“ວັນທີ 30 ເດືອນສິງຫາ–ວັນທີ 5 ເດືອນກັນຍາ. ຄຳສອນ ແລະ ພັນທະສັນຍາ 94–97: ‘ສຳລັບຄວາມລອດຂອງຊີໂອນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 30 ເດືອນສິງຫາ–ວັນທີ 5 ເດືອນກັນຍາ. ຄຳສອນ ແລະ ພັນທະສັນຍາ 94–97,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ພຣະວິຫານເຄີດແລນ

Kirtland Temple [ພຣະວິຫານເຄີດແລນ], ໂດຍ ອາລ໌ ຣາວສ໌

ວັນທີ 30 ເດືອນສິງຫາ–ວັນທີ 5 ເດືອນກັນຍາ

ຄຳສອນ ແລະ ພັນທະສັນຍາ 94–97

“ສຳລັບຄວາມລອດຂອງຊີໂອນ”

ຫລັກທຳ ແລະ ຄຳສອນ ໃດແດ່ທີ່ໂດດເດັ່ນຕໍ່ທ່ານ ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 94–97? ໃຫ້ແນ່ໃຈວ່າທ່ານບັນທຶກຄວາມປະທັບໃຈຂອງທ່ານໄວ້.

ບັນທຶກຄວາມປະທັບໃຈຂອງທ່ານ

ເມື່ອພຣະຜູ້ເປັນເຈົ້າໄດ້ບັນຊາໂມເຊໃຫ້ສ້າງຫໍເຕັນສັກສິດ, ພຣະອົງໄດ້ບອກໂມເຊໃຫ້ “ເຮັດທຸກສິ່ງຕາມແບບຢ່າງທີ່ [ພຣະອົງ] ໄດ້ສະແດງແກ່ເພິ່ນ ທີ່ເທິງພູນັ້ນ” (ເຮັບເຣີ 8:5; ເບິ່ງ ອົບພະຍົບ 25:8–9 ນຳອີກ). ຫໍເຕັນສັກສິດມີຈຸດປະສົງໃຫ້ເປັນຈຸດສູນກາງຂອງຄ້າຍຊາວອິດສະຣາເອນຢູ່ໃນຖິ່ນແຫ້ງແລ້ງກັນດານ (ເບິ່ງ ຈົດບັນຊີ 2:1–2). ຕໍ່ມາ, ພຣະເຈົ້າໄດ້ບັນຊາໂຊໂລໂມນ ແລະ ຜູ້ຄົນຂອງເພິ່ນໃຫ້ສ້າງພຣະວິຫານ ອີງຕາມແບບແຜນທີ່ພຣະອົງໄດ້ເປີດເຜີຍ (ເບິ່ງ 1 ຂ່າວຄາວ 28:12, 19).

ເມື່ອພຣະຜູ້ເປັນເຈົ້າໄດ້ຟື້ນຟູຄວາມສົມບູນຂອງພຣະກິດຕິຄຸນ, ພຣະອົງໄດ້ບັນຊາໂຈເຊັບ ສະມິດ ໃຫ້ສ້າງພຣະວິຫານ ອີງຕາມແບບແຜນທີ່ຖືກເປີດເຜີຍ. “ຈົ່ງສ້າງບ້ານຫລັງນັ້ນ, ບໍ່ແມ່ນຕາມວິທີຂອງໂລກ,” ພຣະຜູ້ເປັນເຈົ້າໄດ້ປະກາດ. “ຈົ່ງສ້າງມັນຕາມວິທີຊຶ່ງເຮົາຈະສະແດງ” (ຄຳສອນ ແລະ ພັນທະສັນຍາ 95:13–14; ເບິ່ງ 97:10 ນຳອີກ). ຄືກັນກັບຫໍເຕັນສັກສິດຢູ່ໃນຖິ່ນແຫ້ງແລ້ງກັນດານ, ພຣະວິຫານມີຈຸດປະສົງໃຫ້ເປັນຈຸດສູນກາງທີ່ໂດດເດັ່ນຢູ່ໃນເມືອງເຄີດແລນ (ເບິ່ງ ຄຳສອນ ແລະ ພັນທະສັນຍາ 94:1).

ທຸກວັນນີ້ ບ້ານຂອງພຣະຜູ້ເປັນເຈົ້າ ມີຢາຍຢູ່ທົ່ວໂລກ. ເຖິງແມ່ນວ່າພຣະວິຫານບໍ່ໄດ້ຕັ້ງຢູ່ໃນຈຸດສູນກາງຂອງຕົວເມືອງເຮົາ, ແຕ່ມັນກໍສາມາດເປັນຈຸດສູນກາງໃນຊີວິດຂອງເຮົາໄດ້. ເຖິງແມ່ນວ່າພຣະວິຫານແຕ່ລະແຫ່ງແຕກຕ່າງກັນໃນຮູບແບບ, ແຕ່ຢູ່ໃນນັ້ນ ເຮົາຮຽນຮູ້ແບບແຜນຈາກສະຫວັນຢ່າງດຽວກັນ—ຄືແຜນຂອງສະຫວັນທີ່ຈະພາເຮົາກັບຄືນສູ່ທີ່ປະທັບຂອງພຣະເຈົ້າ. ພິທີການອັນເປັນນິດທີ່ສັກສິດຊ່ວຍເຮົາສ້າງຊີວິດຂອງເຮົາ ແລະ ເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາ “ບໍ່ແມ່ນຕາມວິທີຂອງໂລກ” ແຕ່ຕາມແບບແຜນທີ່ພຣະເຈົ້າສະແດງແກ່ເຮົາ.

ເບິ່ງ Saints, 1:169–70; “A House for Our God,” Revelations in Context, 165–73.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 94; 97:15–17

ພຣະຜູ້ເປັນເຈົ້າສາມາດສະຖິດຢູ່ກັບເຮົາ ໃນຊີວິດປະຈຳວັນຂອງເຮົາໄດ້.

ຄຳແນະນຳຢູ່ໃນ ຄຳສອນ ແລະ ພັນທະສັນຍາ 94 ແລະ 97 ໄດ້ຖືກມອບໃຫ້ໃນວັນດຽວກັນ—ວັນທີ 2 ເດືອນສິງຫາ, 1833. ພາກທີ 97 ແມ່ນກ່ຽວກັບການວາງແຜນສ້າງພຣະວິຫານຢູ່ເຂດແຈ໊ກສັນ, ລັດມີເຊີຣີ, ຂະນະທີ່ ພາກທີ 94 ແມ່ນກ່ຽວກັບການສ້າງອາຄານບໍລິຫານ ຢູ່ໃນເມືອງເຄີດແລນ, ລັດໂອໄຮໂອ. ທ່ານອາດສັງເກດເຫັນບາງຢ່າງທີ່ຄ້າຍຄືກັນ ໃນສິ່ງທີ່ພຣະຜູ້ເປັນເຈົ້າໄດ້ກ່າວກ່ຽວກັບອາຄານທີ່ແຕກຕ່າງກັນເຫລົ່ານີ້ (ເບິ່ງ ຄຳສອນ ແລະ ພັນທະສັນຍາ 94:2–12; 97:10–17). ຂະນະທີ່ທ່ານໄຕ່ຕອງຄຳແນະນຳເຫລົ່ານີ້, ໃຫ້ພິຈາລະນາສິ່ງທີ່ທ່ານສາມາດເຮັດ ເພື່ອຈະມີປະສົບການເລື່ອງລັດສະໝີພາບ ແລະ ການປະທັບຢູ່ຂອງພຣະຜູ້ເປັນເຈົ້າໃຫ້ເລື້ອຍກວ່າເກົ່າ, ທັງຢູ່ໃນອາຄານຂອງສາດສະໜາຈັກ ແລະ ຢູ່ໃນຊີວິດປະຈຳວັນຂອງທ່ານ.

ຄຳສອນ ແລະ ພັນທະສັນຍາ 95

ພຣະຜູ້ເປັນເຈົ້າຕີສອນຜູ້ທີ່ພຣະອົງຮັກ.

ປະມານຫ້າເດືອນໄດ້ຜ່ານໄປ ນັບແຕ່ເດືອນມັງກອນ ປີ 1833, ເມື່ອພຣະຜູ້ເປັນເຈົ້າໄດ້ບັນຊາໄພ່ພົນຢູ່ໃນເມືອງເຄີດແລນໃຫ້ສ້າງບ້ານຂອງພຣະເຈົ້າ ແລະ ຈັດການຊຸມນຸມທີ່ສັກສິດ (ເບິ່ງ ຄຳສອນ ແລະ ພັນທະສັນຍາ 88:117–19). ເມື່ອໄດ້ຮັບການເປີດເຜີຍທີ່ບັນທຶກຢູ່ໃນ ພາກທີ 95 ໃນເດືອນມິຖຸນາ ປີ 1833, ເຂົາເຈົ້າຍັງບໍ່ໄດ້ເຮັດຕາມພຣະບັນຍັດນັ້ນເທື່ອ. ທ່ານຮຽນຮູ້ຫຍັງແດ່ຈາກວິທີທີ່ພຣະຜູ້ເປັນເຈົ້າໄດ້ຕີສອນໄພ່ພົນຢູ່ໃນການເປີດເຜີຍນີ້? ມີພຣະບັນຍັດ ຫລື ຄຳແນະນຳຢ່າງໃດບໍ ທີ່ທ່ານຍັງບໍ່ໄດ້ປະຕິບັດຕາມເທື່ອ? ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງ?

ເບິ່ງ D. Todd Christofferson, “As ManyLove, I Rebuke and Chasten,” Ensign ຫລື Liahona, May 2011, 97–100 ນຳອີກ.

ຄຳສອນ ແລະ ພັນທະສັນຍາ 95:8, 11–17; 97:10–17

ຢູ່ໃນພຣະວິຫານ ພຣະເຈົ້າອວຍພອນຜູ້ຄົນຂອງພຣະອົງ.

ຫລັງຈາກໄດ້ຖືກຕີສອນເພາະການບໍ່ໄດ້ສ້າງບ້ານຂອງພຣະຜູ້ເປັນເຈົ້າຢູ່ໃນເມືອງເຄີດແລນ, ແລ້ວຜູ້ນຳຂອງສາດສະໜາຈັກໄດ້ເລືອກເອົາບ່ອນໜຶ່ງຢູ່ໃນທົ່ງເຂົ້າຫວີດ ບ່ອນທີ່ເຂົາເຈົ້າຈະສ້າງ. ໄຮຣຳ ສະມິດ, ອ້າຍຂອງສາດສະດາ, ໄດ້ແລ່ນໄປເອົາກ່ຽວໃຫຍ່ທັນທີ ແລະ ໄດ້ເລີ່ມຕົ້ນຖາງທົ່ງ. “ພວກເຮົາກະກຽມທີ່ຈະສ້າງບ້ານແຫ່ງໜຶ່ງໃຫ້ແກ່ພຣະຜູ້ເປັນເຈົ້າ,” ເພິ່ນກ່າວ, “ແລະ ຂ້ອຍຕັ້ງໃຈທີ່ຈະເປັນຄົນທຳອິດໃນການລົງມື” (ໃນ Teachings of Presidents of the Church: Joseph Smith [2007], 271, 273). ໃຫ້ໄຕ່ຕອງຄວາມກະຕືລືລົ້ນຂອງໄຮຣຳ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 95:8, 11–17; 97:10–17. ທ່ານພົບເຫັນຫຍັງແດ່ທີ່ດົນໃຈທ່ານໃຫ້ມີຄວາມຕັ້ງໃຈທີ່ຄ້າຍຄືກັນນັ້ນ ໃນການຢາກໄດ້ຮັບພອນຂອງພຣະວິຫານ?

Hyrum Smith Clearing Land [ໄຮຣຳ ສະມິດ ກຳລັງຖາງທົ່ງ], ໂດຍ ໂຈເຊັບ ບຣິກກີ

ຄຳສອນ ແລະ ພັນທະສັນຍາ 97:18–28

ຊີໂອນຄື “ຜູ້ທີ່ມີໃຈບໍລິສຸດ.”

ສາດສະດາໂຈເຊັບ ສະມິດ ໄດ້ສິດສອນວ່າ, “ເຮົາຕ້ອງສ້າງຊີໂອນຂຶ້ນ ໃຫ້ເປັນເມືອງທີ່ຍິ່ງໃຫຍ່ທີ່ສຸດ” (Teachings: Joseph Smith, 186). ຕໍ່ໄພ່ພົນໃນຊ່ວງໄລຍະຊຸມປີ 1830, ຊີໂອນໄດ້ເປັນ “ເມືອງຂອງພຣະເຈົ້າ” ແທ້ໆ (ຄຳສອນ ແລະ ພັນທະສັນຍາ 97:19). ແຕ່ໃນການເປີດເຜີຍທີ່ບັນທຶກຢູ່ໃນ ພາກທີ 97, ພຣະຜູ້ເປັນເຈົ້າໄດ້ຂະຫຍາຍທັດສະນະນັ້ນ. ຊີໂອນຍັງຖືກບັນຍາຍວ່າເປັນຜູ້ຄົນ—“ຜູ້ທີ່ມີໃຈບໍລິສຸດ” ນຳອີກ (ຂໍ້ທີ 21). ຂະນະທີ່ທ່ານອ່ານ ຂໍ້ທີ 18–28, ໃຫ້ຄິດກ່ຽວກັບຄຳບັນຍາຍນີ້ ເມື່ອທ່ານອ່ານຄຳວ່າ “ຊີໂອນ.” ຄຳວ່າ ໃຈບໍລິສຸດ ໝາຍຄວາມວ່າແນວໃດຕໍ່ທ່ານ? ພຣະວິຫານຊ່ວຍບັນລຸ “ຄວາມລອດຂອງຊີໂອນ” ໄດ້ແນວໃດ? (ຂໍ້ທີ 12).

ເບິ່ງ ໂມເຊ 7:18; Gospel Topics, “Zion,” topics.ChurchofJesusChrist.org ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 95:8.ການເຮັດ ແລະ ການຮັກສາພັນທະສັນຍາຂອງພຣະວິຫານ ໄດ້ນຳ “ອຳນາດຈາກເບື້ອງບົນ” ມາສູ່ຊີວິດຂອງທ່ານແນວໃດ? ບາງທີສະມາຊິກໃນຄອບຄົວສາມາດແບ່ງປັນຄວາມຮູ້ສຶກຂອງເຂົາເຈົ້າກ່ຽວກັບພຣະວິຫານ ຫລື ແບ່ງປັນປະສົບການ ຕອນເຂົາເຈົ້າຮູ້ສຶກໄດ້ຮັບພອນ ດ້ວຍ “ອຳນາດຈາກເບື້ອງບົນ” ຜ່ານທາງການນະມັດສະການຢູ່ໃນພຣະວິຫານແນວໃດ.

ເພື່ອຊ່ວຍຜູ້ທີ່ກະກຽມທີ່ຈະໄປພຣະວິຫານ, ທ່ານສາມາດເບິ່ງວິດີໂອ, ຮູບພາບ, ແລະ ຄຳແນະນຳ ຢູ່ທີ່ temples.ChurchofJesusChrist.org. ເພື່ອຊ່ວຍເດັກນ້ອຍໃຫ້ຮຽນຮູ້ກ່ຽວກັບພຣະວິຫານ, ທ່ານສາມາດໃຊ້ “Your Path to the Temple” (ໃນ Temples of The Church of Jesus Christ of Latter-day Saints [ສະບັບພິເສດຂອງ Ensign ຫລື Liahona, Oct. 2010], 72–75).

ຄຳສອນ ແລະ ພັນທະສັນຍາ 95:1–11.ເຮົາຮຽນຮູ້ຫຍັງແດ່ກ່ຽວກັບການຕີສອນ ຈາກຂໍ້ເຫລົ່ານີ້? ເຮົາຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າ? ຄວາມຮູ້ເຫລົ່ານີ້ມີຜົນກະທົບຕໍ່ວິທີທີ່ເຮົາໄດ້ຮັບການຕີສອນ ຫລື ຕີສອນຄົນອື່ນແນວໃດ?

ຄຳສອນ ແລະ ພັນທະສັນຍາ 97:8.ອີງຕາມຂໍ້ນີ້, ເຮົາຈະສາມາດ “ຍອມຮັບຈາກ” ພຣະຜູ້ເປັນເຈົ້າແນວໃດ? ສິ່ງນັ້ນແຕກຕ່າງຈາກການຖືກຮັບຮູ້ຈາກໂລກແນວໃດ? ຄຳວ່າ “ຍຶດຖືພັນທະສັນຍາ [ຂອງເຮົາ] ໂດຍການເສຍສະລະ” ໝາຍຄວາມວ່າແນວໃດ? ເຮົາໄດ້ເຮັດສິ່ງນີ້ແນວໃດ?

ຄຳສອນ ແລະ ພັນທະສັນຍາ 97:10–21.ສາດສະດາໂຈເຊັບ ສະມິດ ໄດ້ສິດສອນວ່າ, “ບ່ອນໃດກໍຕາມທີ່ໄພ່ພົນໄປເຕົ້າໂຮມກັນບ່ອນນັ້ນຄືຊີໂອນ, ຊຶ່ງຄົນຊອບທຳທຸກຄົນຈະສ້າງສາໃຫ້ເປັນບ່ອນທີ່ປອດໄພສຳລັບລູກຫລານຂອງເຂົາເຈົ້າ” (Teachings: Joseph Smith, 186). ເຮົາຈະສາມາດສ້າງຊີໂອນຢູ່ໃນບ້ານເຮືອນຂອງເຮົາໄດ້ແນວໃດ? ຫລັກທຳຢ່າງໃດແດ່ທີ່ເຮົາພົບເຫັນ ຢູ່ໃນ ຄຳສອນ ແລະ ພັນທະສັນຍາ 97:10–21? ນຳກັນເປັນຄອບຄົວ, ໃຫ້ເລືອກຫລັກທຳຂໍ້ທີ່ຈະເອົາໃຈໃສ່ຕໍ່ລະຫວ່າງອາທິດນີ້.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.

ການປັບປຸງການສຶກສາສ່ວນຕົວ

ບັນທຶກປະສົບການຂອງທ່ານ. ໃຫ້ບັນທຶກປະສົບການທີ່ທ່ານໄດ້ມີກັບຫລັກທຳ ແລະ ຄຳສອນທີ່ທ່ານກຳລັງຮຽນຮູ້ກ່ຽວກັບ. ປະສົບການເຫລົ່ານີ້ສາມາດກາຍເປັນພາກສ່ວນໜຶ່ງໃນປະຫວັດຂອງບຸກຄົນ ທີ່ຈະເປັນພອນໃຫ້ແກ່ຄົນລຸ້ນຫລັງໄດ້.