“ວັນທີ 11–17 ເດືອນຕຸລາ. ຄຳສອນ ແລະ ພັນທະສັນຍາ 115–120: ‘ການເສຍສະລະຂອງລາວຈະສັກສິດຕໍ່ເຮົາຫລາຍກວ່າລາຍໄດ້ຂອງລາວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 11–17 ເດືອນຕຸລາ. ຄຳສອນ ແລະ ພັນທະສັນຍາ 115–120,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
Far West [ຟາແວັດ], ໂດຍ ອາລ໌ ຣາວສ໌
ວັນທີ 11–17 ເດືອນຕຸລາ
ຄຳສອນ ແລະ ພັນທະສັນຍາ 115–120
“ການເສຍສະລະຂອງລາວຈະສັກສິດຕໍ່ເຮົາຫລາຍກວ່າລາຍໄດ້ຂອງລາວ”
ພຣະຜູ້ເປັນເຈົ້າຢາກກ່າວກັບທ່ານ. ຂະນະທີ່ທ່ານສຶກສາພຣະຄຳພີ, ໃຫ້ອະທິຖານ ແລະ ທູນຂໍໃຫ້ພຣະອົງຊ່ວຍທ່ານຄົ້ນພົບຄຳສອນຂອງພຣະອົງສຳລັບທ່ານ.
ບັນທຶກຄວາມປະທັບໃຈຂອງທ່ານ
ມັນມີເຫດຜົນທີ່ຈະມີຄວາມຫວັງກັບສະຖານທີ່ເຕົ້າໂຮມແຫ່ງໃໝ່ຂອງໄພ່ພົນ ຢູ່ທີ່ເມືອງຟາແວັດ, ລັດມີເຊີຣີ, ໃນເດືອນກໍລະກົດ ປີ 1838. ເມືອງນີ້ໄດ້ເຕີບໂຕຢ່າງໄວ, ເບິ່ງຄືວ່າມີທີ່ດິນຢ່າງຫລວງຫລາຍ, ແລະ ມັນຖືກເປີດເຜີຍວ່າ ມັນຕັ້ງຢູ່ໃກ້ເບື້ອງເໜືອຂອງ ອາດາມ-ອອນໄດ-ອາມັນ, ສະຖານທີ່ສຳຄັນທາງວິນຍານ (ເບິ່ງ ຄຳສອນ ແລະ ພັນທະສັນຍາ 107:53–56; 116). ເຖິງຢ່າງໃດກໍຕາມ, ມັນຄົງເປັນເລື່ອງຍາກສຳລັບໄພ່ພົນທີ່ຈະບໍ່ຄິດກ່ຽວກັບສິ່ງທີ່ເຂົາເຈົ້າໄດ້ສູນເສຍ. ເຂົາເຈົ້າໄດ້ຖືກຂັບໄລ່ໜີຈາກເມືອງອິນດີເພັນເດັນສ໌, ຊຶ່ງເປັນສະຖານທີ່ສູນກາງທີ່ຖືກເລືອກຂອງຊີໂອນ, ແລະ ໂອກາດທີ່ຈະໄດ້ກັບຄືນໄປໃນໄວໆນັ້ນ ຄົງເປັນເລື່ອງຍາກ. ນອກເໜືອຈາກນັ້ນ, ໄພ່ພົນຍັງໄດ້ຫລົບໜີຈາກເມືອງເຄີດແລນ, ລັດໂອໄຮໂອນຳອີກ, ໄດ້ປະຖິ້ມພຣະວິຫານທີ່ເຂົາເຈົ້າຮັກ ຫລັງຈາກພຽງແຕ່ສອງປີ. ແລະ ເທື່ອນີ້ບໍ່ໄດ້ເປັນພຽງແຕ່ສັດຕູນອກສາດສະໜາຈັກເທົ່ານັ້ນທີ່ສ້າງບັນຫາ—ສະມາຊິກຜູ້ສຳຄັນຫລາຍຄົນໄດ້ຫັນມາຕໍ່ຕ້ານໂຈເຊັບ ສະມິດ, ລວມທັງພະຍານສາມຄົນຂອງພຣະຄຳພີມໍມອນ ແລະ ສະມາຊິກສີ່ຄົນໃນກຸ່ມອັກຄະສາວົກສິບສອງ. ບາງຄົນອາດສົງໃສວ່າ ອານາຈັກຂອງພຣະເຈົ້າກຳລັງເຕີບໂຕແທ້ໆບໍ, ຫລື ມັນກຳລັງເສື່ອມໂຊມລົງ?
ແຕ່ຜູ້ທີ່ຊື່ສັດບໍ່ໄດ້ໃຫ້ຄຳຖາມເຊັ່ນນັ້ນມາຢຸດຢັ້ງເຂົາເຈົ້າ. ກົງກັນຂ້າມ, ເຂົາເຈົ້າໄດ້ເລີ່ມຕົ້ນສ້າງສະຖານທີ່ສັກສິດແຫ່ງໃໝ່, ເທື່ອນີ້ຢູ່ໃນເມືອງຟາແວັດ. ເຂົາເຈົ້າໄດ້ວາງແຜນທີ່ຈະສ້າງພຣະວິຫານແຫ່ງໃໝ່. ອັກຄະສາວົກໃໝ່ສີ່ຄົນໄດ້ຖືກເອີ້ນ, ລວມທັງສອງຄົນນີ້—ຈອນ ເທເລີ ແລະ ວີວເຝີດ ວູດຣັບ—ຜູ້ຕໍ່ມາໄດ້ກາຍເປັນປະທານຂອງສາດສະໜາຈັກ (ເບິ່ງ ຄຳສອນ ແລະ ພັນທະສັນຍາ 118:6). ໄພ່ພົນໄດ້ຮຽນຮູ້ວ່າ ການເຮັດວຽກງານຂອງພຣະເຈົ້າບໍ່ໄດ້ໝາຍຄວາມວ່າ ຈະບໍ່ມີວັນລົ້ມເຫລວ, ມັນໝາຍຄວາມວ່າ ທ່ານຈະ “ລຸກຂຶ້ນໃໝ່.” ແລະ ເຖິງແມ່ນວ່າທ່ານຕ້ອງໄດ້ເສຍສະລະບາງຢ່າງ, ແຕ່ການເສຍສະລະເຫລົ່ານັ້ນ ຈະເປັນສິ່ງສັກສິດຕໍ່ພຣະເຈົ້າ, ແມ່ນແຕ່ “ສັກສິດຫລາຍກວ່າ … ລາຍໄດ້ [ຂອງທ່ານ]” (ຄຳສອນ ແລະ ພັນທະສັນຍາ 117:13).
ເບິ່ງ Saints, 1:296–99; “Far West and Adam–ondi–Ahman,” Revelations in Context, 235–41.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນ ແລະ ພັນທະສັນຍາ 115:4–6
ຊື່ຂອງສາດສະໜາຈັກຖືກຕັ້ງຂຶ້ນໂດຍພຣະຜູ້ເປັນເຈົ້າ.
ປະທານ ຣະໂຊ ເອັມ ແນວສັນ ໄດ້ກ່າວວ່າ ຊື່ຂອງສາດສະໜາຈັກເປັນ “ເລື່ອງທີ່ສຳຄັນແທ້ໆ” (“The Correct Name of the Church,” Ensign ຫລື Liahona, Nov. 2018, 87). ໃຫ້ຄິດເບິ່ງວ່າເປັນຫຍັງສິ່ງນີ້ຈຶ່ງເປັນຄວາມຈິງ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 115:4–6. ຊື່ຂອງສາດສະໜາຈັກກ່ຽວຂ້ອງກັບວຽກງານ ແລະ ພາລະກິດຂອງມັນແນວໃດ?
ເບິ່ງ 3 ນີໄຟ 27:1–11 ນຳອີກ.
ຄຳສອນ ແລະ ພັນທະສັນຍາ 115:5–6
ຊີໂອນ ແລະ ສະເຕກຂອງມັນໃຫ້ “ບ່ອນຫລົບໄພຈາກພະຍຸ.”
ເຖິງແມ່ນວ່າໄພ່ພົນໄດ້ປະເຊີນກັບຄວາມຫຍຸ້ງຍາກຫລາຍໃນປີ 1838, ແຕ່ພຣະຜູ້ເປັນເຈົ້າຍັງມີຄວາມຄາດໝາຍສູງສຳລັບເຂົາເຈົ້າຢູ່. ໃຫ້ຊອກຫາຂໍ້ຄວາມຢູ່ໃນ ຄຳສອນ ແລະ ພັນທະສັນຍາ 115:5–6 ອັນທີ່ເນັ້ນບົດບາດທີ່ພຣະຜູ້ເປັນເຈົ້າປະສົງໃຫ້ສາດສະໜາຈັກຂອງພຣະອົງ ແລະ ສະມາຊິກໃນນັ້ນ ບັນລຸຢູ່ໃນໂລກນີ້. ຍົກຕົວຢ່າງ, ທ່ານຮູ້ສຶກວ່າທ່ານຄວນເຮັດສິ່ງໃດ ເພື່ອ “ລຸກຂຶ້ນ ແລະ ສ່ອງແສງ”? (ຂໍ້ທີ 5). ພະຍຸທາງວິນຍານໃດແດ່ທີ່ທ່ານສັງເກດເຫັນຢູ່ອ້ອມຮອບທ່ານ, ແລະ ເຮົາຈະພົບ “ບ່ອນຫລົບໄພ” ຜ່ານທາງການເຕົ້າໂຮມແນວໃດ? (ຂໍ້ທີ 6).
ເບິ່ງ 3 ນີໄຟ 18:24 ນຳອີກ.
ການເສຍສະລະຂອງເຮົາແມ່ນສັກສິດຕໍ່ພຣະຜູ້ເປັນເຈົ້າ.
ການໜີຈາກເມືອງເຄີດແລນຄົງເປັນສິ່ງຍາກ ໂດຍສະເພາະສຳລັບຜູ້ທີ່ຄື ນິວເອັນ ເຄ ວິດນີ, ຜູ້ໄດ້ສ້າງຄວາມຮັ່ງມີເປັນດີໃຫ້ແກ່ຄອບຄົວຂອງລາວ. ທ່ານພົບເຫັນຫຍັງແດ່ຢູ່ໃນ ຄຳສອນ ແລະ ພັນທະສັນຍາ 117:1–11 ທີ່ອາດຊ່ວຍເຂົາເຈົ້າຕັດສິນໃຈເສຍສະລະແບບນີ້? ຂໍ້ເຫລົ່ານີ້ປ່ຽນທັດສະນະຂອງທ່ານ ກ່ຽວກັບວ່າສິ່ງໃດສຳຄັນແທ້ໆແນວໃດ?
ການຮຽກຮ້ອງອໍລີເວີ ກະແຣນເຈີ ໃຫ້ເສຍສະລະ ແມ່ນແຕກຕ່າງ: ພຣະຜູ້ເປັນເຈົ້າໄດ້ມອບໝາຍໃຫ້ເພິ່ນຢູ່ເມືອງເຄີດແລນ ແລະ ຈັດການເລື່ອງການເງິນຂອງສາດສະໜາຈັກ. ມັນໄດ້ເປັນພາລະທີ່ໜັກໜ່ວງ, ແລະ ຂະນະທີ່ເພິ່ນໄດ້ເປັນຕົວແທນໃຫ້ແກ່ສາດສະໜາຈັກດ້ວຍຄວາມສຸດຈະລິດ, ໃນທີ່ສຸດເພິ່ນກໍບໍ່ໄດ້ກູ້ເງິນຄືນຫລາຍເທົ່າໃດ. ໃຫ້ພິຈາລະນາພຣະຄຳຂອງພຣະຜູ້ເປັນເຈົ້າຢູ່ໃນ ຂໍ້ທີ 12–15 ອາດກ່ຽວຂ້ອງກັບສິ່ງທີ່ພຣະຜູ້ເປັນເຈົ້າໄດ້ຮຽກຮ້ອງຈາກທ່ານແນວໃດ.
ເບິ່ງ ມັດທາຍ 6:25–33; Boyd K. Packer, “The Least of These,” Ensign ຫລື Liahona, Nov. 2004, 86–88; “Far West and Adam–ondi–Ahman,” Revelations in Context, 239–40 ນຳອີກ.
ຮູບນີ້ ນິວເອັນ ເຄ ວິດນີ ໄດ້ຖືກບັນຊາໃຫ້ຍ້າຍໄປຢູ່ ອາດາມ-ອອນໄດ-ອາມັນ.
ຄຳສອນ ແລະ ພັນທະສັນຍາ 119–20
ໂດຍການຈ່າຍເງິນສ່ວນສິບ, ເຮົາຊ່ວຍສ້າງ ແລະ “ຊຳລະແຜ່ນດິນຊີໂອນໃຫ້ບໍລິສຸດ.”
ຄຳແນະນຳຢູ່ໃນ ພາກທີ 119 ແລະ 120 ຟັງແລ້ວຄ້າຍຄືກັບວິທີທີ່ວຽກງານຂອງພຣະຜູ້ເປັນເຈົ້າໄດ້ຮັບການສະໜັບສະໜູນທາງການເງິນ ໃນວັນເວລາຂອງເຮົາ. ທຸກວັນນີ້, ໄພ່ພົນໄດ້ບໍລິຈາກ “ໜຶ່ງສ່ວນສິບຂອງຜົນປະໂຫຍດທັງໝົດຂອງເຂົາເຈົ້າ [ໃນເວລານີ້ ໝາຍເຖິງ ລາຍໄດ້] ປະຈຳປີ” (ຄຳສອນ ແລະ ພັນທະສັນຍາ 119:4), ແລະ ເງິນທຶນເຫລົ່ານີ້ໄດ້ຖືກກຳກັບໂດຍສະພາທີ່ຮ່ວມດ້ວຍຝ່າຍປະທານສູງສຸດ, ກຸ່ມອັກຄະສາວົກສິບສອງ, ແລະ ຝ່າຍອະທິການຄວບຄຸມ. ໃຫ້ພິຈາລະນາຄຳຖາມດັ່ງຕໍ່ໄປນີ້ ຂະນະທີ່ທ່ານສຶກສາພາກເຫລົ່ານີ້:
-
ການຮັກສາກົດສ່ວນສິບເປັນການ “ຊຳລະແຜ່ນດິນຊີໂອນໃຫ້ບໍລິສຸດ” ແນວໃດ? ກົດນີ້ສາມາດຊ່ວຍເຮັດໃຫ້ບ່ອນທີ່ທ່ານອາໄສຢູ່ ເປັນ“ແຜ່ນດິນຊີໂອນສຳລັບພວກເຈົ້າ” ແນວໃດ? (ຄຳສອນ ແລະ ພັນທະສັນຍາ 119:6).
-
ສຳນວນທີ່ວ່າ “ໂດຍສຽງຂອງເຮົາເອງເຖິງພວກເຂົາ” ຢູ່ໃນ ຄຳສອນ ແລະ ພັນທະສັນຍາ 120 ມີຄວາມສຳຄັນຕໍ່ທ່ານແນວໃດ?
ເບິ່ງ ມາລາກີ 3:8–12; David A. Bednar, “The Windows of Heaven,” Ensign ຫລື Liahona, Nov. 2013, 17–20; “The Tithing of My People,” Revelations in Context, 250–55 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 115:4–6.ມັນຈະຊ່ວຍຄອບຄົວຂອງທ່ານໄດ້ບໍ ທີ່ຈະອ່ານຂໍ້ເຫລົ່ານີ້ ຂະນະທີ່ເບິ່ງຕາເວັນຂຶ້ນ? ມັນອາດຊ່ວຍພວກທ່ານໃຫ້ສົນທະນາເຖິງຄວາມໝາຍທີ່ຈະ “ລຸກຂຶ້ນ ແລະ ສ່ອງແສງ” (ຂໍ້ທີ 5). ຫລື ພວກທ່ານສາມາດສົນທະນາກ່ຽວກັບວ່າ ການຊອກຫາບ່ອນຫລົບໄພ ຕອນມີລົມພະຍຸນັ້ນເປັນຈັ່ງໃດ. ປະສົບການນັ້ນ ຈະເປັນຄືກັບການຊອກຫາ “ບ່ອນຫລົບໄພ” ຢູ່ໃນສາດສະໜາຈັກແນວໃດ? (ຂໍ້ທີ 6). ແລ້ວພວກທ່ານສາມາດລົມກັນກ່ຽວກັບວິທີທີ່ຄອບຄົວຂອງພວກທ່ານສາມາດຊ່ວຍຄົນອື່ນໃຫ້ຊື່ນຊົມກັບບ່ອນຫລົບໄພທີ່ສາດສະໜາຈັກຈັດຫາໃຫ້.
-
ຄຳສອນ ແລະ ພັນທະສັນຍາ 117:1–11.ຄອບຄົວຂອງທ່ານສາມາດປຽບທຽບນ້ຳ “ໜຶ່ງຢອດ” ກັບບາງສິ່ງທີ່ “ຫລາຍກວ່ານັ້ນ” (ຂໍ້ທີ 8), ດັ່ງເຊັ່ນ ນ້ຳໜຶ່ງໂຖ. ສິ່ງນີ້ສາມາດນຳໄປສູ່ການສົນທະນາກ່ຽວກັບສິ່ງທີ່ສຳຄັນໜ້ອຍກວ່າໃນຊີວິດຂອງເຮົາ ທີ່ອາດກີດກັນເຮົາຈາກການໄດ້ຮັບພອນຂອງພຣະເຈົ້າຢ່າງຫລວງຫລາຍ.
-
ຄຳສອນ ແລະ ພັນທະສັນຍາ 119.ພວກທ່ານສາມາດຮ້ອງເພງ ດັ່ງເຊັ່ນ “ນັບພຣະພອນຂອງທ່ານ” (ເພງສວດ ແລະ ເພງຂອງເດັກນ້ອຍ, 8). ເພງ ແລະ ພາກທີ 119 ສິດສອນເຫດຜົນທີ່ເຮົາຈ່າຍເງິນສ່ວນສິບແນວໃດ? ເດັກນ້ອຍກໍສາມາດໄດ້ຮັບຜົນປະໂຫຍດຈາກບົດຮຽນທີ່ໃຊ້ສິ່ງຂອງ: ທ່ານສາມາດເອົາບາງສິ່ງທີ່ນ້ອຍໆໃຫ້ພວກເຂົາ, ຊ່ວຍພວກເຂົາຄຳນວນໜຶ່ງສ່ວນສິບ, ແລະ ບອກພວກເຂົາວ່າ ເປັນຫຍັງທ່ານຈຶ່ງຈ່າຍເງິນສ່ວນສິບ. (ເບິ່ງ ຈິງໃຈຕໍ່ສັດທາ, 180–82 ນຳອີກ.)
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ນັບພຣະພອນຂອງທ່ານ,” ເພງສວດ ແລະ ເພງຂອງເດັກນ້ອຍ, 8.
ການປັບປຸງການສິດສອນຂອງເຮົາ
ຊຸກຍູ້ການກຸ້ມຕົນເອງ. “ເມື່ອ [ສະມາຊິກໃນຄອບຄົວ] ມີຄຳຖາມ, ບາງເທື່ອມັນດີກວ່າທີ່ຈະສິດສອນເຂົາເຈົ້າເຖິງວິທີຊອກຫາຄຳຕອບດ້ວຍຕົວເອງ, ແທນທີ່ຈະຕອບຄຳຖາມທັນທີ” (Teaching in the Savior’s Way, 28).
ການມອບ 10 ເປີເຊັນ ໃຫ້ແກ່ພຣະຜູ້ເປັນເຈົ້າ ເປັນເງິນສ່ວນສິບ ຈະຊ່ວຍເຫລືອວຽກງານແຫ່ງຄວາມລອດຂອງພຣະອົງໃຫ້ດຳເນີນໄປໜ້າ.