“ວັນທີ 23–29 ເດືອນສິງຫາ. ຄຳສອນ ແລະ ພັນທະສັນຍາ 93: ‘ຮັບເອົາຄວາມສົມບູນຂອງພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 23–29 ເດືອນສິງຫາ. ຄຳສອນ ແລະ ພັນທະສັນຍາ 93,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ສະເຕຟາໂນເຫັນພຣະເຈົ້າ ແລະ ພຣະເຢຊູຄຣິດ

I See the Son of Man Standing on the Right Hand of God [ຂ້າພະເຈົ້າເຫັນບຸດມະນຸດຢືນຢູ່ກ້ຳຂວາພຣະຫັດຂອງພຣະເຈົ້າ], ໂດຍ ວາວເຕີ ເຣນ

ວັນທີ 23–29 ເດືອນສິງຫາ

ຄຳສອນ ແລະ ພັນທະສັນຍາ 93

“ຮັບເອົາຄວາມສົມບູນຂອງພຣະອົງ”

ຄຳສອນ ແລະ ພັນທະສັນຍາ 93 ສິດສອນວ່າ “ຄວາມຈິງຄືຄວາມຮູ້ແຈ້ງເຖິງສິ່ງທີ່ເປັນຢູ່, ແລະ ດັ່ງທີ່ໄດ້ເປັນມາ, ແລະ ດັ່ງທີ່ຈະເປັນ” (ຂໍ້ທີ 24). ຂະນະທີ່ທ່ານສຶກສາພາກນີ້, ໃຫ້ຊອກຫາຄວາມຈິງ ແລະ ບັນທຶກສິ່ງທີ່ທ່ານຮຽນຮູ້. ທ່ານເຕັມໃຈທີ່ຈະເຮັດຫຍັງແດ່ເພື່ອຈະໄດ້ຮັບຄວາມຈິງ? (ເບິ່ງ ຂໍ້ທີ 27–28).

ບັນທຶກຄວາມປະທັບໃຈຂອງທ່ານ

“ເມື່ອທ່ານຂຶ້ນຂັ້ນໄດ,” ໂຈເຊັບ ສະມິດ ໄດ້ສິດສອນ, “ທ່ານຈະຕ້ອງເລີ່ມຕົ້ນແຕ່ຂັ້ນທຳອິດ, ແລະ ຂຶ້ນໄປເທື່ອລະຂັ້ນ ເຖິງຂັ້ນສຸດທ້າຍ; ແລະ ຫລັກທຳຂອງພຣະກິດຕິຄຸນກໍເປັນເຊັ່ນນັ້ນ—ທ່ານຈະຕ້ອງເລີ່ມຕົ້ນແຕ່ຂໍ້ທຳອິດ, ແລະ ຕໍ່ໄປຈົນກະທັ້ງທ່ານຮຽນຮູ້ຫລັກທຳທັງໝົດຂອງຄວາມສູງສົ່ງ” (Teachings of Presidents of the Church: Joseph Smith [2007], 268).

ບາງເທື່ອຂັ້ນໄດແຫ່ງຄວາມສູງສົ່ງເບິ່ງຄືສູງເກີນກວ່າຈະຂຶ້ນເຖິງໄດ້, ແຕ່ເຮົາໄດ້ເກີດມາເພື່ອຈະປີນຂຶ້ນຈົນເຖິງຂັ້ນສຸດທ້າຍ. ຄວາມຈຳກັດໃດກໍຕາມທີ່ເຮົາອາດເຫັນຢູ່ໃນຕົວເຮົາເອງ, ແຕ່ພຣະບິດາເທິງສະຫວັນ ແລະ ພຣະບຸດຂອງພຣະອົງເຫັນບາງສິ່ງທີ່ສະຫງ່າລາສີໃນຕົວເຮົາ, ບາງສິ່ງທີ່ເປັນເໝືອນພຣະເຈົ້າ. ຄືກັນກັບທີ່ພຣະເຢຊູຄຣິດ “ໄດ້ຢູ່ໃນການເລີ່ມຕົ້ນກັບພຣະບິດາ,” ແລະ “ພວກເຈົ້າຄືກັນ” (ຄຳສອນ ແລະ ພັນທະສັນຍາ 93:21, 23). ຄືກັນກັບທີ່ພຣະອົງ “ໄດ້ຮັບຈາກພຣະຄຸນໜຶ່ງຫາອີກພຣະຄຸນໜຶ່ງ, ຈົນກວ່າພຣະອົງໄດ້ຮັບຄວາມສົມບູນ,” ແລະ ເຊັ່ນດຽວກັນ “ພວກເຈົ້າຈະໄດ້ຮັບພຣະຄຸນແທນພຣະຄຸນ” (ຂໍ້ທີ 13, 20). ພຣະກິດຕິຄຸນທີ່ຟື້ນຟູສິດສອນເຮົາກ່ຽວກັບສະພາບທີ່ແທ້ຈິງຂອງພຣະເຈົ້າ, ແລະ ມັນກໍໄດ້ສິດສອນເຮົາອີກກ່ຽວກັບຕົວເຮົາເອງ ແລະ ສິ່ງທີ່ເຮົາສາມາດກາຍເປັນ. ເຖິງແມ່ນວ່າ “ຄົນຊົ່ວຄົນນັ້ນ” ຈະພະຍາຍາມຫລາຍພຽງໃດ (ຂໍ້ທີ 39)—ແລະ ເຖິງແມ່ນວ່າທ່ານຮູ້ສຶກວ່າຕົວເອງຂາດຕົກບົກພ່ອງ—ແຕ່ທ່ານກໍເປັນລູກແທ້ໆຂອງພຣະເຈົ້າ ພ້ອມດ້ວຍສັກກະຍະພາບ ທີ່ຈະ “ຮັບເອົາຄວາມສົມບູນຂອງພຣະອົງໃນເວລາອັນເໝາະສົມ” (ຂໍ້ທີ 19).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 93

ເຮົານະມັດສະການພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ.

ໃນການກ່າວເຖິງການເປີດເຜີຍຢູ່ໃນ ຄຳສອນ ແລະ ພັນທະສັນຍາ 93, ພຣະຜູ້ເປັນເຈົ້າໄດ້ອະທິບາຍວ່າ, “ເຮົາມອບຄຳກ່າວເຫລົ່ານີ້ແກ່ພວກເຈົ້າ ເພື່ອພວກເຈົ້າຈະເຂົ້າໃຈ ແລະ ຮູ້ວ່າຈະ ນະມັດສະການຢ່າງໃດ, ແລະ ຮູ້ວ່າພວກເຈົ້ານະມັດສະການສິ່ງໃດ, ເພື່ອພວກເຈົ້າຈະມາຫາພຣະບິດາໃນນາມຂອງເຮົາ, ແລະ ຮັບເອົາຄວາມສົມບູນຂອງພຣະອົງໃນເວລາອັນເໝາະສົມ” (ຂໍ້ທີ 19). ຂະນະທີ່ທ່ານສຶກສາການເປີດເຜີຍນີ້, ໃຫ້ໝາຍຄວາມຈິງທີ່ທ່ານພົບເຫັນກ່ຽວກັບຜູ້ທີ່ເຮົານະມັດສະການ: ພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ. ທ່ານຮຽນຮູ້ຫຍັງແດ່ກ່ຽວກັບ “ວິທີນະມັດສະການ” ພວກພຣະອົງ? ກ່ຽວກັບວິທີທີ່ຈະ “ມາຫາພຣະບິດາ”?

ສາດສະດາໂຈເຊັບ ສະມິດ ໄດ້ສິດສອນວ່າ, “ຖ້າຫາກມະນຸດບໍ່ເຂົ້າໃຈລັກສະນະຂອງພຣະເຈົ້າ, ແລ້ວເຂົາກໍບໍ່ເຂົ້າໃຈຕົວເຂົາເອງ” (Teachings: Joseph Smith, 40). ຂະນະທີ່ທ່ານຮຽນຮູ້ກ່ຽວກັບພຣະຜູ້ຊ່ວຍໃຫ້ລອດໂດຍການສຶກສາ ຄຳສອນ ແລະ ພັນທະສັນຍາ 93, ໃຫ້ຊອກຫາສິ່ງທີ່ທ່ານຮຽນຮູ້ກ່ຽວກັບຕົວເອງ. ຍົກຕົວຢ່າງ, ທ່ານຮຽນຮູ້ຫຍັງແດ່ກ່ຽວກັບພຣະອົງຈາກ ຂໍ້ທີ 3, 12, 21, ແລະ 26? ຄວາມຈິງທີ່ຄ້າຍຄືກັນຢ່າງໃດແດ່ທີ່ທ່ານພົບເຫັນກ່ຽວກັບຕົວທ່ານເອງຢູ່ໃນ ຂໍ້ທີ 20, 23, ແລະ 28–29? (ເບິ່ງ 1 ໂຢຮັນ 3:2; 3 ນີໄຟ 27:27; Dean M. Davies, “The Blessings of Worship,” Ensign ຫລື Liahona, Nov. 2016, 93–95 ນຳອີກ.)

ຄຳສອນ ແລະ ພັນທະສັນຍາ 93:1–39

ລັດສະໝີພາບຂອງພຣະເຈົ້າຄືຄວາມສະຫວ່າງ ແລະ ຄວາມຈິງ.

ທ່ານອາດສັງເກດເຫັນຄຳວ່າ ລັດສະໝີພາບ, ຄວາມສະຫວ່າງ, ແລະ ຄວາມຈິງ ປະກົດເລື້ອຍໆ ຢູ່ໃນການເປີດເຜີຍນີ້. ຂະນະທີ່ທ່ານສຶກສາ ຂໍ້ທີ 21–39 ໂດຍສະເພາະ, ໃຫ້ຂຽນຄວາມຈິງຕ່າງໆລົງໄວ້ ອັນທີ່ທ່ານໄດ້ຮຽນຮູ້ກ່ຽວກັບລັດສະໝີພາບ, ຄວາມສະຫວ່າງ, ແລະ ຄວາມຈິງ. ຄວາມຈິງເຫລົ່ານີ້ດົນໃຈທ່ານເພື່ອໃຫ້ສະແຫວງຫາຄວາມສະຫວ່າງ ແລະ ຄວາມຈິງຫລາຍກວ່າເກົ່າແນວໃດ? ຄວາມຈິງເຫລົ່ານີ້ອາດມີຜົນກະທົບຕໍ່ວິທີທີ່ທ່ານດຳລົງຊີວິດປະຈຳວັນແນວໃດ?

ເຮົາໄດ້ຮັບຄວາມສະຫວ່າງ ແລະ ຄວາມຈິງ ເມື່ອເຮົາຮັກສາພຣະບັນຍັດຂອງພຣະເຈົ້າ.

ຄຳສອນ ແລະ ພັນທະສັນຍາ 93:40–50

“ຈົ່ງຈັດບ້ານເຮືອນຂອງພວກເຈົ້າເອງໃຫ້ເປັນລະບຽບ.”

ປະມານ ຂໍ້ທີ 40, ຄຳສອນ ແລະ ພັນທະສັນຍາ 93 ເບິ່ງຄືວ່າມັນປ່ຽນຈາກຄຳສອນກ່ຽວກັບລັດສະໝີພາບຂອງພຣະເຈົ້າ ແລະ ສັກກະຍະພາບແຫ່ງສະຫວັນຂອງເຮົາ ເປັນຄຳແນະນຳກ່ຽວກັບການເປັນພໍ່ແມ່ ແລະ ການຈັດບ້ານເຮືອນຂອງເຮົາໃຫ້ເປັນລະບຽບ. ຄຳສອນຂອງພຣະຜູ້ເປັນເຈົ້າກ່ຽວກັບຄວາມສະຫວ່າງ, ຄວາມຈິງ, ແລະ ລັດສະໝີພາບ ຢູ່ໃນ ຂໍ້ທີ 1–39 ຊ່ວຍທ່ານໃຫ້ເຂົ້າໃຈ ແລະ ເຮັດຕາມຄຳແນະນຳຢູ່ໃນ ຂໍ້ທີ 40–50 ແນວໃດ?

ເບິ່ງ David A. Bednar, “More Diligent and Concerned at Home,” Ensign ຫລື Liahona, Nov. 2009, 17–20 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 93:2.ພຣະເຢຊູຄຣິດໄດ້ເປັນ “ຄວາມສະຫວ່າງ” ໃນຊີວິດຂອງເຮົາແນວໃດ? ເຮົາໄດ້ເຫັນຄວາມສະຫວ່າງຂອງພຣະອົງຢູ່ໃນຜູ້ຄົນທີ່ຢູ່ອ້ອມຮອບເຮົາແນວໃດ?

ຄຳສອນ ແລະ ພັນທະສັນຍາ 93:3–29.ເພື່ອຊ່ວຍຄອບຄົວຂອງທ່ານໃຫ້ສົນທະນາກ່ຽວກັບສິ່ງທີ່ເຂົາເຈົ້າຮຽນຮູ້ຢູ່ໃນ ພາກທີ 93 ກ່ຽວກັບພຣະຜູ້ຊ່ວຍໃຫ້ລອດ ແລະ ຕົວເຂົາເຈົ້າເອງ, ພວກທ່ານສາມາດຫລິ້ນເກມຈັບຄູ່. ຍົກຕົວຢ່າງ, ທ່ານສາມາດຕຽມເຈ້ຍນ້ອຍໜຶ່ງຊຸດ ທີ່ມີຂໍ້ຄວາມຈາກ ພາກທີ 93 ທີ່ສິດສອນຄວາມຈິງກ່ຽວກັບພຣະຜູ້ຊ່ວຍໃຫ້ລອດ (ເບິ່ງ ຂໍ້ທີ 3, 12, 21, 26) ແລະ ຕຽມເຈ້ຍນ້ອຍອີກຊຸດໜຶ່ງ ຊຶ່ງສິດສອນບາງຢ່າງທີ່ຄ້າຍຄືກັນນັ້ນກ່ຽວກັບຕົວເຮົາເອງ (ເບິ່ງ ຂໍ້ທີ 20, 23, 28–29). ສະມາຊິກໃນຄອບຄົວສາມາດປ່ຽນຜຽນກັນເລືອກເອົາເຈ້ຍຈາກແຕ່ລະຊຸດ, ອ່ານຂໍ້ຄວາມ, ແລະ ພະຍາຍາມຊອກຫາຄວາມຈິງທີ່ກົງກັນ. ຄວາມຈິງເຫລົ່ານີ້ມີອິດທິພົນຕໍ່ວິທີທີ່ເຮົາຮູ້ສຶກກ່ຽວກັບພຣະຜູ້ຊ່ວຍໃຫ້ລອດ ແລະ ກ່ຽວກັບຕົວເຮົາເອງແນວໃດ?

ຄຳສອນ ແລະ ພັນທະສັນຍາ 93:12–13, 20.ຄຳວ່າການໄດ້ຮັບ “ພຣະຄຸນແທນພຣະຄຸນ” ແລະ ການສືບຕໍ່ “ຈາກພຣະຄຸນໜຶ່ງຫາອີກພຣະຄຸນໜຶ່ງ” ໝາຍຄວາມວ່າແນວໃດ? (ຂໍ້ທີ 12–13). ຂໍ້ເຫລົ່ານີ້ແນະນຳຫຍັງແດ່ກ່ຽວກັບວິທີທີ່ເຮົາເຕີບໂຕ ແລະ ຮຽນຮູ້? ການຮູ້ຈັກສິ່ງນີ້ມີຜົນກະທົບຕໍ່ວິທີທີ່ເຮົາປະຕິບັດຕໍ່ຄົນອື່ນ—ແລະ ຕໍ່ຕົວເຮົາເອງແນວໃດ?

ຄຳສອນ ແລະ ພັນທະສັນຍາ 93:24.ໃຫ້ອ່ານຄວາມໝາຍຂອງຄວາມຈິງທີ່ພົບເຫັນຢູ່ໃນຂໍ້ນີ້, ແລະ ເຊື້ອເຊີນສະມາຊິກໃນຄອບຄົວ ໃຫ້ແບ່ງປັນບາງສິ່ງຈາກ ພາກທີ 93 ທີ່ເຂົາເຈົ້າຄິດວ່າເປັນຄວາມຈິງທີ່ລ້ຳຄ່າ. ຄວາມໝາຍຢ່າງອື່ນໃດແດ່ກ່ຽວກັບຄວາມຈິງທີ່ເຮົາພົບເຫັນຢູ່ໃນ ໂຢຮັນ 14:6; ຢາໂຄບ 4:13; ຫລື ຢູ່ໃນເພງສວດກ່ຽວກັບຄວາມຈິງ, ດັ່ງເຊັ່ນ “ບອກມາ ສັດຈະຄືຫຍັງ?” (ເພງສວດ ແລະ ເພງຂອງເດັກນ້ອຍ, 34).

ຄຳສອນ ແລະ ພັນທະສັນຍາ 93:40.ບາງທີເມື່ອທ່ານອ່ານຂໍ້ນີ້, ຄອບຄົວຂອງທ່ານສາມາດຮ້ອງເພງກ່ຽວກັບການຮຽນຮູ້ຢູ່ທີ່ບ້ານ, ດັ່ງເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72). ລູກຜູ້ນ້ອຍອາດມັກສະແດງທ່າທີ່ເຂົ້າກັບເນື້ອເພງ. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອເຊື້ອເຊີນ “ຄວາມສະຫວ່າງ ແລະ ຄວາມຈິງ” ໃຫ້ເຂົ້າມາສູ່ຄອບຄົວຂອງທ່ານຫລາຍກວ່າເກົ່າ?

ຄຳສອນ ແລະ ພັນທະສັນຍາ 93:41–50.ໃຫ້ປຶກສານຳກັນເປັນຄອບຄົວກ່ຽວກັບສິ່ງທີ່ອາດ “ບໍ່ຖືກຕ້ອງໃນບ້ານເຮືອນຂອງເຈົ້າ.” ເຮົາສາມາດເຮັດຫຍັງແດ່ເພື່ອ “ຈັດບ້ານເຮືອນ [ຂອງເຮົາ] ໃຫ້ເປັນລະບຽບ”? (ຂໍ້ທີ 43–44).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ “ເຮົາເປັນລູກຂອງພຣະເຈົ້າ,” ເພງສວດ ແລະ ເພງຂອງເດັກນ້ອຍ, 64.

ການປັບປຸງການຮຽນຮູ້ຂອງເຮົາ

ອ່ານຫລາຍກວ່າໜຶ່ງເທື່ອ. ທ່ານສາມາດເລືອກທີ່ຈະອ່ານ ຄຳສອນ ແລະ ພັນທະສັນຍາ 93 ຫລາຍກວ່າໜຶ່ງເທື່ອລະຫວ່າງອາທິດນີ້. ທຸກເທື່ອທີ່ທ່ານອ່ານ, ທ່ານອາດສັງເກດເຫັນວ່າ ຄວາມຈິງທີ່ແຕກຕ່າງກັນມີຄວາມໂດດເດັ່ນ ຫລື ດົນໃຈທ່ານໃນວິທີທາງໃໝ່. ການອ່ານຫລາຍເທື່ອຈະໃຫ້ໂອກາດທ່ານໄດ້ໄຕ່ຕອງຢ່າງເລິກຊຶ້ງຫລາຍກວ່າເກົ່າ.