“ວັນທີ 4–10 ເດືອນຕຸລາ. ຄຳສອນ ແລະ ພັນທະສັນຍາ 111–114: ‘ເຮົາຈະສັ່ງທຸກສິ່ງທັງປວງເພື່ອຜົນປະໂຫຍດຂອງພວກເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 4–10 ເດືອນຕຸລາ. ຄຳສອນ ແລະ ພັນທະສັນຍາ 111–114,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ໂຈເຊັບ ສະມິດ ສັ່ງສອນ

ວັນທີ 4–10 ເດືອນຕຸລາ

ຄຳສອນ ແລະ ພັນທະສັນຍາ 111–114

“ເຮົາຈະສັ່ງທຸກສິ່ງທັງປວງເພື່ອຜົນປະໂຫຍດຂອງພວກເຈົ້າ”

ໃຫ້ທູນຂໍການນຳພາຈາກພຣະວິນຍານດ້ວຍການອະທິຖານ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 111–14, ແລະ ບັນທຶກຄວາມປະທັບໃຈຂອງທ່ານ. ແລ້ວໃຫ້ພິຈາລະນາວິທີທີ່ທ່ານສາມາດປະຕິບັດຕາມຄວາມປະທັບໃຈເຫລົ່ານັ້ນ.

ບັນທຶກຄວາມປະທັບໃຈຂອງທ່ານ

ທ່ານເຄີຍມີປະສົບການທາງວິນຍານບໍ ທີ່ເຮັດໃຫ້ທ່ານຮູ້ສຶກໝັ້ນໃຈ ແລະ ປອດໄພ ໃນສັດທາຂອງທ່ານ—ແຕ່ແລ້ວຄວາມທຸກໃນຊີວິດໄດ້ທົດສອບສັດທາຂອງທ່ານ, ແລະ ທ່ານພົບເຫັນຕົວເອງດີ້ນລົນຫາຄວາມສະຫງົບທີ່ທ່ານເຄີຍມີ? ສິ່ງທີ່ຄ້າຍຄືກັນນີ້ ກໍໄດ້ເກີດກັບໄພ່ພົນຢູ່ໃນເມືອງເຄີດແລນຄືກັນ. ໜ້ອຍກວ່າໜຶ່ງປີຫລັງຈາກການຖອກເທທາງວິນຍານທີ່ກ່ຽວຂ້ອງກັບການອຸທິດພຣະວິຫານເຄີດແລນ, ບັນຫາໄດ້ເກີດຂຶ້ນ. ວິກິດທາງການເງິນ, ຄວາມບາດໝາງຢູ່ໃນກຸ່ມອັກຄະສາວົກສິບສອງ, ແລະ ການທົດລອງຢ່າງອື່ນໆ ໄດ້ເຮັດໃຫ້ບາງຄົນຫວັ່ນໄຫວໃນສັດທາຂອງຕົນ.

ເຮົາບໍ່ສາມາດຫລີກເວັ້ນຈາກການທົດລອງ, ສະນັ້ນ ເຮັດແນວໃດເຮົາຈຶ່ງຈະສາມາດປ້ອງກັນມັນບໍ່ໃຫ້ຄຸກຄາມສັດທາ ແລະ ປະຈັກພະຍານຂອງເຮົາໄດ້? ບາງທີພາກສ່ວນໜຶ່ງຂອງຄຳຕອບ ອາດພົບເຫັນຢູ່ໃນຄຳແນະນຳຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 112, ຊຶ່ງໄດ້ມອບໃຫ້ຂະນະທີ່ຄວາມຍາກລຳບາກຢູ່ໃນເມືອງເຄີດແລນ ເພີ່ມທະວີຂຶ້ນ. ພຣະຜູ້ເປັນເຈົ້າໄດ້ກ່າວວ່າ, “ເຮັດໃຫ້ໃຈຂອງເຈົ້າບໍລິສຸດຢູ່ຕໍ່ໜ້າເຮົາ” (ຂໍ້ທີ 28), “ຢ່າກະບົດ” (ຂໍ້ທີ 15), “ຈົ່ງຄາດແອວຂອງເຈົ້າເພື່ອວຽກງານນັ້ນ” (ຂໍ້ທີ 7), ແລະ “ຈົ່ງຖ່ອມຕົວ” (ຂໍ້ທີ 10). ເມື່ອທີ່ເຮົາເຮັດຕາມຄຳແນະນຳນີ້, ພຣະຜູ້ເປັນເຈົ້າຈະ “ຈູງມືພາ [ເຮົາ] ໄປ” ຜ່ານຜ່າຄວາມຍາກລຳບາກ ແລະ ໄປສູ່ການປິ່ນປົວ ແລະ ຄວາມສະຫງົບສຸກ (ເບິ່ງ ຂໍ້ທີ 10, 13).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 111

ພຣະຜູ້ເປັນເຈົ້າສາມາດ “ສັ່ງທຸກສິ່ງທັງປວງເພື່ອຜົນປະໂຫຍດ [ຂອງເຮົາ].”

ເມື່ອເຖິງປີ 1836, ສາດສະໜາຈັກໄດ້ມີໜີ້ສິນຫລາຍໃນການເຮັດວຽກງານຂອງພຣະຜູ້ເປັນເຈົ້າ. ຂະນະທີ່ໂຈເຊັບ ສະມິດ ແລະ ຄົນອື່ນໆເປັນຫ່ວງກ່ຽວກັບໜີ້ສິນເຫລົ່ານີ້ ແລະ ໄດ້ຊອກຫາທາງຈ່າຍໜີ້ສິນ, ພວກເພິ່ນໄດ້ເດີນທາງໄປເມືອງຊາເລັມ, ລັດມາສາຊູເສດສ໌, ບາງທີເພາະຂ່າວເລົ່າລືວ່າ ມີເງິນຈຳນວນໜຶ່ງຖືກປະຖິ້ມຢູ່ໃນເຮືອນຫລັງໜຶ່ງຢູ່ທີ່ນັ້ນ (ເບິ່ງ ຫົວຂໍ້ພາກຂອງ ຄຳສອນ ແລະ ພັນທະສັນຍາ 111). ຫລັງຈາກພວກເພິ່ນໄດ້ໄປເຖິງເມືອງຊາເລັມ, ພຣະຜູ້ເປັນເຈົ້າໄດ້ປະກາດວ່າ, “ມີຊັບສົມບັດຢ່າງຫລວງຫລາຍກວ່າໜຶ່ງຢ່າງໃຫ້ພວກເຈົ້າຢູ່ໃນເມືອງນີ້” (ຂໍ້ທີ 10)—ຊັບສົມບັດທີ່ລວມທັງຜູ້ຄົນທີ່ພຣະອົງຈະ “ເຕົ້າໂຮມອອກມາໃນເວລາອັນເໝາະສົມ ເພື່ອຜົນປະໂຫຍດຂອງຊີໂອນ” (ຂໍ້ທີ 2; ເບິ່ງ ອົບພະຍົບ 19:5 ນຳອີກ). ເຖິງແມ່ນວ່າ ພວກເພິ່ນບໍ່ພົບເຫັນເງິນຢູ່ເມືອງຊາເລັມ, ແຕ່ຕໍ່ມາ ຜູ້ປ່ຽນໃຈເຫລື້ອມໃສທີ່ມາຈາກບ່ອນນັ້ນດ້ວຍຄວາມພະຍາຍາມຂອງຜູ້ສອນສາດສະໜາ ໄດ້ເປັນພາກສ່ວນໜຶ່ງທີ່ບັນລຸຄຳສັນຍາຂອງພຣະຜູ້ເປັນເຈົ້າ.

ຂະນະທີ່ທ່ານອ່ານ ພາກທີ 111, ໃຫ້ຄິດກ່ຽວກັບສິ່ງທີ່ທ່ານເປັນຫ່ວງນຳ. ໃຫ້ພິຈາລະນາພຣະຄຳຂອງພຣະຜູ້ເປັນເຈົ້າຕໍ່ໂຈເຊັບ ອາດກ່ຽວຂ້ອງກັບທ່ານແນວໃດ. ພຣະຜູ້ເປັນເຈົ້າໄດ້ຊ່ວຍທ່ານໃຫ້ພົບເຫັນ “ຊັບສົມບັດ” ທີ່ບໍ່ຄາດຄິດແນວໃດ? (ຂໍ້ທີ 10). ໃຫ້ຄິດກ່ຽວກັບສິ່ງທີ່ພຣະອົງໄດ້ກະທຳ ໃນການ “ສັ່ງທຸກສິ່ງທັງປວງເພື່ອຜົນປະໂຫຍດຂອງພວກເຈົ້າ” (ຂໍ້ທີ 11). ສຳນວນທີ່ວ່າ “ໃຫ້ໄວເທົ່າທີ່ພວກເຈົ້າຮັບມັນໄດ້” ສິດສອນທ່ານກ່ຽວກັບພຣະບິດາເທິງສະຫວັນແນວໃດ?

ເບິ່ງ ມັດທາຍ 6:19–21, 33; “More Treasures Than One,” Revelations in Context, 229–34 ນຳອີກ.

ຄຳສອນ ແລະ ພັນທະສັນຍາ 112:3–15

ພຣະຜູ້ເປັນເຈົ້າຈະນຳພາຜູ້ທີ່ສະແຫວງຫາວຽກງານຂອງພຣະອົງດ້ວຍຄວາມຖ່ອມຕົວ.

ຄວາມເປັນນ້ຳໜຶ່ງໃຈດຽວກັນຂອງກຸ່ມອັກຄະສາວົກໄດ້ເສື່ອມໂຊມລົງໃນລະດູຮ້ອນຂອງປີ 1837. ມີຄວາມຄິດທີ່ແຕກຕ່າງກັນເລື່ອງໜ້າທີ່ຮັບຜິດຊອບ, ແລະ ສະມາຊິກບາງຄົນໄດ້ເວົ້າຕໍ່ຕ້ານສາດສະດາ ໂຈເຊັບ ສະມິດ. ທອມມັສ ບີ ມາສ໌, ເວລານັ້ນໄດ້ເປັນປະທານຂອງກຸ່ມອັກຄະສາວົກສິບສອງ, ມີຄວາມເປັນຫ່ວງ, ແລະ ເພິ່ນໄດ້ຈາກລັດມີເຊີຣີ ໄປຫາລັດໂອໄຮໂອ, ສະແຫວງຫາຄຳແນະນຳຈາກສາດສະດາ. ບຣາເດີ ມາສ໌ ໄດ້ຮັບຄຳແນະນຳຜ່ານທາງການເປີດເຜີຍ ຢູ່ໃນ ພາກທີ 112. ຄຳແນະນຳຂອງພຣະຜູ້ເປັນເຈົ້າອາດຊ່ວຍເພິ່ນ ແລະ ກຸ່ມຂອງເພິ່ນແນວໃດ? ບົດຮຽນໃດແດ່ແມ່ນສຳລັບທ່ານ ຂະນະທີ່ທ່ານພະຍາຍາມເອົາຊະນະການຂັດແຍ້ງ ແລະ ຄວາມຮູ້ສຶກທີ່ບາດໝາງ?

ໃຫ້ທ່ານພິຈາລະນາໂດຍສະເພາະ ຂໍ້ທີ 10. ຄຳວ່າ ພຣະຜູ້ເປັນເຈົ້າຈະ “ຈູງມື” ພາທ່ານໄປໝາຍຄວາມວ່າແນວໃດ? ເປັນຫຍັງການນຳພາເຊັ່ນນີ້ ຈຶ່ງຮຽກຮ້ອງຄວາມຖ່ອມຕົວ?

ເບິ່ງ Ulisses Soares, “Be Meek and Lowly of Heart,” Ensign ຫລື Liahona, Nov. 2013, 9–11; “The Faith and Fall of Thomas Marsh,” Revelations in Context, 54–60 ນຳອີກ.

ຖ້າຫາກເຮົາຖ່ອມຕົວ, ແລ້ວພຣະຜູ້ເປັນເຈົ້າຈະນຳພາເຮົາ ແລະ ຕອບຄຳອະທິຖານຂອງເຮົາ.

ຄຳສອນ ແລະ ພັນທະສັນຍາ 113

ໂຈເຊັບ ສະມິດ ໄດ້ເປັນ “ຜູ້ຮັບໃຊ້ຄົນໜຶ່ງຢູ່ໃນພຣະຫັດຂອງພຣະຄຣິດ.”

ເອຊາຢາໄດ້ກ່າວເຖິງລູກຫລານຂອງເຢຊີ ວ່າເປັນ “ກົກໄມ້” ແລະ ເປັນ “ຮາກ” (ເອຊາຢາ 11:1, 10). ໃນ ພາກທີ 113, ພຣະຜູ້ເປັນເຈົ້າອະທິບາຍວ່າ ລູກຫລານເຫລົ່ານີ້, ຜູ້ຮັບໃຊ້ຂອງພຣະຄຣິດ, ຈະເປັນເຄື່ອງມືໃນການເຕົ້າໂຮມຜູ້ຄົນຂອງພຣະຜູ້ເປັນເຈົ້າໃນຍຸກສຸດທ້າຍ (ເບິ່ງ ຄຳສອນ ແລະ ພັນທະສັນຍາ 113:4, 6)—ຄຳທຳນາຍທີ່ບັນຍາຍກ່ຽວກັບສາດສະດາ ໂຈເຊັບ ສະມິດ ເປັນຢ່າງດີ. ຄວາມຈິງນີ້ ແລະ ຢ່າງອື່ນໆ ຢູ່ໃນ ພາກທີ 113 ໄດ້ເປັນກຳລັງໃຈໃຫ້ໄພ່ພົນລະຫວ່າງທີ່ປະເຊີນກັບຄວາມຫຍຸ້ງຍາກຢູ່ໃນເມືອງເຄີດແລນແນວໃດ? ທ່ານພົບເຫັນຫຍັງແດ່ຢູ່ໃນການເປີດເຜີຍ ທີ່ດົນໃຈທ່ານໃຫ້ມີພາກສ່ວນໃນວຽກງານຂອງພຣະຜູ້ເປັນເຈົ້າໃນທຸກວັນນີ້?

ເບິ່ງ ຄູ່ມືພຣະຄຳພີ, “ເຢຊີ,” scriptures.ChurchofJesusChrist.org; 2 ນີໄຟ 21:10–12; ໂຈເຊັບ ສະມິດ—ປະຫວັດ 1:40 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 111:2, 9–11.ຂໍ້ເຫລົ່ານີ້ສາມາດຊຸກຍູ້ການສົນທະນາກ່ຽວກັບສິ່ງທີ່ຄອບຄົວຂອງທ່ານຖືວ່າເປັນ “ຊັບສົມບັດ” ນິລັນດອນ. ທ່ານສາມາດຫລິ້ນການຊອກຫາຊັບສົມບັດບາງຢ່າງຢູ່ໃນເຮືອນທ່ານ ທີ່ເປັນຕົວແທນໃຫ້ແກ່ສິ່ງທີ່ພຣະຜູ້ເປັນເຈົ້າເຫັນວ່າເປັນສົມບັດ ຫລື ຖືວ່າມີຄ່າ. ເມື່ອຄອບຄົວຂອງທ່ານຊອກເຫັນແຕ່ລະຢ່າງ, ໃຫ້ສົນທະນາສິ່ງທີ່ພວກທ່ານສາມາດເຮັດ ເພື່ອສະແດງວ່າມັນມີຄຸນຄ່າຕໍ່ພວກທ່ານ.

ຄຳສອນ ແລະ ພັນທະສັນຍາ 112:10.ແອວເດີ ຢູລິດຊິສ໌ ໂຊອາເຣສ໌ ໄດ້ບັນຍາຍຜູ້ຄົນທີ່ຖ່ອມຕົວໃນທາງນີ້ວ່າ: “ຄົນທີ່ຖ່ອມຕົວເປັນຄົນທີ່ສອນງ່າຍ, ຮັບຮູ້ວ່າເຂົາເຈົ້າເພິ່ງພຣະເຈົ້າ ແລະ ປາດຖະໜາທີ່ຈະເຮັດຕາມພຣະປະສົງຂອງພຣະອົງ. ຄົນຖ່ອມຕົວເປັນຄົນອ່ອນໂຍນ ແລະ ມີຄວາມສາມາດທີ່ຈະເປັນອິດທິພົນໃຫ້ແກ່ຄົນອື່ນໃຫ້ເປັນຄືກັນກັບເຂົາເຈົ້າ” (“Be Meek and Lowly of Heart,” Ensign ຫລື Liahona, Nov. 2013, 10). ໃຫ້ຄິດຫາທາງທີ່ຈະຊ່ວຍຄອບຄົວຂອງທ່ານໃຫ້ເຂົ້າໃຈຄວາມໝາຍຂອງການເປັນຄົນຖ່ອມຕົວ. ພວກທ່ານສາມາດຮ້ອງເພງໜຶ່ງກ່ຽວກັບຄວາມຖ່ອມຕົວ, ດັ່ງເຊັ່ນ “ພຣະຜູ້ຊ່ວຍດ້ວຍຄວາມຖ່ອມ” (ເພງສວດ ແລະ ເພງຂອງເດັກນ້ອຍ, 28), ຂະນະທີ່ສະມາຊິກໃນຄອບຄົວຄົນໜຶ່ງ “ຈູງມື” ສະມາຊິກຄົນອື່ນໆ ແລະ ພາກັນຍ່າງຢູ່ໃນເຮືອນ. ຫລື ໃຫ້ແບ່ງປັນປະສົບການ ຕອນທີ່ພຣະຜູ້ເປັນເຈົ້າໄດ້ “ຈູງມື” ສະມາຊິກໃນຄອບຄົວຂອງທ່ານໄປ ແລະ “ຕອບຄຳອະທິຖານຂອງ [ເຂົາເຈົ້າ].”

ຄຳສອນ ແລະ ພັນທະສັນຍາ 112:11–14, 26.ແມ່ນຫຍັງຄືຄວາມແຕກຕ່າງລະຫວ່າງການຮູ້ຈັກຊື່ຂອງບາງຄົນ ແລະ ການຮູ້ຈັກຕົວເຂົາເຈົ້າ? ເຮົາຮຽນຮູ້ຫຍັງແດ່ຈາກ ຂໍ້ທີ 11–14 ເຖິງຄວາມໝາຍຂອງການຮູ້ຈັກພຣະຜູ້ເປັນເຈົ້າ?

ຄຳສອນ ແລະ ພັນທະສັນຍາ 112:15.ຄຳວ່າ “ກະບົດ” ຕ້ານສາດສະດາ ໝາຍຄວາມວ່າແນວໃດ? ເຮົາພົບເຫັນຫຍັງແດ່ຢູ່ໃນຂໍ້ນີ້ ທີ່ຊ່ວຍເຮົາໃຫ້ຢາກສະໜັບສະໜູນສາດສະດາ?

ຄຳສອນ ແລະ ພັນທະສັນຍາ 113:7–8.ເຮົາຮຽນຮູ້ຫຍັງແດ່ຈາກ ຂໍ້ທີ 8 ທີ່ຈະຊ່ວຍ “ນຳຊີໂອນມາອີກ” ແລະ ໄຖ່ອິດສະຣາເອນ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະຜູ້ຊ່ວຍດ້ວຍຄວາມຖ່ອມ,” ເພງສວດ ແລະ ເພງຂອງເດັກນ້ອຍ, 28.

ການປັບປຸງການສິດສອນຂອງເຮົາ

ດຳເນີນຊີວິດຕາມປະຈັກພະຍານຂອງທ່ານ “‘ທ່ານສອນສິ່ງທີ່ທ່ານເປັນ,’ ແອວເດີ ນຽວ ເອ ແມ໊ກສະແວວ ໄດ້ສິດສອນ. ‘ລັກສະນະນິໄສຂອງທ່ານຈະເປັນສິ່ງໜ້າຊົງຈຳຫລາຍກວ່າ … ຄວາມຈິງໃດໜຶ່ງ ຢູ່ໃນບົດຮຽນໃດໜຶ່ງ’” (Teaching in the Savior’s Way, 13).