“ວັນທີ 9–15 ເດືອນສິງຫາ. ຄຳສອນ ແລະ ພັນທະສັນຍາ 88: ‘ສະຖາປະນາ … ບ້ານຂອງພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 9–15 ເດືອນສິງຫາ. ຄຳສອນ ແລະ ພັນທະສັນຍາ 88,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຫ້ອງທີ່ມີຕັ່ງ ແລະ ແປ້ນມ້ານັ່ງ

ວັນທີ 9–15 ເດືອນສິງຫາ

ຄຳສອນ ແລະ ພັນທະສັນຍາ 88

“ສະຖາປະນາ … ບ້ານຂອງພຣະເຈົ້າ”

ປະທານຣະໂຊ ເອັມ ແນວສັນ ໄດ້ກ່າວວ່າ, “ຂ້າພະເຈົ້າສັນຍາວ່າ ເມື່ອທ່ານທຳງານຢ່າງພາກພຽນ ເພື່ອສ້ອມແປງບ້ານເຮືອນຂອງທ່ານ ໃຫ້ເປັນສູນກາງຂອງການຮຽນຮູ້ພຣະກິດຕິຄຸນ, … ອິດທິພົນຂອງຜູ້ປໍລະປັກໃນຊີວິດ ຂອງທ່ານ ແລະ ໃນບ້ານເຮືອນ ຂອງທ່ານ ຈະລົດນ້ອຍຖອຍລົງ” (“Becoming Exemplary Latter-day Saints,” Ensign ຫລື Liahona, Nov. 2018, 113).

ບັນທຶກຄວາມປະທັບໃຈຂອງທ່ານ

ບາງຄັ້ງບາງຄາວ, ພຣະຜູ້ເປັນເຈົ້າໄດ້ໃຫ້ເຮົາເຫັນໜ້ອຍໜຶ່ງເຖິງ “ເດຊານຸພາບ ແລະ ອຳນາດ” ອັນບໍ່ມີຂອບເຂດຂອງພຣະອົງ (ຄຳສອນ ແລະ ພັນທະສັນຍາ 88:47) ຜ່ານທາງການເປີດເຜີຍຢ່າງຫລວງຫລາຍຕໍ່ສາດສະດາຂອງພຣະອົງ. ຄຳສອນ ແລະ ພັນທະສັນຍາ 88 ເປັນການເປີດເຜີຍທີ່ດີເລີດ—ກ່ຽວກັບຄວາມສະຫວ່າງ ແລະ ລັດສະໝີພາບ ແລະ ອານາຈັກ ທີ່ສາມາດເຮັດໃຫ້ບັນຫາຢູ່ໃນໂລກ ເບິ່ງຄືບໍ່ສຳຄັນເມື່ອປຽບທຽບ. ແມ່ນແຕ່ຖ້າຫາກເຮົາບໍ່ສາມາດເຂົ້າໃຈທຸກສິ່ງທັງໝົດ ກັບສິ່ງທີ່ພຣະຜູ້ເປັນເຈົ້າກຳລັງສິດສອນເຮົາ, ແຕ່ຢ່າງໜ້ອຍເຮົາກໍສາມາດຮູ້ສຶກວ່າ ມີຫລາຍສິ່ງກ່ຽວກັບນິລັນດອນ ຊຶ່ງເກີນກວ່າທີ່ເຮົາເຂົ້າໃຈຢູ່ໃນເວລານີ້. ແນ່ນອນ, ພຣະຜູ້ເປັນເຈົ້າບໍ່ໄດ້ກ່າວເຖິງສິ່ງລຶກລັບທີ່ຍິ່ງໃຫຍ່ເຫລົ່ານີ້ ເພື່ອເຮັດໃຫ້ເຮົາຢ້ານກົວ ຫລື ເຮັດໃຫ້ເຮົາຮູ້ສຶກບໍ່ມີຄ່າ. ຕາມຈິງແລ້ວ, ພຣະອົງໄດ້ສັນຍາວ່າ, “ວັນນັ້ນຈະມາເຖິງ ເມື່ອພວກເຈົ້າ ຈະ ເຂົ້າໃຈແມ່ນແຕ່ພຣະເຈົ້າ” (ຂໍ້ທີ 49; ເນັ້ນຄຳເນີ້ງ). ບາງທີເພາະຈຸດປະສົງທີ່ສຳຄັນນັ້ນ ພຣະຜູ້ເປັນເຈົ້າຈຶ່ງໄດ້ຊຸກຍູ້ໄພ່ພົນຂອງພຣະອົງຢູ່ໃນເມືອງເຄີດແລນ ໃຫ້ຈັດຕັ້ງໂຮງຮຽນຂອງສາດສະດາຂຶ້ນ. “ຈົ່ງວາງລະບຽບຕົວເອງ,” ພຣະອົງໄດ້ກ່າວ. “ຕຽມສິ່ງທີ່ຈຳເປັນທຸກຢ່າງ, ແລະ ສະຖາປະນາ … ບ້ານຂອງພຣະເຈົ້າ” (ຂໍ້ທີ 119). ເພາະຢູ່ພາຍໃນບ້ານສັກສິດຂອງພຣະເຈົ້າ—ແລະ ໃນບ້ານເຮືອນຂອງເຮົາ—ທີ່ພຣະອົງສາມາດ, ຫລາຍກວ່າບ່ອນອື່ນໃດ, ເຮັດໃຫ້ເຮົາເຫັນພາບທີ່ເກີນກວ່າໂລກມະຕະ, “ເປີດເຜີຍພຣະພັກຂອງພຣະອົງແກ່ [ເຮົາ],” ແລະ ກະກຽມເຮົາໃຫ້ສາມາດ “ທົນກັບລັດສະໝີພາບຂອງອານາຈັກຊັ້ນສູງ” (ຂໍ້ທີ 68, 22).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 88

ພຣະຜູ້ເປັນເຈົ້າສະເໜີມອບຄວາມຫວັງ ແລະ ສັນຕິສຸກໃຫ້ເຮົາ.

ບໍ່ພຽງເທົ່າໃດມື້ ຫລັງຈາກການເຕືອນກ່ຽວກັບສົງຄາມ ທີ່ຈະ “ລຸກລາມໄປເຖິງປະຊາຊາດທັງປວງ” (ຄຳສອນ ແລະ ພັນທະສັນຍາ 87:2), ພຣະຜູ້ເປັນເຈົ້າໄດ້ມອບການເປີດເຜີຍໃຫ້ແກ່ໂຈເຊັບ ສະມິດ ເອີ້ນວ່າ “‘ໃບໝາກກອກ’ … ເດັດອອກມາຈາກຕົ້ນໄມ້ຂອງເມືອງສຸຂະເສີມ, ເປັນຂ່າວສານແຫ່ງສັນຕິສຸກຂອງພຣະຜູ້ເປັນເຈົ້າແກ່ພວກເຂົາ” (ຄຳສອນ ແລະ ພັນທະສັນຍາ 88, ຫົວຂໍ້ພາກ). ການເປີດເຜີຍນີ້ ຄືກັນກັບໃບໝາກກອກ, ສັນຍາລັກແບບດັ້ງເດີມແຫ່ງສັນຕິສຸກແນວໃດ? (ເບິ່ງ ປະຖົມມະການ 8:11 ນຳອີກ). ຄວາມຈິງໃດແດ່ຢູ່ໃນພາກນີ້ ທີ່ຊ່ວຍທ່ານໃຫ້ຮູ້ສຶກມີຄວາມຫວັງ ແລະ ສັນຕິສຸກ ໃນພຣະຄຣິດ?

ຄຳສອນ ແລະ ພັນທະສັນຍາ 88:6–67

ຄວາມສະຫວ່າງ ແລະ ກົດ ມາຈາກພຣະເຢຊູຄຣິດ.

ຄຳວ່າ ຄວາມສະຫວ່າງ ແລະ ກົດ ໄດ້ຖືກກ່າວຊ້ຳຫລາຍເທື່ອຢູ່ໃນ ພາກທີ 88. ຂໍ້ຄວາມເຫລົ່ານີ້ໄດ້ຖືກໃຊ້ຢູ່ໃນພຣະຄຳພີອື່ນໆ ເພື່ອບັນຍາຍເຖິງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ (ສຳລັບຕົວຢ່າງ, ໃຫ້ເບິ່ງ ເອຊາຢາ 60:19; ໂຢຮັນ 1:1–9; 3 ນີໄຟ 15:9). ໃຫ້ໝາຍ ຫລື ບັນທຶກ ບ່ອນທີ່ທ່ານພົບເຫັນຂໍ້ຄວາມເຫລົ່ານີ້ ຢູ່ໃນ ຄຳສອນ ແລະ ພັນທະສັນຍາ 88:6–67, ແລະ ຂຽນສິ່ງທີ່ທ່ານໄດ້ຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ, ຄວາມສະຫວ່າງ, ແລະ ກົດ ລົງໄວ້. ຂໍ້ເຫລົ່ານີ້ອາດດົນໃຈທ່ານໃຫ້ທຳການປ່ຽນແປງໃນຊີວິດຂອງທ່ານ ເພື່ອຮັບເອົາຄວາມສະຫວ່າງ ແລະ ດຳລົງຊີວິດຕາມ “ກົດຂອງພຣະຄຣິດ” ດ້ວຍຄວາມຊື່ສັດກວ່າເກົ່າ (ຂໍ້ທີ 21).

ເບິ່ງ Sharon Eubank, “Christ: The Light That Shines in Darkness,” Ensign ຫລື Liahona, May 2019, 73–76 ນຳອີກ.

ຄຳສອນ ແລະ ພັນທະສັນຍາ 88:62–126

ຕຽມສິ່ງທີ່ຈຳເປັນທຸກຢ່າງ.

ໃນບາງວິທີ, ເຮົາກຳລັງມີຊີວິດຢູ່ໃນຊ່ວງເວລາທີ່ພຣະຜູ້ເປັນເຈົ້າໄດ້ບັນຍາຍໄວ້ ເມື່ອ “ທຸກສິ່ງທັງປວງຈະຢູ່ໃນຄວາມສັບສົນວຸ້ນວາຍ; ແລະ ແນ່ນອນ, ໃຈຂອງມະນຸດຈະທໍ້ຖອຍ” (ຄຳສອນ ແລະ ພັນທະສັນຍາ 88:91). ຂະນະທີ່ທ່ານອ່ານ ຂໍ້ທີ 62–126, ໃຫ້ພິຈາລະນາວິທີທີ່ຄຳແນະນຳຂອງພຣະຜູ້ເປັນເຈົ້າ ສາມາດກະກຽມທ່ານສຳລັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດແນວໃດ. ຕໍ່ໄປນີ້ແມ່ນຄຳຖາມຈຳນວນໜ້ອຍໜຶ່ງ ເພື່ອໃຫ້ພິຈາລະນາ:

ຂໍ້ທີ 62–76.ຂະນະທີ່ທ່ານໄຕ່ຕອງຂໍ້ເຫລົ່ານີ້, ທ່ານໄດ້ຮັບການດົນໃຈໃຫ້ເຮັດສິ່ງໃດ ເພື່ອຈະໄດ້ “ເຂົ້າໃກ້” ພຣະເຈົ້າ? (ຂໍ້ທີ 63). ໃຫ້ພິຈາລະນາພຣະບັນຊາຂອງພຣະຜູ້ເປັນເຈົ້າ ໃຫ້ “ຊຳລະຕົນໃຫ້ບໍລິສຸດ” ໝາຍເຖິງສິ່ງໃດຕໍ່ທ່ານ (ຂໍ້ທີ 68).

ຂໍ້ທີ 77–80, 118–26.ເປັນຫຍັງມັນຈຶ່ງ “ສົມຄວນສຳລັບພວກເຈົ້າທີ່ຈະເຂົ້າໃຈ” ທັງເລື່ອງທີ່ເປັນຄຳສອນ ແລະ ເລື່ອງທີ່ເປັນທາງໂລກ? (ຂໍ້ທີ 78). ທ່ານຕິດຕາມຄຳແນະນຳ ທີ່ຈະ “ສະແຫວງຫາການຮຽນຮູ້” ແນວໃດ? (ຂໍ້ທີ 118). ທ່ານຄິດວ່າ ການຮຽນຮູ້ “ໂດຍການສຶກສາ ແລະ ໂດຍສັດທາ” ໝາຍຄວາມວ່າແນວໃດ?

ຂໍ້ທີ 81–116.ໃຫ້ຄິດທີ່ຈະບັນທຶກຄຳທຳນາຍກ່ຽວກັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ ຢູ່ໃນຂໍ້ເຫລົ່ານີ້ໄວ້. ທ່ານຄິດວ່າເປັນຫຍັງພຣະຜູ້ເປັນເຈົ້າປະສົງໃຫ້ທ່ານຮູ້ກ່ຽວກັບສິ່ງເຫລົ່ານີ້?

ຂໍ້ທີ 117–26.ໃຫ້ຄິດທີ່ຈະອ່ານຂໍ້ເຫລົ່ານີ້ ໂດຍມີພຣະວິຫານຢູ່ໃນຈິດໃຈ; ທ່ານພົບເຫັນຫຍັງແດ່ທີ່ສາມາດຊ່ວຍທ່ານໃຫ້ກະກຽມທີ່ຈະເຂົ້າໄປໃນບ້ານຂອງພຣະຜູ້ເປັນເຈົ້າ?

ເບິ່ງ D. Todd Christofferson, “Preparing for the Lord’s Return,” Ensign ຫລື Liahona, May 2019, 81–84; David A. Bednar, “Seek Learning by Faith,” Ensign, Sept. 2007, 61–68 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 88:14–33, 95–101.ເຮົາຮຽນຮູ້ຫຍັງແດ່ກ່ຽວກັບການຟື້ນຄືນພຣະຊົນ ຈາກຂໍ້ເຫລົ່ານີ້? ຄວາມຈິງເຫລົ່ານີ້ມີອິດທິພົນຕໍ່ການເລືອກຂອງເຮົາແນວໃດ?

ຄຳສອນ ແລະ ພັນທະສັນຍາ 88:33.ທ່ານສາມາດເລີ່ມຕົ້ນສົນທະນາກ່ຽວກັບຂໍ້ນີ້ ໂດຍການຂໍໃຫ້ສະມາຊິກໃນຄອບຄົວເວົ້າລົມກ່ຽວກັບຂອງປະທານທີ່ເຂົາເຈົ້າໄດ້ຮັບ—ທັງສິ່ງທີ່ເຂົາເຈົ້າໄດ້ຮັບດ້ວຍຄວາມປິຕິຍິນດີ ແລະ ບາງຢ່າງທີ່ເຂົາເຈົ້າບໍ່ປິຕິຍິນດີ. ເຮົາຈະສາມາດສະແດງໃຫ້ພຣະຜູ້ເປັນເຈົ້າເຫັນວ່າເຮົາປິຕິຍິນດີ ກັບຂອງປະທານແຫ່ງລັດສະໝີພາບຊັ້ນສູງທີ່ພຣະອົງປະທານໃຫ້ເຮົາແນວໃດ? ເຮົາປິຕິຍິນດີກັບ “ຜູ້ປະທານຂອງປະທານ” ແນວໃດ?

ຄຳສອນ ແລະ ພັນທະສັນຍາ 88:63, 68.ຂໍ້ເຫລົ່ານີ້ບັນຈຸຄຳປະຕິບັດບາງຢ່າງ ທີ່ອາດດົນໃຈທ່ານໃຫ້ຄິດຫາວິທີທີ່ສ້າງສັນ ເພື່ອສິດສອນຂ່າວສານ ຢູ່ໃນຂໍ້ເຫລົ່ານີ້ ໃຫ້ແກ່ລູກໆຂອງທ່ານ. ຍົກຕົວຢ່າງ, ທ່ານອາດຫລິ້ນໝາກລີ້ ເພື່ອສົນທະນາສຳນວນ “ສະແຫວງຫາ ເຮົາດ້ວຍຄວາມພາກພຽນ ແລະ ພວກເຈົ້າຈະ ພົບ ເຮົາ” (ຂໍ້ທີ 63; ເນັ້ນຄຳເນີ້ງ).

ຄຳສອນ ແລະ ພັນທະສັນຍາ 88:81.ນຳກັນເປັນຄອບຄົວ, ໃຫ້ຊອກຫາເຄື່ອງໝາຍຊີ້ບອກຄຳເຕືອນບາງຢ່າງ ຢູ່ໃນເຮືອນ ຫລື ຢູ່ອ້ອມແອ້ມເຮືອນ, ດັ່ງເຊັ່ນຄຳເຕືອນຢູ່ກັບກ່ອງຢາ ຫລື ປ້າຍຈາລະຈອນສຳລັບຜູ້ຂັບລົດ. ຄຳເຕືອນເຫລົ່ານີ້ຊ່ວຍທ່ານແນວໃດ? ພຣະບິດາເທິງສະຫວັນປະສົງໃຫ້ເຮົາ “ເຕືອນເພື່ອນບ້ານ [ຂອງເຮົາ]” ກ່ຽວກັບສິ່ງໃດ?

ເບິ່ງ ຄຳສອນ ແລະ ພັນທະສັນຍາ 88:119.ເພື່ອດົນໃຈຄອບຄົວຂອງທ່ານເຮັດໃຫ້ບ້ານເຮືອນຂອງທ່ານເປັນຄືກັນກັບຄຳບັນຍາຍ ຢູ່ໃນ ຂໍ້ທີ 119, ໃຫ້ພະຍາຍາມເຮັດບາງສິ່ງ ຄືກັບສິ່ງນີ້: ຂຽນສຳນວນຈາກຂໍ້ນີ້ໃສ່ເຈ້ຍນ້ອຍ, ແລະ ໃຊ້ເຈ້ຍນ້ອຍເຫລົ່ານັ້ນປົກປິດພຣະວິຫານໄວ້. ອ່ານ ຄຳສອນ ແລະ ພັນທະສັນຍາ 88:119 ນຳກັນ, ແລະ ໃຫ້ສະມາຊິກໃນຄອບຄົວດຶງເອົາເຈ້ຍນ້ອຍແຕ່ລະໃບອອກ ເມື່ອເຂົາເຈົ້າໄດ້ຍິນສຳນວນທີ່ຕົງກັນຢູ່ໃນຂໍ້ນີ້. ເຮົາຈະເຮັດແນວໃດ ເພື່ອໃຫ້ບ້ານເຮືອນຂອງເຮົາເປັນ “ບ້ານຂອງພຣະເຈົ້າ”? (ຂໍ້ທີ 119).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ໂອ້ພຣະບິດາຜູ້ນິລັນ,” ເພງສວດ ແລະ ເພງຂອງເດັກນ້ອຍ, 18.

ການປັບປຸງການສິດສອນຂອງເຮົາ

ປ່ອຍໃຫ້ລູກໆສະແດງການປະດິດຄິດສ້າງຂອງເຂົາ. ເມື່ອທ່ານເຊື້ອເຊີນລູກໆຂອງທ່ານໃຫ້ສ້າງບາງສິ່ງ ທີ່ກ່ຽວຂ້ອງກັບຫລັກທຳພຣະກິດຕິຄຸນ, ທ່ານບໍ່ພຽງແຕ່ຊ່ວຍພວກເຂົາໃຫ້ເຂົ້າໃຈຫລັກທຳພຣະກິດຕິຄຸນຫລາຍຂຶ້ນກວ່າເກົ່າເທົ່ານັ້ນ, ແຕ່ທ່ານຍັງໄດ້ເຕືອນໃຈພວກເຂົາດ້ວຍສິ່ງຂອງທີ່ສາມາດຈັບບາຍໄດ້ ກ່ຽວກັບສິ່ງທີ່ພວກເຂົາໄດ້ຮຽນຮູ້ນຳອີກ (ເບິ່ງ Teaching in the Savior’s Way, 25).