“ວັນທີ 25–31 ເດືອນຕຸລາ. ຄຳສອນ ແລະ ພັນທະສັນຍາ 124: ‘ບ້ານແດ່ນາມຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 25–31 ເດືອນຕຸລາ. ຄຳສອນ ແລະ ພັນທະສັນຍາ 124,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ນາວູ

Nauvoo the Beautiful [ນາວູທີ່ສວຍງາມ], ໂດຍ ແລຣີ ວິນບອກ

ວັນທີ 25–31 ເດືອນຕຸລາ

ຄຳສອນ ແລະ ພັນທະສັນຍາ 124

“ບ້ານແດ່ນາມຂອງເຮົາ”

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 124, ໃຫ້ໄຕ່ຕອງພອນທີ່ພຣະຜູ້ເປັນເຈົ້າໄດ້ເຊື້ອເຊີນໄພ່ພົນຢູ່ໃນເມືອງນາວູໃຫ້ຮັບເອົາ ແລະ ພອນທີ່ພຣະອົງສະເໜີມອບໃຫ້ແກ່ທ່ານ.

ບັນທຶກຄວາມປະທັບໃຈຂອງທ່ານ

ເຖິງແມ່ນມັນຫຍຸ້ງຍາກໃນຫົກປີທີ່ຜ່ານມາສຳລັບໄພ່ພົນ, ແຕ່ສະຖານະການໄດ້ເລີ່ມດີຂຶ້ນໃນລະດູໃບໄມ້ປົ່ງຂອງປີ 1839: ໄພ່ພົນທີ່ອົບພະຍົບໄດ້ພົບຄວາມເຫັນອົກເຫັນໃຈຈາກປະຊາຊົນຢູ່ເມືອງຄວິນສີ, ລັດອິລິນອຍ. ນາຍຍາມໄດ້ປ່ອຍສາດສະດາ ໂຈເຊັບ ສະມິດ ແລະ ຜູ້ນຳຂອງສາດສະໜາຈັກຄົນອື່ນໆອອກຈາກການຄຸມຂັງຢູ່ໃນລັດມີເຊີຣີ. ແລະ ສາດສະໜາຈັກຫາກໍໄດ້ຊື້ທີ່ດິນຢູ່ລັດອິລິນອຍ ບ່ອນທີ່ໄພ່ພົນສາມາດເຕົ້າໂຮມກັນອີກ. ແມ່ນແລ້ວ, ມັນເປັນບຶງ, ເປັນດິນດອນທີ່ເຕັມໄປດ້ວຍຍຸງ, ແຕ່ເມື່ອປຽບທຽບໃສ່ກັບການທ້າທາຍທີ່ໄພ່ພົນໄດ້ປະເຊີນ, ສະຖານທີ່ບ່ອນນີ້ອາດເບິ່ງຄືວ່າ ເປັນໄປໄດ້. ສະນັ້ນ ເຂົາເຈົ້າຈຶ່ງໄດ້ເປັ່ງນ້ຳອອກຈາກບຶງ ແລະ ໄດ້ຂຽນກົດຂຶ້ນສຳລັບເມືອງໃໝ່ແຫ່ງນີ້, ຊຶ່ງເຂົາເຈົ້າໄດ້ຕັ້ງຊື່ໃຫ້ວ່າ ນາວູ. ແປວ່າ “ສວຍງາມ” ໃນພາສາເຮັບເຣີ, ແຕ່ມັນເປັນຄຳທີ່ສະແດງອອກເຖິງສັດທາຫລາຍກວ່າຄຳບັນຍາຍທີ່ຖືກຕ້ອງ, ຢ່າງໜ້ອຍໃນຕອນຕົ້ນ. ໃນຂະນະດຽວກັນ, ພຣະຜູ້ເປັນເຈົ້າໄດ້ເນັ້ນໃຫ້ສາດສະດາຮູ້ສຶກເຖິງຄວາມຮີບດ່ວນ. ພຣະອົງມີຄວາມຈິງ ແລະ ພິທີການຫລາຍຕື່ມອີກທີ່ຈະຕ້ອງຟື້ນຟູ, ແລະ ພຣະອົງຕ້ອງການໃຫ້ມີພຣະວິຫານ ບ່ອນທີ່ໄພ່ພົນຈະສາມາດໄດ້ຮັບພອນ ແລະ ພິທີການເຫລົ່ານັ້ນ. ໃນຫລາຍວິທີທາງ, ຄວາມຮູ້ສຶກທາງສັດທາອັນດຽວກັນເຫລົ່ານີ້ ແລະ ຄວາມຮີບດ່ວນ ແມ່ນສຳຄັນໃນວຽກງານຂອງພຣະຜູ້ເປັນເຈົ້າໃນທຸກວັນນີ້ຄືກັນ.

ຂະນະທີ່ເມືອງນາວູໄດ້ກາຍເປັນເມືອງທີ່ສວຍງາມ ພ້ອມດ້ວຍພຣະວິຫານທີ່ສວຍງາມ, ແຕ່ໃນທີ່ສຸດທັງສອງໄດ້ຖືກປະຖິ້ມ. ແຕ່ວຽກງານທີ່ສວຍງາມທີ່ແທ້ຈິງຂອງພຣະຜູ້ເປັນເຈົ້າ, ແຕ່ໃດໆມາ, ແມ່ນຄືການ “ສວມມົງກຸດພວກເຈົ້າດ້ວຍກຽດຕິຍົດ, ຄວາມເປັນອະມະຕະ, ແລະ ຊີວິດນິລັນດອນ” (ຄຳສອນ ແລະ ພັນທະສັນຍາ 124:55), ແລະ ວຽກງານນັ້ນບໍ່ເຄີຍສິ້ນສຸດຈັກເທື່ອ.

ເບິ່ງ Saints, 1:399–427; “Organizing the Church in Nauvoo,” Revelations in Context, 264–71.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 124:12–21

ເຮົາສາມາດເປັນສານຸສິດຜູ້ທີ່ພຣະຜູ້ເປັນເຈົ້າໄວ້ວາງໃຈໄດ້.

ເຖິງແມ່ນວ່າ ຜູ້ນຳທີ່ສຳຄັນຫລາຍຄົນໄດ້ໜີຈາກສາດສະໜາຈັກໄປໃນຊ່ວງໄລຍະທ້າຍຊຸມປີ 1830 ກໍຕາມ, ແຕ່ສະມາຊິກສ່ວນຫລາຍຂອງສາດສະໜາຈັກຍັງຊື່ສັດຢູ່ຄືເກົ່າ. ໄພ່ພົນທີ່ຊື່ສັດເຫລົ່ານີ້ ແມ່ນລວມທັງຜູ້ທີ່ໄດ້ອົດທົນກັບການທົດລອງຢູ່ໃນເມືອງມີເຊີຣີ ຕະຫລອດທັງຜູ້ທີ່ຫາກໍໄດ້ເຂົ້າຮ່ວມສາດສະໜາຈັກ. ໃນ ຄຳສອນ ແລະ ພັນທະສັນຍາ 124:12–21, ພຣະຜູ້ເປັນເຈົ້າໄດ້ກ່າວຍ້ອງຍໍບຸກຄົນຈຳນວນໜ້ອຍໜຶ່ງໃນບັນດາເຂົາເຈົ້າ. ທ່ານພົບເຫັນຄວາມຮູ້ກ່ຽວກັບການເປັນຜູ້ນຳ ຢູ່ໃນພຣະຄຳຂອງພຣະອົງແນວໃດແດ່? ມີຫຍັງແດ່ກ່ຽວກັບໄພ່ພົນທີ່ຊື່ສັດເຫລົ່ານີ້ ທີ່ດົນໃຈທ່ານໃຫ້ຢາກເປັນຄືເຂົາເຈົ້າ? ທ່ານອາດຢາກໄຕ່ຕອງວິທີທີ່ພຣະຜູ້ເປັນເຈົ້າໄດ້ສະແດງຄວາມຮັກຂອງພຣະອົງຕໍ່ທ່ານນຳອີກ.

ຄຳສອນ ແລະ ພັນທະສັນຍາ 124:22–24, 60–61

ພຣະຜູ້ເປັນເຈົ້າປະສົງໃຫ້ເຮົາຕ້ອນຮັບ ແລະ ຮັບເອົາຄົນອື່ນ.

ເມື່ອຄິດກ່ຽວກັບຄວາມທຸກທໍລະມານທີ່ໄພ່ພົນໄດ້ຜ່ານຜ່າຢູ່ໃນເມືອງມີເຊີຣີ, ເຂົາເຈົ້າອາດຄິດຢາກແຍກຕົວຢູ່ຕາມລຳພັງ ແລະ ບໍ່ຢາກໃຫ້ມີຄົນມາຢ້ຽມຢາມເມືອງນາວູເລີຍ. ໃຫ້ເກັບຄວາມຄິດນີ້ໄວ້ຢູ່ໃນໃຈ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 124:22–24, 60–61. ແມ່ນຫຍັງທີ່ປະທັບໃຈທ່ານກ່ຽວກັບຄຳແນະນຳຂອງພຣະຜູ້ເປັນເຈົ້າ ທີ່ໃຫ້ສ້າງ “ບ້ານພັກ”? (ຂໍ້ທີ 23). ພຣະຄຳຂອງພຣະອົງໄດ້ສິດສອນທ່ານຫຍັງແດ່ກ່ຽວກັບພາລະກິດຂອງສາດສະໜາຈັກຂອງພຣະອົງ? ໃຫ້ໄຕ່ຕອງວິທີທີ່ຄຳແນະນຳເຫລົ່ານີ້ ອາດກ່ຽວຂ້ອງກັບຕົວທ່ານ ແລະ ບ້ານເຮືອນຂອງທ່ານແນວໃດ.

ເບິ່ງວິດີໂອ “A Friend to All,” ChurchofJesusChrist.org ນຳອີກ.

ຄຳສອນ ແລະ ພັນທະສັນຍາ 124:25–45, 55

ພຣະຜູ້ເປັນເຈົ້າບັນຊາເຮົາໃຫ້ສ້າງພຣະວິຫານ ເພື່ອວ່າເຮົາຈະສາມາດໄດ້ຮັບພິທີການທີ່ສັກສິດ.

ມັນໄດ້ມາເຖິງແບບບໍ່ແປກແນວໃດຕໍ່ໄພ່ພົນຍຸກສຸດທ້າຍ ວ່າທັນທີທີ່ເຂົາເຈົ້າໄດ້ຕັ້ງຖິ່ນຖານຢູ່ໃນເມືອງນາວູ, ແລ້ວພຣະຜູ້ເປັນເຈົ້າຈະສັ່ງເຂົາເຈົ້າໃຫ້ສ້າງພຣະວິຫານ—ຄືກັນກັບທີ່ພຣະອົງໄດ້ເຮັດຢູ່ໃນລັດໂອໄຮໂອ ແລະ ໃນລັດມີເຊີຣີ. ທ່ານພົບເຫັນຫຍັງແດ່ຢູ່ໃນ ຄຳສອນ ແລະ ພັນທະສັນຍາ 124:25–45, 55 ທີ່ຊ່ວຍທ່ານໃຫ້ເຂົ້າໃຈເຖິງເຫດຜົນທີ່ພຣະຜູ້ເປັນເຈົ້າໄດ້ກ່າວວ່າ, “ຜູ້ຄົນຂອງເຮົາໄດ້ຖືກບັນຊາຢູ່ສະເໝີໃຫ້ສ້າງ [ພຣະວິຫານ] ແດ່ນາມຂອງເຮົາ”? (ຂໍ້ທີ 39).

ນັບແຕ່ພຣະວິຫານນາວູໄດ້ຖືກສ້າງຂຶ້ນ, ພຣະວິຫານຫລາຍກວ່າ 200 ແຫ່ງກໍໄດ້ຖືກສ້າງຂຶ້ນ ຫລື ຖືກປະກາດ. ປະທານຣະໂຊ ເອັມ ແນວສັນ ໄດ້ສິດສອນວ່າ: “ເຮົາຮູ້ວ່າ ເວລາຂອງເຮົາຢູ່ໃນພຣະວິຫານແມ່ນຈຳເປັນຕໍ່ຄວາມລອດ ແລະ ຄວາມສູງສົ່ງຂອງເຮົາ ແລະ ຂອງຄອບຄົວເຮົາ. … ການໂຈມຕີຂອງຜູ້ປໍລະປັກ ແມ່ນເພີ່ມທະວີຫລາຍຂຶ້ນ, ໃນຄວາມຮຸນແຮງ ແລະ ໃນຫລາຍຮູບແບບ. ການໄປພຣະວິຫານເປັນປະຈຳຂອງເຮົາ ແມ່ນຈຳເປັນຫລາຍກວ່າທີ່ຜ່ານມາ” (“Becoming Exemplary Latter–day Saints,” Ensign ຫລື Liahona, Nov. 2018, 114). ພຣະວິຫານຊ່ວຍທ່ານໃຫ້ສາມາດຕ້ານທານກັບ “ການໂຈມຕີຂອງຜູ້ປໍລະປັກ” ແນວໃດ? ທ່ານຮູ້ສຶກໄດ້ຮັບຄວາມປະທັບໃຈໃຫ້ເຮັດຕາມຄຳແນະນຳຂອງປະທານແນວສັນແນວໃດ?

ເບິ່ງ Church History Topics, “Nauvoo Temple,” ChurchofJesusChrist.org/study/church–history ນຳອີກ.

Joseph Smith at the Nauvoo Temple [ໂຈເຊັບ ສະມິດ ຢູ່ທີ່ພຣະວິຫານນາວູ], ໂດຍ ແກຣີ ອີ ສະມິດ

ຄຳສອນ ແລະ ພັນທະສັນຍາ 124:84–118

ພຣະຜູ້ເປັນເຈົ້າຢາກມອບຄຳແນະນຳບາງຢ່າງສຳລັບຊີວິດຂອງເຮົາ ໃຫ້ແກ່ເຮົາ.

ຂໍ້ທີ 84–118 ແມ່ນເຕັມໄປດ້ວຍຄຳແນະນຳສຳລັບບຸກຄົນໃດໜຶ່ງໂດຍສະເພາະ, ແລະ ຄຳແນະນຳບາງຢ່າງອາດເບິ່ງຄືວ່າ ບໍ່ກ່ຽວຂ້ອງກັບຊີວິດຂອງທ່ານເລີຍ. ແຕ່ທ່ານອາດພົບເຫັນບາງສິ່ງທີ່ທ່ານຢາກໄດ້ຍິນ. ໃຫ້ຄິດທີ່ຈະທູນຖາມພຣະຜູ້ເປັນເຈົ້າວ່າ ຂ່າວສານຂໍ້ໃດທີ່ພຣະອົງມີໃຫ້ສຳລັບທ່ານ ຢູ່ໃນຂໍ້ເຫລົ່ານີ້, ແລະ ໃຫ້ສະແຫວງຫາການຊີ້ນຳຈາກພຣະວິນຍານ ເພື່ອຊອກຫາມັນ. ແລ້ວ ໃຫ້ຕັດສິນໃຈວ່າທ່ານຈະເຮັດ ແລະ ປະຕິບັດຕາມສິ່ງໃດ. ຍົກຕົວຢ່າງ, ການເປັນຄົນຖ່ອມຕົວຫລາຍຂຶ້ນອາດຊ່ວຍທ່ານໃຫ້ໄດ້ຮັບພຣະວິນຍານແນວໃດ? (ເບິ່ງ ຂໍ້ທີ 97).

ທ່ານອາດໄຕ່ຕອງກ່ຽວກັບຄຳແນະນຳຢ່າງອື່ນທີ່ພຣະຜູ້ເປັນເຈົ້າໄດ້ມອບໃຫ້ແກ່ທ່ານນຳອີກ. ທ່ານປະຕິບັດຕາມຄຳແນະນຳນັ້ນແນວໃດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 124:2–11.ຖ້າຫາກພຣະຜູ້ເປັນເຈົ້າໄດ້ບອກຄອບຄົວຂອງທ່ານໃຫ້ “ປະກາດເຖິງພຣະກິດຕິຄຸນຂອງເຮົາດ້ວຍຄວາມໜັກແໜ້ນ” ຕໍ່ “ກະສັດທັງປວງຂອງໂລກ” (ຂໍ້ທີ 2–3), ແລ້ວພວກທ່ານຈະປະກາດສິ່ງໃດ? ໃຫ້ຄິດທີ່ຈະເຮັດນຳກັນ, ແລະ ເຊື້ອເຊີນສະມາຊິກໃນຄອບຄົວໃຫ້ແນະນຳຄວາມຈິງຂອງພຣະກິດຕິຄຸນ ທີ່ເຂົາເຈົ້າຢາກລວມໄວ້ຢູ່ນຳ.

ຄຳສອນ ແລະ ພັນທະສັນຍາ 124:15.ຄວາມຊື່ສັດໝາຍຄວາມວ່າແນວໃດ? ເປັນຫຍັງພຣະຜູ້ເປັນເຈົ້າຈຶ່ງນັບຖືຄວາມຊື່ສັດ? ມີຕົວຢ່າງຂອງຄວາມຊື່ສັດໃດແດ່ທີ່ຄອບຄົວຂອງທ່ານໄດ້ເຫັນ? (ເບິ່ງ ສຳລັບຄວາມເຂັ້ມແຂງຂອງຊາວໜຸ່ມ, 19 ນຳອີກ.)

ຄຳສອນ ແລະ ພັນທະສັນຍາ 124:28–29, 40–41, 55.ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບເຫດຜົນທີ່ພຣະຜູ້ເປັນເຈົ້າບັນຊາເຮົາໃຫ້ສ້າງພຣະວິຫານ? ຄອບຄົວຂອງທ່ານອາດມັກແຕ້ມຮູບພຣະວິຫານ ຫລື ສ້າງພຣະວິຫານແຫ່ງໜຶ່ງດ້ວຍແທ່ງໄມ້ ຫລື ດ້ວຍວັດຖຸຢ່າງອື່ນ. ເມື່ອພວກທ່ານເຮັດແນວນັ້ນ, ພວກທ່ານສາມາດສົນທະນາເຖິງເຫດຜົນທີ່ພວກທ່ານຂອບຄຸນ ທີ່ເຮົາມີພຣະວິຫານໃນທຸກວັນນີ້ ແລະ ເຫດຜົນທີ່ເຮົາຕ້ອງນະມັດສະການຢູ່ໃນນັ້ນເປັນປະຈຳ.

ຄຳສອນ ແລະ ພັນທະສັນຍາ 124:91–92.ຄອບຄົວຂອງທ່ານຈະໄດ້ຮັບຜົນປະໂຫຍດຈາກການສົນທະນາກ່ຽວກັບປິຕຸພອນບໍ? ສະມາຊິກໃນຄອບຄົວຜູ້ທີ່ໄດ້ຮັບປິຕຸພອນແລ້ວ ສາມາດແບ່ງປັນກ່ຽວກັບວ່າ ເຂົາເຈົ້າຮູ້ສຶກແນວໃດທີ່ໄດ້ຮັບມັນ ແລະ ມັນໄດ້ເປັນພອນໃຫ້ແກ່ເຂົາເຈົ້າແນວໃດ. ພວກທ່ານກໍຍັງສາມາດທົບທວນ “Patriarchal Blessings” (Gospel Topics, topics.ChurchofJesusChrist.org ນຳອີກ).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.

ຮູບພາບ

ຮູບເຄື່ອງໝາຍສຽງຂອງການຟື້ນຟູ

ສຽງຂອງການຟື້ນຟູ

ສະມາຄົມສະຕີສົງເຄາະ

ໃນປີ 1842, ຫລັງຈາກສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນຢູ່ໃນເມືອງນາວູ, ລັດອິລິນອຍ, ສາດສະດາ ໂຈເຊັບ ສະມິດ ໄດ້ກ່າວວ່າ, “ສາດສະໜາຈັກຈະບໍ່ສົມບູນແບບຈົນກວ່າໄດ້ຈັດຕັ້ງກຸ່ມຜູ້ຍິງຂຶ້ນ.”¹ ກໍຄ້າຍຄືກັນນີ້, ການສຶກສາເລື່ອງການຟື້ນຟູຂອງສາດສະໜາຈັກຂອງພຣະຜູ້ເປັນເຈົ້າ ແລະ ຖານະປະໂລຫິດຂອງພຣະອົງ (ເບິ່ງ ຄຳສອນ ແລະ ພັນທະສັນຍາ 107) ຈະບໍ່ສົມບູນແບບ ຈົນກວ່າມັນຮ່ວມດ້ວຍການສຶກສາເລື່ອງສະມາຄົມສະຕີສົງເຄາະ, ຕົວມັນເອງເປັນ “ການຟື້ນຟູຕາມແບບແຜນຂອງສະໄໝບູຮານ” ຂອງກຸ່ມຜູ້ຍິງທີ່ເປັນສານຸສິດຂອງພຣະເຢຊູຄຣິດ.²

ອີລາຍຊາ ອາ ສະໂນ ມີບົດບາດທີ່ສຳຄັນໃນການຟື້ນຟູ. ນາງໄດ້ຢູ່ນຳຕອນສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນເປັນເທື່ອທຳອິດ, ໃນຖານະເລຂາຂອງສະມາຄົມ, ແລະ ໄດ້ຈົດຂໍ້ຄວາມລະຫວ່າງການປະຊຸມ. ນາງໄດ້ເປັນພະຍານດ້ວຍຕົວເອງວ່າ ສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນ “ຕາມແບບແຜນຂອງຖານະປະໂລຫິດ.”³ ຢູ່ຂ້າງລຸ່ມນີ້ແມ່ນຖ້ອຍຄຳຂອງນາງ, ທີ່ໄດ້ບັນທຶກໄວ້ຂະນະທີ່ນາງຮັບໃຊ້ເປັນປະທານສະມາຄົມສະຕີສົງເຄາະສາມັນ, ເພື່ອຊ່ວຍເອື້ອຍນ້ອງຂອງນາງໃຫ້ເຂົ້າໃຈວຽກງານແຫ່ງສະຫວັນ ທີ່ໄດ້ຖືກມອບໃຫ້ແກ່ທິດາແຫ່ງພັນທະສັນຍາຂອງພຣະເຈົ້າ.

ເພື່ອຮຽນຮູ້ຕື່ມອີກກ່ຽວກັບວິທີທີ່ສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນ, ໃຫ້ເບິ່ງ Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.

ອີລາຍຊາ ອາ ສະໂນ

ຮູບພາບ

ອີລາຍຊາ ອາ ສະໂນ, ໂດຍ ຫລຸຍ ແຣມສີ

“ເຖິງແມ່ນວ່າຊື່ [ສະມາຄົມສະຕີສົງເຄາະ] ອາດເປັນຊື່ຕາມສະໄໝໃໝ່, ແຕ່ທີ່ມາຂອງສະຖາບັນແມ່ນເລີ່ມຕົ້ນແຕ່ສະໄໝບູຮານພຸ້ນ. ພວກເຮົາໄດ້ຖືກບອກໂດຍ [ໂຈເຊັບ ສະມິດ], ວ່າອົງການດຽວກັນນີ້ ມີຢູ່ໃນສາດສະໜາຈັກໃນສະໄໝບູຮານ, ກ່າວເຖິງຢູ່ໃນສານຫລາຍສະບັບ ຊຶ່ງບັນທຶກຢູ່ໃນພຣະຄຳພີໃໝ່, ໂດຍໃຊ້ຄຳວ່າ, ‘ສຸພາບສະຕີທີ່ຖືກເລືອກໄວ້’ [ເບິ່ງ 2 ໂຢຮັນ 1:1; ຄຳສອນ ແລະ ພັນທະສັນຍາ 25:3].

“ນີ້ແມ່ນອົງການທີ່ບໍ່ສາມາດຕັ້ງຢູ່ປາດສະຈາກຖານະປະໂລຫິດ, ຈາກຄວາມຈິງທີ່ວ່າ ມັນສືບທອດສິດອຳນາດ ແລະ ອິດທິພົນທັງໝົດຈາກແຫລ່ງນັ້ນ. ເມື່ອຖານະປະໂລຫິດໄດ້ຖືກເອົາໄປຈາກໂລກ, ສະຖາບັນນີ້ ຕະຫລອດທັງລະບຽບທີ່ແທ້ຈິງເພີ່ມເຕີມທັງໝົດຂອງສາດສະໜາຈັກຂອງພຣະເຢຊູຄຣິດຢູ່ເທິງໂລກ, ໄດ້ສູນຫາຍໄປ. …

“ໂດຍທີ່ໄດ້ຢູ່ກັບອົງການຂອງ ‘ສະມາຄົມສົງເຄາະຂອງແມ່ຍິງແຫ່ງນາວູ,’ … ແລະ ໂດຍທີ່ມີປະສົບການຢ່າງຫລວງຫລາຍຢູ່ໃນສະມາຄົມນັ້ນ, ບາງທີຂ້າພະເຈົ້າອາດສາມາດສື່ສານແນວຄິດສອງສາມຢ່າງ ທີ່ຈະຊ່ວຍທິດາຂອງຊີໂອນໄດ້ ໃນການກ້າວອອກໄປເພື່ອເຂົ້າຮ່ວມເຮັດໜ້າທີ່ອັນສຳຄັນຫລາຍນີ້, ຊຶ່ງເຕັມໄປດ້ວຍໜ້າທີ່ຮັບຜິດຊອບໃໝ່ ແລະ ຢ່າງຫລວງຫລາຍ. ຖ້າລູກສາວ ແລະ ແມ່ຄົນໃດໃນອິດສະຣາເອນຮູ້ສຶກວ່າຂອບເຂດຂອງຕົນຈຳກັດຫລາຍ, ບັດນີ້ເຂົາເຈົ້າຈະພົບໂອກາດຢ່າງຫລວງຫລາຍສຳລັບພະລັງ ແລະ ຄວາມສາມາດທຸກຢ່າງ ທີ່ຈະເຮັດຄວາມດີ ຊຶ່ງເຂົາເຈົ້າໄດ້ຮັບໂດຍກົງ. …

ສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນຢູ່ໃນຫ້ອງຊັ້ນເທິງຂອງຮ້ານຄ້າດິນຈີ່ສີແດງ.

“ຖ້າຫາກເກີດມີຄຳຖາມຢູ່ໃນໃຈວ່າ ແມ່ນຫຍັງຄືເປົ້າໝາຍຂອງສະມາຄົມສົງເຄາະຂອງແມ່ຍິງ? ຂ້າພະເຈົ້າຈະຕອບວ່າ—ເພື່ອເຮັດຄວາມດີ—ເພື່ອໃຊ້ຄວາມສາມາດທັງໝົດທີ່ພວກເຮົາມີ ໃນການເຮັດຄວາມດີ, ບໍ່ພຽງແຕ່ເພື່ອໃຫ້ການສົງເຄາະແກ່ຄົນຍາກຈົນເທົ່ານັ້ນ ແຕ່ເພື່ອຊ່ວຍຈິດວິນຍານໃຫ້ລອດນຳອີກ. ການຮ່ວມພະລັງຈະສຳເລັດຈົນນັບບໍ່ຖ້ວນ ຫລາຍກວ່າຄວາມສຳເລັດທີ່ມີປະສິດທິພາບເປັນສ່ວນບຸກຄົນ. …

“ໃນການບໍລິຫານແກ່ຄົນຍາກຈົນ, ສະມາຄົມສົງເຄາະຂອງແມ່ຍິງມີໜ້າທີ່ຢ່າງອື່ນອີກທີ່ຈະປະຕິບັດ ຫລາຍກວ່າພຽງແຕ່ການສົງເຄາະຄວາມຕ້ອງການທາງຮ່າງກາຍເທົ່ານັ້ນ. ຄວາມຍາກຈົນຂອງຈິດໃຈ ແລະ ຄວາມປ່ວຍໂຊຂອງຫົວໃຈ, ກໍຕ້ອງການ ການດູແລຄືກັນ; ແລະ ຫລາຍເທື່ອຄຳເວົ້າທີ່ອ່ອນໂຍນ—ຄຳແນະນຳສອງສາມຄຳ, ຫລື ແມ່ນແຕ່ການຈັບມືດ້ວຍຄວາມອົບອຸ່ນ ແລະ ດ້ວຍຄວາມຮັກໄຄ່ ຈະດີກວ່າ ແລະ ມີຄຸນຄ່າຫລາຍກວ່າຖົງຄຳ. …

“ເມື່ອໄພ່ພົນມາເຕົ້າໂຮມກັນຈາກແດນໄກ, ແປກໜ້າຕໍ່ທຸກຄົນ, ແລະ ອ່ອນໄຫວຕໍ່ຄຳຕົວະຂອງຄົນຫລອກລວງທີ່ຈະພາໄປທາງທີ່ບໍ່ດີ, ສະມາຄົມສະຕີ [ສົງເຄາະ] ຈະຖືກກະຕຸ້ນໃຫ້ດູແລ [ເຂົາເຈົ້າ], ແລະ ແນະນຳເຂົາເຈົ້າໃຫ້ເຂົ້າຮ່ວມສະມາຄົມ ທີ່ຈະຫລໍ່ຫລອມ ແລະ ສົ່ງເສີມເຂົາເຈົ້າ, ແລະ ເໜືອສິ່ງອື່ນໃດ ເພື່ອໃຫ້ຄວາມເຂັ້ມແຂງແກ່ເຂົາເຈົ້າໃຫ້ມີສັດທາໃນພຣະກິດຕິຄຸນ, ແລະ ໃນການເຮັດແນວນັ້ນ, ສະມາຄົມອາດເປັນເຄື່ອງມືໃນການຊ່ວຍກູ້ຫລາຍຄົນ.

“ມັນອາດຕ້ອງໃຊ້ຫລາຍເຫລັ້ມເພື່ອບັນຍາຍໜ້າທີ່, ສິດທິພິເສດ ແລະ ໜ້າທີ່ຮັບຜິດຊອບ ທີ່ມາກັບຂອບເຂດຮັບຜິດຊອບຂອງສະມາຄົມ. … ໃຫ້ລົງມືປະຕິບັດ (ພາຍໃຕ້ການຊີ້ນຳຂອງອະທິການຂອງທ່ານ) ແບບໃຈເຢັນໆ, ຢ່າງຈິງໃຈ, ຢ່າງມີພະລັງ, ຢ່າງເປັນອັນໜຶ່ງດຽວກັນ ແລະ ດ້ວຍການອະທິຖານ, ແລ້ວພຣະເຈົ້າຈະຕອບແທນຄວາມພະຍາຍາມຂອງທ່ານດ້ວຍຄວາມສຳເລັດຜົນ.”⁴