“ວັນທີ 26 ເດືອນກໍລະກົດ–ວັນທີ 1 ເດືອນສິງຫາ. ຄຳສອນ ແລະ ພັນທະສັນຍາ 84: ‘ອຳນາດຂອງຄວາມເປັນເໝືອນພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 26 ເດືອນກໍລະກົດ–ວັນທີ 1 ເດືອນສິງຫາ. ຄຳສອນ ແລະ ພັນທະສັນຍາ 84,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ໂຈເຊັບ ສະມິດ ຮັບເອົາຖານະປະໂລຫິດແຫ່ງເມນຄີເສເດັກ

Restoration [ການຟື້ນຟູ], ໂດຍ ລີສ໌ ລີມັນ ສະວິນໂດ

ວັນທີ 26 ເດືອນກໍລະກົດ–ວັນທີ 1 ເດືອນສິງຫາ

ຄຳສອນ ແລະ ພັນທະສັນຍາ 84

“ອຳນາດຂອງຄວາມເປັນເໝືອນພຣະເຈົ້າ”

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 84, ໃຫ້ໄຕ່ຕອງຄຳແນະນຳໃຫ້ “ດຳລົງຊີວິດຕາມທຸກຄຳທີ່ອອກມາຈາກພຣະໂອດຂອງພຣະເຈົ້າ” (ຂໍ້ທີ 44). ທ່ານຈະດຳລົງຊີວິດຕາມພຣະຄຳຢູ່ໃນການເປີດເຜີຍນີ້ແນວໃດ?

ບັນທຶກຄວາມປະທັບໃຈຂອງທ່ານ

ນັບຕັ້ງແຕ່ຖານະປະໂລຫິດໄດ້ຖືກຟື້ນຟູ ໃນປີ 1829, ໄພ່ພົນຍຸກສຸດທ້າຍໄດ້ຮັບພອນໂດຍອຳນາດທີ່ສັກສິດນັ້ນ. ເຂົາເຈົ້າໄດ້ຮັບບັບຕິສະມາ, ໄດ້ຮັບການຢືນຢັນ, ແລະ ໄດ້ຖືກເອີ້ນໃຫ້ຮັບໃຊ້ໂດຍສິດອຳນາດຂອງຖານະປະໂລຫິດ, ຄືກັນກັບພວກເຮົາໄດ້ຮັບໃນທຸກວັນນີ້. ແຕ່ການເຂົ້າຫາອຳນາດຂອງຖານະປະໂລຫິດ ບໍ່ຄືກັບການເຂົ້າໃຈມັນຢ່າງຖີ່ຖ້ວນ, ແລະ ພຣະເຈົ້າມີຫລາຍກວ່ານັ້ນ ທີ່ພຣະອົງປະສົງໃຫ້ຜູ້ຮັບໃຊ້ຂອງພຣະອົງເຂົ້າໃຈ—ໂດຍສະເພາະກັບການຟື້ນຟູພິທີການຂອງພຣະວິຫານ ທີ່ກຳລັງຈະເກີດຂຶ້ນ. ການເປີດເຜີຍໃນປີ 1832 ກ່ຽວກັບຖານະປະໂລຫິດນັ້ນ, ດຽວນີ້ເປັນ ຄຳສອນ ແລະ ພັນທະສັນຍາ 84, ໄດ້ຂະຫຍາຍມະໂນພາບຂອງໄພ່ພົນ ເຖິງສິ່ງທີ່ຖານະປະໂລຫິດ ແມ່ນກ່ຽວກັບຫຍັງແທ້ໆ. ແລະ ມັນສາມາດເຮັດຄືກັນສຳລັບເຮົາໃນທຸກວັນນີ້. ເຖິງຢ່າງໃດ, ມັນມີຫລາຍສິ່ງຫລາຍຢ່າງທີ່ຕ້ອງຮຽນຮູ້ກ່ຽວກັບອຳນາດແຫ່ງສະຫວັນ ທີ່ດຳລົງ “ຂໍກະແຈແຫ່ງຄວາມຮູ້ຂອງພຣະເຈົ້າ,” ທີ່ສະແດງ “ອຳນາດແຫ່ງຄວາມເປັນເໝືອນພຣະເຈົ້າ,” ໃຫ້ປະຈັກ ແລະ ສິ່ງນັ້ນກະກຽມເຮົາ ໃຫ້ “ເຫັນພຣະພັກຂອງພຣະເຈົ້າ, ແມ່ນແຕ່ພຣະບິດາ, ແລະ ມີຊີວິດຢູ່” (ຂໍ້ທີ 19–22).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 84:1–5, 17–28

ເຮົາໄດ້ເຂົ້າເຖິງອຳນາດຂອງຖານະປະໂລຫິດຂອງພຣະເຈົ້າ ແລະ ພອນທັງຫລາຍ.

ເມື່ອທ່ານຄິດກ່ຽວກັບຄຳວ່າ ຖານະປະໂລຫິດ, ສິ່ງໃດໄດ້ເຂົ້າມາສູ່ຈິດໃຈ? ເລື້ອຍປານໃດທີ່ທ່ານໄດ້ຄິດກ່ຽວກັບ ຖານະປະໂລຫິດ ແລະ ເຖິງອິດທິພົນຂອງມັນຢູ່ໃນຊີວິດປະຈຳວັນຂອງທ່ານ? ຫລັງຈາກໄດ້ໄຕ່ຕອງຄຳຖາມເຫລົ່ານີ້ແລ້ວ, ໃຫ້ສຶກສາ ຄຳສອນ ແລະ ພັນທະສັນຍາ 84:1–5, 17–28, ແລະ ໃຫ້ພິຈາລະນາສິ່ງທີ່ພຣະຜູ້ເປັນເຈົ້າປະສົງໃຫ້ທ່ານຮູ້ກ່ຽວກັບອຳນາດຂອງຖານະປະໂລຫິດຂອງພຣະອົງ. ທ່ານສາມາດໃຊ້ຂໍ້ເຫລົ່ານີ້ເພື່ອບັນຍາຍຖານະປະໂລຫິດກັບບາງຄົນ ແລະ ອະທິບາຍເຖິງຈຸດປະສົງຂອງມັນແນວໃດ?

ທ່ານກໍຄວນໄຕ່ຕອງກ່ຽວກັບພິທີການຂອງຖານະປະໂລຫິດ ທີ່ທ່ານມີພາກສ່ວນໃນນັ້ນນຳອີກ. ທ່ານເຄີຍເຫັນ “ອຳນາດຂອງຄວາມເປັນເໝືອນພຣະເຈົ້າ” (ຂໍ້ທີ 20) ສະແດງໃຫ້ປະຈັກໃນພິທີການບໍ? ໃຫ້ພິຈາລະນາສິ່ງທີ່ພຣະຜູ້ເປັນເຈົ້າປະສົງໃຫ້ທ່ານເຮັດ ເພື່ອຮັບເອົາອຳນາດຂອງພຣະອົງຫລາຍຕື່ມອີກ ໃນຊີວິດຂອງທ່ານ.

ເບິ່ງ M. Russell Ballard, “Men and Women and Priesthood Power,” Ensign, Sept. 2014, 28–33; Gospel Topics, “Priesthood,” topics.ChurchofJesusChrist.org ນຳອີກ.

ຄຳສອນ ແລະ ພັນທະສັນຍາ 84:31–42

ຖ້າຫາກເຮົາຮັບເອົາພຣະຜູ້ເປັນເຈົ້າ ແລະ ຜູ້ຮັບໃຊ້ຂອງພຣະອົງ, ເຮົາຈະຮັບເອົາທຸກສິ່ງທີ່ພຣະອົງມີ.

ແອວເດີ ພອລ໌ ບີ ພີເປີ ໄດ້ສິດສອນວ່າ: “ມັນເປັນທີ່ໜ້າສົນໃຈ ທີ່ໃນຄຳສາບານ ແລະ ພັນທະສັນຍາຂອງຖານະປະໂລຫິດ [ຄຳສອນ ແລະ ພັນທະສັນຍາ 84:31–42], ພຣະຜູ້ເປັນເຈົ້າໃຊ້ຄຳກິລິຍາ ໄດ້ຮັບ ແລະ ຮັບເອົາ. ພຣະອົງບໍ່ໄດ້ໃຊ້ຄຳກິລິຍາ ແຕ່ງຕັ້ງ. ມັນແມ່ນຢູ່ໃນພຣະວິຫານທີ່ຊາຍ ແລະ ຍິງ—ພ້ອມກັນ—ໄດ້ຮັບ ແລະ ຮັບເອົາພອນ ແລະ ອຳນາດຂອງຖານະປະໂລຫິດແຫ່ງອາໂຣນ ແລະ ເມນຄີເສເດັກ ທັງສອງ” (“Revealed Realities of Mortality,” Ensign, Jan. 2016, 21).

ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 84:31–42, ໃຫ້ຊອກຫາຄຳວ່າ “ໄດ້ຮັບ” ແລະ “ຮັບເອົາ.” ໃຫ້ໄຕ່ຕອງສິ່ງທີ່ສອງຄຳນີ້ໝາຍເຖິງ ຢູ່ໃນສະພາບການນີ້. ທ່ານ “ຮັບເອົາ” ພຣະຜູ້ເປັນເຈົ້າ ແລະ ຜູ້ຮັບໃຊ້ຂອງພຣະອົງແນວໃດ?

ທ່ານກໍສາມາດສັງເກດເບິ່ງຄຳສັນຍາ ຢູ່ໃນຂໍ້ເຫລົ່ານີ້ ທີ່ກ່ຽວຂ້ອງກັບ ຄຳສາບານ ແລະ ພັນທະສັນຍາຂອງຖານະປະໂລຫິດນຳອີກ, ຊຶ່ງພຣະເຈົ້າ “ຝ່າຝືນບໍ່ໄດ້” (ຂໍ້ທີ 40). ທ່ານພົບເຫັນຫຍັງແດ່ທີ່ດົນໃຈທ່ານໃຫ້ຊື່ສັດຫລາຍກວ່າເກົ່າ ໃນການຮັບເອົາພຣະບິດາ, ຜູ້ຮັບໃຊ້ຂອງພຣະອົງ, ແລະ ອຳນາດຂອງຖານະປະໂລຫິດຂອງພຣະອົງ?

ເບິ່ງ ຄູ່ມືພຣະຄຳພີ, “ພັນທະສັນຍາ,” “ຄຳສາບານ,” scriptures.ChurchofJesusChrist.org ນຳອີກ.

ຄຳສອນ ແລະ ພັນທະສັນຍາ 84:43–58

ເຮົາມາຫາພຣະຄຣິດ ເມື່ອເຮົາເອົາໃຈໃສ່ຕໍ່ພຣະຄຳຂອງພຣະອົງ ແລະ ເຊື່ອຟັງພຣະວິນຍານຂອງພຣະອົງ.

ການອ່ານພຣະຄຳພີ ແລະ ອ່ານຖ້ອຍຄຳຂອງສາດສະດາເປັນປະຈຳ ມີຄວາມໝາຍຫລາຍກວ່າພຽງແຕ່ເປັນລາຍການທາງວິນຍານທີ່ຕ້ອງເຮັດໃຫ້ແລ້ວໆໄປເທົ່ານັ້ນ. ທ່ານພົບເຫັນຄວາມຈິງໃດແດ່ ຢູ່ໃນ ຄຳສອນ ແລະ ພັນທະສັນຍາ 84:43–58 ທີ່ຊ່ວຍທ່ານໃຫ້ເຂົ້າໃຈເຫດຜົນທີ່ທ່ານຈຳເປັນຕ້ອງສຶກສາພຣະຄຳຂອງພຣະເຈົ້າຢ່າງສະໝ່ຳສະເໝີ? ໃຫ້ສັງເກດເບິ່ງຄວາມແຕກຕ່າງລະຫວ່າງຄວາມສະຫວ່າງ ແລະ ຄວາມມືດ ຢູ່ໃນຂໍ້ເຫລົ່ານີ້, ເຖິງວິທີທີ່ “ການເອົາໃຈໃສ່ຢ່າງພາກພຽນຕໍ່ພຣະຄຳແຫ່ງຊີວິດນິລັນດອນ” ໄດ້ນຳຄວາມສະຫວ່າງ, ຄວາມຈິງ, ແລະ “ພຣະວິນຍານຂອງພຣະເຢຊູຄຣິດ” ເຂົ້າມາໃນຊີວິດຂອງທ່ານແນວໃດ? (ຂໍ້ທີ 43, 45).

ເບິ່ງ 2 ນີໄຟ 32:3; “The Book of Mormon—Keystone of Our Religion,” Teachings of Presidents of the Church: Ezra Taft Benson (2014), 125–35 ນຳອີກ.

ການສຶກສາພຣະຄຳພີຊ່ວຍເຮົາໃຫ້ຮູ້ສຶກເຖິງອິດທິພົນຂອງພຣະວິນຍານ.

ຄຳສອນ ແລະ ພັນທະສັນຍາ 84:62–91

ພຣະຜູ້ເປັນເຈົ້າຈະສະຖິດຢູ່ກັບເຮົາ ເມື່ອເຮົາຢູ່ໃນການຮັບໃຊ້ຂອງພຣະອົງ.

ຂະນະທີ່ທ່ານອ່ານຂໍ້ເຫລົ່ານີ້, ທ່ານສາມາດຊີ້ບອກວິທີທີ່ພຣະຜູ້ເປັນເຈົ້າໄດ້ກ່າວ ວ່າພຣະອົງສະໜັບສະໜູນອັກຄະສາວົກ ແລະ ຜູ້ສອນສາດສະໜາຂອງພຣະອົງແນວໃດ. ຄຳສັນຍາເຫລົ່ານີ້ກ່ຽວຂ້ອງກັບວຽກງານທີ່ພຣະອົງໄດ້ຂໍໃຫ້ທ່ານເຮັດແນວໃດ? ຍົກຕົວຢ່າງ, ຄຳສັນຍາຢູ່ໃນ ຂໍ້ທີ 88 ໄດ້ເກີດເປັນຈິງຢູ່ໃນຊີວິດຂອງທ່ານແນວໃດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 84:6–18.ຫລັງຈາກການອ່ານກ່ຽວກັບວິທີທີ່ໂມເຊຮັບເອົາສິດອຳນາດຂອງຖານະປະໂລຫິດຂອງເພິ່ນ, ຜູ້ດຳລົງຖານະປະໂລຫິດຢູ່ໃນຄອບຄົວຂອງທ່ານ ຫລື ອ້າຍນ້ອງຜູ້ປະຕິບັດສາດສະໜາກິດ ສາມາດແບ່ງປັນປະສົບການຂອງເຂົາເຈົ້າ ກ່ຽວກັບການຖືກແຕ່ງຕັ້ງສູ່ຕຳແໜ່ງຖານະປະໂລຫິດ. ຖ້າເປັນໄປໄດ້, ເຂົາເຈົ້າສາມາດແບ່ງປັນ ແລະ ສົນທະນາກ່ຽວກັບເສັ້ນສາຍສິດອຳນາດຂອງຖານະປະໂລຫິດ. ເປັນຫຍັງມັນຈຶ່ງສຳຄັນທີ່ເຮົາສາມາດສືບສາວສິດອຳນາດຂອງຖານະປະໂລຫິດ ຢູ່ໃນສາດສະໜາຈັກ ໃນທຸກວັນນີ້ ກັບຄືນໄປຫາສິດອຳນາດຂອງພຣະເຢຊູຄຣິດ? ໃນການຂໍເອົາເສັ້ນສາຍສິດອຳນາດຂອງຖານະປະໂລຫິດ, ໃຫ້ສົ່ງອີເມວໄປທີ່ lineofauthority@ChurchofJesusChrist.org.

ຄຳສອນ ແລະ ພັນທະສັນຍາ 84:20–21.ຕອນໃດທີ່ຄອບຄົວຂອງທ່ານ ໄດ້ປະສົບກັບ “ອຳນາດຂອງຄວາມເປັນເໝືອນພຣະເຈົ້າ” ສະແດງໃຫ້ປະຈັກຜ່ານທາງພິທີການ ດັ່ງເຊັ່ນ ການບັບຕິສະມາ ຫລື ສິນລະລຶກ? ບາງເທື່ອພວກທ່ານຄວນເວົ້າລົມກ່ຽວກັບວິທີທີ່ພິທີການເຫລົ່ານີ້ ນຳອຳນາດຂອງພຣະເຈົ້າ ມາສູ່ຊີວິດຂອງພວກທ່ານແນວໃດ. ພວກທ່ານກໍສາມາດສະແດງຮູບພາບພຣະວິຫານນຳອີກ ແລະ ສົນທະນາກ່ຽວກັບພິທີການຂອງພຣະວິຫານ ທີ່ມອບອຳນາດເພີ່ມເຕີມໃຫ້ແກ່ພວກທ່ານ ເພື່ອກາຍເປັນເໝືອນພຣະຜູ້ຊ່ວຍໃຫ້ລອດຫລາຍກວ່າເກົ່າ. ພວກທ່ານອາດຢາກຮ້ອງເພງກ່ຽວກັບຖານະປະໂລຫິດ, ດັ່ງເຊັ່ນ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40), ແລະ ສົນທະນາສິ່ງທີ່ເພງນີ້ສິດສອນກ່ຽວກັບຖານະປະໂລຫິດແນວໃດ.

ຄຳສອນ ແລະ ພັນທະສັນຍາ 84:43–44.ພວກທ່ານສາມາດກະກຽມອາຫານ ຫລື ຂອງກິນຫລິ້ນນຳກັນ ແລະ ໝາຍເຄື່ອງປະສົມແຕ່ລະຢ່າງ ດ້ວຍຖ້ອຍຄຳ ຫລື ສຳນວນ ຈາກ ຂໍ້ທີ 44. ມັນສຳຄັນແນວໃດທີ່ເຮົາຈະໃຊ້ເຄື່ອງປະສົມທຸກຢ່າງ? ມັນສຳຄັນແນວໃດທີ່ຈະດຳລົງຊີວິດ ທຸກວັນ ຕາມພຣະຄຳຂອງພຣະເຈົ້າ?

ຄຳສອນ ແລະ ພັນທະສັນຍາ 84:98–102.ເຮົາຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກ “ເພງໃໝ່” (ຂໍ້ທີ 98) ຢູ່ໃນຂໍ້ເຫລົ່ານີ້? ເຮົາສາມາດເຮັດສິ່ງໃດ ໃນວັນເວລາຂອງເຮົາ ເພື່ອຊ່ວຍໃຫ້ມີສະພາບດັ່ງທີ່ບັນຍາຍຢູ່ໃນເພງນີ້?

ຄຳສອນ ແລະ ພັນທະສັນຍາ 84:106–10.ຄອບຄົວຂອງເຮົາ “ເສີມສ້າງນຳກັນ” ໂດຍຂອງປະທານ ແລະ ຄວາມພະຍາຍາມຂອງ “ອະໄວຍະວະທຸກສ່ວນ” ແນວໃດ? (ຂໍ້ທີ 110).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30; ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ” ນຳອີກ.

ການປັບປຸງການສິດສອນຂອງເຮົາ

ສະເໜີຄຳເຊື້ອເຊີນໃຫ້ປະຕິບັດ ແລະ ຕິດຕາມເບິ່ງ. ເມື່ອທ່ານເຊື້ອເຊີນຄອບຄົວຂອງທ່ານໃຫ້ປະຕິບັດຕາມສິ່ງທີ່ເຂົາເຈົ້າໄດ້ຮຽນຮູ້, ທ່ານໄດ້ສະແດງໃຫ້ເຂົາເຈົ້າເຫັນວ່າ ພຣະກິດຕິຄຸນເປັນບາງສິ່ງທີ່ຄວນດຳລົງຊີວິດຕາມ, ບໍ່ແມ່ນພຽງແຕ່ເວົ້າເຖິງລ້າໆ. ທ່ານຈະເຊື້ອເຊີນເຂົາເຈົ້າໃຫ້ປະຕິບັດຕາມສິ່ງໃດ ຈາກການສຶກສາຂອງທ່ານ ໃນ ຄຳສອນ ແລະ ພັນທະສັນຍາ 84?