງແດ່ຢູ່ໃນພາກນີ້ ທີ່ສາມາດຊ່ວຍທ່ານໃຫ້ສຳເລັດໜ້າທີ່ຮັບຜິດຊອບ ທີ່ພຣະຜູ້ເປັນເຈົ້າໄດ້ມອບໃຫ້ທ່ານ?

ຕໍ່ໄປນີ້ແມ່ນຄຳຖາມບາງຂໍ້ ເພື່ອຊ່ວຍທ່ານໄຕ່ຕອງ ຂໍ້ທີ 5:

ມີທາງໃດແດ່ທີ່ຜູ້ຄົນສາມາດ “ອ່ອນແອ”? ຄຳວ່າ “ຊ່ວຍເຫລືອ” ໝາຍຄວາມວ່າແນວໃດຕໍ່ຜູ້ທີ່ອ່ອນແອ?
ແມ່ນຫຍັງທີ່ເຮັດໃຫ້ມືຂອງຜູ້ຄົນ “ເມື່ອຍລ້າ” ໃນທາງປຽບທຽບ? ເຮົາຈະສາມາດ “ຍົກ” ມືເຫລົ່ານັ້ນຂຶ້ນໄດ້ແນວໃດ?
ສຳນວນທີ່ວ່າ “ຫົວເຂົ່າທີ່ອ່ອນເພຍ” ໝາຍຄວາມວ່າແນວໃດ? ເຮົາຈະສາມາດ “ໃຫ້ກຳລັງ” ແກ່ຫົວເຂົ່າທີ່ອ່ອນເພຍເຫລົ່ານັ້ນໄດ້ແນວໃດ?

ບາງທີການສຶກສາຂໍ້ນີ້ ອາດເຮັດໃຫ້ທ່ານນຶກເຫັນບາງຄົນທີ່ທ່ານສາມາດ “ຊ່ວຍເຫລືອ,” “ຍົກ,” ຫລື “ໃຫ້ກຳລັງ.” ທ່ານຈະເຮັດສິ່ງໃດເພື່ອປະຕິບັດສາດສະໜາກິດຕໍ່ບຸກຄົນນັ້ນ?

ຝ່າຍປະທານສູງສຸດ: ຊິດນີ ຣິກດອນ, ໂຈເຊັບ ສະມິດ, ເຟຣ໌ເດຣິກ ຈີ ວິວລຽມສ໌

ຄຳສອນ ແລະ ພັນທະສັນຍາ 82:1–7

ພຣະຜູ້ເປັນເຈົ້າເຊື້ອເຊີນເຮົາໃຫ້ກັບໃຈ ແລະ ປະຖິ້ມບາບຂອງເຮົາ.

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 82:1–7, ໃຫ້ຄິດທີ່ຈະຂຽນບາງສິ່ງທີ່ທ່ານໄດ້ຮຽນຮູ້ໄວ້: ຄຳເຕືອນກ່ຽວກັບບາບ ແລະ ຄວາມຈິງກ່ຽວກັບການໃຫ້ອະໄພ. ຄວາມຈິງເຫລົ່ານີ້ສາມາດຊ່ວຍທ່ານໃຫ້ຕ້ານທານກັບການລໍ້ລວງຂອງຜູ້ປໍລະປັກໄດ້ແນວໃດ?

ຄຳສອນ ແລະ ພັນທະສັນຍາ 82:8–10

ພຣະບັນຍັດແມ່ນສຳລັບຄວາມລອດຂອງເຮົາ ແລະ ການປົກປ້ອງເຮົາ.

ຖ້າຫາກທ່ານ—ຫລື ບາງຄົນທີ່ທ່ານຮູ້ຈັກ—ເຄີຍສົງໃສວ່າເປັນຫຍັງພຣະຜູ້ເປັນເຈົ້າຈຶ່ງມອບພຣະບັນຍັດຫລາຍຂໍ້ໃຫ້ເຮົາ, ຄຳສອນ ແລະ ພັນທະສັນຍາ 82:8–10 ສາມາດຊ່ວຍໄດ້. ຄວາມຮູ້ຫຍັງແດ່ຢູ່ໃນຂໍ້ເຫລົ່ານີ້ ທີ່ສາມາດຊ່ວຍທ່ານໃຫ້ອະທິບາຍຕໍ່ບາງຄົນ ເຖິງເຫດຜົນທີ່ທ່ານເລືອກເຮັດຕາມພຣະບັນຍັດຂອງພຣະຜູ້ເປັນເຈົ້າ? ທ່ານກໍຄວນພິຈາລະນາວິທີທີ່ພຣະບັນຍັດຂອງພຣະອົງໄດ້ປ່ຽນຊີວິດຂອງທ່ານແນວໃດ. ທ່ານຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າ ຂະນະທີ່ທ່ານອ່ານ ຂໍ້ທີ 10?

ເບິ່ງ ຄຳສອນ ແລະ ພັນທະສັນຍາ 130:20–21; Carole M. Stephens, “If Ye Love Me, Keep My Commandments,” Ensign ຫລື Liahona, Nov. 2015, 118–20 ນຳອີກ.

ຄຳສອນ ແລະ ພັນທະສັນຍາ 83

“ຈະຕ້ອງຈັດຫາໃຫ້ແມ່ໝ້າຍ ແລະ ເດັກກຳພ້າ.”

ໃນເດືອນເມສາ ປີ 1832, ຕາມທີ່ໄດ້ຮັບຄຳແນະນຳຈາກພຣະຜູ້ເປັນເຈົ້າ, ໂຈເຊັບ ສະມິດ ຊຶ່ງໄດ້ເດີນທາງເກືອບເຖິງ 800 ໄມ (1288 ກິໂລແມັດ) ໄປຢ້ຽມຢາມໄພ່ພົນ ຜູ້ທີ່ໄດ້ເຕົ້າໂຮມກັນຢູ່ ລັດມີເຊີຣີ (ເບິ່ງ ຄຳສອນ ແລະ ພັນທະສັນຍາ 78:9). ຊຸມຊົນໜຶ່ງທີ່ເພິ່ນໄດ້ໄປຢ້ຽມຢາມ ມີທັງແມ່ໝ້າຍທີ່ລ້ຽງລູກດ້ວຍຕົວຄົນດຽວ. ໃນບັນດາເຂົາເຈົ້າ ແມ່ນນາງຟີບີ ແພ໊ກ ແລະ ແອນນາ ຣໍເຈີ, ຜູ້ຊຶ່ງສາດສະດາຮູ້ຈັກເປັນສ່ວນຕົວ. ຢູ່ໃນລັດມີເຊີຣີ ໃນລະຫວ່າງປີ 1830, ກົດໝາຍລັດໄດ້ໃຫ້ສິດແບບຈຳກັດແກ່ແມ່ໝ້າຍ ເລື່ອງການໄດ້ຮັບຊັບສິນຂອງສາມີທີ່ເສຍຊີວິດ. ທ່ານຮຽນຮູ້ຫຍັງແດ່ຈາກ ພາກທີ 83 ກ່ຽວກັບຄວາມຮູ້ສຶກຂອງພຣະຜູ້ເປັນເຈົ້າ ກ່ຽວກັບແມ່ໝ້າຍ ແລະ ເດັກກໍພ້າ? ທ່ານຮູ້ຈັກໃຜບໍ ທີ່ຢູ່ໃນສະຖານະການນີ້ ຜູ້ສາມາດໄດ້ຮັບຜົນປະໂຫຍດຈາກຄວາມຮັກ ແລະ ການດູແລຂອງທ່ານ?

ເບິ່ງ ເອຊາຢາ 1:17; ຢາໂກໂບ 1:27 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 81:3.ທ່ານສາມາດມອບເຈ້ຍຫົວໃຈໃຫ້ສະມາຊິກໃນຄອບຄົວ ແລະ ເຊື້ອເຊີນເຂົາເຈົ້າໃຫ້ແຕ້ມ ຫລື ຂຽນບາງສິ່ງໃສ່ ທີ່ເຂົາເຈົ້າຢາກອະທິຖານເຖິງ. ໃຫ້ເວົ້າລົມກ່ຽວກັບຄວາມໝາຍ ທີ່ຈະອະທິຖານ “ສະເໝີໄປ, ໂດຍອອກສຽງ ແລະ ໃນໃຈຂອງເຈົ້າ.”

ຄຳສອນ ແລະ ພັນທະສັນຍາ 81:5.ເພື່ອຮຽນຮູ້ກ່ຽວກັບຫລັກທຳຢູ່ໃນຂໍ້ນີ້, ບາງທີຄອບຄົວຂອງທ່ານສາມາດແບ່ງປັນຕົວຢ່າງ ເຖິງຕອນທີ່ເຂົາເຈົ້າໄດ້ຮູ້ສຶກ “ອ່ອນແອ” ຫລື “ອ່ອນເພຍ” ແລະ ບາງຄົນໄດ້ຊ່ວຍເຫລືອ ຫລື ໃຫ້ກຳລັງແກ່ເຂົາເຈົ້າ. ໃຫ້ສົນທະນາວິທີທີ່ຄອບຄົວຂອງທ່ານສາມາດຮັບໃຊ້ກັນແລະກັນເປັນປະຈຳ ໃນວິທີທາງທີ່ລຽບງ່າຍ.

ຄຳສອນ ແລະ ພັນທະສັນຍາ 82:8–10.ບາງທີເກມທີ່ງ່າຍໆອາດຊ່ວຍຄອບຄົວຂອງທ່ານໃຫ້ຮູ້ສຶກຂອບຄຸນພຣະບັນຍັດຂອງພຣະເຈົ້າ. ສະມາຊິກຄົນໜຶ່ງໃນຄອບຄົວສາມາດໃຫ້ຄຳແນະນຳເພື່ອຊ່ວຍສະມາຊິກອີກຄົນໜຶ່ງໃນຄອບຄົວທີ່ຖືກເອົາຜ້າມັດຕາໄວ້ ເຮັດເຂົ້າຈີ່ຍັດໄສ້ ຫລື ຍ່າງໄປຕາມບ່ອນທີ່ມີສິ່ງຂອງກີດກັນ. ຄິດຫາບາງສິ່ງທີ່ມ່ວນຊື່ນ ແລະ ສ້າງສັນ! ແລ້ວສົນທະນາກ່ຽວກັບພຣະບັນຍັດຂອງພຣະເຈົ້າ ວ່າຄ້າຍຄືກັນກັບເກມນີ້ແນວໃດ.

ຄຳສອນ ແລະ ພັນທະສັນຍາ 82:18–19.ສະມາຊິກໃນຄອບຄົວແຕ່ລະຄົນສາມາດເຮັດສິ່ງໃດ ເພື່ອ “ພັດທະນາພອນສະຫວັນ [ຂອງຕົນ]” ແລະ “ໄດ້ຮັບພອນສະຫວັນອື່ນໆ”? ມັນອາດເປັນເລື່ອງມ່ວນຊື່ນທີ່ຈະຈັດການສະແດງພອນສະຫວັນຂອງຄອບຄົວ. ໃຫ້ຄິດຫາວິທີທີ່ຈະລວມພອນສະຫວັນ ອັນທີ່ຍາກທີ່ຈະສະແດງອອກ (ດັ່ງເຊັ່ນ ຂອງປະທານທາງວິນຍານ; ເບິ່ງ ຄຳສອນ ແລະ ພັນທະສັນຍາ 46:11–26). ເຮົາຈະສາມາດໃຊ້ພອນສະຫວັນຂອງເຮົາ ແລະ ແບ່ງປັນສິ່ງທີ່ເຮົາມີກັບຄອບຄົວ ແລະ ເພື່ອນຂອງເຮົາໄດ້ແນວໃດ? ການໃຊ້ພອນສະຫວັນຂອງເຮົາ ເພື່ອ “ເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ” ໝາຍຄວາມວ່າແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຄວາມເມດຕາເລີ່ມຈາກເຮົາ” ເພງສວດ ແລະ ເພງຂອງເດັກນ້ອຍ, 69; ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ” ນຳອີກ.

ການປັບປຸງການສິດສອນຂອງເຮົາ

ຖາມຄຳຖາມທີ່ນຳພາໄປສູ່ການກະທຳ. ໃຫ້ພິຈາລະນາຄຳຖາມທີ່ກະຕຸ້ນສະມາຊິກໃນຄອບຄົວຂອງທ່ານ ໃຫ້ສະທ້ອນຄິດເຖິງວິທີທີ່ເຂົາເຈົ້າສາມາດດຳລົງຊີວິດຕາມພຣະກິດຕິຄຸນໃຫ້ສົມບູນຫລາຍກວ່າເກົ່າແນວໃດ. “ຄຳຖາມເຫລົ່ານີ້ ຕາມປົກກະຕິແລ້ວ ບໍ່ແມ່ນສຳລັບການສົນທະນາ; ມັນແມ່ນສຳລັບການສະທ້ອນຄິດສ່ວນຕົວ” (Teaching in the Savior’s Way, 31).