“ວັນທີ 27 ເດືອນກັນຍາ–ວັນທີ 3 ເດືອນຕຸລາ. ຄຳສອນ ແລະ ພັນທະສັນຍາ 109–110: ‘ມັນເປັນບ້ານຂອງພຣະອົງ, ເປັນສະຖານທີ່ສັກສິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 27 ເດືອນກັນຍາ–ວັນທີ 3 ເດືອນຕຸລາ. ຄຳສອນ ແລະ ພັນທະສັນຍາ 109–110,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ພຣະວິຫານເຄີດແລນ

Kirtland Temple [ພຣະວິຫານເຄີດແລນ], ໂດຍ ຈອນ ມິກນໍທັນ

ວັນທີ 27 ເດືອນກັນຍາ–ວັນທີ 3 ເດືອນຕຸລາ

ຄຳສອນ ແລະ ພັນທະສັນຍາ 109–110

“ມັນເປັນບ້ານຂອງພຣະອົງ, ເປັນສະຖານທີ່ສັກສິດ”

ເມື່ອກ່າວເຖິງ ຄຳສອນ ແລະ ພັນທະສັນຍາ 109:24–28, ແອວເດີ ເດວິດ ເອ ແບ໊ດນາ ໄດ້ກ່າວວ່າ, “ຂ້າພະເຈົ້າເຊື້ອເຊີນທ່ານໃຫ້ສຶກສາຊ້ຳອີກຫລາຍເທື່ອ ແລະ ໃຫ້ໄຕ່ຕອງດ້ວຍການອະທິຖານເຖິງຜົນຂອງຂໍ້ພຣະຄຳພີເຫລົ່ານີ້ໃນຊີວິດຂອງທ່ານ ແລະ ຄອບຄົວຂອງທ່ານ” (“Honorably Hold a Name and Standing,” Ensign ຫລື Liahona, May 2009, 99). ໃຫ້ພິຈາລະນາຄຳເຊື້ອເຊີນນີ້ ຂະນະທີ່ທ່ານສຶກສາ.

ບັນທຶກຄວາມປະທັບໃຈຂອງທ່ານ

ປະຕູພຣະວິຫານເຄີດແລນບໍ່ຄວນເປີດກ່ອນ 8:00 ໂມງເຊົ້າຂອງວັນທີ 27 ເດືອນມີນາ, 1836. ແຕ່ໄພ່ພົນຜູ້ທີ່ຫວັງຈະໄດ້ເຂົ້າຮ່ວມການອຸທິດ ໄດ້ມາລຽນແຖວລໍຖ້າແຕ່ 7:00 ໂມງເຊົ້າ. ເມື່ອແປ້ນມ້ານັ່ງ ແລະ ຮ່ອມທາງຍ່າງເຕັມໄປດ້ວຍຜູ້ຄົນທີ່ກະຕືລືລົ້ນທີ່ຈະນະມັດສະການ, ໂຈເຊັບ ສະມິດ ຈຶ່ງໄດ້ແນະນຳສະຖານທີ່ເພີ່ມເຕີມ. ເມື່ອສະຖານທີ່ນັ້ນເຕັມອີກ, ຈຶ່ງໄດ້ວາງແຜນຈັດພາກທີສອງ. ແລະ ບໍ່ພຽງແຕ່ຄົນທີ່ມີຊີວິດຢູ່ເທົ່ານັ້ນທີ່ກະຕືລືລົ້ນຢາກໄປຮ່ວມ. ຫລາຍຄົນໄດ້ເປັນພະຍານວ່າ ເຂົາເຈົ້າໄດ້ເຫັນເຫລົ່າທູດຢູ່ໃນພຣະວິຫານ ແລະ ແມ່ນແຕ່ຢູ່ເທິງຫລັງຄາ, ລະຫວ່າງ ແລະ ຫລັງຈາກການອຸທິດ. ເບິ່ງຄືວ່າ “ທູດສະຫວັນ” ໄດ້ມາ ເພື່ອ “ຮ້ອງເພງ ແລະ ໂຮ່ຮ້ອງ” ຮ່ວມກັບໄພ່ພົນຍຸກສຸດທ້າຍ (“ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30).

ເປັນຫຍັງຈຶ່ງມີຄວາມຕື່ນເຕັ້ນຫລາຍທີ່ສຸດ—ຢູ່ທັງສອງຟາກມ່ານ? ຄຳສັນຍາວ່າໄພ່ພົນຈະ “ໄດ້ຮັບພອນດ້ວຍອຳນາດຈາກເບື້ອງບົນ” ເປັນເຫດຜົນຢ່າງໜຶ່ງທີ່ເຂົາເຈົ້າໄດ້ມາເຕົ້າໂຮມກັນຢູ່ລັດໂອໄຮໂອ ແຕ່ຕອນຕົ້ນ (ຄຳສອນ ແລະ ພັນທະສັນຍາ 38:32). ແລະ ສິ່ງທີ່ຍິ່ງໃຫຍ່ກວ່າໄດ້ຖືກສັນຍາສຳລັບອະນາຄົດ. “ນີ້,” ພຣະຜູ້ເປັນເຈົ້າໄດ້ປະກາດ, “ເປັນການເລີ່ມຕົ້ນພອນຊຶ່ງຈະຖອກເທລົງມາເທິງຫົວຂອງຜູ້ຄົນຂອງເຮົາ” (ຄຳສອນ ແລະ ພັນທະສັນຍາ 110:10). ສະໄໝທີ່ເຮົາມີຊີວິດຢູ່ໃນເວລານີ້—ພ້ອມດ້ວຍວຽກງານ ແລະ ພິທີການຂອງພຣະວິຫານທີ່ເລັ່ງດ່ວນມີໃຫ້ຫລາຍລ້ານຄົນ ທັງຄົນເປັນ ແລະ ຄົນຕາຍ—ໄດ້ເລີ່ມຕົ້ນຢູ່ໃນເມືອງເຄີດແລນ, ຕອນທີ່ “ມ່ານປົກຄຸມພື້ນໂລກ [ໄດ້] ເລີ່ມເປີດ” (“ພຣະວິນຍານພຣະເຈົ້າ”).

ເບິ່ງ Saints, 1:232–41; “A House for Our God,” Revelations in Context, 169–72 ນຳອີກ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 109

ພຣະຜູ້ເປັນເຈົ້າຢາກອວຍພອນເຮົາ ຢູ່ໃນບ້ານທີ່ສັກສິດຂອງພຣະອົງ.

ໃນບາງວິທີ, ພຣະວິຫານເຄີດແລນແມ່ນແຕກຕ່າງຈາກພຣະວິຫານທີ່ເຮົາຮູ້ຈັກໃນທຸກວັນນີ້. ມັນບໍ່ມີແທ່ນບູຊາ ແລະ ບໍ່ມີອ່າງບັບຕິສະມາ, ແລະ ພິທີການເຊັ່ນການຮັບບັບຕິສະມາແທນຄົນຕາຍ ແລະ ການຜະນຶກຍັງບໍ່ໄດ້ຖືກຟື້ນຟູເທື່ອ. ແຕ່ພອນທີ່ບັນຍາຍຢູ່ໃນ ພາກທີ 109, ຄຳອະທິຖານອຸທິດສຳລັບພຣະວິຫານເຄີດແລນ, ເປັນພອນທີ່ເຮົາໄດ້ຮັບຢູ່ໃນບ້ານຂອງພຣະຜູ້ເປັນເຈົ້າໃນທຸກວັນນີ້. ໃຫ້ທົບທວນຂໍ້ເຫລົ່ານີ້ ເພື່ອຊອກຫາພອນບາງຢ່າງເຫລົ່ານີ້. ຂະນະທີ່ອ່ານກ່ຽວກັບພອນເຫລົ່ານີ້, ໃຫ້ໄຕ່ຕອງວ່າ ເປັນຫຍັງພອນເຫລົ່ານີ້ຈຶ່ງສຳຄັນຕໍ່ທ່ານ ແລະ ຄອບຄົວຂອງທ່ານ.

ຂໍ້ທີ 5, 12–13 (ເບິ່ງ ຄຳສອນ ແລະ ພັນທະສັນຍາ 110:6–8 ນຳອີກ): ໃນພຣະວິຫານ ພຣະຜູ້ເປັນເຈົ້າສາມາດສະແດງພຣະອົງເອງໃຫ້ປະຈັກແກ່ເຮົາ ແລະ ເຮົາສາມາດຮູ້ສຶກເຖິງອຳນາດຂອງພຣະອົງ.

ຂໍ້ທີ 9, 17–19, 26, 78–79: ໃນພຣະວິຫານ ເຮົາໄດ້ຮັບເອົາພຣະນາມຂອງພຣະຜູ້ເປັນເຈົ້າ.

ຂໍ້ທີ 22–23: ຂະນະທີ່ເຮົາເຮັດ ແລະ ໃຫ້ກຽດແກ່ພັນທະສັນຍາຂອງພຣະວິຫານ, ພຣະຜູ້ເປັນເຈົ້າຈະມອບອຳນາດໃຫ້ເຮົາເພື່ອເຮັດວຽກງານຂອງພຣະອົງ.

ຂໍ້ທີ 24–33: ເມື່ອເຮົາໄປພຣະວິຫານດ້ວຍຄວາມມີຄ່າຄວນ, ເຮົາສາມາດໄດ້ຮັບການປົກປ້ອງຈາກພຣະຜູ້ເປັນເຈົ້າ.

ພອນຢ່າງອື່ນໆ:

ພຣະວິນຍານດົນໃຈທ່ານໃຫ້ເຮັດຫຍັງແດ່ ເພື່ອຈະໄດ້ຮັບພອນເຫລົ່ານີ້?

ຄຳສອນ ແລະ ພັນທະສັນຍາ 109

ຄຳອະທິຖານອຸທິດພຣະວິຫານເຄີດແລນ ສາມາດສິດສອນເຮົາກ່ຽວກັບການອະທິຖານ.

ພາກທີ 109 ແມ່ນຄຳອະທິຖານອຸທິດທີ່ໂຈເຊັບ ສະມິດ ໄດ້ຮັບໂດຍການເປີດເຜີຍ (ເບິ່ງ ຫົວຂໍ້ພາກ). ທ່ານຮຽນຮູ້ຫຍັງແດ່ກ່ຽວກັບການອະທິຖານຈາກພາກນີ້? ຂະນະທີ່ທ່ານອ່ານມັນ, ທ່ານອາດຄິດກ່ຽວກັບການອະທິຖານຂອງທ່ານ. ທ່ານໄດ້ຮັບຄວາມປະທັບໃຈຢ່າງໃດແດ່ ທີ່ສາມາດຊ່ວຍທ່ານດັດແປງການສື່ສານຂອງທ່ານກັບພຣະບິດາເທິງສະຫວັນ? ຍົກຕົວຢ່າງ, ສາດສະດາໄດ້ອະທິຖານກ່ຽວກັບສິ່ງໃດຢູ່ໃນຄຳອະທິຖານນີ້?

ຄຳສອນ ແລະ ພັນທະສັນຍາ 110:1–10

ພຣະຜູ້ເປັນເຈົ້າສາມາດສະແດງພຣະອົງເອງໃຫ້ປະຈັກແກ່ເຮົາຢູ່ໃນພຣະວິຫານ.

ທ່ານຮູ້ສຶກແນວໃດກ່ຽວກັບພຣະຜູ້ຊ່ວຍໃຫ້ລອດ ຫລັງຈາກການອ່ານ ຄຳສອນ ແລະ ພັນທະສັນຍາ 110:1–10? ພຣະອົງໄດ້ສະແດງພຣະອົງເອງໃຫ້ປະຈັກແກ່ທ່ານໃນວິທີໃດຢູ່ໃນພຣະວິຫານ? ໃນທາງໃດແດ່ທີ່ພຣະອົງຊ່ວຍທ່ານໃຫ້ຮູ້ວ່າ ພຣະອົງຮັບເອົາຄວາມພະຍາຍາມ ແລະ ການເສຍສະລະຂອງທ່ານ?

ແຕ່ລະສົ້ນຂອງພຣະວິຫານເຄີດແລນ ມີແທ່ນປາໄສສຳລັບຜູ້ນຳຖານະປະໂລຫິດ.

ຄຳສອນ ແລະ ພັນທະສັນຍາ 110:11–16

ຂໍກະແຈຂອງຖານະປະໂລຫິດທີ່ຈຳເປັນໃນການບັນລຸວຽກງານຂອງພຣະເຈົ້າ ມີຢູ່ໃນສາດສະໜາຈັກທຸກວັນນີ້.

ເພື່ອຈະໄດ້ເຂົ້າໃຈຂໍກະແຈຂອງຖານະປະໂລຫິດທີ່ໂມເຊ, ອີລາຍ, ແລະ ເອລີຢາ ໄດ້ມອບໃຫ້ແກ່ໂຈເຊັບ ສະມິດ ແລະ ອໍລີເວີ ຄາວເດີຣີ ຢູ່ໃນພຣະວິຫານເຄີດແລນ, ທ່ານສາມາດອ່ານຂ່າວສານຂອງແອວເດີ ຄວິນຕິນ ແອວ ຄຸກ “Prepare to Meet God” (Ensign ຫລື Liahona, May 2018, 114–17). ແອວເດີ ຄຸກ ໄດ້ບັນຍາຍເຖິງຂໍກະແຈເຫລົ່ານີ້ ທີ່ກ່ຽວຂ້ອງກັບວຽກງານຂອງສາດສະໜາຈັກໃນທຸກວັນນີ້. ທ່ານອາດຢາກຄິດທີ່ຈະຮຽນຮູ້ກ່ຽວກັບສາດສະດາໃນສະໄໝບູຮານເຫລົ່ານີ້ ໂດຍການສຶກສາ “ໂມເຊ,” “ອີລາຍ,” ແລະ “ເອລີຢາ” ຢູ່ໃນຄູ່ມືພຣະຄຳພີ (scriptures.ChurchofJesusChrist.org). ໃຫ້ໄຕ່ຕອງສິ່ງທີ່ທ່ານສາມາດເຮັດ ເພື່ອຊ່ວຍໃນວຽກງານທີ່ກ່ຽວພັນກັບຂໍກະແຈເຫລົ່ານີ້.

ເບິ່ງ “Priesthood Keys,” True to the Faith, 126–27; Henry B. Eyring, “He Goes before Us,” Ensign ຫລື Liahona, May 2020, 66–69 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 109.ນຳກັນເປັນຄອບຄົວ, ໃຫ້ຊອກຫາບາງຂໍ້ຢູ່ໃນ ພາກທີ 109 ທີ່ດົນໃຈທ່ານໃຫ້ໃຊ້ເວລາຫລາຍກວ່າເກົ່າຢູ່ໃນພຣະວິຫານ (ຍົກຕົວຢ່າງ, ເບິ່ງຂໍ້ທີ່ຢູ່ກ້ອງຫົວຂໍ້ “ແນວຄິດສຳລັບການສຶກສາພຣະຄຳພີເປັນສ່ວນຕົວ”). ໃຫ້ເວົ້າລົມກັນກ່ຽວກັບວິທີທີ່ພວກທ່ານສາມາດເຮັດຕາມສິ່ງທີ່ປະທານຣະໂຊ ເອັມ ແນວສັນ ໄດ້ແນະນຳ: “ໃຫ້ໄປເຂົ້າເຝົ້າພຣະຜູ້ເປັນເຈົ້າເປັນປະຈຳ—ໄປຫາບ້ານທີ່ສັກສິດຂອງພຣະອົງ—ແລ້ວໃຫ້ຮັກສາການນັດພົບນັ້ນດ້ວຍຄວາມແນ່ນອນ ແລະ ດ້ວຍຄວາມຊື່ນຊົມ” (“Becoming Exemplary Latter-day Saints,” Ensign ຫລື Liahona, Nov. 2018, 114). ຖ້າຫາກທ່ານ ຫລື ຄອບຄົວຂອງທ່ານຍັງບໍ່ໄດ້ໄປພຣະວິຫານເທື່ອ, ທ່ານສາມາດເປີດເບິ່ງ temples.ChurchofJesusChrist.org ເພື່ອຊ່ວຍກະກຽມຕົວທ່ານເອງທີ່ຈະໄປ.

ຄຳສອນ ແລະ ພັນທະສັນຍາ 109:78–80.ເພງສວດ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30) ໄດ້ແຕ່ງຂຶ້ນສຳລັບການອຸທິດພຣະວິຫານເຄີດແລນ—ແລະ ມັນໄດ້ຖືກຮ້ອງໃນການອຸທິດພຣະວິຫານທຸກເທື່ອ ນັບແຕ່ນັ້ນມາ. ພວກທ່ານສາມາດຮ້ອງເພງສວດເພງນີ້ນຳກັນເປັນຄອບຄົວ ແລະ ຊອກຫາສຳນວນທີ່ເພີ່ມຄວາມກະຕັນຍູຂອງທ່ານຕໍ່ພຣະວິຫານໃນຍຸກສຸດທ້າຍ. ເພງນີ້ກ່ຽວຂ້ອງກັບຂ່າວສານຂອງ ຄຳສອນ ແລະ ພັນທະສັນຍາ 109:78–80 ແນວໃດ?

ທ່ານສາມາດພົບເຫັນຄຳອະທິຖານອຸທິດສຳລັບພຣະວິຫານທີ່ຢູ່ໃກ້ທ່ານໄດ້ ຢູ່ທີ່ temples.ChurchofJesusChrist.org.

ຄຳສອນ ແລະ ພັນທະສັນຍາ 110.ຂະນະທີ່ຄອບຄົວຂອງທ່ານອ່ານ ພາກທີ 110 ແລະ ເບິ່ງຮູບຢູ່ໃນທ້າຍຂອງໂຄງຮ່າງນີ້, ໃຫ້ເຊື້ອເຊີນເຂົາເຈົ້າໃຫ້ວາດພາບວ່າ ເຂົາເຈົ້າຈະຮູ້ສຶກແນວໃດ ຖ້າຫາກເຂົາເຈົ້າໄດ້ມີໜ້າຢູ່ກັບໂຈເຊັບ ສະມິດ ແລະ ອໍລີເວີ ຄາວເດີຣີ ໃນພຣະວິຫານເຄີດແລນ. ໃຫ້ໂອກາດຄອບຄົວຂອງທ່ານແບ່ງປັນຄວາມຮູ້ສຶກກ່ຽວກັບພຣະຜູ້ຊ່ວຍໃຫ້ລອດ.

ຄຳສອນ ແລະ ພັນທະສັນຍາ 110:15.ແມ່ນຫຍັງທີ່ຊ່ວຍ “ຫັນໃຈ” ຂອງລູກໆຂອງທ່ານໄປຫາບັນພະບຸລຸດຂອງພວກເຂົາ? ທ່ານສາມາດພົບເຫັນແນວຄິດທີ່ສະໜຸກສະໜານບາງຢ່າງໄດ້ ຢູ່ທີ່ FamilySearch.org/discovery. ພວກທ່ານສາມາດຊ່ວຍກັນຊອກຫາບັນພະບຸລຸດ ຜູ້ທີ່ຍັງບໍ່ໄດ້ຮັບພິທີການຂອງພຣະວິຫານເທື່ອ ແລະ ວາງແຜນໄປເຮັດພິທີການແທນເຂົາເຈົ້າຢູ່ໃນພຣະວິຫານ. ພວກທ່ານກໍຍັງສາມາດເວົ້າລົມກັນກ່ຽວກັບວິທີທີ່ວຽກງານທີ່ເອລີຢາໄດ້ຟື້ນຟູຢູ່ໃນພຣະວິຫານເຄີດແລນ ເຮັດໃຫ້ພວກທ່ານມີຄວາມຮັກຕໍ່ບັນພະບຸລຸດຂອງພວກທ່ານຫລາຍຂຶ້ນກວ່າເກົ່າແນວໃດ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30.

ຮູບພາບ

ຮູບເຄື່ອງໝາຍສຽງຂອງການຟື້ນຟູ

ສຽງຂອງການຟື້ນຟູ

ການສະແດງໃຫ້ປະຈັກທາງວິນຍານ ແລະ ພຣະວິຫານເຄີດແລນ

Like a Fire Is Burning [ເໝືອນດັ່ງໄຟກຳລັງລຸກໄໝ້], ໂດຍ ກະເລັນ ແອັສ ຮອບຄິນສັນ

ຢູ່ຂ້າງລຸ່ມແມ່ນຖ້ອຍຄຳຂອງໄພ່ພົນຍຸກສຸດທ້າຍ ຜູ້ທີ່ໄດ້ຢູ່ໃນພຣະວິຫານເຄີດແລນ ລະຫວ່າງການອຸທິດ ແລະ ຢູ່ໃນການປະຊຸມອື່ນໆ ຕໍ່ຈາກນັ້ນ. ຫລາຍຄົນໄດ້ປຽບທຽບປະສົບການຂອງເຂົາເຈົ້າໃສ່ກັບປະສົບການຂອງໄພ່ພົນໃນສະໄໝບູຮານ ເມື່ອ “ອຳນາດຈາກເບື້ອງເທິງລົງມາເທິງ” ເຂົາເຈົ້າ ໃນວັນ ເພັນເຕຄໍສະເຕ (ລູກາ 24:49; ເບິ່ງ ກິດຈະການ 2:1–4; ຄຳສອນ ແລະ ພັນທະສັນຍາ 109:36–37 ນຳອີກ).

ອີລາຍຊາ ອາ ສະໂນ

“ພິທີການອຸທິດນັ້ນ ອາດຝຶກຊ້ອມກັນກ່ອນ, ແຕ່ບໍ່ມີພາສາໃດ ທີ່ສາມາດບັນຍາຍ ເຖິງການສະແດງໃຫ້ປະຈັກຈາກສະຫວັນ ໃນວັນທີ່ໜ້າຊົງຈຳນັ້ນ. ທູດສະຫວັນໄດ້ມາປະກົດຕໍ່ບາງຄົນ, ໃນຂະນະທີ່ທຸກຄົນຮູ້ສຶກເຖິງຄວາມສູງສົ່ງ, ແລະ ທຸກຫົວໃຈ ໄດ້ເຕັມໄປດ້ວຍ‘ຄວາມຊື່ນຊົມ ຢ່າງທີ່ບອກບໍ່ໄດ້ ແລະ ເຕັມໄປດ້ວຍລັດສະໝີພາບ.’”¹

ຊິວເວຍ ຄັດເລີ ແວບ

“ໜຶ່ງໃນສິ່ງທີ່ຂ້າພະເຈົ້າຈື່ຈຳໄດ້ແມ່ນການອຸທິດພຣະວິຫານ. ພໍ່ຂອງຂ້າພະເຈົ້າໄດ້ຍົກພວກເຮົາຂຶ້ນນັ່ງຕັກເພິ່ນ ແລະ ໄດ້ບອກພວກເຮົາວ່າ ເປັນຫຍັງພວກເຮົາຈຶ່ງຈະໄປ ແລະ ການອຸທິດບ້ານຂອງພຣະເຈົ້າໝາຍຄວາມວ່າແນວໃດ. ແລະ ເຖິງແມ່ນວ່າຂ້າພະເຈົ້າຍັງນ້ອຍຢູ່ໃນເວລານັ້ນ, ຂ້າພະເຈົ້າກໍຍັງຈື່ໂອກາດນັ້ນໄດ້ຢ່າງແຈ້ງຊັດ. ຂ້າພະເຈົ້າສາມາດຫວນຄິດຜ່ານໄລຍະຫລາຍປີ ແລະ ໄດ້ເຫັນຕົວເອງຕອນຂ້າພະເຈົ້າໄດ້ເຫັນສາດສະດາໂຈເຊັບ, ຢືນຢູ່ ແລະ ຍົກມືຂຶ້ນເທິງຟ້າສະຫວັນ, ໃບໜ້າຂອງເພິ່ນຊີດຊຽວ, ນ້ຳຕາໄດ້ໄຫລລົງອາບແກ້ມເພິ່ນ ຂະນະທີ່ເພິ່ນກ່າວໃນວັນທີ່ໜ້າຊົງຈຳນັ້ນ. ທຸກຄົນເບິ່ງຄືວ່ານ້ຳຕາໄຫລຄືກັນ. ພຣະວິຫານອັ່ງອໍໄປດ້ວຍຜູ້ຄົນ ຈົນວ່າເດັກນ້ອຍສ່ວນຫລາຍໄດ້ນັ່ງຕັກຜູ້ໃຫຍ່, ເອື້ອຍຂອງຂ້າພະເຈົ້າໄດ້ນັ່ງຕັກພໍ່, ຂ້າພະເຈົ້າໄດ້ນັ່ງຕັກແມ່. ຂ້າພະເຈົ້າຍັງຈື່ເສື້ອຜ້າທີ່ພວກເຮົານຸ່ງໃນມື້ນັ້ນ. ໃນເວລານັ້ນ ຄວາມຄິດຂອງຂ້າພະເຈົ້າຍັງອ່ອນເກີນໄປທີ່ຈະສາມາດເຂົ້າໃຈເຖິງຄວາມສຳຄັນທັງໝົດຂອງມັນໄດ້, ແຕ່ເມື່ອເວລາໄດ້ຜ່ານໄປ ຂ້າພະເຈົ້າໄດ້ເຂົ້າໃຈຫລາຍຂຶ້ນ, ແລະ ຂ້າພະເຈົ້າຮູ້ບຸນຄຸນທີ່ຂ້າພະເຈົ້າໄດ້ຮັບສິດທິພິເສດ ໃນການໄປຮ່ວມ.”²

ອໍລີເວີ ຄາວເດີຣີ

“ໃນຕອນຄ່ຳ ຂ້າພະເຈົ້າໄດ້ພົບກັບເຈົ້າໜ້າທີ່ຂອງສາດສະໜາຈັກ ຢູ່ໃນບ້ານຂອງພຣະຜູ້ເປັນເຈົ້າ. ພຣະວິນຍານໄດ້ຖອກເທລົງມາ—ຂ້າພະເຈົ້າໄດ້ເຫັນລັດສະໝີພາບຂອງພຣະເຈົ້າ, ຄືກັນກັບກ້ອນເມກໃຫຍ່, ລົງມາ ແລະ ປົກຄຸມພຣະວິຫານ, ແລະ ເຕັມຢູ່ໃນພຣະວິຫານຄືກັນກັບລົມອັນມີພະລັງແຮງ. ພ້ອມນີ້ ຂ້າພະເຈົ້າຍັງໄດ້ເຫັນລີ້ນເປັນຮູບເໝືອນແປວໄຟ ລົງມາຍັງຫລາຍຄົນ, … ຂະນະທີ່ເຂົາເຈົ້າເວົ້າພາສາຕ່າງໆ ແລະ ທຳນາຍ.”³

ເບັນຈາມິນ ບຣາວ

“ມີພາບນິມິດຫລາຍຢ່າງປະກົດຂຶ້ນ. ບາງຄົນໄດ້ເຫັນເລົາ ຫລື ກ້ອນເມກຢູ່ເທິງພຣະວິຫານ, ຮຸ່ງເຫລື້ອມເປັນສີຄຳເມື່ອສະທ້ອນແສງແດດ. ອີກສອງຄົນໄດ້ເຫັນສາມພຣະອົງລ່ອງລອຍຢູ່ໃນຫ້ອງພ້ອມກັບກະແຈຫລາຍດວງທີ່ຮຸ່ງເຫລື້ອມຢູ່ໃນພຣະຫັດຂອງພວກພຣະອົງ, ແລະ ກໍມີສາຍໂສ້ທີ່ຮຸ່ງເຫລື້ອມຢູ່ໃນພຣະຫັດຂອງພວກພຣະອົງຄືກັນ.”⁴

ອໍສັນ ພະແຣັດ

“ພຣະເຈົ້າໄດ້ສະຖິດຢູ່ທີ່ນັ້ນ, ເຫລົ່າທູດສະຫວັນຂອງພຣະອົງກໍຢູ່ທີ່ນັ້ນ, ພຣະວິນຍານບໍລິສຸດກໍຢູ່ໃນທ່າມກາງຜູ້ຄົນ … ແລະ ເຂົາເຈົ້າເຕັມໄປດ້ວຍອຳນາດ ແລະ ການດົນໃຈຈາກພຣະວິນຍານບໍລິສຸດ ຈາກຫົວເຖິງຕີນ.”⁵

ແນນຊີ ນາໂອມີ ອາເລັກແຊນເດີ ທະເຣຊີ

“[ເມື່ອ] ພຣະວິຫານສຳເລັດ ແລະ ອຸທິດແລ້ວ … ມັນແມ່ນສອງມື້ທີ່ຂ້າພະເຈົ້າມີຄວາມສຸກຫລາຍທີ່ສຸດໃນຊີວິດ. ເພງທີ່ເໝາະສົມທີ່ຖືກແຕ່ງຂຶ້ນສຳລັບໂອກາດນັ້ນແມ່ນ ‘ພຣະວິນຍານພຣະເຈົ້າເໝືອນດັ່ງໄຟກຳລັງລຸກໄໝ້.’ ມັນເປັນຄວາມຈິງທີ່ວ່າ ອິດທິພົນຂອງສະຫວັນໄດ້ຢູ່ເທິງພຣະວິຫານແຫ່ງນັ້ນ. … ຂ້າພະເຈົ້າຮູ້ສຶກວ່າ ມັນເປັນສະຫວັນເທິງໂລກ.”⁶