“ວັນທີ 20–26 ເດືອນກັນຍາ. ຄຳສອນ ແລະ ພັນທະສັນຍາ 106–108: ‘ໃຫ້ຟ້າສະຫວັນເປີດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 20–26 ເດືອນກັນຍາ. ຄຳສອນ ແລະ ພັນທະສັນຍາ 106–108,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຕາເວັນສ່ອງແສງຜ່ານກ້ອນເມກ

ວັນທີ 20–26 ເດືອນກັນຍາ

ຄຳສອນ ແລະ ພັນທະສັນຍາ 106–108

“ໃຫ້ຟ້າສະຫວັນເປີດ”

ແອວເດີ ຢູລິດຊິສ໌ ໂຊອາເຣສ໌ ໄດ້ສິດສອນວ່າ, “ເຮົາຕ້ອງໝັ້ນຄົງຢູ່ໃນ [ພຣະຜູ້ຊ່ວຍໃຫ້ລອດ], ເອົາໃຈໃສ່ຕໍ່ພຣະຄຳພີ, ປິຕິຍິນດີກັບມັນ, ຮຽນຮູ້ຄຳສອນຂອງພຣະອົງ, ແລະ ພະຍາຍາມດຳລົງຊີວິດ ໃນແບບດຽວກັນກັບພຣະອົງ” (“How Can I Understand?” Ensign ຫລື Liahona, May 2019, 7). ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 106–8, ໃຫ້ບັນທຶກວິທີທີ່ທ່ານສາມາດພະຍາຍາມດຳລົງຊີວິດຕາມຄວາມຈິງທີ່ທ່ານຄົ້ນພົບ.

ບັນທຶກຄວາມປະທັບໃຈຂອງທ່ານ

ເມື່ອເບິ່ງພຽງເຜີນໆ, ຄຳສອນ ແລະ ພັນທະສັນຍາ 107 ອາດເບິ່ງຄືເປັນພຽງກ່ຽວກັບການຈັດຕັ້ງຕຳແໜ່ງໃນຖານະປະໂລຫິດເຂົ້າເປັນໂຄງຮ່າງການເປັນຜູ້ນຳສຳລັບສາດສະໜາຈັກຂອງພຣະຜູ້ເປັນເຈົ້າເທົ່ານັ້ນ. ແນ່ນອນ, ເມື່ອເຖິງຕອນທີ່ການເປີດເຜີຍນີ້ໄດ້ຖືກຈັດພິມ, ຈຳນວນສະມາຊິກຂອງສາດສະໜາຈັກໄດ້ມີຫລາຍເກີນກວ່າຄວາມສາມາດຂອງຜູ້ນຳຈຳນວນໜ້ອຍໜຶ່ງທີ່ໄດ້ຖືກແຕ່ງຕັ້ງໄວ້ໃຫ້ດູແລ. ດັ່ງນັ້ນ ການລະບຸໂຄງຮ່າງ ແລະ ໜ້າທີ່ຮັບຜິດຊອບຂອງຝ່າຍປະທານສູງສຸດ, ກຸ່ມອັກຄະສາວົກສິບສອງ, ສາວົກເຈັດສິບ, ອະທິການ, ແລະ ຝ່າຍປະທານກຸ່ມ ຈຶ່ງເປັນສິ່ງຈຳເປັນ ແລະ ເປັນປະໂຫຍດຫລາຍ. ແຕ່ມີຄຳແນະນຳຈາກສະຫວັນຢູ່ໃນ ພາກທີ 107 ຫລາຍກວ່ານີ້ອີກ ທີ່ນອກເໜືອໄປຈາກການຈັດຕັ້ງຕຳແໜ່ງຂອງຖານະປະໂລຫິດ ແລະ ກຸ່ມຕ່າງໆ. ໃນນີ້ພຣະຜູ້ເປັນເຈົ້າໄດ້ສິດສອນເຮົາກ່ຽວກັບລະບຽບເກົ່າແກ່ຂອງຖານະປະໂລຫິດ ທີ່ໄດ້ “ຖືກແຕ່ງຕັ້ງຂຶ້ນໃນວັນເວລາຂອງອາດາມ” (ຂໍ້ທີ 41). ຈຸດປະສົງຂອງມັນນັບຈາກແຕ່ຕອນຕົ້ນ ແມ່ນການເຮັດໃຫ້ເປັນໄປໄດ້ສຳລັບລູກໆຂອງພຣະເຈົ້າ—ລວມທັງຕົວທ່ານ—ເພື່ອຮັບເອົາພິທີການຊ່ວຍໃຫ້ລອດຂອງພຣະກິດຕິຄຸນ ແລະ ຊື່ນຊົມກັບ “ພອນທາງວິນຍານທັງໝົດຂອງສາດສະໜາຈັກ—ການມີສິດທິພິເສດທີ່ຈະຮັບເອົາຄວາມລຶກລັບຂອງອານາຈັກສະຫວັນ, [ແລະ] ໃຫ້ຟ້າສະຫວັນເປີດແກ່ພວກເຂົາ” (ຂໍ້ທີ 18–19).

ເບິ່ງ “Restoring the Ancient Order,” Revelations in Context, 208–12.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 106; 108

ພຣະຜູ້ເປັນເຈົ້າແນະນຳ, ສະໜັບສະໜູນ, ແລະ ສົ່ງເສີມຜູ້ທີ່ພຣະອົງເອີ້ນໃຫ້ຮັບໃຊ້.

ໃນ ຄຳສອນ ແລະ ພັນທະສັນຍາ 106 ແລະ 108, ພຣະຜູ້ເປັນເຈົ້າໃຫ້ຄຳແນະນຳ ແລະ ສັນຍາກັບສະມາຊິກສອງຄົນທີ່ຖືກເອີ້ນໃຫ້ຮັບໃຊ້ຢູ່ໃນສາດສະໜາຈັກ. ສຳນວນໃດແດ່ຢູ່ໃນການເປີດເຜີຍນີ້ ທີ່ສະໜັບສະໜູນ ແລະ ໃຫ້ຄວາມຮູ້ກ່ຽວກັບການຮັບໃຊ້ຂອງທ່ານເອງ ຢູ່ໃນອານາຈັກຂອງພຣະເຈົ້າ? ຕໍ່ໄປນີ້ແມ່ນຄຳຖາມບາງຢ່າງ ເພື່ອໃຫ້ພິຈາລະນາ:

ທ່ານໄດ້ຮັບ “ພຣະຄຸນ ແລະ ຄວາມແນ່ນອນໃຈ” ທີ່ຈະສາມາດ “ຍຶດໝັ້ນ” ໃນວິທີໃດ? (ຄຳສອນ ແລະ ພັນທະສັນຍາ 106:8).
ທ່ານຈະສາມາດ “ລະມັດລະວັງນັບແຕ່ນີ້ເປັນຕົ້ນໄປໃນການຍຶດຖືຄຳປະຕິຍານຂອງທ່ານ,” ຫລື ພັນທະສັນຍາຂອງທ່ານແນວໃດ? (ຄຳສອນ ແລະ ພັນທະສັນຍາ 108:3).

ມີສຳນວນຢ່າງອື່ນອີກໃດແດ່ຈາກ ພາກທີ 106 ແລະ 108 ທີ່ມີຄວາມໝາຍຕໍ່ທ່ານ?

ເບິ່ງ Russell M. Nelson, “Ministering with the Power and Authority of God,” Ensign ຫລື Liahona, May 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28 ນຳອີກ.

ຄຳສອນ ແລະ ພັນທະສັນຍາ 107

ພຣະຜູ້ເປັນເຈົ້ານຳພາສາດສະໜາຈັກຂອງພຣະອົງຜ່ານທາງສິດອຳນາດຂອງຖານະປະໂລຫິດ.

ຂະນະທີ່ທ່ານສຶກສາກ່ຽວກັບການຟື້ນຟູພຣະກິດຕິຄຸນ, ທ່ານອາດສັງເກດເຫັນວ່າ ຕາມປົກກະຕິແລ້ວ ພຣະຜູ້ເປັນເຈົ້າບໍ່ໄດ້ອະທິບາຍຄຳສອນຢ່າງເຕັມສ່ວນໃນການເປີດເຜີຍເທື່ອດຽວ. ແຕ່ພຣະອົງຈະເປີດເຜີຍ “ເປັນບັນທັດ” (ຄຳສອນ ແລະ ພັນທະສັນຍາ 98:12) ເມື່ອຈຳເປັນອີງຕາມສະຖານະການ. ເຖິງແມ່ນວ່າທີ່ຜ່ານມາພຣະຜູ້ເປັນເຈົ້າໄດ້ໃຫ້ຄຳແນະນຳກ່ຽວກັບຖານະປະໂລຫິດ ນັບແຕ່ປີ 1829 (ເບິ່ງ, ຍົກຕົວຢ່າງ, ພາກທີ 20 ແລະ 84), ແຕ່ພຣະອົງໄດ້ໃຫ້ຄຳແນະນຳເພີ່ມເຕີມແກ່ໄພ່ພົນ ໃນປີ 1835 ກ່ຽວກັບຕຳແໜ່ງໃດໜຶ່ງໂດຍສະເພາະຂອງຖານະປະໂລຫິດ ອັນທີ່ຈຳເປັນຕໍ່ການປົກຄອງ ແລະ ນຳພາຝູງຊົນທີ່ກຳລັງເຕີບໃຫຍ່ຂະຫຍາຍຕົວຂອງພຣະອົງ.

ຂະນະທີ່ທ່ານອ່ານກ່ຽວກັບຕຳແໜ່ງຂອງຖານະປະໂລຫິດດັ່ງຕໍ່ໄປນີ້, ໃຫ້ພິຈາລະນາວິທີທີ່ທ່ານສາມາດສະໜັບສະໜູນຜູ້ທີ່ຮັບໃຊ້ຢູ່ໃນການເອີ້ນເຫລົ່ານີ້ ໂດຍ “ຄວາມໝັ້ນໃຈ, ສັດທາ, ແລະ ຄຳອະທິຖານ” ຂອງທ່ານແນວໃດ (ຄຳສອນ ແລະ ພັນທະສັນຍາ 107:22).

ຝ່າຍປະທານສູງສຸດ ແລະ ປະທານຂອງສາດສະໜາຈັກ (ຂໍ້ທີ 9, 21–22, 65–66, 91–92)
ອັກຄະສາວົກສິບສອງ (ຂໍ້ທີ 23–24, 33–35, 38, 58)
ສາວົກເຈັດສິບ (ຂໍ້ທີ 25–26, 34, 93–97)
ອະທິການ (ຂໍ້ທີ 13–17, 68–76, 87–88)

ຄຳສອນ ແລະ ພັນທະສັນຍາ 107:1–20

ພິທີການຂອງຖານະປະໂລຫິດເອື້ອອຳນວຍພອນທາງວິນຍານ ແລະ ທາງໂລກ ໃຫ້ແກ່ລູກໆຂອງພຣະບິດາເທິງສະຫວັນທຸກຄົນ.

ແອວເດີ ນຽວ ແອວ ແອນເດີເຊັນ ໄດ້ສິດສອນວ່າ: “ຖານະປະໂລຫິດເປັນອຳນາດ ແລະ ສິດອຳນາດຂອງພຣະເຈົ້າສຳລັບຄວາມລອດ ແລະ ພອນຂອງທຸກຄົນ—ຜູ້ຊາຍ, ຜູ້ຍິງ, ແລະ ເດັກນ້ອຍ. … ເມື່ອເຮົາມີຄ່າຄວນພໍ, ພິທີການຂອງຖານະປະໂລຫິດຈະເພີ່ມພູນຊີວິດຂອງເຮົາຢູ່ໃນໂລກ ແລະ ຕຽມເຮົາສຳລັບຄຳສັນຍາທີ່ດີເດັ່ນຂອງໂລກທີ່ຢູ່ຂ້າງໜ້າ” (“Power in the Priesthood,” Ensign ຫລື Liahona, Nov. 2013, 92). ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 107:1–20 (ເບິ່ງ ໂດຍສະເພາະ ຂໍ້ທີ 18–20) ແລະ ຂ່າວສານພາກສ່ວນອື່ນຂອງແອວເດີ ແອນເດີເຊັນ, ໃຫ້ຄິດທີ່ຈະບັນທຶກຄວາມປະທັບໃຈທີ່ທ່ານໄດ້ຮັບ ເຖິງວິທີທີ່ອຳນາດຂອງພຣະເຈົ້າໄດ້ເສີມສ້າງຊີວິດຂອງທ່ານຢູ່ໃນໂລກ ແລະ ຕຽມທ່ານສຳລັບນິລັນດອນແນວໃດ. ທ່ານໄດ້ເຮັດຫຍັງແດ່ເພື່ອຈະໄດ້ຮັບ—ແລະ ຊ່ວຍຄົນອື່ນໃຫ້ໄດ້ຮັບ—ພອນເຫລົ່ານັ້ນຢ່າງເຕັມສ່ວນຫລາຍກວ່າເກົ່າ?

ເບິ່ງ ຄຳສອນ ແລະ ພັນທະສັນຍາ 84:19–27; Dallin H. Oaks, “The Melchizedek Priesthood and the Keys,” Ensign ຫລື Liahona, May 2020, 69–72 ນຳອີກ.

ຄຳສອນ ແລະ ພັນທະສັນຍາ 107:41–57

ຖານະປະໂລຫິດເປັນພອນໃຫ້ແກ່ຄອບຄົວ.

ອາດາມຢາກໃຫ້ລູກຫລານຂອງເພິ່ນໄດ້ຮັບພອນໂດຍຖານະປະໂລຫິດ. ເພິ່ນໄດ້ຮັບພອນຢ່າງໃດແດ່? (ເບິ່ງ ຂໍ້ທີ 42, 55). ຂະນະທີ່ທ່ານອ່ານກ່ຽວກັບສິ່ງທີ່ອາດາມໄດ້ເຮັດ, ໃຫ້ພິຈາລະນາຄວາມປາດຖະໜາຂອງທ່ານ ທີ່ຢາກໃຫ້ຄອບຄົວຂອງທ່ານຊື່ນຊົມກັບພອນຂອງຖານະປະໂລຫິດ. ທ່ານໄດ້ຮັບການດົນໃຈໃຫ້ເຮັດສິ່ງໃດ ເພື່ອຊ່ວຍຄອບຄົວຂອງທ່ານໃຫ້ໄດ້ຮັບພອນເຫລົ່ານີ້?

Adam Blessing His Posterity [ອາດາມໃຫ້ພອນແກ່ລູກຫລານຂອງເພິ່ນ], ໂດຍ ຄະລາກ ແຄວລີ ພຣາຍສ໌

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 106:6.ຄອບຄົວຂອງເຮົາສາມາດເຮັດຫຍັງແດ່ເພື່ອໃຫ້ “ສະຫວັນຊື່ນຊົມ”?

ຄຳສອນ ແລະ ພັນທະສັນຍາ 107:22.ເຮົາກຳລັງເຮັດສິ່ງໃດເພື່ອສະໜັບສະໜູນຜູ້ນຳຂອງເຮົາ “ໂດຍຄວາມໝັ້ນໃຈ, ສັດທາ, ແລະ ຄຳອະທິຖານ”?

ຄຳສອນ ແລະ ພັນທະສັນຍາ 107:27–31, 85.ຫລັກທຳທີ່ນຳພາສະພາຂອງສາດສະໜາຈັກ ກໍສາມາດຊ່ວຍເຮົາໃຫ້ປຶກສາຫາລືນຳກັນເປັນຄອບຄົວໄດ້. ຫລັກທຳໃດແດ່ຢູ່ໃນຂໍ້ເຫລົ່ານີ້ ທີ່ເຮົາສາມາດນຳໃຊ້ກັບສະພາຄອບຄົວຂອງເຮົາ? (ເບິ່ງ M. Russell Ballard, “Family Councils,” Ensign ຫລື Liahona, May 2016, 63–65.)

ຄຳສອນ ແລະ ພັນທະສັນຍາ 107:99–100.ໃຫ້ເອົາເຈ້ຍຂໍ້ແນະນຳເຮັດວຽກບ້ານໃຫ້ສະມາຊິກຄົນໜຶ່ງໃນຄອບຄົວ, ແລະ ເຊື້ອເຊີນລາວໃຫ້ເລືອກວິທີທີ່ຈະເຮັດໜ້າທີ່ນັ້ນ: ຢ່າງພາກພຽນ, ຢ່າງກຽດຄ້ານ, ຫລື ໂດຍທີ່ບໍ່ອ່ານຂໍ້ແນະນຳ. ປ່ອຍໃຫ້ສະມາຊິກຄົນອື່ນໆໃນຄອບຄົວເບິ່ງລາວເຮັດໜ້າທີ່ນັ້ນ ແລະ ເດົາເບິ່ງວ່າຄົນນັ້ນເລືອກເຮັດໃນແບບໃດ. ແລ້ວໃຫ້ສະມາຊິກໃນຄອບຄົວຄົນອື່ນໆປ່ຽນຜຽນກັນເຮັດ. ເປັນຫຍັງພຣະຜູ້ເປັນເຈົ້າຈຶ່ງຕ້ອງການໃຫ້ເຮົາຮຽນຮູ້ໜ້າທີ່ ແລະ ເຮັດໜ້າທີ່ດ້ວຍຄວາມພາກພຽນທັງໝົດ? (ເບິ່ງ Becky Craven, “Careful versus Casual,” Ensign ຫລື Liahona, May 2019, 9–11.)

ຄຳສອນ ແລະ ພັນທະສັນຍາ 108:7.ເຮົາຈະສາມາດເພີ່ມຄວາມເຂັ້ມແຂງໃຫ້ກັນແລະກັນ ໃນການສົນທະນາຂອງເຮົາໄດ້ແນວໃດ? ໃນການອະທິຖານຂອງເຮົາແນວໃດ? ໃນການຕິຕຽນ, ຫລື ໃນການສະໜັບສະໜູນຂອງເຮົາໄດ້ແນວໃດ? ໃນທຸກສິ່ງທີ່ເຮົາເຮັດແນວໃດ? ພວກທ່ານອາດເລືອກໜຶ່ງໃນສິ່ງເຫລົ່ານີ້ ເພື່ອເຮັດນຳກັນເປັນຄອບຄົວ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຂອບພຣະໄທສຳລັບສາດສະດາ,” ເພງສວດ ແລະ ເພງຂອງເດັກນ້ອຍ, 40.

ການປັບປຸງການສຶກສາສ່ວນຕົວ

ບັນທຶກຄວາມປະທັບໃຈ. ເມື່ອໄດ້ຮັບຄວາມປະທັບໃຈ ຫລື ຄວາມຮູ້ທາງວິນຍານທີ່ມາສູ່ທ່ານ, ໃຫ້ບັນທຶກມັນໄວ້. ເມື່ອທ່ານເຮັດແນວນັ້ນ, ທ່ານໄດ້ສະແດງໃຫ້ພຣະຜູ້ເປັນເຈົ້າເຫັນວ່າ ທ່ານນັບຖືການຊີ້ນຳຂອງພຣະອົງ. (ເບິ່ງ Teaching in the Savior’s Way, 12, 30.)